ВТБ Бірыңғай лигасы 2019/2020
Астана
Астана
ВТБ Бірыңғай Лигасы, Тұрақты біріншілік
14.02.2020, 19:30 Жм
Арена: Жекпе-жек сарайы (Астана)
88:91
Негізгі уақыт
24:24 13:23 22:29 29:15
Ойын нөмірі: RS-107
Көрермен: 1433
Химки
Химки

ВТБ Бірыңғай лигасының көшбасшысы «Химки» «Астанаға» қонаққа келеді

11.02.2020, 13:00    Просмотров: 744
Источник: Баспасөз қызметі
Автор:

Жұма күні, 14 ақпанда «Астана» Президенттік баскетбол клубы ВТБ Бірыңғай лигасының екінші айналымы аясында, өз алаңындағы кезекті кездесуін өткізіп, турнир кестесінде көш бастап келе жатқан Мәскеу облысының «Химки» клубымен додаға түседі.
 


«Химки» – Ресейдің ерлер арасындағы кәсіпқой баскетбол клубы, Мәскеу облысынан, 1997 жылы құрылған. ВТБ Бірыңғай лигасынан бөлек, Еуролига додасында бақ сынайды.

Жетістіктері:

  • Ресей чемпионатының күміс жүлдегері – 2006, 2008, 2009, 2010, 2011, 2012, 2013, 2015, 2017, 2018, 2019
  • Ресей чемпионатының қола жүлдегері – 2007
  • Ресей кубогының жеңімпазы – 2008
  • ВТБ Бірыңғай лигасының чемпионы – 2010/2011
  • ВТБ Бірыңғай лигасы Промо-кубогының күміс жүлдегері – 2008
  • ВТБ Бірыңғай лигасының күміс жүлдегері – 2014/2015, 2016/2017, 2017/2018, 2018/2019
  • ULEB Еуропа кубогының финалына шыққан – 2008/2009
  • Еуропа кубогының финалына шыққан – 2005/2006
  • FIBA Еуролигасы «Төртеу финалында» додаға түскен – 2004/2005
  • ВТБ Бірыңғай лигасы «Төртеу финалында» додаға түскен – 2009/2010
  • Еуропа кубогының жеңімпазы – 2011/2012, 2014/2015

Баскетбольный клуб Химки 2019/2020


Маусым басталған бетте, яғни 20 қазан күні Мәскеу түбінде өткен, бірінші айналымдағы матчта «Астана» биылғы маусымдағы ең сүреңсіз ойынын өткізіп, небәрі 56 ұпай еншілеген. Ал алаң иелері айқын басымдықпен жеңіске жеткен болатын – 73:56. Сол ойыннан кейін «Химки» ВТБ лигасында 12 матч өткізді. «Астананы» ұтқан соң, өз алаңында УНИКС клубының да жауырынын жерге тигізді. Одан кейін өз жерінде «Парма» және «Цмоки-Минск» клубтарын әзер ұтты. Содан соң түзде «Нижний Новгородқа» дес бермеді және «Зениттен» жеңісті жұлып әкетті. Ал «Калевті» өз жанкүйерлері алдында күйрете жеңді. Келесі «Локомотив-Кубань» клубымен өткен өз алаңындағы ойында «Химки» биылғы маусымда бірінші рет жеңілістің кермек дәмін татты. Әзірше бұл – химкиліктердің жалқы жеңілісі. Бұдан кейін Мәскеу облысының ұжымы өзінің басты қарсыласы ЦСКА саңлақтарын өз алаңында ойсырата жеңді. Әрі «Енисеймен» өткен тартысты матчта да басым түсті. Түздегі кезекті ойындарында «Цмоки-Минск» клубын тізе бүктірді, оларға тіпті УНИКС те төтеп бере алмады. Ал 10 ақпан күні өткен аса тартысты соңғы кездесуінде «НН» баскетболшыларын биылғы маусымда екінші рет тізерлетті. Бұдан бөлек, «Химкидің» Еуролигадағы ойындар күнтізбесі өте күрделі екендігін айта кетуге тиіспіз.

