ВТБ Бірыңғай лигасы 2020/2021
Астана
Нұр-Сұлтан
ВТБ Бірыңғай лигасы, Тұрақты біріншілік
09.01.2021, 14:00 Сн
Арена: Велотрек «Сары-Арқа» (Нұр-Сұлтан)
86:82
Негізгі уақыт
20:22 20:21 24:19 22:20
Ойын нөмірі: RS-77
Көрермен: 0
Локомотив Кубань
Краснодар

«Астана» жаңа жылдағы бірінші матчын өз алаңында «Локомотив-Кубаньмен» өткізеді

08.01.2021, 13:00    Просмотров: 33
Источник: Баспасөз қызметі
Автор:

Жаңажылдық мерекелер өтіп, «Астана» баскетбол клубы жаңа жылда ВТБ Бірыңғай лигасындағы бірінші матчына егжей-тегжей дайындалып жатыр. Қарсыласы – Краснодардың «Локомотив Кубань» клубы. Кездесу сенбі күні, 9 қаңтарда өтеді. Басталуы – астана уақытымен 14:00-де.

НАЗАР АУДАРЫҢЫЗДАР! — Матч көрерменсіз бос трибуналарда өтеді.


«Локомотив-Кубань» – Ресейдің ерлер арасындағы кәсіпқой баскетбол клубы, Краснодар қаласынан, 1946 жылы құрылған. Биылғы маусымда ВТБ Бірыңғай лигасынан бөлек, Еурокубок додасында өнер көрсетеді.

Жетістіктері:

  • Еуропа кубогының жеңімпазы – 2012/2013
  • Ресей кубогының иегегері – 2000, 2018
  • РТЖ халықаралық кубогының жеңімпазы – 2007, 2008
  • Еуропа кубогының финалына шыққан – 2017/2018
  • FIBA кубогының финалына шыққан – 2004/2005
  • EuroChallenge кубогының финалына шыққан – 2010/2011
  • Корач кубогының финалына шыққан – 2001/2002
  • Ресей кубогының финалына шыққан – 2013/2014
  • Еуролиганың қола жүлдегері – 2015/2016
  • ВТБ Бірыңғай лигасының күміс жүлдегері – 2012/2013
  • ВТБ Бірыңғай лигасының қола жүлдегері – 2014/2015
  • Ресей чемпионатының қола жүлдегері – 2000/2001, 2001/2002, 2011/2012, 2014/2015


Команда құрамы:

“Локомотив-Кубань” маусым аралығында ойыншыларының көбісін сақтап қалды. Әйтсе де, былтырғы маусымдағы көшбасшыларының бірнешеуі командамен өзара келісімшартарын ұзартқан жоқ. Олардың арасында америкалықтар Джонни О’Брайант пен Сэм Деккер, сондай-ақ ресейліктер Дмитрий Кулагин мен Захар Ведищев бар. Сонымен қатар, Виталий Фридзон “Зенитке” ауысып кетті, Владимир Ивлев «Пармаға» ойысты, ал жас қорғаушы Тимофей Герасимов “Нижний Новгород” құрамын толықтырды. Былтырғы маусымдағы негізгі құрамынан командада америкалықтар Алан Уильямс пен Уилл Каммингс, литвалықтар Миндаугас Кузминскас пен Мантас Калниетис қалды. Ресей ойыншыларынан Станислав Ильницкий, Григорий Мотовилов және Валерий Калинов Краснодар командасының намысын әлі қорғап жүр. Сонымен қатар, Андрей Мартюк және Сергей Долинин сынды былтырғы маусымда команда құрамында болған жастар да алаңға шығарылып жүр.

