ВТБ Бірыңғай лигасы 2021/2022
ЦСКА (МСК)
Мәскеу
ВТБ Бірыңғай Лигасы, Тұрақты біріншілік
13.02.2022, 18:00 Жс
Арена: Мегаспорт (Мәскеу)
84:65
Негізгі уақыт
18:14 26:16 18:19 22:16
Ойын нөмірі: RS-80
Көрермен: 1568
Астана
Астана

«Астана» бірінші рет ЦСКА ұжымының жаңа аренасында ойнайды

12.02.2022, 21:00    Просмотров: 128
Источник: Баспасөз қызметі
Автор:

Өз алаңындағы Қазақстан кубогы додасын аяқтаған соң, «Астана» баскетбол клубы Мәскеудің ЦСКА командасымен ВТБ Бірыңғай лигасының биылғы маусымдағы бірінші ойынын өткізуге аттанды. Матч жексенбі күні, 13 ақпанда Мәскеудегі “Мегаспорт” жаңа спорт сарайы аренасында өтеді. Басталуы – астана уақытымен 18:00-деа.

ЦСКА – Ресейдің ерлер арасындағы кәсіпқой баскетбол клубы, Мәскеу қаласынан, 1923 жылы құрылған. Биылғы маусымда ВТБ Бірыңғай лигасынан бөлек, Еуролига додасында бақ сынайды.

Жетістіктері:

  • КСРО чемпионы − 1945, 1960-1962, 1964-1966, 1969-1974, 1976-1984, 1988, 1990 
  • Ресей чемпионы – 1992-2000, 2003-2019, 2021 
  • КСРО кубогының жеңімпазы − 1972, 1973 
  • Ресей кубогының жеңімпазы – 2005-2007, 2010 
  • Еуропа чемпиондары Кубогының жеңімпазы − 1960/1961, 1962/1963, 1968/1969, 1970/1971. 
  • NEBL чемпионы − 1999/2000. 
  • Еуролига чемпионы − 2005/2006, 2007/2008, 2015/2016, 2018/2019
  • ВТБ Бірыңғай лигасының чемпионы − 2009/2010, 2011/2012-2018/19, 2020/2021
  • ВТБ Бірыңғай лигасының күміс жүлдегері − 2010/2011
  • ВТБ Бірыңғай лигасыны Суперкубогы иегері – 2021​


Баскетбольный клуб ЦСКА 2021/2022

Команда құрамы:

Әскерилер клубының құрамы былтырғы маусыммен салыстырғанда, көп өзгерген жоқ. Команда өзінің негізін қалайтын белді ойыншыларын сақтап қалып отырғаны, бірінші жыл емес. Бұл жолы, былтырғы құрамдағы 11 ойыншысы қалды – дат Иффе Лундберг, италияндық Дэниэл Хэккетт, неміс Йоханнес Фогтманн, грузин Торнике Шенгелия, америкалық Уилл Клайберн, сондай-ақ ресейліктер Джоэл Боломбой, Александр Хоменко, Иван Ухов, Семен Антонов, Андрей Лопатин және Никита Курбанов. Сонымен қатар, серб Никола Милутиновты атап өтуіміз керек, ол былтырғы маусымның ақпан айында команда тізімінен шығарылды да, биылғы маусымда қайта оралды. Сөйтіп, былтырғы маусымда келісімшарттарының мерзімі аяқталған  америкалық Дэрран Хиллиард пен нигериялық Майкл Эрик биылғы маусымда ЦСКА-мен келісімшарттарын ұзартқан жоқ.