Турнир кестесіндегі жағдай: «Химки» биыл ВТБ Бірыңғай лигасындағы ең үздік маусымдарының бірін өткізіп келеді. Дәл қазір бірінші орынға орнығып-жайғасып алған. Мәскеу облысының командасы биылғы маусымда әзірше бір-ақ рет ұтылды. Десек те, бір емес, бірнеше ойында жеңістен айырылып қалуға шақ қалды. Мәселен, бес ойында 5 ұпайдан кем есеп айырмасымен жеңіске жетті. Реті келгенде айта кетейік, химкиліктер түзде үйдегісінен жақсы ойнайды. Әлгі қауіпті бес ойынның бәрі де, сондай-ақ жалқы жеңілісі өз алаңында өткен ойындар болатын. Айтпақшы, химкиліктердің өкшесін басып келе жатқан ЦСКА мен «Локомотив-Кубань» Мәскеу облысы командасынан 3 ұпай қалып келеді. Яғни үш жеңістері кем. «Астана» ЦСКА-дан ұтылып қалған соң, плей-офф аймағынан тыс қалып, 9-шы орынға орналасты. «Химкиді» жеңсе, плей-офф аймағына оралады, ал ұтылып қалса, Қазақстан командасы 11-ші орынға сырғиды.

Команда құрамындағы өзгеріс: команда құрамынан ресейлік екі ойыншы кетті – тәжірибелі Евгений Валиев және өрімдей жас Тимофей Якушин. Екеуі де «Парма» клубына ойысты. Ұжымның негізгі құрамына көмек ретінде фарм-командасынан жас шабуылшы Иван Евстигнеев қосылды. Әрі ол бес ойында алаңға шығып та үлгерді. Ал жақында ғана «Химкиге» америкалық алып шабуылшы Томас Эрл Робинсонның оралғаны мәлім болды. Томастың ҰБҚ-ындағы карьерасы адам қызығарлықтай деуге де болады. Ол 2009 жылдан 2017 жылға дейін «Сакраменто Кингз», «Хьюстон Рокетс», «Портленд Трэйл Блэйзерс», «Филадельфия Севенти Сиксерс», «Бруклин Нетс» және «Лос-Анджелес Лейкерс» секілді командалар сапында ойнады. 2017/2018 маусымында «Химки» сапында өнер көрсетіп, содан соң Қытайға кеткен болатын. Енді, міне, бір жарым маусымнан кейін Мәскеу облысы ұжымына қайта оралып отыр.

Команда көшбасшылары: қорғаушы Алексей Швед – Мәскеу облысы командасының шүбәсіз көшбасшысы. Сондай-ақ Бірыңғай лиганың Ұпай, Пас және Тиімділік секілді параметрлері бойынша көш бастап келеді. Алексей орта есеппен бір ойында 22.7 ұпай еншілеп, 9.3 пас беріп жүр, тиімділігі – 24.8. Нәтижелі көрсеткіштері бойынша командада екінші және үшінші орындарда – америкалық орталық шеп ойыншысы Девин Букер мен латыш шабуылшысы Янис Тимма. Бұлардың бәрі де бастапқы бестікте ойнайды. Американың екі алып шабуылшысы, яғни Джереми Эванс пен Энтони Гилл командаға көп пайда тигізіп жүр. Бірақ соңғы рет екеуі 19 қаңтар күні ойнаған. Ал Томас Эрл Робинсонның командаға қайта оралуы туралы берген сұхбатында Римас Куртинайтис аталмыш америкалық екі шабуылшының командаға қол жетімді болмай тұрғанын мәлімдеді. Дәл қазір сенім арта алатын ойыншылары – швед шабуылшысы Йонас Жеребко, серб қорғаушысы Стефен Йовович және тағы бір латыш қорғаушысы Дайрис Бертанс. Ресейлік ойыншылардың ішінен шабуылшы Сергей Моня мен Сергей Карасевті, сондай-ақ Егор Вяльцев пен Вячеслав Зайцевті атап өтуге болады. Бұлар ойынның басынан бастап, әр матчта орта есеппен он бес минуттан артық ойнап жүр.

Матч жұма күні, яғни 14 ақпанда Нұр-Сұлтандағы «Жекпе-Жек» спорт кешені аренасында өтеді. Басталуы – астана уақытымен 19:30-да. Матчтың онлайн-трансляциясы біздің сайтымыздың Ойын орталығы бөлімінде, сондай-ақ QazSport телеарнасында тікелей эфирде жүргізіледі. Билеттер Ticketon.kz сайтында сатылымға шығып та қойды.
 


Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» ВТБ Бірыңғай лигасында «Химки» клубын ұтып кете жаздады

15.02.2020, 10:00    Просмотров: 423
Источник: Баспасөз қызметі
Автор:

Өз алаңындағы шектен тыс шиеленісті өткен матчта «Астана» Президенттік баскетбол клубы ВТБ Бірыңғай лигасының көшбасшысы, Мәскеу облысынан келген «Химки» клубын ұтуға шақ қалды.

«Химки» – ВТБ Бірыңғай лигасының көшбасшысы, биылғы чемпионаттың негізгі бөлігінде небәрі бір-ақ рет ұтылған ұжым. Мәскеу облысының командасы бұл ойында да фаворит болды. Бірақ Қазақстанға негізгі құрамдағы ойыншыларының бәрі келген жоқ. Нақтырақ айтқанда, Алексей Швед пен Янис Тимм келмеді. Алайда ол екеуі болмаса да, де қонақтар сапында деңгейі жоғары ойыншылар көп еді – Дэвин Букер, Йонас Жеребко, Стефан Йович, Дайрис Бертанс, Егор Вяльцев, Вячеслав Зайцев және Сергей Моня. Сондай-ақ биыл ВТБ Бірыңғай лигасы аясында алаңға бірінші рет Крис Крамер шығып, Томас Робинсон тырнақалды ойынын өткізді. Қазақстан командасы үшін бұл ойын өте маңызды еді, бірақ қарсыласы азулы ұжым болды. Ойын басталғанда «Астана» құрамында алаңға шыққандар – Джеймс Флоренс, Вадим Щербак, Душан Ристич, АлександрЖигулин және Малкольм Хилл.

«Астана» баскетболшылары ортаға лақтырылған допты қағып алды, бірақ алғашқы шабуылдары сәтсіз аяқталды. Ал қонақтар өздерінің бірінші шабуылдарында үш ұпай еншіледі. Джеймс Флоренс алаң иелері үшін осы ойындағы алғашқы ұпайларды еншілегенімен, «Химки» доға сыртынан шығыршықты дәл көздеуден жаңылмай, бірден қара үзіп кетті. Екі минуттан кейін 7 ұпай айырмасымен алда тұрды. Біздің команда есепті тез теңестірді, ал Джеймс Флоренс үш ұпайлық соққысымен өз ұжымын алға да шығарды. Кезең соңына дейін командалар алма-кезек ұпай еншілеп, бір-бірінен қалысқан жоқ. «Химки» алға шықты, бірақ біздің командадан құйрық үзіп кете алмады. Бірінші кезеңнің соңында Джеремайя Хиллдің үш ұпайлық добынан кейін «Астана» тағы да алға шықты. Бірақ бұл кезең тең есеппен аяқталды. Екінші кезеңнің бірінші жартысы тең дәрежеде өтті және есеп те бірнеше рет теңесті. Бұл кезең бел ортасынан ауғанда «Химки» қарқынын үдете түсіп, алысқа ұзай бастады. Есеп айырмасы бірте-бірте ұлғая түсті. Біздің жігіттерге ұпай еншілеу қиындап, қонақтар шығыршықты доға сыртынан дәл көздеуді жиілетті. Ойынның бірінші жартысы аяқталуға жақындағанда, қонақтар есеп айырмасын 10 ұпайға жеткізді. Әрі матчтың бірінші бөлігі осылай аяқталды да – 37:47.