Локомотив Кубань баскетбол клубы 2020/2021

Жаңа ойыншыларының үшеуі – америкалықтар. Қорғаушы Джордан Кроуфорд өз карьерасын NBA-да бастап, бірнеше маусым бойы “Атланта Хоукс”, “Вашингтон Уизардс”, “Бостон Селтикс” және “Голден Стейт Уорриорз” клубтары сапында ойнаған. Бұдан соң тағдыр оны Қытайға жөнелтті – “Синьцзян Флайн Тайгерс” және “Тянцзинь Жунган” командаларына. Содан Америкаға қайта оралып, Кроуфорд NBA Жетілу лигасындағы “Форт-Уэйн Мэд Энтс” және “Гранд-Рапидс Драйв” командалары сапында өнер көрсеткен. Одан кейін тағы бір маусымды NBA-дағы “Нью-Орлеан Пеликанс” құрамында өткізеді. Бұдан кейін Израильдің “Ирони”, Қытайдың “Сычуань Блю Уэйлс” және немістің “Брозе Бамберг” клубтарында ойнаған. Шабуылшы Кевин Херви Краснодар командасына дейін тек Оклахоманың намысын қорғап, NBA Жетілу лигасындағы “Оклахома-Сити Блю” сапында ойнаған, сонымен қатар, NBA-дағы “Оклахома-Сити Тандер” құрамында бірнеше ойын өткізген. Орталық шептегі Реджи Линч кәсіби карьерасын ВТБ Бірыңғай лигасында, Эстонияның “Калев” клубы сапында бастаған. Одан кейін бір жылды Италияның “Урания” командасы сапында өткізген. Серб қорғаушысы Иван Паунич командаға қазан айында қосылды. Ол өз карьерасында бірталай команданың сапында ойнаған, тіпті кезінде біздің команданың да намысын қорғаған. Паунич карьерасын Сербияда бастап, “Партизан”, “Мега Ишрана”, “Морнар” және “Войводина Сербиягаз” командаларында ойнаған. Содан соң Бельгияның “Остенде”, Грекияның “Арис”, Ресейдің “Нижний Новгород”, Италияның “Виртус”, Украинаның “Азовмаш”, Испанияның “Лагун Аро” және “Фуэнлабрада” командаларында өнер көрсеткен. Бұдан кейін Иван “Астанамен” келісімшартқа отырған, бірақ маусымды аяғына дейін ойнап шықпай, Црна Гораның “Будучность” командасына ауысып кеткен болатын. Бұдан әрі Испанияның “Фуэнлабрада”, Түркияның “Тофаш”, Иранның “Чемидор” және Сербияның “Мега Бемакс” командаларында да ойнап шықты. Ресейлік ойыншылардан команданы қорғаушылар Владислав Емченко мен Даниил Середа, шабуылшы Егор Сычков, орталық шептегі Ярослав Нягу толықтырды. Бұлардың бәрі де – жас ойыншылар және “Локомотив” жүйесінің түлектері.

Бас бапкер:

Евгений Пашутин команда тізгінін былтырғы маусымның ортасында қолына алған болатын. Әрі биылғы маусымда да “Локомотив-Кубань” клубының бас бапкері қызметінде қалды. Оған ресейлік мамандар Владимир Анциферов пен Станислав Збарский көмектеседі.

Команда көшбасшылары:

Маусым басында команданың айқын көшбасшысы Алан Уильямс болған. Бірақ қараша айында Алан сол жақ тізесін қатты жарақаттап алып, болжам бойынша қатардан алты айға шығып қалды. Уильямс жоқ кезде команданың көшбасшылары америкалықтар Джордан Кроуфорд пен Реджи Линч, сондай-ақ литвалық Мантас Калниетис болып жүр. Команда жетістіктеріне литвалық Миндаугас Кузминскас және америкалықтар Уилл Каммингс пен Кевин Херви де сүбелі үлес қосып келеді. Ресейліктерден жаттықтырушылар құрамы үнемі Станислав Ильницкийге мүмкіндік беріп жүр. Сондай-ақ, алаңға Григорий Мотовилов, Андрей Мартюк және Владислав Емченко жиі шығады.

Турнир кестесіндегі жағдай:

“Локомотив-Кубань” биылғы маусымда 12 ойын өткізіп үлгерді. Әрі олардың үштен екі бөлігінде, яғни сегіз матчта жеңіске жетіп, төртеуінде ұтылып қалды. Айтпақшы, соңғы ойында, осы жаңа жылдың басында өткен матчта, өз алаңында “Химкиге” есе жіберіп алды. Әйтсе де, мұндай нәтиже Краснодар командасының төртінші орынға табан тіреуіне мүмкіндік беріп тұр. “Астана” әзірше – тек оныншы орында, он ойында үш рет жеңіске жетті.

Кездесулер тарихы:

«Астана» мен «Локомотив-Кубань» бұған дейін бір-бірімен 12 рет кездесті. Біздің команда бұл текетіресте үш рет қана жеңіске жетті. Алайда, екеуара соңғы матчта, “Астана” өз алаңында, Краснодар ұжымынан жеңісті жұлып алған болатын.

