ВТБ Бірыңғай лигасы 2020/2021
Астана
Астана
ВТБ Бірыңғай Лигасы, Тұрақты біріншілік
01.03.2021, 19:30 Дс
Арена: «Сары-Арқа» велотрегі (Астана)
61:77
Негізгі уақыт
23:18 5:25 15:21 18:13
Ойын нөмірі: RS-109
Көрермен: 0
Калев
Таллинн

«Астана» көктемді өз алаңында «Калевпен» қарсы алады

28.02.2021, 18:00    Просмотров: 217
Источник: Баспасөз қызметі
Автор:

«Астана» баскетбол клубының ойыншылары 2021 жылғы Азия кубогының іріктеу додасындағы шешуші ойындарды сәтті өткізіп, Ұлттық құрама сапынан оралды. Біздің жігіттермен бірге Қазақстанға үлкен баскетбол да қайта оралды. 1 наурыз күні олар Астанада, ВТБ Бірыңғай лигасы аясында, Эстонияның «Калев» командасымен жауапты ойын өткізеді. Кездесу дүйсенбі күні, 1 наурызда өтеді. Басталуы – Астана уақытымен 19:30-да.  

НАЗАР АУДАРЫҢЫЗДАР! — Коронавирус нәубеті салдарынан, Астанаға енгізілген шектеу шараларына байланысты матч көрерменсіз бос трибуналарда өтеді.​

«Калев» – Эстонияның ерлер арасындағы кәсіпқой баскетбол клубы, Таллинн қаласынан. 1920 жылы құрылған.

Жетістіктері:

  • КСРО чемпионы − 1991.
  • Эстония чемпионы − 2000, 2005, 2006, 2009, 2011, 2012, 2013, 2014, 2016-2019
  • Эстония чемпионатының күміс жүлдегері – 2015
  • Эстония кубогының жеңімпазы − 2005-2008, 2016, 2017
 

Калев баскетбол клубы 2020/2021

«Астана» биылғы маусымда эстондармен бірінші рет 2020 жылы 5 қарашада кездесіп, онда біздің жігіттер Таллиннен жеңісті өңгеріп қайтқан. Содан бері эстон ұжымы 11 матч өткізді. Қазақстан командасымен өткен ойыннан кейін “Калев” биылғы маусымдағы бірінші жеңісіне қол жеткізіп, өз алаңында “Цмоки-Минск” жігіттерін тізе бүктірген. Одан кейін үш рет ұтылды – түзде УНИКСтен, “Нижний Новгородтан” және “Автодордан”. Сонымен қатар, өз алаңында “Зенитке” де есе жіберіп алды. Содан соң “Калев” екінші рет жеңіске жетіп, тағы да “Цмоки-Минск” командасынан басым түсті. Бірақ бұл жолы – Минскіде. Бұдан кейін “Зелена Гура” және “Енисей” командаларымен өткен матчтарда да жеңіліске ұшырады. 7 ақпан күні эстон ұжымы көпшілікті қайран қалдырып, ЦСКАдан түзде жеңісті жұлып алды. “Калев” соңғы екі ойынын Пермде өткізіп, онда жергілікті ПАРМА командасымен додаға түсті, ал біреуінде шартты түрде алаң иесі болды. Алайда екі матчта да пермдіктер жеңіске жетті.

Турнир кестесіндегі жағдай:

“Астана” да, “Калев” те әзірше плей-офф аймағынан – біршама алыста. Эмиль Райковичтің командасы он бес ойында төрт рет қана жеңіске жетіп, 10-орында тұр. Ал эстондар екі саты төмен орналасқан, олар 15 ойынның үшеуінде жеңіске жетті. Қазір турнир кестесінің төменгі жағы – ығы-жығы, командалар бір-бірімен «иық тіресіп» тұр. Яғни алдағы ойынның нәтижесі олардың жағдайын біршама өзгертуі мүмкін. Егер “Астана” жеңіске жетсе, 10-орында қалады, бірақ жеңісі мен жеңілісінің көрсеткіші түзеле бастайды. Бұл жағдайда “Калев” те өз орнында қалады, бірақ “Енисей” мен “Астанадан” құйрық үзіп қала бастайды. Ал егер эстондар жеңіске жетсе, онда “Астана” бір саты төмен сырғып, өзара матчтардың нәтижелеріне байланысты “Енисейді” тағы да алдына шығарып алады. Сонымен қатар, қонақтар жеңіп кетсе, біздің жігіттер нәтижелері бойынша олармен теңеседі. Айта кету маңызды, биылғы маусымда эстондардың еншісінде бір техникалық жеңіліс бар. Сондықтан олар жеңіске жетсе де, олардың бір ойындары кем, бәрібір он екінші орында қалады.