Джеремайя Хилл

Негізі, матчтың бірінші жартысының соңғы бес минутында ғана қонақтар басымдық танытты. Әйтпесе, қалған уақытта біздің команда есе жібере қойған жоқ болатын. 10 ұпай айырмасы біздің жігіттердің сағын сындыратындай басымдық емес-тін. Әрі Эмиль Райковичтің командасы таразы басын теңестіре алатындай еді. Бірақ «Химки» бұған үзілді-кесілді қарсы болды. Басында 10 ұпай айырмасы біразға дейін сақталып тұрды. Бірақ үшінші кезеңнің ортасына қарай қонақтар 15 ұпай айырмасымен ұзай түсті. Қазақстандықтар ойын өрнегіне өзгеріс енгізуге тырысты, бірақ ол да қолдан келер емес. Ал үшінші кезеңнің аяқталуына бір минут қалғанда, есеп айырмасы 20 ұпайды жуықтады. Сөйтіп, төртінші кезең басталмай тұрып, «Астана» ірі есеппен ұтылып жатты – 17 ұпай айырмасымен. Мұндай есеп айырмасын 10 минутта теңестіруге болады, бірақ іс жүзінде жүзеге асыру оңай емес. Қазақстан командасы комбек жасап, қонақтарын қуып жетуге тырысты. Бірақ «Химки» өз басымдығын уысынан шығара қоймады. Матчтың аяқталуына бес минут қалғанда Мәскеу облысынан келген команда 14 ұпай айырмасымен ұтып жатты. Кезеңнің орта тұсында екі команда үш ұпайлық соққыларымен көрермендерді сүйсіндірді. Одан кейін Александр Жигулин данк орындап, есеп айырмасын 11 ұпайға дейін қысқартты. Әрі Қазақстан командасын жігерлендіріп, серпіліс жасауына қамшы болды. Оны Малкольм Хилл қолдап, қазақстандық шабуылды айып соққыларымен түйіндеп, үшеуін де мүлтіксіз орындады. Ал есеп 8 ұпайға дейін қысқарды. «Астана» қорғаныста мұқият ойнап, «Химки» ұпай ала алмады. Ал қазақстандықтардың шабуылдары нәтижелі болды. Александр Жигулин тағы да ұпай еншілеп, одан кейін ойын тізгінін Малкольм Хилл өз қолына алды. Ол тіпті есеп айырмасын мейілінше қысқартты. «Химкидің» жаттықтырушылары тайм-аут алуға мәжбүр болды. Бірақ бұл да оларға көмектескен жоқ. Матчтың аяқталуына 45 секунд қалғанда екпін алған Малкольм Хилл таразы басын теңестірді. «Химкиліктердің» келесі шабуылында доп алаң сыртына шығып кетті. Даулы жағдай! Төрешілер өз шешімдерін бейне қайталаудан анықтауға кетті. Ойынның бітуіне 12 секунд қалған. Енді ойын тағдыры төрешілер шешіміне байланысты еді. Егер олар допты біздің командаға берсе, онда «Астананың» шабуылға шығуға уақыттары болатын еді және біздің ойыншылар мүлт кетіп, ұпай еншілей алмаса, ойын овертаймға ұласар еді. Ал егер төрешілер допты «Химкиге» берсе, онда олардың шабуылдарын жалғастыруына 3 секунд уақыттары болар еді. Бейне қайталауды ұзақ көріп, оны көп талқылаған төрешілер бізге оңтайлы емес, тіпті «қауіпті» шешім қабылдап, допты қонақтарға берді. «Химки» үш секундтың ішінде допты шығыршыққа лақтырып үлгерді. Әрі мүлт кеткен жоқ. Енді біздің командада 8 секунд уақыт бар. Есепті теңестіріп, ойынды овертаймға созу үшін тек үш ұпай керек. Өкінішке қарай, біздің команданың соққысы ойдағыдай болмай шықты және нысанаға жетпеді. «Химки» бүгін жеңісті жұлып әкетті. Есеп – 88:91 (24:24, 13:23, 22:29, 29:15).
 


Ең көп ұпай еншілегендер: 

  • «Астана» – Малкольма Хилл екі команда сапында да ең көп ұпай еншілеген ойыншы болды. Ол команда қоржынына 24 ұпай салып, 4 рет доп қағып алды және 3 пас берді. Джеффри Крокет бүгін 17 ұпай еншілеп, 4 рет доп қағып алды және 3 пас беріп, тура осынша рет допты тартып әкетті. Джеремайя Хилл өз есебіне дабл-дабл жазды – 12 ұпай + 10 пас, сондай-ақ 4 рет доп қағып алып, 4 рет допты тартып әкетті. Қазақстандықтар ішінен ең тиімді ойыншы Дмитрий Гаврилов болды. Ол небәрі 4 ұпай еншіледі, бірақ 8 рет доп қағып алды. Джеймс Флоренс 13 ұпай еншілеп, 4 рет доп қағып алды. Ал Александр Жигулин небәрі 6 ұпай еншілесе де, Малкольм Хиллмен бірге қазақстандық комбектің бастаушысы болды.
  • «Химки» – Дэвин Букер өз командасының жеңіске жетуіне сүбелі үлес қосты  (19 ұпай + 7 рет доп қағып алды), Дайрис Бертанс бүгін өзінің 18 ұпайының бәрін доға сыртынан еншіледі, ал Стефан Йович (13 ұпай, 6 рет доп қағып алды, 8 пас) үш ұпайлық соққысымен командасына жеңіс әперді.  


