«Астана» Президенттік баскетбол клубы өз алаңында өткізген сәтті ойындарынан кейін Саратовқа сапар шекті. Онда, 16 қараша күні жергілікті «Автодор» клубымен додаға түседі. Бұл ойында біздің команданың турнир кестесіндегі жағдайын нығайтып, ВТБ Бірыңғай лигасының биылғы маусымында түздегі алғашқы жеңісіне қол жеткізетін мүмкіндігі бар.

«Автодор» – Ресейдің ерлер арасындағы кәсіпқой баскетбол клубы, Саратов қаласынан. 1960 жылы құрылған.

Жетістіктері:

• Ресей чемпионатының күміс жүлдегері – 1993/1994, 1996/1997, 1997/1998, 1998/1999
• Ресей чемпионатының қола жүлдегері – 1995/1996
• Еуропа кубогының жартылай финалына шыққан – 1997/1998
• А суперлигасының чемпионы – 1996/1997, 1997/1998
• Б суперлигасының чемпионы – 2008/2009
• Суперлига чемпионы – 2013/2014
• Суперлиганың қола жүлдегері – 2012/2013

Саратов командасының бас бапкері – көпшілікке танымал Ресей маманы, бұрынғы белгілі ойыншысы Евгений Пашутин. Ол саратовтықтарды биыл ғана жаттықтырып жүрген жоқ. Пашутин бұл қызметке 2007/2008 жылдар маусымында бекітіліп, италиялық Андреа Маццонаның ауыстырған болатын. Келесі маусымды Италияның «Канту» командасында бастағанымен, «Авторға» тез оралып, Сергей Мокинді алмастырған. Биылғы маусымда Евгений «автодорлықтардың» бапкерлері құрамын маусым басынан бері басқарып келеді. Сондай-ақ, Евгений Пашутиннің өз карьерасында «Спартак» (СПб), «Локомотив-Кубань», УНИКС және ЦСКА командаларының бас бапкері болғанын, сонымен қатар Ресейдің ерлер арасындағы құрамасының да тізгінін ұстап, ал қазір Ресей-U20 құрамасын қоса жаттықтыратындығын айта кетуге тиіспіз. Саратовтың қазіргі бапкері мен «Автодор» арасындағы байланыс сонау 1992 жылы басталған. Сол кезде Пашутин автодорлықтардың құрамында ойнап, жалпы алғанда, 6 маусым бойы «Автодордың» намысын қорғаған. Бұдан бөлек, ол сонау КСРО заманында «Спартак» (Ленинаград) сапында, одан кейін «Динамо» (Мәскеу), УНИКС және ЦСКА клубтарында, сондай-ақ Израильдің «Маккаби» командасында өнер көрсеткен. Евгений Пашутин ойыншы ретінде Әлем чемпионатының күміс, Еуропаның қола жүлдегері атанған. Ресей чемпионы да болып, 6 рет өз елінің күміс жүлдегесіне қол жеткізген. Жаттықтырушы ретінде Ресей чемпионы, ВТБ Бірыңғай лигасының чемпионы, екі дүркін Еуропа кубогының жеңімпазы және Ресей кубогының иегері атанды.

Былтырғы маусымға көз жүгіртіп, биыл Саратов клубы америкалық белді ойыншыларынан айырылып қалды деп, сенімді түрде айтуға болады. Олар – Тре Голден, Перрин Бьюфорд және Дэвид Кравиш. Жалпы, биылғы маусым аралығында команданың барлық легионерлері кетіп қалды. Атап айтқанда – тағы да екі америкалық ойыншы, яғни Энтони Айрлэнд пен Ди Джей Ньюбилл, сондай-ақ серб Борис Савович. Ал ресейліктерден былтырғы маусымды соңына дейін ойнаған Артем Забелин де кетті. Маусым аралығында төрт ойыншы ғана командамен өзара келісімшарттарын ұзартты, әрі олардың бәрі де – ресейліктер. Солардың бірі – ардагер Андрей Сепелев. Бірақ ол команда құрамына тіркелгенімен, ВТБ лигасында небәрі бір ойын ғана өткізді, оның өзінде, 2015/2016 маусымында екі минуттай ғана ойнапты. Қалған үшеуі жергілікті жастар – Антон Квитковских, Александр Петенев және Никита Михайловский.