Команда құрамындағы өзгерістер:

Желтоқсанда Эстонияның “Калев” командасы америкалық қорғаушы Гейб Биллермен арадағы келісімшартты бұзып, оның орнына сол күні-ақ серб қорғаушысы Брано Джукановичті алып, келісімшартқа отырған. Алайда ол да эстондардың сапында ұзақ тұрмады. Әрі 26 ақпан күні команда сапынан кетіп қалды. Желтоқсанда “Калевтің” құрамына былтырғы маусымдағы көшбасшыларының бірі, эстон шабуылшысы Янари Йоэссар қайта оралды. Оның карьерасы негізінен Эстонияда өтіп жатыр. 2015 жылдан бері ол “Рапла”, “Раквере Тарвас” және “Университет Тарту” сынды эстон командалары сапында ойнады. Ал 2017 жылдан бері “Калевтің” намысын қорғап келеді. Рас, былтырғы маусымды ол Испанияның “Канариас” командасы сапында бастады, бірақ маусым барысында эстон ұжымына қайтып келді. Биылғы маусымда да тура солай болды деуге болады, тек Янари маусымды Испанияның “Манреса” командасында бастады. Жалпы, желтоқсан эстондардың ростерінде өзгеріске толы болды. Жаңа жыл қарсаңында “Калев” өз құрамын тағы бір жаңа ойыншымен, атап айтқанда,  америкалық шабуылшы Морис Кемппен нығайтқан болатын. Кемп өз карьерасын Венгрияның “Альба Фехервар” командасы сапында бастап, одан кейін NBA Жетілу лигасындағы “Кантон Чардж” командасы сапында бір маусым ойнаған. Одан кейін ол Грекияның “Кавала”, Эстонияның “Рапла”, Ливанның “Тадамон Зук”, Аргентинаның “Орбас Баскет” және Испанияның “Фуэнлабрада” командаларында өнер көрсетті. Биылғы маусымды Морис Уругвайдың “Насиональ” командасы құрамында бастаған.

Әрине, осы ретте “Астана” командасы сапындағы өзгерісті де атап өткен ләзім. Орталық шептегі латыш ойыншысы Мартиньш Мейерс біздің команда сапынан кетіп, оның орнына америкалық орталық шеп ойыншысы Эрик Бакенер келді. Ол “Калев” клубымен өтетін матчта “Астана” сапындағы алғашқы ойынын өткізеді.

Команда көшбасшылары:

Команданың қазіргі көшбасшысы – Маркус Кин. Оның нәтижелері тиімділігі жағынан да, нәтижелілігі жағынан да бәрінен асып тұр. Сонымен қатар, команданың жаңа ойыншысы Морис Кемпті, әрі шартты түрдегі жаңа ойыншысы Янари Йоэсаарды атап өтуге тиіспіз. Екеуі де тез арада ұжымға судай батып, тастай сіңіп, команданың көшбасшыларына айнала білді. Сондай-ақ Девин Томас пен Чавон Льюис негізгі құрам ойыншылары болып есептеледі. Рас, Чавон биылғы маусымда небәрі төрт ойын ғана өткізді. Бірақ Пермдегі екі ойынның бірінде ойнады. Сонымен қатар, “Калевтің” жаттықтырушылары Мартин Дорбек, Крегор Хермет, Стэн Сокк, Танел Курбас сынды эстондар мен латыш Янис Кауфманисті алаңға жиі шығарып отырады.
 


Матч дүйсенбі күні, 1 наурызда Нұр-Сұлтандағы «Сарыарқа» республикалық велотрегі аренасында өтеді. Басталуы – астана уақытымен 19:30-да. Матчтың онлайн-трансляциясы біздің сайтымыздың Ойын орталығы бөлімінде жүргізіледі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» өз алаңында «Калевке» есе жіберіп алды

02.03.2021, 10:00    Просмотров: 191
Источник: Баспасөз қызметі
Автор:

«Астана» баскетбол клубы Эстонияның «Калева» клубымен өткен матчтың алғашқы кезеңінде өрнекті ойын үлгісін көрсеткенімен, екінші онминуттықта кежегесі кейін тартып, бұл матч тағдырына көп әсер етті.