«Астана» клубының бас бапкері — Эмиль Райкович:
— Мен өз командамды құттықтағым келеді. Өйткені олар соңына дейін шайқасты. «Химки» – Еуролига командасы, ВТБ лигасының биылғы маусымында бір рет қана ұтылды. Әйтсе де, біздің жігіттер ойын соңында есепті теңестірді, «–17» ұпай айырмасымен ұтылып жатсақ та, берілген жоқ. Бәрі де соңғы сәтте, допты қай команда иеленуі керек болғанда шешілді. Өкінішке қарай, допты «Химки» алып, Йович өте маңызды үш ұпайлық соққысын дөп түсірді. Мен өз жігіттерімді мақтан тұтамын және қызу қолдап отырған жанкүйерлерімізге көп рахмет.

«Химки» клубының бас бапкері — Римас Куртинайтес:
— Ойынымыз көңілден шықпайды, жеңгенімізге қуаныштымын. Бүгін «+15» кезінде біз Еуролига командасына сай ойын өрнегін көрсете алмадық. Біз нәтижеге қол жеткіздік, бұл біз үшін қиын емес, бірақ одан айырылып қалмау керек қой. Қателіктер жібере бастадық, қоғаныста жаңылыстық. Бүгін 10 рет қайтқан допты қағып ала алмадық. Бәрін де шаршағанымызға аудара салуға болады, бірақ мен одан аулақпын. Біз кәсіпқойлармыз, біз тынығып үлгеріп, одан кейін барлық күш-жігерімізді салып ойнауымыз керек. Бүгінгі ойынымызға мүлде ырза емеспін. Тек жеңіске жеткеніміз болмаса…

Салдары: Бәрі де бұл аптаның қазақстандықтар үшін өте ауыр болатынын білді. Дүйсенбіде – ЦСКА, ал жұмада – «Химки». Өкінішке қарай, «Астана» қайран қалдыра алмай, 11-орынға сырғыды. Бірақ біздің команданың плей-офф аймағына қайта оралуға болатын мүмкіндігі – мол. Өйткені 6-орындағы команданың «Астанадан» бір ғана жеңісі артық. Сондықтан кез келген мүмкіндік үшін жан алып, жан беру керек. «Химки» болса, турнир кестесіндегі бірінші орынға мейілінше жайғасты.

Келесі матч: астана баскетболшыларының ВТБ Бірыңғай лигасында көктемге дейін дамылдап алатын мүмкіндігі бар. Нақтырақ айтқанда, 1 наурыз күні Эмиль Райковичтің шәкірттері түзде Красноярскінің «Енисей» командасымен додаға түседі. Ал өз алаңында «Астана» 8 наурыз күні Эстонияның «Калев» клубымен ойнайды. Ал оған дейін біздің жігіттердің көбісі өз алаңымызда өтетін, 2021 жылғы Азия кубогының іріктеу ойындарында Қазақстан құрамасының намысын қорғайды.
 


Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құрылған жылы: 1997 Клубтық түстері: сары, көк
Мемлекет: Ресей Арена: Мытищи Арена
Қала: Химки Сайт: bckhimki.ru

Сипаттамасы

«Химки» – ресейдің ерлер арасындағы баскетбол клубы, Мәскеу облысынан.

Жетістіктері:
  • Ресей чемпионатының күміс жүлдегері – 2006, 2008, 2009, 2010, 2011, 2012, 2013, 2015, 2017, 2018, 2019
  • Ресей чемпионатының қола жүлдегері – 2007
  • Ресей кубогының жеңімпазы – 2008
  • ВТБ Бірыңғай лигасының чемпионы – 2010/2011
  • ВТБ Бірыңғай лигасының күміс жүлдегері – 2014/2015, 2016/2017, 2017/2018, 2018/2019
  • ULEB Еуропа кубогының финалына шыққан – 2008/2009
  • Еуропа кубогының финалына шыққан – 2005/2006
  • FIBA Еуролигасы «Төртеу финалында» додаға түскен – 2004/2005
  • ВТБ Бірыңғай лигасы «Төртеу финалында» додаға түскен – 2009/2010
  • Еуропа кубогының жеңімпазы – 2011/2012, 2014/2015

Команданың жалпы суреті

Химки