Биылғы маусымда команданың негізгі құрамындағылар – түгелдей жаңа ойыншылар. Дәл қазір «Автодор» сапында 5 америкалық ойыншы бар. Алайда Рейвонте Райстың келгенінен кеткені тез болды. Ол алғашқы екі ойыннан кейін команда сапынан кетіп қалды. Қорғаушы Маркел Старкс Австралия мен Пуэрто-Рикода өнер көрсеткен, ал Еуропада Италия, Германия, Грекия, Түркии және Польша чемпионаттарында ойнап үлгеріпті. Биылғы маусымда Саратов командасы өткізген бес ойында да негізгі құрамда алаңға шықты. Шабуылшы Элджин Кук Германия мен Хорватиядағы ойындарын мақтан тұта алады. Тәжірибелі қорғаушы Орландо Джонсонның ойнамаған жері де, командасы да жоқ, тек ҰБҚ-ға тұрақтай алмаған. Бірақ «Индиана Пейсерс», «Сакраменто Кингз», «Финикс Санз» және «Нью-Орлеан Пеликанс» командалары сапында алаңға шыққан. Орландо Еуропада Испания, Босния және Герцоговина елдерінде ойнаған. Азияда Филиппи, Қытай және Ливияда өнер көрсеткен. Әрі ол ВТБ Бірыңғай лигасына алғаш рет келіп отырған жоқ. 2016/2017 маусымында УНИКС сапында 8 ойын өткізген. Биыл міне, Элджин мен Орландо «Автодор» өткізген бес матчта да алаңға шықты. Орталық шептегі Айзея Хикс ҰБҚ-дағы «Нью-Йорк Никс» клубында ойнаған. Енді Саратовта, соңғы екі ойында «Автодордың» намысын жыртты. Қорғаушы Тобин Карберри әзірше, тек Солтүстік Еуропа елдерінде ойнаған – Исландияда, Финляндияда және Данияда. Соңғысының, яғни Данияның чемпионы да болыпты. Әзірше команда сапында тіркеліп тұр, бірақ әлі алаңға шыққан жоқ. Орталық шептегі, француз Мухамаду Жайте негізінен Францияда өнер көрсеткен. Бірақ Саратовқа Италия командасынан келді. «Автодордың» маусым басындағы бес ойынында да алаңға шықты. Нигерия қорғаушысы Майкл Уме бұған дейін Германия, Испания, Италия, Израиль және Польша чемпионатитарындағы кәсіпқой командаларда ойнаған, Саратов командасының намысын соңғы екі ойынында қорғады. Латыш шабуылшысы Каспарс Берзиньш болса, Латвияда, Испанияда және Ресейде ойнаған. Әрі ВТБ Бірыңғай лигасына беймәлім ойыншы емес, әзірше «Автодор» сапында екі ойын өткізді, соңғы рет ЦСКА баскетболшыларымен додаға түскенде алаңға шықты. Ресейлік ойыншылардан, маусым аралығында келісімшартарын ұзартқандарынан бөлек, «Автодор» сапында Алексей Бабушкин, Егор Бестужев және Роман Баландин сынды жастар пайда болды.
 
Кездесулер тарихы: «Астана» мен «Автодор» өзара 13 рет кездесті. Бірінші ойын сонау 2013/2014 жылдар маусымында, Нестеров кубогы аясында өтті, онда саратовтықтар басым түсті. «Автодор» тек келесі маусымнан бастап қана ВТБ Бірыңғай лигасында ойнай бастады. ВТБ лигасынан бөлек, біздің команда мен Саратов ұжымы екі рет EuroChallenge додасында кездесті. Жалпы, «Астана» 13 ойынның 7-еуінде жеңіске жетіп, 6-уында ұтылды. ВТБ Бірыңғай лигасындағы өзара жалпы есепте де біздің жігіттер алда – 6:4.    

Турнир кестесіндегі жағдай: «Астана» өз алаңында шектен тыс шиеленісті үш ойын өткізіп, жанкүйерлерін біршама қобалжытып, үшеуінің де соңында жеңісті жұлып алды. Ал түзде өткізген екі ойында да Эмиль Райковичтің шәкірттері жеңілістің кермек дәмін татты. Дәл қазір, турнир кестесінде астана командасының ұпайы да, пайыздық көрсеткіштері де «Локо», «Нижний» және «Енисей» клубтарымен бірдей болып тұр. Бірақ қосымша көрсеткіштері бойынша, алдына тек ЦСКА мен «Химки» клубтарын салып, айбарлы үшінші орынға орналасқан. «Автодор» да бес ойын өткізді, бірақ біреуінде ғана жеңіске жетіп, турнир кестесінде 11-орынды қанағат тұтып тұр.

Қызықты деректер:

• «Автодор» – «Астана» шығыршығына ең көп ұпай салған команда. Бұл 2015/2016 маусымындағы жүзеге асқан, онда саратовтықтар бірінші ойында 131 ұпай салып, екіншісінде 132 ұпай еншілеген болатын. Әрі бұл – «Астананың» ВТБ Бірыңғай лигасы тарихындағы ең нашар көрсеткіші.
• «Астананы» қазіргі ойыншысы Коти Кларк 2017/2018 маусымында «Автодор» сапында ойнаған және ВТБ Бірыңғай лигасы чемпионатының ең тиімді ойыншысы атанған.

