ВТБ Бірыңғай лигасы 2020/2021
Зенит
Санкт-Петербург
ВТБ Бірыңғай Лигасы, Тұрақты біріншілік
01.11.2020, 20:00 Жс
Арена: «Сибур Арена» (Санкт-Петербург)
85:52
Негізгі уақыт
27:14 11:13 23:6 24:19
Ойын нөмірі: RS-33
Көрермен: 1342
Астана
Астана

«Астана» демалыс күні Санкт-Петербургте «Зенитпен» додаға түседі

31.10.2020, 10:00    Просмотров: 294
Источник: Баспасөз қызметі
Автор:

Ұлттық лига маусымын сәтті бастап, өз алаңында «Каспий» командасын екі рет тізерлетіп, жігерлене түскен «Астана» баскетбол клубының ойыншылары Нева жағасындағы қалаға кетті. Онда олар ВТБ Бірыңғай лигасы аясында Петербордың «Зенитімен» додаға түседі. Матч жнексенбі күні, 1 қарашада, астана уақытымен 20:00-де басталады.

«Зенит»
 – Ресейдің ерлер арасындағы кәсіпқой баскетбол клубы, Санкт-Петербург қаласынан. 2014 жылы құрылған. ВТБ Бірыңғай лигасынан бөлек, Еуролига додасында да өнер көрсетеді.

Жетістіктері:

  • ВТБ Бірыңғай лигасының қола жүлдегері − 2015/2016, 2016/2017, 2017/2018 
  • Ресей чемпионатының қола жүлдегері – 2016-2018 
  • Ресей кубогының финалына шыққан – 2015/2016

Команда құрамы:

Маусым аралығында петерборлықтардың құрамы көп өзгерді. Былтырғы маусымдағы құрамынан небәрі 7 адам ғана Санкт-Петербург командасы сапында қалды. Командадан мексикалық Густаво Айон, француз Эндрю Альбиси және америкалықтар Колтон Айверсон, Алекс Ренфро, Тим Абромайтис сынды ойыншылар кетті. Ресейліктерден тәжірибелі Антон Понкрашов пен Евгений Воронов та өз жолдарын тапты. «Зенитпен» келісімшартарын ұзартқан жеті ойыншының екеуі америкалық Остин Холлинс пен Уилл Томас, поляк Матеуш Понитка, сондай-ақ ресейлік Дмитрий Хвостов, Антон Пушков, Владислав Трушкин және Андрей Зубков сынды ойыншылар болды.