Қызықты деректер:

  • Былтырғы маусымда бұл екі команда бір ойын ғана өткізді. Ол Нұр-Сұлтанда өтіп, “Астана” «Локодан» жеңісті жұлып алған болатын.
  • “Локомотива-Кубань” клубының ойыншысы Иван Паунич 2014 жылы “Астана” сапында ойнаған. Бірақ Иван өз командасының соңғы ойынында алаңға шыққан жоқ. Оның енді Қазақстан астанасында тағы да өнер көрсететін мүмкіндігі бар.


Матч сенбі күні, 9 қаңтарда Нұр-Сұлтандағы «Сарыарқа» республикалық велотрегі аренасында өтеді. Басталуы – астана уақытымен 14:00-де. Матчтың онлайн-трансляциясы біздің сайтымыздың Ойын орталығы бөлімінде, сонымен қатар QazSport телеарнасында тікелей эфирде жүргізіледі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» жаңа жылды жақсы бастады – астанада «Локомотив Кубань» клубын тізе бүктірді

10.01.2021, 10:00    Просмотров: 31
Источник: Баспасөз қызметі
Автор:

«Астана» баскетбол клубының барлық жанкүйерлерін жаңа жылдың сәтті басталуымен құттықтаймыз! ВТБ Бірыңғай лигасы аясындағы өз алаңында Краснодардың «Локомотивімен» өткен матчта біздің жігіттер жанкештілік танытып, жүректі қобалжытқан ойын соңында азулы қарсыласынан маңызды жеңісті жұлып алды.

Ортаға лақтырылған допты қонақтар іліп әкетті де, созыңқы болып шыққан бірінші шабуылдарында есеп ашты. Біздің жігіттер қонақтардың тағы бір нәтижелі шабуылынан көз жазып қалып барып, өздерінің алғашқы ұпайларына қол жеткізді. Нақтырақ айтқанда, Майкл Томпсон үш айып соққысының екеуін дөп түсірді. Адонис Томас ойын барысында бірінші рет нысананы дәл көздеп, есеп айырмасын бір ұпайға дейін қысқартты. Бірақ қонақтар сонда да алда болды. “Астана” олардың өкшесін басып, кубандықтардың алысқа ұзап кетулеріне мүмкіндік берген жоқ. Матч басында Қазақстан командасының ұпайларын тек Томас пен Томпсон еншілеп отырды. Бірақ олар 5-6 ұпай шамасында тербеліп тұрған есеп айырмасына соншалықты әсер ете алмады. Ал Оярс Силиньш үш ұпайлық дәл соққысымен есеп айырмасын екі есе қысқартты. Іле-шала Томпсон да шығыршықты алыстан дәл көздеп, осы матчта бірінші рет таразы басын теңестірді. Одан кейін Майкл тағы бір үш ұпайлық соққыны сәтті орындап, “Астананы” алға шығарды. Өкінішке қарай, осы сәттен бастап кезең соңына дейін біздің жігіттер бірде-бір шабуылдарын сәтті аяқтай алмай қойды. Ал қонақтар қоржындарына бес ұпай қосып, қайтадан алға шықты – 20:22. Бірақ атап өтуге тиіспіз, бүгін біздің алыстан атқылайтын артиллериямыз екпін алды, қуанғанымыз да осы еді. Екінші кезеңнің басында Мартиньш Мейерс пен Джеремайя Хилл осы ойындағы алғашқы ұпайларын еншіледі. Осының арқасында біздің команда қайтадан алға шықты. Бірақ қонақтар бұған келіскен жоқ, әрине. Әрі олар таразы басын қайтадан өздеріне қарай аударып алды. Дмитрий Гавриловтың екі ұпайы таразы басын кезекті рет теңелтті. Ал біздің капитан, яғни Рустам Мырзағалиев өзінің алыстан лақтырған бірінші добын қиыс жібергенімен, бұл шабуылда соның есесін қайтарып, “Астананы” алға шығарды. “Арқан тартыс” созыла түсіп, екі команда алма-кезек алға шығып отырды. Әуелі Асқар Майдекин, одан кейін Майкл Томпсон есепті теңестіргендерімен, матчтың бірінші бөлігінің соңындағы соңғы шабуыл «Локо» еншісінде болып, олар өз мүмкіндіктерін мүлт жіберген жоқ – 40:43.

