ВТБ Бірыңғай лигасы 2021/2022
УНИКС
Казань
ВТБ Бірыңғай лигасы, Тұрақты біріншілік
14.11.2021, 21:00 Жс
Арена: Баскет Холл (Казань)
71:59
Негізгі уақыт
26:15 10:16 15:12 20:16
Ойын нөмірі: RS-36
Көрермен: 1307
Астана
Нұр-Сұлтан

«Астана» Қазанда ВТБ Бірыңғай лигасының көшбасшысымен додаға түседі

13.11.2021, 18:30    Просмотров: 9
Источник: Баспасөз қызметі
Автор:

2023 жылғы Әлем кубогының іріктеу матчтары өтетін 1-ші ойын кезеңі қарсаңында «Астана» баскетбол клубы ВТБ Бірыңғай лигасының көшбасшысына қонаққа барады – Қазанның УНИКС клубына. Матч жексенбі күні, яғни 14 қарашада Қазан қаласында өтеді. Басталуы – астана уақытымен 21:00-де.

УНИКС
 – Ресейдің ерлер арасындағы кәсіпқой баскетбол клубы, Қазан қаласынан. 1991 жылы құрылған. Биылғы маусымда ВТБ Бірыңғай лигасынан бөлек Еуролига додасында да өнер көрсетеді.

Жетістіктері:

  • Ресей чемпионатының күміс жүлдегері − 2001, 2002, 2004, 2007, 2016, 2021 
  • Ресей чемпионатының қола жүлдегері − 2000, 2003, 2005, 2009-2011, 2013/2014, 2018/2019
  • Ресей кубогының жеңімпазы − 2003, 2009, 2014 
  • FIBA Еуролига чемпионы − 2003/2004 
  • Еуропа кубогы жеңімпазы − 2010/2011
  • Еуропа кубогының финалына шыққан – 2013/2014, 2020/2021
  • NEBL чемпионы − 2002/2003. 
  • ВТБ Бірыңғай лигасының күміс жүлдегері − 2009/2010, 2011/2012, 2015/2016, 2020/2021 
  • ВТБ Бірыңғай лигасының қола жүлдегері − 2010/2011, 2018/2019


Баскетбольный клуб УНИКС

Команда құрамы:

Қазан командасы былтырғы маусыммен салыстырғанда құрамын едәуір өзгертті. Маусым аралығында ұжымнан америкалықтар Нэйт Уолтерс, Окаро Уайт, Джамар Смит, Джордан Морган, Джон Холланд кетіп қалды. Әрі македондық болып тіркелген Джордан Теодор да кетті. Ресей ойыншыларынан Александр Разумов пен Кирилл Аношин УНИКСпен келісімшарттарын ұзартқан жоқ. Павел Антипов “Нижний Новгород” командасына, ал Евгений Колесников пен Павел Сергеев “Автодор” клубына ауысты. Қазандағы тұрғылықты орындарын тек бес баскетболшы ғана өзгерткен жоқ – америкалықтар Джон Браун III, Айзея Кэнэн және ресейліктер Георгий Жбанов, Дмитрий Узинский, Артем Клименко.