Зенит баскетбол клубы 2020/2021

Биылғы маусымда петерборлықтар сапын үш америкалық ойыншы толықтырды. Қорғаушы Кей Си Риверс өз карьерасын Италияның «Латина», «Бенеттон» және «Виртус» командалары сапында бастаған. Сондай-ақ Францияның “Роан” командасының да намысын қорғаған. Кей Си ВТБ Бірыңғай лигасына бірінші рет келіп отырған жоқ. 2011/2012 және 2012/2013 жылдар маусымдарында Ресейдің “Локомотив-Кубань” және “Химки” командалары сапында ойнаған. NBA Жетілу лигасында “Рино Бигхорнс” сапында өнер көрсеткен, сондай-ақ Еуропаның азулы командаларында да шыңдалған. Атап айтқанда, Испанияның “Реал Мадрид”, немістің “Бавария”, гректің “Панатинаикос” және сербтің “Црвена Звезда” клубтарында ойнаған. Сонымен қатар, Италияның “Реджана” және Испанияның “Реал Бетис” клубтарында да атой салды. Былтырғы маусымды ол Литваның “Жальгирисі” құрамында өткізді. Риверстің атақ-жетістіктерінен көз сүрінеді: Еуролига чемпионы, Испания мен Грекияның екі дүркін чемпионы, Адриатика лигасының чемпионы, Сербия және Литва чемпионы. Сонымен қатар, Испания кубогының екі дүркін жеңімпазы, Испания СуперКубогының иегері, Грекия және Миндаугас Королі кубогының жеңімпазы. Қорғаушы Билли Бэрон бұған дейін Литваның “Летувос Ритас”, Бельгияны “Шарлеруа”, Испанияның “Мурсия”, Түркияның “Эскишехир” және Сербияның “Црвена Звезда” командалары сапында тәжірибе жинаған. Билли Сербия және Адриатика лигасының чемпионы, Адриатика СуперКубогының жеңімпазы. Шабуылшы Алекс Пойтресс NBA-дағы “Филадельфия СевентиСиксерс”, “Индиана Пейсерс” және “Атланта Хоукс” сынды клубтардың сапында төбе көрсеткен. Сонымен қатар, NBA Жетілу лигасындағы “Форт Уэйн Мэд Энтс” және “Эри БэйХоукс” командаларында ойнаған. АҚШ-тан кейін Пойтресс қытайдың “Жилин Норт-Ист Тайгерс” және түріктің “Галатасарай” клубтары сапында өнер көрсетті. Канада қорғаушысы Кевин Пангос Испаниядағы “Гран-Канариа” және Литвадағы “Жальгирис” командалары сапында шыңдалған, ал соңғы екі маусымды Испанияның “Барселонасында” өткізді. Литва шабуылшысы Артурас Гудайтис өз карьерасының басым бөлігін Литвадағы “Гаргждай-Бремена”, “Жальгирис” және “Летувос Ритас” командалары құрамында өткізген, ал соңғы үш маусымда Италияның “Олимпия Милан” клубы сапында ойнады. Артурас – Литваның екі дүркін чемпионы және Италия чемпионы, сондай-ақ Литва кубогының жеңімпазы, Миндаугас Королі кубогы мен Италиядағы екі кубоктың иегері. Ресей ойыншылары ішінен “Зенитке” ауысқан ең әйгілі ойыншы ретінде қорғаушы Виталий Фридзонды бөле-жара атап өтуге болады. Виталий өзінің 15 жылдан асатын карьерасында “Химки”, ЦСКА және “Локомотиве-Кубань” командалары сапында өнер көрсетті. Бірнеше рет Ресей және ВТБ Бірыңғай лигасы чемпионы болды, Еуролига чемпионы және Әлем Чемпионаты мен Олимпиада ойындарының қола жүлдегері. “Зениттің” енді бір ресейлік тәжірибелі жаңа ойыншысы – қорғаушы Денис Захаров. Бұған дейін ол “Спарта и К”, “Динамо Мәскеу”, “Нижний Новгород”, “Локомотив Кубань” командалары сапында ойнаған. Соңғы маусымдарда “Енисейдің” намысын қорғады. Сонымен қатар, команда сапын екі жас ойыншы толықтырды. Шабуылшы Игорь Вольхин “Химкиден” ауысып келсе, шабуылшы Максим Карванен зениттің өз жүйесінен қосылды.

Бас бапкер:

Санкт-Петербург командасының жаттықтырушылары штабы былтырғы маусыммен салыстырғанда мүлде өзгерген жоқ. Команданы сол бұрынғысынша Испания маманы Хави Паскуаль басқарады, ал оған жерлесі Иньиго Зорзано, грек Адамантиос Панагиотопулос және ресейлік маман Сергей Вознюк көмектеседі.

Хави Паскуаль

Команда көшбасшылары:

ВТБ Бірыңғай лигасында өткізген төрт ойында команданың көшбасшылары ретінде америкалықтар Алекс Пойтресс пен Билли Бэрон көзге түсті. Сонымен қатар, Остин Холлинс, Кевин Пангос және Матеуш Понитка да сенімді ақтап жүр. Кей Си Риверс, Уилл Томас және Артурас Гудайтис та нәтижелі ойын өрнегін көрсетіп келеді. Ресейлік ойыншылардан Андрей Зубковты айрықша атап өтуге болады, ал Виталий Фридзон мен Денис Захаровты бапкері үнемі бастапқы бестікте ойнатып жүр.

