Тарих қойнауына еніп бара жатқан жыл соңында «Астана» баскетбол клубы ВТБ Бірыңғай лигасы аясындағы тағы бір шетелдік сапарын бастап, Польшада жергілікті “Зелена Гура” командасымен додаға түседі. Бұл матч 14 желтоқсаннан 15 желтоқсанға ауғанда, астана уақытымен түн ортасында басталады.
«Зелена Гура» – Польшаның ерлер арасындағы кәсіпқой баскетбол клубы, Зелена Гура қаласынан, 1946 жылы құрылған. Биылғы маусымда ВТБ Бірыңғай лигасынан бөлек, Польша чемпионатында бақ сынайды.
Жетістіктері:
Команда құрамы:
Польша командасы былтырғы маусыммен салыстырғанда құрамынын түбегейлі өзгертті. Клуб легионерлерінің бәрімен қош айтысты, олардың ішінде былтырғы маусымдағы көшбасшылары да бар – америкалықтар Дрю Гордон, Тони Мейер, Джо Томассон және швед Людвиг Хакансон. Әрі хорват Ивица Радич пен америкалық Джордж Кинг та «Зелена Гурадан» кетіп қалды. Сонымен қатар, команда бірнеше жергілікті ойыншымен келісімшарттарын ұзартқан жоқ – поляктар Ярослав Зисковски, Пржемислав Замойски, Миколай Ветлински, Кацпер Маковски.
Былтырғы маусымдағы құрамынан тек үш ойыншы ғана қалды, әрі бәрі де Польша азаматтары – Лукаш Кошарек, Марцель Понитка және Кацпер Трачик. Биылғы маусымда «Зелена Гура» құрамына төрт бірдей америкалық ойыншы қосылды. Бірінші кезекте, орталық шептегі Джеффри Гроселлға назар аударғымыз келеді. Себебі, ол елорда командасының жанкүйерлеріне жақсы таныс, өйткені 2018/2019 жылдар маусымында «Астананың» намысын қорғаған болатын. Ал былтырғы маусымды Францияның “Орлеан” командасы сапында өткізді. Америкалық қорғаушы Крис Ричард та – Қазақстанға мейілінше танымал ойыншы. Өйткені ол бұған дейін үш маусым бойы Ақтаудың “Каспий” командасы сапында өнер көрсеткен. Сондай-ақ Крис Эстонияның ВЭФ және немістің “Тайгерс Тубинджен” командалары сапында ойнаған. Ал өткен екі маусымды “Оради” құрамында өткізіп, екі мәрте Румыния чемпионы атанды. Шабуылшы Сисиль Уилльямс поляк командасына дейін бір маусым Францияның “Сорг Баскет” және тағы бір маусым Португалияның “Галитос Баррейро” командалары сапында ойнаған. Шабуылшы Блейк Рейнольдс университеттен соң бір ғана маусым Болгарияның “Черноморец Бургас” командасы сапында өнер көрсеткен. Дат қорғаушысы Габриэль Лундберг «Зелена Гураға» дейін үш маусым Данияның “Копенгаген Вулфпак” және “Хорсенс” командалары, сондай-ақ үш маусым Испанияның “Манриса” және “Канариас” клубтары сапында шыңдалған. Соңғы командасымен FIBA Құрлықаралық кубогының жеңімпазы атанғанын атап өтуге тиіспіз. Сонымен қатар, Польша командасы құрамын Латвияның екі ойыншысымен толықтырды. Аса тәжірибелі шабуылшы Роландс Фрейманис өз карьерасын латыштың “АСК Рига” және ВЭФ клубтары сапында бастап, одан соң ұзақ уақыт бойы Испанияға тұрақтап, “Касахоль”, “Уэска”, “Лагун Аро” және “Жирона” клубтарының намысын қорғаған. Сонымен қатар, ол Италияның “Сутор”, Украинаның “Химик”, Эстонияның “Калев” және Ресейдің УНИКС клубтары сапында ойнаған. Сондай-ақ Түркияның “Ушак” және “Газиантеп”, Грекияның “Ифаистос Лимну” командаларында да өнер көрсеткен. Роландс былтырғы маусымда да Польшада өткізіп, “Анвил” сапында көзге түсті. Шабуылшы Янис Берзиньш жеті жыл Латвияның “Валмиера” және ВЭФ клубтары сапында тер төгіп, одан кейін бір маусым Италияның “Орландина” командасы сапында ойнады. Ал өткен екі маусымды Латвияның “Вентспилс” клубында өткізді. Сонымен қатар, команда құрамына жергілікті үш ойыншыны тартты. Олардың бәрі де бұған дейін тек Польшада ойнаған жігіттер – шабуылшылар Филип Пут және Кацпер Порада, сондай-ақ қорғаушы Даниэль Шимкевич.