Биылғы маусымда УНИКС сапында үш америкалық ойыншы Бірыңғай лигасында алғаш рет додаға түсті. Тәжірибелі қорғаушы О Джей Мэйо өзінің кәсіби карьерасындағы бастапқы 8 маусымды NBA-дағы “Мемфис Гриззлис”, “Даллас Маверикс” және “Милуоки Бакс” клубтары сапында өткізген. Одан кейін пуэрторикалық “Атлетикос де Сан-Херман” командасында ойнады. Ал соңғы үш маусымды Азияда өткізді – Тайванның “Дацин Тайгерс” және “Тайбэй Фубон Брэйвз”, Қытайдың “Хунань Жинжиань Мие” және “Ляонин Флаин Леопардс” командалары құрамында. Америкалық қорғаушы Лоренцо Браун Құрама Штаттарда NBA мен NBA Жетілу лигасы арасында “сенделген”. NBA-да ол “Филадельфия СевентиСиксерс”, “Миннесота Тимбервулвз”, “Феникс Санс” және “Торонто Рэпторс” клубтары сапында ойнады. Ал NBA Жетілу лигасысында “Делавер ЭйтиСевенерс”, “Спрингфилд Армор”, “Грэнд Рэпидс Драйв” және “Рэпторс 905” ұжымдарының намысын қорғаған. Сонымен қатар, Лоренцо Қытайда “Жежиань Голден Буллз” және “Гунчжоу Лонг Лайнс” сапында өнер көрсетті. Әрі Сербияның “Црвен Звезда” және Түркияның “Фенербахче” клубтары сапында да ойнап үлгерді. Америкалық шабуылшы Джарелл Брэнтли УНИКСке дейін екі маусым NBA-дағы “Юта Джазз” сапында, сондай-ақ оның NBA Жетілу лигасысындағы фарм-командасы “Солт-Лейк Сити Старз” құрамында ойнаған. Хорватия шабуылшысы Марио Хезонья өзінің кәсіби карьерасын Испанияның “Барселонасы” жүйесінде бастаған. Бес маусым NBA-дағы “Орландо Мэджик”, “Нью-Йорк Никс” және “Портленд Трэйл Блэйзерс” клубтарында ойнаған. Сондай-ақ, Грекияның “Панатиакос” командасы мен Хорватия құрамалары сапында өнер көрсеткен. Италия қорғаушысы Марко Списсу тек өз елінде ойнап, “Торрес”, “Динамо Сассари”, “СантОрсола”, “КУС Бари”, “Касалпустерленго”, “Виола Реджио Калабриа”, “Дертола” және “Виртус Болонья” клубтарының намысын қорғаған. Әрі 2019 жылы ЕуроКубок жеңімпазы атанған. Нигерияның орталық шептегі ойыншысы Тони Джекири Түркияның “Бандырма Кырмызы” командасынан бастап, Бельгияда “Оостенде” командасымен Белгия чемпионы атанып, осы елдің кубогының да жеңімпазы болған. Сондай-ақ, өз карьерасында Түркияның “Газиантеп”, Францияның “АСВЕЛЛ” және Испанияның “Баскония” командаларының де жейделерін киген. Қазан командасына биылғы маусымда ресейлік төрт тәжірибелі ойыншы ауысып келді. Шабуылшы Андрей Воронцевич “НН” командасынан ойысты, ал бұған дейін он маусымнан артық уақыт бойы ЦСКА намысын қорғаған болатын. Қорғаушы Артем Комолов та “Нижний Новгородтан” келді, ол онда соңғы төрт  маусымын өткізіп, оған дейін “Зенит” сапында ойнаған. Қорғаушы Вячеслав Зайцев бұған дейінгі маусымдарды “Химки” сапында өткізіп, ал оған дейін “Красный Октябрь” және “Енисей” командаларында болған. Шабуылшы Евгений Валиев те – бұрынғы “Химкидің” ойыншысы, сондай-ақ “Парма”, “Зенит” және “Триумф” командаларында ойнаған.

Бас бапкер: УНИКС маусым аралығында жаттықтырушыларын толықтай дерлік ауыстырды. Бас бапкер, грек Димитрис Прифтис пен оның көмекшілері және жерлестері Томас Нику мен Валилес Симтсак командадан кетті. Жаңа бас бапкер болып Хорватия маманы Велимир Перасович бекітілді. Велимир өз карьерасын ойыншы ретінде бастап, Олимпиада ойындарының күміс жүлдегері, Әлем чемпионы, Еуропа чемпионы атанып, екі рет Еуропаның қола жүлдегері болған. Югославияның “ПОП 84” командасында, сондай-ақ Испанияның “Бреоган”, “Таугрес”, “Фуэнлабрада” және “Аликанте” клубтарында ойнаған. Жаттықтырушылық карьерасын өзі түлеп ұшқан “ПОП 84” командасынан бастаған. Бірақ ол кезде бұл ұжым “Сплит” деп аталатын. Испанияның алты командасының тізгінін ұстаған –“Севилья”, “Таугрес”, “Эстудиантес”, “Валенсия”, “Лабораль Кутча” және “Баскония”. Сондай-ақ, Түркияның “Эфес Пилсен” және “Анадолу Эфес”, Хорватияның “Цибона” командалары мен Хорватия құрамасын жаттықтырған. Қазанда оған словениялық Юре Дракслар, грек Константинос Каймакоглу (былтырғы маусымда ғана УНИКС-тің сапында ойнаған), серб Джордже Варагич, хорват Милан Каракаш және былтырғы маусымнан қалған жалғыз бапкер, ресейлік Артур Бигеев көмектеседі.