Турнир кестесіндегі жағдай:

“Зенит” маусым басынан бері төрт ойын өткізіп, төртеуінде де жеңіске жетіп, турнир кестесінде көш бастап келеді. Алайда, “Зенит” негізінен турнир кестесінің төменгі бөлігіндегі командалармен кездесті:  “Калев”, “Зелена Гура” және “Цмоки-Минск”. Сондай-ақ биыл спорттық бабына келе алмай жүрген “Химкиді” де тізерлетті. “Астана” да 4 матч өткізді. Бірақ біздің команда бір рет қана жеңіске жетіп, дәл қазір командалар рейтингінде оныншы орынды иемденіп тұр.

Қызықты деректер:

“Астана” мен “Зенит” 11 рет додаға түсті, екеуара кездесулерде петерборлық команда біздің жігіттерді жеті мәрте ұтып, төрт рет ұтылып, басым болып жүр.

Қызықты деректер: 

  • Былтырғы маусымда осы екі команда бір рет қана кездесті. Бұл кездесу Нұр-Сұлтанда өтіп, онда “Астана” жеңісті жұлып алған болатын.
  • Бұған дейінгі екі кездесуде “Астана” мен “Зенит” тек овертаймда ғана бір-бірінен айлаларын асыра алған болатын.


Матч жексенбі күні, яғни 1 қарашада Санкт-Петербургтегі «Сибур Арена» алаңында өтеді. Басталуы – астана уақытымен 20:00-де. Матчтың онлайн-трансляциясы біздің сайтымыздың Ойын орталығы бөлімінде, сонымен қатар QazSport телеарнасында тікелей эфирде жүргізіледі.


Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Эмиль Райковичтің шәкірттері түзде «Зениттен» ойсырай ұтылды

02.11.2020, 10:00    Просмотров: 280
Источник: Баспасөз қызметі
Автор:

“Астана” Санкт-Петербургке жол шеккенде, төрт ойын өткізген командамыздың қоржынында бір ғана жеңіс болды. Ал “Зенит” болса, бұған дейінгі төрт ойынында да жеңіске жеткен-тін. Сондықтан, петерборлық команда өз алаңында фаворит еді. Сонымен қатар, бұл матчта Девин Марблдың біздің команда сапында ВТБ Бірыңғай лигасындағы бірінші ойынын өткізгенін атап өтуге болады.

Ортаға лақтырылған доп алаң иелерінің олжасына айналып, петерборлықтар бірінші шабуылдарында-ақ шығыршықты дәл көздеп, есеп ашты. Майкл Томпсон бір жарым минуттан кейін Қазақстан командасының алғашқы ұпайын еншіледі. Ал бір минутқа да жетпейтін уақыттан соң Адонис Томас үш ұпайлық соққысымен таблодағы есепті теңестірді. Алайда “Зенит” айылын жимай, қайтадан алға шықты. Бұдан кейінгі 4 минутта алаң иелері көсіле шауып, өз мүмкіндіктерінің бәрін жүзеге асырды. Осылай, олардың басымдығы лезде екі таңбалы санға жетті. Біздің жігіттер шабуылды аяқтау барысында көп қателесті және қоржынымызға ұпай қосу қиямет-қайымға айналды. “Зенит” нәтижелі ойын өрнегін сабақтай түсіп, бірінші кезең аяқталуға таяғанда + 15 ұпай айырмасымен қара үзді. Бірақ бірінші кезеңнің нүктесін Майкл Томпсон қойып, алаң иелерінің қорғанысын бұзып өтті де, есепті өзгертті – 27:14. Екінші кезеңнің басында Девин Марбл өзінің ВТБ Бірыңғай лигасындағы алғашқы ұпайларын еншілеп, үш ұпайлық соққысын шығыршыққа дөп түсірді. Әрі энд уан орындау құқығына қол жеткізді. Девиннің мүлтіксіз орындаған айып соққысынан кейін “Астана” есеп айырмасын 9 ұпайға дейін қысқарты. Өкінішке қарай, “Астана” осының өзін ұстап тұра алмады, кезеңнің орта тұсына қарай “Зенит” қайтадан 15 ұпаймен ұзап кетті. Бірақ алаң иелерінің бірінші кезеңдегідей нәтижелі ойын өрнегін көрсете алмағандарын атап өтуге тиіспіз. Матчтың бірінші жартысының соңына дейін Майкл Томпсон, Адонис Томас және Девин Марбл үшеуінің дәл соққыларынан кейін есеп айырмасы 11 ұпайға дейін қысқарды. “Астана” екінші кезеңде басым түсті, бірақ небәрі екі ұпай айырмасымен. Әйтсе де, бірінші жиырма минуттан кейін есеп айырмасын сәл де болса, қысқарта түсті.