Осыған орай, жаңа ойыншылары да көп емес, әрине. Командаға маусым басында Литва шабуылшысы Марюс Григонис қосылды. Ол өз карьерасын Литваның “Жальгирис” клубы жүйесінде бастаған. Одан кейін Испанияның “Пеньяс Уэска”, “Манреса” және “Иберостар Тенерифе”, сондай-ақ немістің “Альба” командаларында ойнады. Соңғы үш жылды өзі түлеп ұшқан “Жальгиристе” өткізді. Марюс өз карьерасында FIBA Чемпиондары лигасының жеңімпазы атанып, екі рет Литва чемпионы болған, әрі Король Миндаугас кубогын иеленген. Командаға жаңадан қосылған екі ресейлік ойыншыны таныстырудың да қажеті жоқ. Өйткені, олардың біреуі ЦСКА сапында ойнаған – Алексей Швед. Ал соңғы жылдары ол Мәскеу түбіндегі “Химки” клубының негізгі жұлдыздарының бірі болды. Орталық шептегі Владимир Ивлеев бұған дейін ұзақ уақыт “Нижний Новгород” және “Локомотив-Кубань” клубтарында ойнап, былтырғы маусымды “ПАРМА” сапында өткізді. Ал маусым басталып кеткен соң, ЦСКА сапын америкалық шабуылшы Кеннет Фарид толықтырды. Ол мейілінше, ұзақ уақыт NBA-дағы “Денвер Наггетс” сапында бақ сынап, “Бруклин Нетс” пен “Хьюстон Рокетс” құрамдарында да өнер көрсетті. Сонымен қатар, Кеннет Қытайдың “Чжэцзян Лайонс” және Пуэрто-Риканың “Леонес де Понсе” клубтарында да ойнады. Фарид – 2014 жылғы Әлем чемпионы. Бірақ Кеннет Фарид пен ЦСКА жолдары екі айырылып, 2021 жылғы желтоқсан айында ол АҚШ-қа оралды. Әскерилер клубыны ең соңғы жаңа ойыншысы – америкалық қорғаушы Аллерик Фримен. Онымен келісімшартқа 1 ақпанда ғана қол қойылды. Әрі ол УНИКС-пен өткен триллерде үш минут ойнап үлгерді. Аллерик Венгрияның “Альба Фехервар”, Түркияның “Бурсаспор”, Қытайдың “Шенжень Авиаторс” жәнеи “Киндао Иглз” және Францияның “АСВЕЛ” командаларында ойнаған.

Бас бапкер: ЦСКА-ның жаттықтырушылары құрамы командалардың соңғы кездесуінен бері мүлдем өзгерген жоқ. Әскерилер клубын сол бұрынғысынша грек маманы Димитрис Итудис жаттықтырады. Оған сол бұрынғыдай, грек Андреас Пистиолис, ресейлік Антон Юдин және испан маманы Даррил Миддлтон көмектеседі. Алайда, ақпан айының басынан бері, Итудистің денсаулығына байланысты, команданы оның көмекшісі Андреас Пистиолис басқарып жүр. Бірақ Еуролига додасындағы, “Маккаби” клубымен түзде өткен ойында Димитрис командамен бірге болды, яғни ол өз ұжымын “Астанамен” өтетін матчта да басқаратын шығар.

Команда көшбасшылары: ЦСКА-ның ВТБ Бірыңғай лигасындағы ең тиімді ойыншысы – Никола Милутинов. Бірақ команданың ең көп ұпай жинаған ойыншысы, яғни Иффе Лундберг тиімділігі жағынан да одан көп қалыс тұрған жоқ. Торнике Шенгелия мен Йоханнес Фогтманн да өте жоғары нәтижелер көрсетіп жүр, бірақ екеуі де соңғы рет алаңға қаңтар айында шыққан. Джоэл Боломбой мен Дэниэл Хэккеттің де – статистикалық көрсеткіштері адам қызығарлықтай. Никита Курбанов, Марюс Григонис, Алексей Швед және Иван Ухов та олардан қалысар емес. Уилл Клайберн де көзге түсіп жүр, бірақ ол желтоқсан айынан бері ВТБ Бірыңғай лигасындағы ойындарда төбе көрсетпей кетті. Яғни әскерилер құрамы – үнемі қарымды.