Матч сенбі күні, яғни 16 қарашада Саратовтағы «Кристалл» Спорт сарайы аренасында өтеді. Басталуы – астана уақытымен 19:00-де. Матчтың онлайн-трансляциясы біздің сайтымыздың Ойын орталығы бөлімінде жүргізіледі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» Президенттік баскетбол клубы ВТБ Бірыңғай лигасында түздегі бірінші жеңісіне сынық сүйем жетпей сүрінді. Саратовта жергілікті «Автодор» клубына тек матч соңында есе жіберіп алды.

Бірден айта кетейік, Айзея Уайтхед тобығын жарақаттап алып, Саратовта өз командасына болыса алмады. Бұл өз кезегінде матч нәтижесіне әсер етпей қалған жоқ. Өйткені Айзея бұған дейінгі ойындарда команда көшбасшыларының бірі екенін және олрасан зор пайда келтіретіндігін дәлелдеген болатын.

«Астана» ойынды тәп-тәуір бастап, екі рет үш ұпайлық соққыларын шығыршықа дәл түсірді. Ал алаң иелері тек осыдан кейін ғана есеп ашты. Бірақ саратовтықтар бұған жасымады, әрі олар біздің команданы тез қуып жетті. Әуелі есепті мейілінше қысқартып, одан кейін таразы басын теңестірді. Әйтсе де, Қазақстан командасы бірінші кезеңнің басым бөлігінде алда болды. Бірақ соңғы минуттарда дода көрігі мейілінше қызып, екі команда алма-кезек алға шығып отырды. Десек те, бірінші 10 минутта алаң иелері басымдау болды – 20:19. Екінші кезеңнің басын біздің команда сәтті өткізіп, алға шығып қана қоймай, біршама ұзай түсті де. Алаң иелері біздің команданы тоқтату үшін қолдарынан келгеннің бәрін жасап бақты және олар «Астананың» есеп айырмасын одан әрі ұлғайта түсулеріне мүмкіндік берген жоқ. Қазақстандық гандикап осы кезеңнің ортасына дейін сақталып тұрды. Бірақ одан кейін Евгений Пашутиннің шәкірттері есепті мейілінше қысқартты. Ал екі жарым минуттан кейін саратовтықтар қайтадан алға шықты. Әрі матчтың бірінші жартысы аяқталғанда 5 ұпай айырмасымен алда тұрды – 47:42.



Бес ұпай айырмасы табан тірескен дода көрігіне ешқандай да әсер еткен жоқ. Керісінше, ойын одан әрі қыза түсті. Әрі үшінші кезеңде алаң температурасы тек жоғары көтеріле берді. Енді «Астана» қуып жетуші рөлінде тер төкті. Үш жарым минут өткен соң екі команданың арасын 1 ұпай ғана бөліп тұрды. Бірақ біздің команда есепті теңестіруге болатын бұл мүмкіндіктен айырылып қалды. «Автодор» қарқын қосып, өз басымдығын 7 ұпайға жеткізді. Эмиль Райковичтің командасы жауап ретінде қамшыны басып, есепті қысқарта түсті. Екі минутқа да толмайтын уақыт ішінде екі команданы тағы да бір ғана ұпай бөліп тұрды. Әрі бұл кезеңнің қалған уақытында тек «Астана» доп салып, таразы басын өздеріне қарай аударды. 62:65 елорда ұжымы отыз минуттан кейін алға шықты. Төртінші кезеңде дода көрігі одан әрі қызды. «Автодор» отқа май құя түсіп, соңғы кезеңнің бірінші минутында-ақ бір ұпай айырмасымен алға шықты. Осыдан кейін нағыз тартыс басталды. «Автодор» үнемі алға шығып, ал «Астана» есепті теңестіріп отырды. Осылай біраз уақыт өтті. Матчтың аяқталуына үш минут қалғанда алаң иелері екі ұпай айырмасымен ғана алда тұрды. Бірақ біздің команда өз шабуылын сәтті аяқтай алмады. Бұл аз болғандай, өздері саратовтықтардың екі шабуылын тойтара алмады. Сөйтіп, 2 минутқа жетпейтін уақыт ішінде есеп айырмасы қайтадан 7 ұпайға жетті. Ойын соңы нағыз тактикалық «шайқасқа» ұласты, жаттықтырушылар тайм-аут алу құқығын алма-кезек пайдаланды. Матчтың бітуіне 9 секунд қалғанда «Астана» 3 ұпай айырмасымен ұтылып жатты. Бірақ бүгін жеңісті жұлып алудың сәті түспей қойды. Шығыршықтың та, алаңның да «бүйрегі» жергілікті ұжымға бұрып тұрғандай әсер қалдырды. «Астанаға» осылай түзде жеңіске жетудің қиысыны келмеді. «Автодордың» асығы алшысынан түсті – 90:85 (20:19, 27:23, 15:23, 28:20).