Ортада лақтырылған допты қонақтар іліп әкеткенімен, олар бірінші шабуылдарында есеп аша алмады. Бірақ эстондар екінші мүмкіндіктерін мүлт жіберген жоқ. “Астана” көп күттірмей, бірден жауап қатты – Майкл Томпсон осы матчтағы алғашқы үш ұпайлық соққыны сәтті орындап, біздің команданы алға шығарды. Бұдан кейін «Калев» тағы да алға қарай лап қойды, бірақ олардың ұмтылысын астана командасының жаңа ойыншысы Эрик Бакнер тойтарып, өзі «Астана» сапындағы және ВТБ Бірыңғай лигасындағы алғашқы ұпайларын еншіледі. Содан соң нәтижелі шабуылдарымызбен құйындай соқтық – Адонис Томас, Оярс Силиньш және Майкл Томпсон доп салды. Ал “Калевтің” жаттықтырушылары құрамы тайм-аут алуға мәжбүр болып, Қазақстан командасының қарқынны басуға тырысты. Әрі бұл ойлары жартылай болса да, жүзеге асты. Эстондар есеп айырмасын жеті ұпайдан үш ұпайға дейін қысқартты. Алайда “Астана” қонақтарының өздерін қуып жетулеріне мүмкіндік берген жоқ. Оның негізгі себебі Оярс Силиньштің көсіле сілтеуі болды. Ол әуелі доға сыртынан мергендік танытып, одан кейін айып сызығынан шығыршықты екі рет дәл көздеді. Бірінші кезеңнің аяғына дейін осы матчтағы алғашқы ұпайларын Джеремайя Хилл, Девин Марбл және Асқар Майдекин де еншіледі. Ал есеп айырмасы жеті ұпай маңайында тербеліп тұрды. Бірақ кезеңнің соңғы секундтарында біздің жігіттер өзекті өртеп, доптан айырылып қалды да, қонақтар оны мүлт жібермей, бірінші кезеңнің нүктесін қойды – 23:18, алда алаң иелері. Сөйтіп, бірінші кезеңде “Астананың” ұпай еншілеу көрсеткіші айтарлықтай болды. Бірақ екінші кезеңде, дәл осы көрсеткіш бойынша елорда ұжымы ауызды қу шөппен сүртті. “Калев” бір минуттан сәл ғана асатын уақыт ішінде таразы басын теңестірді. Сондықтан Эмиль Райкович бірден тайм-аут алуға мәжбүр болды. Өкінішке қарай, бұдан нәтиже шықпады. Эстондар алға қарай ентелей берді. “Астананың” екінші онминуттықтағы бірінші ұпайларын Майкл Томпсон еншілеп, кезеңнің төртінші минутында үш ұпайлық соққысын «нысанаға» дөп түсірді. Алайда бұл да алаңдағы жағдайға өзгеріс енгізе алмады. “Калев” ойын тізгінін уысынан шығармай, ал “Астана” қонақтардың шығыршығына доп сала алмай, пұшайман болды. Матчтың бірінші жартысының аяқталуына үш минут қалғанда, есеп айырмасы екі таңбалы санға жетті. Одан кейін, лезде 15 ұпайдан да асып кетті. Екінші кезеңнің аяқталуына екі минуттан да аз уақыт қалғанда, Томпсон флоутер орындады. Бұл кездесудің бірінші жартысындағы соңғы нәтижелі әрекет болды. Ал есеп – 28:43.

Майкл Томпсон

“Астана” ойынды тәп-тәуір бастағанымен, екінші кезеңде небәрі бес ұпай ғана еншіледі, ал өз шығыршығына 25 ұпай өткізіп алды. Үзіліс кезінде жаттықтырушыла құрамы ойын өрнегіне түзетулер енгізді, ал 15 ұпай есеп айырмасы әлі де еңсе түсірерліктей емес еді. Үшінші кезеңде есепті Джеремайя Хилл ашқан. Бірақ біздің жігіттер қонақтардың үш бірдей нәтижелі шабуылынан көз жазып қалды. Біздің команданы шабуылда ғана емес, қоғаныстаста да ойын өрнегі үйлеспей қойды. Оған “Калевтің” тағы да үш шабуылынын нәтижелі аяқтауы дәлел бола алады. Осылай, “Астана” жиырма ұпайдан да артық есеп айырмасымен ұтылып жатты. Кезең соңына дейін біздің команда сапынан Майкл Томпсон, Джеремайя Хилл және Девин Марбл ұпай еншіледі. Әйтсе де, командалар арасы жиырма ұпайдан артық шамада сақталып тұрды. Асқар Майдекин қонақтардың қорғанысын бұзып өтіп, үшінші кезеңдегі есепті түйіндеді – 43:64. Жиырма ұпайдан артық есеп айырмасы – бұл соңғы кезең үшін тым көп, әрі мұндай жағдайда оларды енді қуып жету өте қиын. Оның үстіне, “Калев” тізгін тартпай, үстемдік құрып, соңғы кезеңдегі бірінші ұпайларды да солар еншіледі. Майкл Томпсон мен Девин Марбл салған доптар есеп айырмасын сәл де болса қысқарта түсті. Ал “Калевтің” нәтижелі бір шабуылынан соң Максим Марчук біздің команданың екпінді серпілісін бастады. Оны Майкл Томпсон қолдап, доға сыртынан екі рет мергендік танытты. Джеремайя Хилл орындаған айып соққысынан кейін есеп айырмасы 13 ұпайға дейін қысқарды. Ал матчтың аяқталуына әлі төрт минут уақыт қалған. Доп додасы мейілінше қыза түсті. Алайда “Астана” осы қарқынын ұстап тұра алмады, ал келесі екі минутта ойын тізгіні қайтадан қонақтарға көшті. Олар есеп айырмасын қайтадан жиырма ұпайға жеткізіп, былайша айтқанда, жеңіске жеткендеріне қуана бастады. Соңғы бір жарым минутта тек Майкл Томпсон ұпай еншілеп отырды да, төрт рет айып сызығынан шығыршықты дәл көздеді – 61:77 (23:18, 5:25, 15:21, 18:13).