Майкл Томпсон

“Астана” үшін жағдай соншалықты сорақы емес еді. Әрі іс жүзінде болып тұратындай, 11 ұпай орнын толтыруға болатындай айырма болатын. Бірақ үшінші кезең Қазақстан командасы үшін шектен тыс сәтсіз өтті. Бұл кезеңнің бірінші жартысы Санкт-Петербург командасы үшін де нәтижелі бола қоймады. Олар бес минуттың ішінде бар болғаны 6 ұпай ғана еншіледі. Ал “Астана” үшін осы бес минут одан да бетер болды. Біздің жігіттер осы бес минутта бірде-бір ұпай еншілей алмай діңкеледі. Ал есеп айырмасы 20 ұпайды жуықтады. Майкл Томпсон алтыншы минутта ғана біздің команда үшін осы кезеңдегі алғашқы ұпайды еншіледі. Үшінші кезеңнің екінші жартысында “Зенит” дәл соққыларын жиілетті, ал “Астана” шығыршықты дәл көздеуден қалды. Екі команданың арасы алшақтай түсіп, кезең соңында 30 ұпайды жуықтады. Соңғы кезеңге дейін алаң иелері 28 ұпай айырмасымен қара үзіп кетіп, Эмиль Райковичтің командасына бұл ойында жеңіске жету мүмкіндігі жоққа тән бола бастады. Төртінші кезеңнің басында “Астана” ойын өрнегіне өзгеріс енгізерліктей ештеңе көрсете алмады. Ал “Зенит” болса, жеңіске қарай адымдай берді. Матчтың аяқталуына бес минут қалғанда петерборлықтар 30 ұпаймен алысқа ұзап кетті. Әрі бұл ойында енді қай команданың жеңіске жетерлігі де байқалып тұрді. Алаң иелері тізгін тартпай, “Астанаға” ешқандай мүмкіндік берген жоқ. Қазақстан командасына ұпай еншілеу қиынға соғып, 50 ұпай межесіне олар матчтың аяқталуына бір минут қалғанда ғана жетті. Сөйтіп, “Зенит” айқын басымдықпен жеңіске жетті . Есеп – 85:52.

Егер цифрлар қорытындысына көңіл аударар болсақ, онда бұл ойындағы басты мәселе соққыларды шығыршыққа дөп түсіру болғанын байқаймыз: біздің жігіттер орта қашықтықтан 35 пайыз, ал алыстан 27% пайыз соққыларын ғана сәтті аяқтай алды, ал алаң иелерінің бұл көрсеткіштеріне үңілсек, екі ұпайлық соққылары – 52%, үш ұпайлық соққылары – 45%. Біздің команданың бүгінгі жеңілісінің басты себебі дәл осы көрсеткіштер болды. Сонымен қатар, “Астана” шығыршықтан қайтқан допты қағып алудан да есе жіберіп алды – 27:42.
 