Рустам Муразагалиев

Үлкен үзілістен кейін, үшінші кезеңдегі алғашқы ұпайды Асқар Майдекин еншіледі, ол бір айып соққысын мүлтіксіз орындады. Краснодарлықтар алға ұзап кетуге тырысты, бірақ Асқардың тағы бір ұпайы мен Оярстің үш ұпайлық добы таразы басын қайтадан теңелтті. Силиньш үшінші кезеңнің бірінші жартысында көсіле сілтеп, екі минуттың ішінде тағы да екі рет есепті теңестірді. “Локомотив-Кубань” алға шығумен болып, бірақ біздің жігіттер ылғи олардың өкшелерін басып, жүйкелеріне тие бастады. Джеремайя Хилл кезең соңына дейін екі рет есепті теңестіріп, содан соң Николай Бажинге әдемі пас бере қойды. Соңғысы кезеңнің соңғы минутында “Астананы” алға шығарды. Краснодарлықтар сабыр сақтай алғандарымен, бұл кезеңнің нүктесін Антон Пономарев қойып, “Астана” алға шықты – 64:62. Соңғы кезеңде тартысты дода одан әрі жалғаса түсті. Біздің команданың да қимыл-әрекеттеріне жүйкелері әсер етіп, бұл ойын сапасына кесірін тигізбей қойған жоқ. “Локо” бес ұпай айырмасымен алға озды. Алайда Мартиньш Мейерс жағдайды түзеп, өзі жалғыз таразы басын теңестірді. Бірақ қонақтар қайтадан алға шығып, біршама ұзай түсті. Жетінші минуттың басында матчтың шешуші сәттерінің бірі жүзеге асты. Адонис Томасқа қарсы ойын ережесі бұзылды, ал ең бастысы, ол кубандықтардың көшбасшысы, орталық шептегі Реджи Линчті бесінші рет ереже бұзуға мәжбүрледі. Ол матчты қосалқы құрам орындығынан көріп, аяқтауға кетті. Бұдан кейін Мейерс еншілеген ұпайлар есепті теңелтіп, ал Хиллдің орындауындағы үш ұпайлық соққы алаң иелерін алға шығарды. Матч соңына дейін екі минуттан да аз уақыт қалған болатын, ал дода көрігі шектен тыс қыза түсті. Қыза түскен дода көрігі Адонис Томастың өте маңызды үш ұпайлық соққысын дөп түсіруіне бөгет бола алмады. Дәл осы сәтте матчтыың аяқталуына отыз секунд қалған еді – “Астана” +4. Краснодарлықтардың жаттықтырушылары тайм-аут сұрады, әрине. Бірақ Эмиль Райковичтің де өз шәкірттеріне бағалы ақыл-кеңес айтатын уақыты болды. Кубандықтар соққы орындау кезінде алаң иелерін ойын ережесін бұзуға мәжбүрлеп, айып соққыларын мүлтіксіз орындады. Әрі есеп айырмасын екі ұпайға дейін қысқартты. “Астана” уақыт өткенінің өздеріне тиімді екенін түсініп, шабуылды аяқтауға асықан жоқ. Бірақ жеңістен айырылып қауіпі өте жоғары еді. Майкл Томпсон шығыршық түбінде тәуекелге бел буғанымен, өз мүмкіндігін жүзеге асыра алмады. Бірақ Оярс Силиньш дер кезінде оған көмекке ұмтылып, допты қағып алды да, қайыра соғып, өте маңызды ұпайлар олжалады. Осылай, 4 ұпай басымдығына қайта қол жеткізді. Былайша айтқанда, ойын тағдырын шешті де. Краснодарлықтар үшін уақыт тым аз қалған еді, әрі олар қандай да бір айла-әрекет ойлап таба алмады да. Есеп – 86:82, “Астананың” жаңа жылдағы бірінші жеңісі.

Салдары: «Астана» жеңіске жетсе де, турнир кестесінің оныншы сатысында қалды. Бірақ бүгін УНИКС «Пармадан» басым түссе, біздің команда бір саты жоғары көтеріле алады. «Локомотив-Кубань» төртінші орыннан бесінші орынға сырғыды. Бірақ бүгін «Парма» – УНИКС матчы керісінше аяқталса, яғни пермдіктер жеңіске жетсе, олар өз орындарына қайта оралады.
 


