ВТБ Бірыңғай лигасы 2020/2021
Астана
Астана
ВТБ Бірыңғай Лигасы, Тұрақты біріншілік
05.12.2020, 15:00 Сн
Арена: «Сары-Арқа» велотрегі (Астана)
69:79
Негізгі уақыт
15:20 20:21 14:20 20:18
Ойын нөмірі: RS-53
Көрермен: 0
Пари Нижний Новгород
Нижний Новгород

ВТБ Бірыңғай лигасында бір ай ойнамаған «Астана» «Нижний Новгородты» қабылдайды

04.12.2020, 10:00    Просмотров: 335
Источник: Баспасөз қызметі
Автор:

«Астана» ВТБ Бірыңғай лигасында тұп-тура бір ай ойын өткізген жоқ. Осы уақыт аралығында біздің команда Ұлттық лигада 6 матч өткізіп, Қазақстан кубогын жеңіп алды. «Нижний Новгород» командасымен өтетін ойын ВТБ Бірыңғай лигасының биылғы маусымында, өз алаңымызда, ысқырығы безілдейтін екінші матч қана болады. Ол 5 желтоқсан күні, Нұр-Сұлтанда, «Сарыарқа» республикалық велотрегі аренасында өтеді. Басталуы – астана уақытымен 15:00-де.

НАЗАР АУДАРЫҢЫЗДАР! — Матч көрерменсіз, бос трибуналарда өтеді.


«Нижний Новгород» — Ресейдің ерлер арасындағы кәсіпқой баскетбол клубы, Нижний Новгород қаласынан, 2000 жылы құрылған. Биыл ВТБ Бірыңғай лигасынан бөлек FIBA Чемпиондар лигасында өнер көрсетеді.

Жетістіктері:

  • Ресей Суперлигасының «Б» дивизионындағы чемпионы – 2010
  • Ресей кубогының финалына шыққан – 2011, 2018, 2019
  • ВТБ Бірыңғай лигасының күміс жүлдегері – 2013/14
  • Ресей чемпионатының күміс жүлдегері – 2013/14

Команда құрамы:

Нижний Новгород ұжымы былтырғы маусыммен салыстырғанда легионерлерін толықтай өзгертті. Даррал Уиллис, Брендон Браун, Терелл Паркс және Майкл Дженкинс сынды америкалық көшбасшылары команда сапынан кетті. Ресейлік ойыншыларынан Павел Антиповпен пен Георги Жбанов келісімшарттарын ұзартқан жоқ, олар Қазанның УНИКС-іне ауысып кетті.

Нижний Новгород баскетбол клубы 2020/2021

Сегіз ресейлік ойыншы “Нижний Новгородпен” өз келісімшарттарын ұзартты. Олар – негізгі құрамда ойнайтын Артем Комолов, Антон Астапкович, Евгений Бабурин, Иван Стребков және Александр Ганькевич, сонымен қатар, Сергей Торопов пен Александр Чадов, сондай-ақ жас ойыншы Михаил Беленицкий. Биылғы маусымда “НН” құрамына бірден төрт жаңа легионер қосылды. Бірақ олардың біреуі бірде-бір ойын өткізбеген күйі командадан кетіп қалды. Ол – америкалық ауыр шабуылшы, былтыр ғана университет командасында ойнаған Нейт Сестина. Францияның орталық шеп ойыншысы Александре Гаврилович былтырғы маусымды да ВТБ Бірыңғай лигасында өткізіп, “Цмоки Минск” командасы сапында ойнаған. Оған дейін кәсіби тұрғыда Францияның “Роан”, “Эрмин Нант” және “АЛМ Эврё” командаларында, сондай-ақ Болгарияның “Балкан” командасы сапында өнер көрсеткен. Американың ойын үйлестіруші қорғаушысы Кейси Шеперд ВТБ Бірыңғай лигасына алғаш рет келіп отыр. Бұған дейін ол Црна Гораның “Улцинь”, Венгрияның “Капошвари”, Грузияның “Батуми” және Украинаның “Киев-Баскет” командалары сапында өнер көрсеткен. Лигаға бірінші рет келіп, «НН» сапына қосылған енді бір америкалық ойыншы – шабуылшы Люк Петрасек. Ол бұған дейін екі маусым NBA Жетілу лигасындағы “Гинсборо Сворм” командасында шыңдалған. Ал былтырғы маусымды немістің “Гисен Фотисиксерс” командасы сапында өткізді. Ресейлік жас ойыншыларының бірі, яғни қорғаушы Тимофей Герасимов бұған дейін “Нижний Новгород” сапында ойнаған, ал шабуылшы Илья Платонов командаға “Локомотив-Кубань” жүйесінен ауысып келді.