Команда көшбасшылары: ВТБ Бірыңғай лигасында УНИКСтің ең тиімді және нәтижелі ойыншысы хорват Марио Хезонья болып жүр. Сонымен қатар, көшбасшылар қатарында – Джон Браун III, Айзея Кэннэн, Лоренцо Браун және Андрей Воронцевич. Бастапқы бестікке Джаррелл Брэнтли, Дмитрий Узинский және Тони Джекири үшеуі де жиі ілігеді.

Турнир кестесіндегі жағдай: “Астана” дәл қазір екі жеңіс, екі жеңілісімен ВТБ Бірыңғай лигасында жетінші орынды иеленіп тұр. УНИКС алты ойында бес рет жеңіске жетіп, бірінші орынға оналасқан. Қазандықтар маусым басында “Локомотив-Кубань” мен “Зелена Гура” командаларын тізе бүктірді. Содан кейін “Енисейден” жеңісті жұлып алып, “Автодордан” ұтылып қалды. Әрі «ПАРМАны» да оңайшылықпен ұта алмады. Есесіне, соңғы матчта ЦСКА саңлақтарын сан соқтырып кетті. Еуролигада Қазан командасы тоғыз ойын өткізіп, соның үшеуінде жеңіске жетті. Бұл ретте, 12 қараша күні олар Грекияның “Панатинаикос” командасын ұтты.

Кездесулер тарихы: ВТБ Бірыңғай лигасы аясындағы кездесулерінде «Астана» мен УНИКС алаңда 17 рет жолықты. Соның екеуінде ғана астана командасы Қазаннан шыққан әйгілі қарсыласынан айласын асыра алды.

Қызықты деректер:

  • “Астана” УНИКС-ті соңғы рет 2018/2019 маусымында ұтқан, әрі бұл Қазанда жүзеге асқан болатын.
  • Букмекерлер “Астананың”жеңіске жететіндігіне мүлдем сенбейді.


Матч жексенбі күні, яғни 14 қарашада Қазандағы Баскет-Холл алаңында өтеді. Басталуы – астана уақытымен 21:00-де. Матчтың онлайн-трансляциясы біздің сайтымыздың басты бетінде жүргізіледі.

Жалпы, турнир жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» Қазанда қалт жіберді доптарын алыстан

14.11.2021, 23:00    Просмотров: 16
Источник: Баспасөз қызметі
Автор:

«Астана» баскетбол клубының түздегі ВТБ Бірыңғай лигасындағы турнир кестесінің төресімен, яғни Қазанның УНИКС командасымен өткен ойыны біздің жігіттер үшін маңызды сын болды. Бұл ойын аса нәтижелі болмады, әрі біздің команданың допты алыстан дөп түсіру коэффициенті өте төмен болды.