Турнир кестесіндегі жағдай: “Астана” тоғыз ойындағы екі жеңісімен 10-шы орында тұр. Ал ЦСКА өзіне үйреншікті емес, 4-ші орында орналасқан. Олар тоғыз рет жеңіске жетіп, төрт рет жеңіліске ұшырады. Биылғы маусымда мәскеуліктер ойламаған жерден “Калевқа” есе жіберіп алды. Рас, одан кейін эстондардан еселерін ірі жеңіспен қайтарды. Петербордың “Зенитінен” де ұтылып қалды. Ал қазір турнир кестесінде көш бастап келе жатқан Қазанның УНИКС клубынан екі рет ұтылды. Алайда екеуінде де шектенттыс шиеленісті ойын болды. Мәселен, жақында ғана аяқталған соңғы ойында матч тағдыры үшінші овертаймда шешілді. Жалпы, ЦСКА-ның екі доп додасында, яғни ВТБ лига мен Еуролигада бақ сынап жүрген ұжым екенін естен шығармауымыз керек. Ал “Астанамен” өтетін ойын олар үшін ақпанның басынан бергі, екі аптаға да жетпес уақыт ішіндегі, бесінші матч болады.

Кездесулер тарихы: «Астана» мен ЦСКА үшін бұл 23-ші екеуара матч болады. Біздің команда әскерилер клубын жеңуге шақ қалған матч болды, бірақ әлі жеңген емес. Сондықтан ЦСКА ұжымымен арадағы кездесулерде жеңісіміз әлі 0 болып тұр.

Қызықты деректер:

  • ЦСКА – ВТБ Бірыңғай лигасында “Астанадан” әлі ұтылмай келе жатқан жалғыз команда.


Матч жексенбі күні, яғни 13 ақпанда, Мәскеудегі “Мегаспорт” спорт сарайы аренасында өтеді. Басталуы – астана уақытымен 18:00-де. Ойынның онлайн-трансляциясы біздің сайтымыздың басты бетінде жүргізіледі.

Жалпы, турнир жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

ЦСКА «Астана» үшін өре жетпейтін қарсылас болып тұр

13.02.2022, 21:00    Просмотров: 129
Источник: Баспасөз қызметі
Автор:

«Астана» баскетбол клубы Мәскеуде ЦСКА-мен тайталасып бақты, бірақ азулы қарсыласын жеңе алмады. Дарко Руссо бұл матчты бастауды Энтони Хики, Скайлар Спенсер, Антонио Кэмпбелл, Марк Тихоненко сынды легионерлеріміз бен қазақстандық Максим Марчукке сеніп тапсырды.

Ортада ойынға қосылған допты біздің команда іліп әкетіп, Энтони Хики бірінші шабуылда-ақ есеп ашты, әрі “Астананы” алға шығарды. Бірақ бұдан кейінгі төрт минутта Қазақстан командасы доп сала алмай, ал алаң иелері жеті ұпай айырмасымен алға ұзап кетті. Кезең ортасында Максим Марчук айып соққыларын мүлтіксіз орындап, Скайлар Спенсер шығыршық түбінен доп салды. Сонда да біздің команда екі таңбалы сан айырмасымен артта қалып, Дарко Руссо тым ерте тайм-аут алуға мәжбүр болды. Осы тактикалық іркілістен кейін алаң иелерінің қарқындары бәсеңсіп, ұпай еншілеуден қала бастады. Сөйтіп, бірінші кезеңнің соңғы үш минутында тек “Астананың” ұпайлары ұлғайып отырды. Антонио Кэмпбелл біздің ұжымнан бірінші болып үш ұпайлық доп салды, Энтони Хики ойын барысында тағы үш ұпай еншіледі, Максим Марчук те үш ұпайлық доға сыртынан мергендік танытты. Осылай, біз қарсыласымызды қуып жетпесек те, кезең соңына дейін есепті әжептәуір қысқарттық – 18:14. Екінші онминуттықтың басында әскерилер клубы үш ұпайлық доп салғанымен, Энтони Хики екі рет қатарынан біздің шабуылдарымызды сәтті аяқтады. Яғни есеп айырмасы бір үш ұпайлық соққыға дейін қысқарды. ЦСКА қайтадан шабуыл мен қорғаныста ширақ қимылдап, алға қарай ұзай бастады. Бізге тағы да бапкерлеріміз алған бір минуттық үзіліс көмектесті – әскерилер қайтадан екі таңбалы сан айырмасымен қара үзіп кеткен болатын. Кезең ортасында Олег Балашов екі рет алыстан доп салды, ал Марк Тихоненко салған үш ұпайлықтан соң, “Астана” бес ұпай айырмасымен ғана ұтылып жатты. Матчтың бірінші жартысының соңғы үш минутында мәскеуліктер нәтижелі ойын өрнегін көрсетті. Марк Тихоненко тағы бір үш ұпайлық соққысын дөп түсіргенімен, біздің команда екі таңбалы санға тең есеп айырмасымен ұтылып жатты – 44:30. Статистика бойынша, алаң иелерінің көп соққы бағыттағаны көрініп тұрды. Ортадан лақтырған доптарының пайызы бойынша мәскеуліктер біздің ұжымнан әлдеқайда асып түсті. Сонымен қатар, “Астананың” доптан айырылып қалған сәттері артық болып (4 ретке), қайтқан допты қағып алуда да қалып қойды (10 ретке). Мұның бәрі екінші мүмкіндікте доп салу айырмасының көп болып, доптан біз айырылып қалғанда олардың мүмкіндіктері арта түскенін білдіреді.