Бас бапкер:
«Зелена Гураның» жаттықтырушылары құрамын әлі хорват маманы Жан Табак басқарады. Былтырғы маусымдағыдай оған Польша жаттықтырушысы Аркадиуш Милошевски көмектеседі. Жаттықтырушыла құрамындағы жаңа маман Испания бапкері Феликс Алонсо болып отыр.
Команда көшбасшылары:
Команданың көшбасшысы – ең көп ұпай жинаған және тиімділігі жоғары дат қорғаушысы Габриэль Лунберг. Сондай-ақ, статистикалық көрсеткіштерімен Джеффри Гроселл, Роландс Фрейманис, Крис Ричард және Марцель Понитка да мақтана алады. Польша командасының жаттықтырушылары құрамы алаңға Сисиль Уилльямс, Блейк Рейнольдс, Янис Берзиньш және Лукаш Кошарек сынды ойыншыларын жиі шығарады.
Турнир кестесіндегі жағдай:
“Зелена Гура” маусым басталғалы тоғыз ойын өткізіп үлгерді. Әрі олардың үшеуінде жеңіске жетті. Поляктар басында оңбай сүрініп, төрт рет қатарынан ұтылды – “Зенит”, “Нижний Новгород” және екі рет “Локомотив-Кубань” командаларынан. Жак Табактың командасы бірінші жеңісіне өз алаңында “Цмоки Минск” клубын тізерлетіп, қол жеткізді. Одан кейін “Зениттен” ойсырай ұтылды да, УНИКС-ті тізе бүктіріп, көпшілікті таң қалдырды. Ал соңғы екі матчты “Зелена Гура” түзде өткізіп, “Енисейді” ұтты да, ЦСКА-ға есе жіберіп алды. Польша командасына осы үш жеңісі турнир кестесінде “Астанадан” бір саты жоғары орналасуға мүмкіндік беріп тұр.
Кездесулер тарихы:
Командалар өзара төрт рет кездесіп, соңғы екі маусымда екі матчтан өткізді. Екеуара кездесулер нәтижесі бойынша “Астана” айқын басымдық танытып тұр, Қазақстан командасы осы төрт ойында жеңілістің кермек дәмін татып көрген жоқ.
Қызықты деректер:
Матч дүйсенбі күні, 14 желтоқсанда Зелена-Гурадағы «Хала Зелена Гура» аренасында өтеді. Басталуы – астана уақытымен түн ортасында. Матчтың онлайн-трансляциясы біздің сайтымыздың Ойын орталығы бөлімінде, сонымен қатар QazSport телеарнасында тікелей эфирде жүргізіледі.
Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.
«Астана» баскетбол клубы Польшада, ВТБ Бірыңғай лигасы аясындағы матчта, жергілікті “Зелена Гураның” қарқынына төтеп бере алмай, ойсырай ұтылып қалды. Бұл екеуара кездесулер тарихындағы бірінші жеңіліс болды.