Бас бапкер:

Былтырғы маусымдағыдай, “Нижний Новгородтың” жаттықтырушылары штабын тәжірибелі серб маманы Зоран Лукич басқарады. Оған сол бұрынғысынша ресейлік жаттықтырушылар Алексей Жуков пен Сергей Козин көмектеседі, ал биылғы маусымның басында оларға Егор Панов қосылды.

Зоран Лукич

Команда көшбасшылары:

Биылғы маусымда ресейлік шабуылшы Антон Астапкович көсіле сілтеп, дәл қазір командадағы ең тиімді және көп ұпай еншілеген ойыншы болып отыр. Кейси Шеперд нижегородтықтар сапына тез сіңіп, тамаша ойын өрнегін көрсетіп келеді. Сондай-ақ ресейліктер Артем Комолов пен Евгений Бабурин де  «НН» қоржынына көп пайда келтіріп жүр. Ал Александре Гаврилович пен Иван Стребков бастапқы бестіктің ойыншыларына айналды. Сергей Торопов бірінші ойында ерекше көзге түскен, бірақ содан кейін алаңға шыққан емес. Жаттықтырушылар штабы Александр Ганькевич, Александр Чадов және Тимофей Герасимовқа үнемі сені артып келеді.

Турнир кестесіндегі жағдай:

“Нижний Новгород” биылғы маусымда 4 матч өткізді. Әрі бірінші ойында ЦСКА-дан басым түсті. Сонымен қатар, “Зелена Гура” мен ПАРМАны да тізе бүктірді. Бірақ “Локомотив Кубань” командасына есе жіберіп алды. Осылай, төрт ойынның үшеуінде жеңіске жеткен нижегородтықтар қазір турнир кестесінің үшінші сатысында тұр. “Астана” алты ойынның екеуінде ғана жеңіске жетіп, тоғызыншы орынға орналасқан.

Кездесулер тарихы:

Екеуара кездесулер нәтижелері бойынша “Нижней Новгородтың” біздің командадан мерейі үстем болып отыр. ВТБ Бірыңғай лигасының былтырғы маусымына дейін нижегородтықтар 14 рет жеңіске жетіп, тек екі рет ұтылып қалды. Былтырғы толық өтпей қалған маусымда бұл екі команда Нұр-Сұлтанда бір кездесу ғана өткізіп үлгерді, әрі онда да нижегородтықтар жеңіске жеткен болатын.

Қызықты деректер:

  • «Астана» ВТБ Бірыңғай лигасында түздегі алғашқы жеңісіне Нижний Новгород қаласында қол жеткізген.


Матч жексенбі күні, 5 желтоқсанда Нұр-Сұлтандағы «Сарыарқа» республикалық велотрегі аренасында өтеді. Басталуы – астана уақытымен 15:00-де. Матчтың онлайн-трансляциясы біздің сайтымыздың Ойын орталығы бөлімінде, сонымен қатар QazSport телеарнасында тікелей эфирде жүргізіледі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

ВТБ Бірыңғай лигасы – «Астана» өз алаңында «Нижний Новгородтан» ұтылды

05.12.2020, 20:00    Просмотров: 363
Источник: Баспасөз қызметі
Автор:

«Астана» баскетбол клубының командасы ВТБ Бірыңғай лигасындағы «Нижний Новгород» клубымен өз алаңында өткен матчың басым бөлігінде қонақтарын қуып жетуге тырысып, үнемі олардың өкшесін басып отырса да, бәрібір жеңісті жұлып ала алмады.