УНИКС ортада лақтырылған допты іліп алып, бірінші шабуылында-ақ есеп ашты. Біздің команда да көп күттірген жоқ – Джейлен Барфорд осы матчтағы алғашқы ұпайларын еншісіне жазды. Әйтсе де, матч басында алаң иелері көсіле сілтеді. Олар екі минуттан кейін бес ұпай айырмасымен алда тұрды. Энтони Хики кезеңнің бел ортасына дейін үш шабуылын сәтті аяқтап, Скайлар Спенсер де доп салды. Бірақ УНИКС те қарап қалмады, өз мүмкіндіктерін қалт жібермей, соның арқасында 9 ұпай айырмасымен ұтып жатты, бес минут ойын уақытынан кейін. Ал бір минуттан қазандықтар екі таңбалы сан айырмасымен алға озды. Марк Тихоненко біздің команда сапынан бірінші рет алыстан доп салып, кезең соңына дейін айып соққысы сызығынан Барфорд мергендік танытты. Әйткенмен, УНИКС бірінші онминуттықта екі таңбалы сан айырмасымен басым түсті – 26:15. Тихоненко екінші кезеңнің басында да доға сыртынан доп салды. Бастапқы бес минутта екі команда да нәтижелі ойын өрнегін көрсете алмады. Марк Тихоненкодан кейін осы бес минутта Хики мен Кэмпбелл екі ұпайдан еншіледі. Ал алаң иелері небәрі бес ұпайды қанағат тұтты. Есеп айырмасы 9 ұпайды құрады. Антонио Кэмпбелл өзінің үш ұпайлық соққысымен оны алты ұпайға дейін қысқартты. Спенсер олжалаған екі ұпайдан кейін, “Астана” есеп айырмасын төрт ұпайға дейін қысқартты. Матчтың бірінші жартысының соңғы минуттарында УНИКС тағы бес ұпай еншіледі, ал Қазақстан командасы сапынан Барфорд пен Кэмпбелл доп салды. Сөйтіп, “Астана” екінші кезеңде басым түсті. Негізінен, қорғаныста сауатты ойын үлгісін көрсетіп, азулы қарсыласының 10 ұпайды ғана қанағат тұтуына мүмкіндік берді. Десек те, жиырма минут ойын уақытынан кейінгі жалпы есепте ұтылып  жатты – 36:31.

Джейлен Барфорд

Бірінші кезеңде кежегесі кейін тартып, екіншісінде намысқа тырысып, жалпы есепте бес ұпай айырмасымен ұтылып жатқан астаналықтардың матчтың екінші жартысында да дода көрігін қыздара түсетіндіктері анық еді. Бірақ, өкінішке қарай, УНИКС үшінші кезеңнің басында біздің командадан асып түсті. Үш минуттан астам уақыт ішінде біздің команда сапынан тек Барфорд екі ұпай еншілеп, ал Спенсер айып соққысы сызығынан бір рет қана доп салды. Алаң иелері болса, осы уақыт аралығында есеп айырмасын он ұпайға жеткізді. Үшінші кезеңнің ортасына дейін Джейлен Барфорд екі рет шығыршықты дәл көздеді. Ал Максим Марчук, алаң иелеріның шығыршығы түбінде жалғыз қалғанын пайдаланып, допты үстінен салды. Әрі есеп айырмасын алты ұпайға дейін қысқартты. Алайда қазандықтар лезде есеп айырмасын екі таңбалы санға жеткізді. Антонио Кэмпбелл энд уан орындап, осы кезеңде доп салған соңғы ойыншы болды. Соңғы онминуттық алдында “Астана” 51:43 есебімен ұтылып жатты. Мұндай есеп айырмасында, әрине, жеңісті жұлып алуға болады, он минутта. Бірақ ол үшін доға сыртынан доп салу коэффициентін жақсарту керек еді. Ал біздің команданың бастапқы үш кезеңдегі бұл көрсеткіші өте теөмен болды. Соңғы кезеңнің бастапқы минуттарында екі команда екі нәтижелі шабуылдарымен алмасты. Біздің сапымыздан Барфорд пен Хики доп салды. Ал есеп айырмасы сол сегіз ұпай шамасында сақталып тұрды. Қазақстан командасының үш ұпайлық коэффициенті титтей де өзгерген жоқ. Ал ойыншыларымыз доға сыртынан мүлт кеткен соққыларын жалғастыра берді. Бұған қоса олар орта қашықтықтан да мергендік таныта алмай, доптан айырылып қалу сәттері жиілей бастады. УНИКС болса, дәл осы уақыт аралығында көсіле сілтеді. Әрі матчты аяқталуына бес минут уақыт қалғанда 20 ұпай айырмасымен ұтып жатты. Сөйтіп, бұл ойында қай команданың жеңіске жететіндігі белгілі де болды. Джейлен Барфорд екі айып соққысыни мүлтіксіз орындап, Энтони Хики алаң иелерінің қорғанысын бұзып өтіп, ал Рустам Мырзағалиев ақыры үш ұпайлық соққысын дөп түсірді. Алаңдағы дода көрігі мейілінше қыза түсіп, есеп айырмасы он үш ұпайға дейін қысқарды. Бірақ екі минут қана ойын уақыты қалған еді. Уақыт өткен сайын алаң иелерінің мүмкіндіктері арта түсті. Әрі шабуылдары да нәтижелі болып отырды. Енді, УНИКС-тің жеңіске жететіні анық еді. Кэмпбелл екі ұпай еншілеп, Мырзағалиев ойынды үш ұпайлық соққысымен түйіндесе де, бұл матчтың қорытынды есебіне әзер ете алмады. 71:59 – УНИКС жеңіске жетті.
 