Ең көп ұпай еншілегендер:

  • «Астана» – Мартиньш Мейерс ойынның екінші жартысында көсіле сілтеп, таблодағы жағдайды жиі теңестірумен болды – 18 ұпай, 8 рет доп қағып алды. Джеремайя Хилл матч басында көзге түспеді, бірақ одан кейін команда қоржынына маңызды ұпайлар салып отырды – 15 ұпай, 4 рет доп қағып алды, 6 пас, 2 рет допты тартып әкетті. Оярс Силиньш осы ойынның нүктесін ғана қойған жоқ, әрі 14 ұпай еншілеп, 6 рет доп қағып алды. Адонис Томас матчтың маңызды сәттерінде шешуші рөлді атқарып, 14 ұпай еншіледі және 5 рет доп қағып алды. Ал Майкл Томпсон матчтың бірінші жартысында біздің команданың негізі әрекет етуші күші болды – 12 ұпай, 4 рет доп қағып алды, 8 пас.
  • «Локомотив-Кубань» – Реджи Линч, біздің ойыншылар бес фолмен “құрықтап”, матч соңында қосалқы құрам орындығына тұсаулап отырғызса да, дабл-дабл авторы атанды – 17 ұпай, 11 рет доп қағып алды, 6 блокшот. Мантас Калниетис пен Джордан Кроуфорд 15 ұпайдан еншіледі. Ал Станислав Ильницкий дабл-даблге бір қадам жетпей қалды – 9 ұпай, 10 рет доп қағып алды.


«Астана» бас бапкері — Эмиль Райкович:
— Айтуға тиіспін, «Локомотивті» жеңгенімізге өте ырзамын. Биылғы маусымда оның шабуылы – Лигадағы ең үздіктерінің бірі. Біз қорғаныста өте жақсы ойнадық деп ойлаймын. Бүгін 12 ойыншының бәрі де күш-қуаттарын толықтай сарқ етіп, қорғаныста жанкештілік танытты. Бұл – біз үшін өте маңызды жеңіс.

«Локомотив-Кубань» бас бапкері — Евгений Пашутин:
— Өте ауыр ойын болды. Біз 2 кезең бойы ойын тізгінін өз қолымызда ұстадық, бірақ 3-ші кезеңде қорғаныста босаңсып қалып, Хилл мен Томпсонның еркін шабуылдауларына мүмкіндік беріп қойдық. Бізге қорғаныста сауатты ойнап, жеңіс үшін табандылық таныту қажет.
 


Келесі матч: Ұлттық лигадағы «Атырау Барыстарымен» өз алаңында, яғни 12 және 13 қаңтар күндері өтуі тиіс қос ойыны кейінге шегерілгендіктен, «Астана» енді келесі кездесулерін тек 17 және 18 қаңтар күндері түзде өткізеді. Онда біздің жігіттер биылғы маусымда бірінші рет Қостанайдың «Тобылымен» додаға түседі. Ал ВТБ Бірыңғай лигасындағы астана командасының келесі қарсыласы – «Енисей». Бұл матч 24 қаңтар күні Красноярскіде өтеді.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құлылған жылы: 1946 Клубтық түстері: жасыл, қызыл
Мемлекет: Ресей Арена: Баскет Холл
Қала: Краснодар Сайт: lokobasket.com

Сипаттамасы

«Локомотив-Кубань» – ресейдің кәсіби ерлер баскетбол клубы, Краснодар қаласынан, 1946 жылы құрылған.

Жетістіктері:
  • Еуропа кубогының жеңімпазы – 2012/2013
  • Ресей кубогының иегегері – 2000, 2018
  • РТЖ халықаралық кубогының жеңімпазы – 2007, 2008
  • Еуропа кубогының финалына шыққан – 2017/2018
  • FIBA кубогының финалына шыққан – 2004/2005
  • EuroChallenge кубогының финалына шыққан – 2010/2011
  • Корач кубогының финалына шыққан – 2001/2002
  • Ресей кубогының финалына шыққан – 2013/2014
  • Еуролиганың қола жүлдегері – 2015/2016
  • ВТБ Бірыңғай лигасының күміс жүлдегері – 2012/2013
  • ВТБ Бірыңғай лигасының қола жүлдегері – 2014/2015
  • Ресей чемпионатының қола жүлдегері – 2000/2001, 2001/2002, 2011/2012, 2014/2015

Команданың жалпы суреті

Локомотив Кубань