«Астана» ортаға қайта лақтырылған допты іліп әкеткенімен, бұл матчтағы алғашқы ұпайларды қонақтар еншіледі. Мартиньш Мейерс келесі шабуылда-ақ біздің команданың да есебін ашты, әрі ол ойын басында көзге ерекше жиі түсті. Нижегородтықтар матч басында біршама абдырып та қалды, содан төртінші минутта олардың шығыршығына оныншы ұпай салынып, алты ұпай айырмасымен ұтылып жатты. Алайда, бұдан кейін, өкінішке қарай, “Астананың” ойыны үйлеспей қойды. Төрт минуттай уақыт бойы біздің ойыншылар қонақтардың шығыршығына доп түсіре алмай, дал болды және доптан жиі айырылып қала берді. Ал қонақтардың ойын өрнектері, керісінше, түлеп сала берді. Әрі олар осы минуттарды өз кәделеріне жаратып, алты ұпай айырмасымен ұтылып жатқан команда енді төрт ұпай басымдықпен алға оза бастады. Ақыры, “Астана” голсыз өткізген тынышқтығын үзіп, Джеремайя Хилл айып соққысын мүлтіксіз орындады. Бірақ бұл ойын өрнегіне өзгеріс енгізе алмады. Қонақтар алда ойқастаумен болды. Рас, есеп айырмасы соншалықты ұлғайған жоқ. Бірінші кезеңнің аяқталуына бір минут қалғанда астана ұжымы жеті ұпай айырмасымен ұтылып жатты. Жалпы, бірінші он минуттың нүктесін Девин Марбл қойды, 15:20 – алда нижегородтықтар. Екінші онминуттықтың басында «Нижний» көсіле сілтеді, бір жарым минуттан кейін олар біздің жігіттерімізден он ұпайдан артық есеп айырмасымен қара үзе бастады. Он ұпайға жуық есеп айырмасы екі минуттай сақталып тұрды, бірақ одан кейін Майкл Томпсон бұл ойында “Астана” сапынан бірінші болып алғашқы үш ұпайлық соққыны сәтті орындады. Ал Девин Марблдың екі ұпайлық добынан кейін есеп айырмасы үш ұпайға дейін қысқарды. Әйтсе де, Эмиль Райковичтің шәкірттері қонақтарды қуып жете алмай қойды. Есеп айырмасы 3-6 ұпай арасында тербеліп тұрды. Ал матчтың бірінші жартысының аяқталуына бір минут қалғанда, “Астана” небәрі екі ұпай айырмасымен ғана ұтылып жатты. Бірақ біздің жігіттер қанша тырысса да, өз шабуылдарын сәтті аяқтай алмай қойды. Ал “НН” болса, тағы төрт ұпай олжалап, матчтың бірінші жартысы 35:41 есебімен аяқталды. Алда – қонақтар.

Адонис Томас

Алты ұпай – бұл үлкен айырма емес. Бірақ біздің команда таразы басын теңелте алмады. Ол аз болғандай, нижегородтықтар өз басымдықтарын лезде екі таңбалы санға қайта жеткізді. Девин Марблдың ұпайлары есеп айырмасына соншалықты әсер ете қоймады. Бірақ Джеремайя Хиллдің үш ұпайлық соққысынна кейін есеп айырмасы бес ұпайға дейін қысқарды. Алайда “Астана” тағы да қарсыласын қыспаққа ала түсіп, есепті теңестіре алмады. “НН” қайтадан екі таңбалы есеп айырмасына қол жеткізіп, оны берік ұстап тұрды. Үшінші кезеңнің аяқталуына екі минуттай қалғанда, Джеремайя Хилл әдемі данкпен дода көрігін қыздыра түсті. Бірақ бұл да жалпы жағдайға көп әсер ете қоймады. Осы кезеңдегі соңғы ұпайларды қонақтардың баскетболшылары еншілеп, матчтың төртінші ширек бөлігі алдында біздің жігіттерден он екі ұпай айырмасымен ұзап кетті – 49:61. Бұл да команданың сағын сындыратын есеп айырмасы емес-тін. Жағдайды түзеу үшін “Астанаға” екпін алу қажет еді. Алайда, өкінішке қарай, мұны іс жүзінде орындаудан айту ғана оңай болып шықты. Әрі екпінді “Нижний Новгород” ала бастады. Олардың басымдығы бірте-бірте жиырма ұпайды да жуықтай бастады. Мартиньш Мейерс екі нәтижелі шабуылымен есеп айырмасын аз да болса, қысқарта түсті. Әйткенмен, бір жарым минуттан кейін таблодағы есеп “Астана” үшін «–19» болып тұрды. Қазақстан командасының ойыншылары намысты қолдан бермеуге тырысты, бірақ қонақтар жеңісті уыстарынан шығармай, он бес ұпай айырмасын сақтап тұрды. Дмитрий Гаврилов ойын соңында көзге түсіп, бірнеше шабуылды сәтті аяқтап шықты. Десек те, матчтың аяқталуына бір минут қалғанда “Астана” он ұпаймен ұтылып жатты. Бұдан кейін ешқандай да оқыс серпіліс жүзеге асқан жоқ, матчтың аяқталуына бес секунд қалғанда Девин Марбл ойын нүктесін қойды – 69:79. “Астана” жеңіліске ұшырады.
 