Ең көп ұпай еншілегендер:

  • «Астана» – біздің сапымызда ең тиімді ойыншы Антонио Кэмпбелл болды, ол өз еншісіне дабл-дабл жазды – 12 ұпай, 12 рет доп қағып алды, 2 пас және 2 рет допты тартып алды. Джейлен Барфорд 16 ұпай еншілеп, 3 рет доп қағып алды, 3 пас берді. Ал Энтони Хики 12 ұпай жинап, 3 рет доп қағып алды, 6 пас берді.
  • «УНИКС» – Алаң иелерінің екі бірдей ойыншысы тиімділігі жағынан 23 балдан жинады. Марио Хезонья – 18 ұпай, 9 рет доп қағып алды, 3 пас, 3 рет допты тартып алды және 1 блокшот; Джаррелл Брэнтли – 14 ұпай, 9 рет доп қағып алды, 2 пас, 2 рет допты тартып алды және 1 блокшот.


Келесі матч: Енді «Астана» ойыншылары ВТБ Бірыңғай лигасындағы клубтық жейделерін тек үш аптадан кейін ғана киеді. Нақтырақ айтқанда, 5 желтоқсан күні Нұр-Сұлтанға Эстонияның «Калев» командасы келеді. Ал оған дейін біздің жігіттер Ұлттық құрама сапында Әлем кубогының іріктеу кезеңінде екі матч өткізеді. Ұлттық лига аясындағы келесі қос кездесу өз алаңымыздағы алғашқы ойындар болады. 8 және 9 желтоқсан күндері Нұр-Сұлтанға жауапты матчтарын өткізу үшін Қостанайдың «Тобыл» командасы қонаққа келеді.

Жалпы, турнир жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құлылған жылы: 1991 Клубтық түстері: ақ, жасыл
Мемлекет: Ресей Арена: Баскет Холл
Қала: Казань Сайт: www.unics.ru

Сипаттамасы

УНИКС – Ресейдің ерлер арасындағы кәсіпқой баскетбол клубы, Қазан қаласынан, 1991 жылы құрылған.
 
Жетістіктері:
  • Ресей чемпионатының күміс жүлдегері − 2001, 2002, 2004, 2007, 2016, 2021
  • Ресей чемпионатының қола жүлдегері − 2000, 2003, 2005, 2009−2011, 2013/2014, 2018/2019
  • Ресей кубогының жеңімпазы − 2003, 2009, 2014
  • FIBA Евролига чемпионы − 2003/2004
  • Еуропа кубогы жеңімпазы − 2010/2011
  • Еуропа кубогының финалына шыққан – 2013/14 
  • NEBL чемпионы − 2002/2003
  • ВТБ Бірыңғай лигасының күміс жүлдегері − 2009/2010, 2011/2012, 2015/2016, 2020/2021
  • ВТБ Бірыңғай лигасының қола жүлдегері − 2010/11, 2018/2019

Команданың жалпы суреті

УНИКС