Олег Балашов

Шығыршық ауыстырған соң командалар нәтижелі шабуылдарымен алмасты – Антонио Кэмпбелл аллей-уп орындап, Энтони Хики алаң иелерінің қорғанысын бұзып өтіп, екі ұпай олжалады. Есеп айырмасы он бес ұпай шамасында сақталып тұрды. Алайда, осы сәтте біздің алыс артиллериямыз іске қосылды – Антонио Кэмпбелл мен Энтони Хики екі реттен допты алыс қашықтықтан нысанаға дөп түсірді. Кезеңнің ортасына қарай есеп айырмасы бес ұпайға дейін қысқарды. Алайда алаң иелері біздің екпінімізді басып, бұдан кейінгі екі минутта есеп айырмасы бес-жеті ұпай аралығында тербеліп тұрды. Осы уақыт аралығында Скайлар Спенсер екі ұпай, ал Энтони Хики бір ұпай еншіледі. Бірақ үшінші кезеңнің соңында ЦСКА жауапсыз алты ұпай еншілеп, соңғы кезең қарсаңында он үш балл айырмасымен ұтып жатты – 62:49. Төртінші кезеңде біздің ұжымның ойыны үйлеспей қойып, ЦСКА өз басымдығын жиырма ұпайға жуықтатты. Олег Балашов пен Энтони Хики салған үш ұпайлық доптар есеп айырмасын он бір ұпайға қысқарты. Бірақ кезеңнің бел ортасында алаң иелері есеп айырмасын жиырма ұпайға дейін ұлғайтты. Энтони Хики тағы екі ұпай еншілегенімен, матчтың аяқталуына үш минут қалғанда, бәрі де белгілі болды. ЦСКА жиырма алты ұпай айырмасымен қара үзіп кетті. Матч соңында мәскеуліктер қарқындарын бәсеңсітіп, біздің сапымыздан Максим Марчук пен Олег Балашов бір реттен, ал Энтотни Хики екі мәрте доп салды. Есеп айырмасы қысқарғанымен, “Астана” бұл ойында ұтылып қалды. Есеп – 84:65.


Көп ұпай еншілегендер: 

ЦСКА – Әскерилер сапында бастапқы бестіктегілер көсіле сілтеп, бес ойыншы он ұпайдан артық жинады. Мәскеуліктерден Марюс Григонис ең көп ұпай жинаған, ал Никола Милутинов ең тиімді ойыншы болды.

«Астана» – Энтони Хики бүгін ешкіммен ауыспай, матчты бастан-аяқ ойнап шықты, 26 ұпай еншілеп, 6 рет доп қағып алды, 7 пас беріп, 2 рет допты тартып алды. Антонио Кэмпбелл 11 ұпай жинап, 6 рет доп қағып алды. Олег Балашов 11 ұпай олжалап, 2 пас берді. Ал Максим Марчук өз еншісіне 7 ұпай жазып, 4 рет доп қағып алды.