Ең көп ұпай еншілегендер: 

  • «Зенит» – петерборлық команда сапында ресейліктер Антон Пушков (13 ұпай, 6 рет доп қағып алды) және Андрей Зубков (10 ұпай және 9 рет доп қағып алды) ерекше көзге түсті. Сонымен қатар, канадалық Кевин Пангос та көсіле сілтеп, 14 ұпай еншіледі және 9 пас берді.
  • «Астана» – бүгін біздің ойыншылардың көбісінің ойындары үйлеспей қойды. Әйтсе де, Майкл Томпсон біздің команда сапында көзге түсіп, екі команда сапындағы ең көп ұпай еншілеген ойыншы болды – 16 ұпай, 5 рет доп қағып алды, 3 пас берді. Девин Марбл алғашқы ойынында тәп-тәуір нәтиже көрсетті – 13 ұпай, 3 рет доп қағып алды, 3 пас және 2 рет допты қиып әкетті. Адонис Томас 10 ұпай еншілеп, 4 рет доп қағып алды. 


«Зениттің» бас бапкері Хави Паскуаль:
— Жанкүйерлерімізге бізбен бірге болғандары үшін рахмет. 24 күннен кейін алаңға қайта оралғанымызға қуаныштымыз. Бұл – тамаша сезім, Сибур Аренада өз жанкүйерлеріміздің көз алдында тағы да дода көрігін қыздыруға дәмеленгенбіз. Жалпы, ойын жақсы өтті, матчтыі басынан аяғына дейін біз сауатты түрде қорғана білдік. Ең бастысы, өз тактикамызды бұлжытпай жүзеге асырдық. Шабуыда кейбір қателіктер жіберіп алдық. Алайда жігіттеріміз аянған жоқ, барлық күш-жігерлерін салды. Осындай ұзақ үзілістен кейін бұл мүлде оңай емес еді.

«Астананың» бас бапкері Эмиль Райкович:
— «Зенитті» жеңісімен құттықтаймын. Қарсыласымыздың үш аптадан артық уақыт бойы ойнамағандары мүлде сезілген жоқ. Ойыншылары тың, жеңіске ашқұрсақ болып, күш-жігерлерін 100% жұмсады. Ал біз болсақ, кежегеміз кейін тартып, ойнаудан қалдық. Біз жоспарымыздың ешқайсысын жүзеге асырмай, матчқа құрған тактикадан ауытқыдық. Бізге әлі көп тер төгу керек, әсіресе күш-қуатымызға көңіл бөлу қажет.

Салдары: «Зенит» бесінші ойында жеңіске жетіп, турнир кестесіндегі бірінші орынға мейілінше жайғаса түсті. Ал «Астана» жалқы жеңісімен рейтингтегі оныншы сатыда қалды.

Келесі матч: 5 қараша күні астана баскетболшылары ВТБ Бірыңғай лигасы аясындағы кезекті ойынын түзде өткізеді. Олар елге қайтпай, Таллинге жол тартып, онжа жергілікті «Калевпен» додаға түседі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

# Тәж індетінен сақ болып, «Астанаға» жақ болыңыздар!

Қарсылас жайлы мәлімет

Құрылған жылы: 2014 Клубтық түстері: ақ, көк
Мемлекет: Ресей Арена: «Сибур Арена»
Қала: Санкт-Петербург Сайт: https://bc-zenit.com

Сипаттамасы

«Зенит» – ресейдің кәсіби ерлер баскетбол клубы, Санкт-Петербург қаласынан, 2014 жылы құрылған.

Жетістіктері:
  • ВТБ Бірыңғай лигасының чемпионы — 2021/2022
  • Ресей Чемпионатының жеңімпазы — 2021/2022
  • ВТБ Бірыңғай лигасының қола жүлдегері – 2015/2016, 2016/2017, 2017/2018, 2019/2020 
  • Ресей чемпионатының қола жүлдегері – 2015/2016, 2016/2017, 2017/2018, 2019/2020
  • ВТБ Бірыңғай лигасы Суперкубогының күміс жүлдегері — 2021
  • Ресей кубогының финалына шыққан – 2015/2016

Команданың жалпы суреті

Зенит