Ең көп ұпай еншілегендер:

  • «Астана» – Девин Марбл біздің команда сапындағы ең көп ұпай жинаған ойыншы болды. Оның еншісінде – 16 ұпай, 7 рет доп қағып алды. Матч басында көзге түсіп, бүкіл ойын бойы жанкештілік танытқан Мартиньш Мейерсу 14 ұпай еншілеп, 8 рет доп қағып алды, 3 блокшот қойды. Дмитрий Гавриловта – 11 ұпай және 5 рет доп қағып алды. Ал Майкл Томпсон бүгін 10 ұпай еншілеп, 4 рет доп қағып алды, 5 пас берді.
  • «Нижний Новгород» – нижегородтықтардың капитаны Евгений Бабурин бүгін өз еншісіне 15 ұпай қосып, 5 рет доп қағып алды, 3 пас беріп, 4 рет допты тартып алды. Артем Комолов пен Антон Астапкович 13 ұпайдан еншіледі.


«Астананың» бас бапкері — Эмиль Райкович:
– «Нижний Новгородты» жеңісімен құттықтаймын. Қарсыласымыз бізден асып түсіп, жеңіске лайық болды. Біз өз ойынымыздың ырғағын таба алмадық. Өйткені, бір ай бойы ВТБ лигасында ойнаған жоқпыз. Біздің ойыншылар бұл ойында «жұмсақтық» көрсетіп, шабуылдаудың ретін таппады. Негізі, біз дайындалған едік. Біз бұл жеңілістен сабақ алуға міндеттіміз.

«Нижний Новгородтың» бас бапкері — Зоран Лукич:
— Командамызды жеңісімен құттықтаймын. Бірақ ойын сапасын да ұмытпауымыз керек. Міне, дәл осы біздің командада аса жоғары деңгейде болған жоқ. Төртінші кезеңде бірнеше аллей-уп орындамақ болып, мүлт кеттік. Бұл біздің командаға жақсы сабақ болады деп ойлаймын.


Келесі матч: біздің жігіттер тағы да ұзақ уақыт үйлерінде болмайды. Әуелі, яғни 8 және 9 желтоқсан күндері оңтүстік астанаға барып, Ұлттық лиганың биылғы маусымында бірінші рет «Алматы Легионымен» додаға түседі. Ал ВТБ Бірыңғай лигасыдағы келесі ойынын 14 желтоқсанда өткізіп, астана командасы түзде Польшаның «Зелена Гура» клубымен кездеседі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құрылған жылы: 2000 Клубтық түстері: ақ, қара
Мемлекет: Ресей Арена: СС «Нагорный»
Қала: Нижний Новгород Сайт: www.nn-basket.ru

Сипаттамасы

«Пари Нижний Новгород» – ресейдің ерлер арасындағы баскетбол клубы, Нижний Новгород қаласынан, 2000 жылы құрылған.

Жетістіктер:
  • Ресей Суперлигасының «Б» дивизионы чемпионы – 2010
  • Ресей кубогының финалына шыққан – 2011, 2018, 2019
  • ВТБ Бірыңғай лигасының күміс жүлдегері – 2013/2014
  • Ресей чемпионатының күміс жүлдегері – 2013/2014

Команданың жалпы суреті

Пари Нижний Новгород