Салдары: “Астана”әрбір жеңіліснен кейін плей-офқа шығу мүмкіндігінен айырыла түсіп, үздік сегіздіктен алшақтап барады. Бүгінгі ойыннан кейін біздің команда 11-орынға сырғып, “Енисей” командасын алдына шығарып алды.Қазір үш ұжымның, атап айтқанда, “Енисей”, “Астана” және “Калев” командаларының жеңістері мен жеңілістерінің саны – бірдей. Красноярск командасы “Астанадан” екеуара матчтардың нәтижелеріне байланысты жоғары тұр. Ал “Калев” аталған екі ұжымнан да ұпайларына байланысты төмен тұр. Өйткені, биылғы маусымда олардың техникалық жеңілісі бар.
 


Ең көп ұпай еншілегендер:

  • «Астана» – Майкл Томпсон бүгін өз мойнына көп жүк артып, команданың нағыз көшбасшысы болды – 24 ұпай, 5 рет доп қағып алды, 4 пас және 3 рет допты тартып әкетті. Ал Джеремайя Хилла 10 ұпай жинап, 4 рет доп қағып алды, 3 пас беріп, блокшот қойды. Оярс Силиньштің еншісінде – 10 ұпай және 2 рет доп қағып алды. Ал Эрик Бакнердің дебюті біз күткендей табысты болмады – 2 ұпай. бірақ 7 рет доп қағып алды.
  • «Калев» – Янари Йоэсаар мен Чавон Льюис қонақтардың жеңісінің негізін қалаушылар болды. Янари – қомақты дабл-дабл – 17 ұпай және 18 рет доп қағып алды, 2 пас, 4 рет допты тартып әкетті. Чавон – 21 ұпай және 6 пас. Маркус Кин – 13 ұпай, 6 рет доп қағып алды, 3 пас және 3 рет допты тартып әкетті.


«Астананың» бас бапкері Эмиль Райкович:
— «Калевті» жеңісімен құттықтаймын. Олар бүгін үздік болды. Қарсыласымыз қайтқан допты қағып алуда үстемдік құрды, бұл олардың құлшыныстары мен ынталарының жоғары екендігін көрсетті. Біз спорттық бабымызда болмадық, қайтқан доп үшін таласып, жанкештілік танытпадық. Өз алаңымызда 61 ұпай ғана еншілеп, жеңіске жетуді ойлау – өте қиын. Сондықтан бізге әрі қарай не істеу керек екендігін ойлау керек.

«Калевтің» бас бапкері Робертс Штельмахерс:
— Команданың барлық ойыншыларына алғыс айтқым келеді, мен ойын нәтижесіне өте ризамын. Бұл біраз үзілістен кейінгі тамаша жеңіс болды. Бүгінгі матчтағы есеп айырмасы өз алаңымызда ұтылып қалған «–7» есесін қайтаруға мүмкіндік берді. Сондықтан біз бұл нәтижеге өте ырзамыз.
 


Келесі матч: Енді Эмиль Райковичтің командасы ВТБ Бірыңғай лигасы аясында «Нижний Новгородпен» сырт алаңда өтетін ойынға дайындалады. Бұл кездесу алдағы демалыс күні, яғни 7 наурызда болады.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құрылған жылы: 1920 Клубтық түстері: ақ, көк
Мемлекет: Эстония Арена: Kalev Sports Hall
Қала: Таллинн Сайт: www.bckalev.ee

Сипаттамасы

«Калев» – Эстонияның ерлер арасындағы баскетбол клубы, Таллинн қаласынан, 1920 жылы құрылған. ВТБ Бірыңғай лигасынан бөлек, Эстония Чемпионатында бақ сынайды.
    
Жетістіктері:
  • КСРО чемпионы − 1991
  • Эстония Чемпионатының жеңімпазы − 2000, 2005, 2006, 2009, 2011, 2012, 2013, 2014, 2016-2019, 2021
  • Эстония Чемпионатының күміс жүлдегері – 2015
  • Эстония Кубогының жеңімпазы − 2005-2008, 2016, 2017, 2020

Команданың жалпы суреті

Калев