ЦСКА бас бапкері – Димитрис Итудис:
— Команданы құттықтаймын. Біз негізінен жақсы ойнадық. «Астананың» негізгі күші, оның ойынын үйлестірушісі – Хики. Ал ол бүгін тағы бір тамаша ойын өткізді, біз оның қимыл-әрекеттеріне лайықты жауап таппадық. Бірақ бұл біздің қорғаныста біраз машықтанып, «оқшаулауға» қарсы ойын өрнегімізді өзгертуге мүмкіндік берді. Бізге жарақат алған ойыншыларымыз жетіспейтіндей, олардың спорттық баптарына келе амай жүргендері әсер ететіндей. Бұл біздің құрамымызды ауыстырып отыруға көмектесіп, тер төгіп өз қабілетімізді іс жүзінде байқай алдық.

«Астананың» бас бапкері – Дарко Руссо:
— Біз бүгін Еуропаның ең үздік командасының бірімен ойнадық. Бұл біз үшін маңызды ойын еді. Себебі, ең үздік ойыншымыз кеткен соң, өзімізді тексеріп көру керек болды. Әрі қарай қалай ойнайтынымызды түсіну қажет болды. Өйткені, енді маусым аяғына дейін команда сапында ешқандай өзгеріс болмайды. ЦСКА ешқашан қарсыласын бағаламай ойнамайды. Олар бізге қарсы дөрекілеу ойнады, ал біз олардың осы агрессиясын тоқтата алмадық. Олар үнемі жанасып, қоян-қолтық ойнап, жеңіске жетті. Біз «-19» айырмасымен де ұтылып жаттық, Бірақ, жалпы, намысты қолдан берген жоқпыз. Әйтсе де, мен ырза болмай тұрған жоқпын. Біздің ойындарымыздың күнтізбесі тым қиын, енді «Локо» және УНИКС командаларымен ойнаймыз. Қиын болады, бірақ біз сескенбейміз, мен команданы әрбір қарсыласпен шайқасуға үйретіп жүрмін.

Салдары: “Астана” әлі оныншы орында тұр, бірақ “Цмоки-Минск” бізбен негізгі көрсеткіштері бойынша теңесті, тек қосымша көрсеткіштеріне байланысты бізден бір саты төмен орналасты.

Келесі матч: Алдағы аптада біздің жігіттер өз алаңымызда екі ойын өткізеді. Сейсенбі күні, 15 ақпанда астанаға қонаққа Краснодардың «Локомотив Кубань» клубы келеді. Басталуы – астана уақытымен 19:00-де. Матч билеттерін Ticketon.kz сайтынан сатып ала аласыздар. Содан соң, бейсенбі күні, 17 ақпанда сары-көкшіл жейделілерге Қазанның УНИКС клубы қонақ болады. Басталуы – астана уақытымен 19:30-да. Бұл матчтың да билеттерін Ticketon.kz сайтынан сатып ала аласыздар.

Жалпы, турнир жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құрылған жылы: 1923 Клубтық түстері: қызыл, көк
Мемлекет: Ресей Арена: ӘСК ЦСКА
Қала: Мәскеу Сайт: www.cskabasket.com

Сипаттамасы

ЦСКА – Ресейдің ерлер арасындағы баскетбол клубы, Мәскеу қаласынан, 2000 жылы құрылған.

Жетістіктері:
  • КСРО чемпионы − 1945, 1960-1962, 1964-1966, 1969-1974, 1976-1984, 1988, 1990
  • Ресей чемпионы – 1992-2000, 2003-2019
  • КСРО Кубогының жеңімпазы − 1972, 1973, 1982
  • Ресей Кубогының жеңімпазы – 2005-2007
  • Еуропа чемпиондары кубогының жеңімпазы − 1960/1961, 1962/1963, 1968/1969, 1970/1971
  • Еуролига чемпионы − 2005/06, 2007/08, 2015/16 
  • NEBL чемпионы − 1999/2000
  • ВТБ Бірыңғай лигасының чемпионы − 2009/2010, 2011/2012-2018/19, 2020/21
  • ВТБ Бірыңғай лигасының күміс жүлдегері − 2010/2011, 2021/2022
  • Нева Кубогының жеңімпазы — 2020
  • А. Я. Гомельский Кубогының жеңімпазы - 2020

Команданың жалпы суреті

ЦСКА (МСК)