Осы жеңілістен кейін «Астананың» жеңістері көрсеткіші қайтадан 50% болды – 3:3. Ал турнир кестесіне келер болсақ, онда бәрі сықап тұр. «Астана» бүгінгі жеңілісінен соң үшінші орыннан тоғызыншы орынға бір-ақ сырғыды. Бұған бүгін қосарлана өткен матчтардың да нәтижелері әсер етті, әрине. Саратовтағы ойын өте ауыр болды, табан тірескен дүлей дода тартысты өтті. Бұл жерде, тағы да Уайтхедтің жарақаттанып қалғандығын айта кеткіміз келеді. Әрі Душан Ристич те төртінші кезеңде жарақаттанып қалып, соңғы минуттарда көсіле сілтей алмады. Жеңілістің аты жеңіліс, «Автодор» бүгін өзіне жеңіс ауадай қажет болғандығын дәлелдеді. Бізге тек ойыншыларымыздың жарақаттары жеңіл болса екен, бұдан кейінгі ойындарға кесірі тимесе етті деп, үміттенгеннен басқа амал жоқ.
 
Ең көп ұпай еншілегендер:

• «Астана» – бүгін барлығының назары Коти Кларкке ауды, себебі ол өзінің бұрынғы командасына қарсы ойнады, 1017/2018 маусымында ол саратовтықтардың көшбасшысы болған. Америкалық ойыншы жерге қаратқан жоқ. Қазақстан командасы сапында ең тиімді ойыншы болды – 26 ұпай және 7 рет доп қағып алды. Малкольм Хилл де 20 ұпайдан артық еншіледі (22) және ол 6 рет доп қағып алып, 6 пас берді. Душан Ристичтің еншісінде 15 ұпай, сондай-ақ ол 8 рет доп қағып алып, 6 пас берді.
• «Автодор» – біздің команда бүгін Мухаммаду Жайтені матч аяқталмай жатып, орындыққа отыруға мәжбүр етті. Бірақ ол сол уақытқа дейін-ақ 22 ұпай еншілеп, 13 рет доп қағып алды. Сондай-ақ «Автодор» сапында америкалықтар жай оғындай жарқылдады: Маркел Старкс – 20 ұпай, 8 пас және Айзея Хикс – 18 ұпай, 9 рет доп қағып алды.

«Автодор» клубының бас бапкері Евгений Пашутин:
— «Астана» ойынды өрбіте және дода тізгінін өз қолында ұстай алатын – азулы команда. Мұны олар бұған дейін «Локо» және «Зенит» клубтарымен кездескенде дәлелдеген. Біз жан-жақты дайындалдық. Қорғаныста Джеремая Хиллге қарсы сауатты ойнадық. Кларкке тосқауыл қоя алмадық. Бірақ бірден оны қаумаламай, мүмкіндік берейік деп шештік. «Астананың» бес сұрмергеніне бірдей әр шептен шығыршықты нысанаға алуға мүмкіндік бергенше, осы шешіміміз дұрыс болды. Бәрін де қорғаныс шешті. Жігіттер өздерін де аяған жоқ, доптың астына төселе де кетті. Шығыршық түбінде оңай доп салуға мүмкіндік бермедік.

«Астана» клубының бас бапкері Эмиль Райкович:
— Көрермендер үшін өте қызықты ойын болды деп ойлаймын. Біздің жеңіске жететіндей мүмкіндіктеріміз болды, бірақ біз кейбір сәттерде, қорғаныста «пик-н-роллдарға» қарсы сауатты ойын өрнегін көрсете алмадық. Негізгі құрамдағы ойыншыларымыз тың болмай, бірақ қиындықтарға тап болдық. Өйткені олар алаңда 35-36 минуттан ойнады. Соның салдарынан шешуші минуттарда, жеңіске жету үшін қосымша үдеу қоса алмады. Менің ойымша, біздің жеңілісіміздің басты себебі – осы. Әрі бүгін біз 4 легионермен ғана ойнадық, себебі Уайтхед жарақатына байланысты алаңға шыға алмады.

Келесі матч: «Астана» келесі ойындарын өз алаңында өткізеді – 19 және 20 қараша күндері елорда баскетболшылары Ұлттық лига чемпионаты аясында «Атырау Барыстарын» қабылдайды. Ал ВТБ Бірыңғай лигасындағы келесі ойынын Эмиль Райковичтің шәкірттері 25 қараша күні Таллиннде жергілікті «Калев» клубымен өткізеді.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.