Ортаға лақтырылған допты біздің команда іліп әкетті. Бірақ Қазақстан командасы бірінші шабуылында ұпай еншілей алмады. Мұндай жағдайды алаң иелері де бастарынан кешіріп, өздерінің бірінші шабуылдарын дәл соққымен түйіндей алмады. Негізі, олар соққы бағытаған болатын, бірақ оны шабуылда ойын ережесін бұзып, төреші ысқырғаннан кейін жүзеге асырды. Бұдан кейін Адонис Томас ойын тізгінін өз қолына алып, есеп ашты. Жалпы, Адонис матчтың алғашқы минуттарында өте белсенді болды және бірнеше шабуылды нәтижелі аяқтады. Бұған Майкл Томпсонның үш ұпайлық добын қоссақ, матчтың басы “Астана” үшін тәп-тәуір өрбіген еді. Алайда алаң иелері де қарап қалмады, үнемі Эмиль Райковичтің командасының өкшесін басып отырды, басында қуып жетуге тырысумен болды. Николай Бажин “энд уан” орындап, сондай-ақ Марбл мен Томпсон кезекті ұпайларын еншілеп, Қазақстан ұжымы алты ұпай айырмасымен алға озды. Әйтсе де, бірінші кезеңнің ортасында “Астана” сәтсіздікке ұшырады. Екі минуттың ішінде +6 басымдығы -4 болып шыға келді. Енді кезең соңына дейін командалар матч басындағыдай емес, қарама-қайшы рөльді атқарды – “Зелена Гура” ұзай түсуге, ал “Астана” қуып жетуге тырысты. Кезеңнің аяқталуына қырық секунд қалғанда, Джеремайя Хиллдің үш ұпайлық добы алаң иелерін қуып жетуге көмектесті. Бірақ ойынның бірінші ширек бөлігін қарсыласымыз түйіндеді – 27:24. Мұндай тартысты ойында үш ұпай айырмасы ештеңе шешпейтін еді. Бірақ алаң иелері сапында “қаһарлы қару” екпін алып, көсіле шапты. Ол – біздің команданың бұрынғы ойыншысы Джеффри Гроселл. Басында Мартиньш Мейерс пен Джеремайя Хилл қарсыласымыздың алысқа ұзап кетуіне мүмкіндік бермеген болатын. Бірақ олардың бұл талпыныстарына да қарамай, алаң иелері есеп айырмасын бірте-бірте ұлғайта бастады. Екінші кезеңнің экваторына қарай ол тіпті алғаш рет екі таңбалы санға да жетті. Шабуылымызда бәрі де үйлесе қоймай, қорғанысымыз да Гроселлге төтеп бере алмай, он минуттың ішінде -15 ұпай айырмасымен есе жіберіп алдық. Бұған бірінші кезеңде үш ұпай айырмасымен ұтылғанымызды қоссақ, матчтың бірінші бөлігіндегі сорақы есеп айырмасының қорытындысын шығарамыз – 61:43.
Осы ретте, екінші кезеңде Джеффри Гроселлдің біздің бүкіл командадан екі ұпай артық еншілегенін айта кетуге тиіспіз. Шығыршық ауыстырған соң қарқынымызды үдетіп, есеп айырмасын қысқартуға тырысуымыз керек еді. Бірақ үшінші кезеңнің бастапқы бес минутында жағдай өзгере қоймады. “Астана” бес минуттың ішінде тек бір рет қана нысананы дәл көздей алды – Коля Бажин айып соққысын дөп түсірді, оның өзінде екі мүмкіндігінің біреуін ғана мүлтіксіз орындады. Ал бұл кезде поляктар ойын тізгінін өз қолдарына алып, кезеңнің ортасына қарай 30 ұпайға жуық есеп айырмасымен қара үзіп кеткен болатын. Эмиль Райковичке мұндай жағдай мүлдем ұнаған жоқ, әрине. Ол тайм-аут алды, одан кейін біздің жігіттер сәл де болса, ширыға түскендей еді. Алайда біздің ойыншылардың нәтижелі әрекеттерінің бәріне дерлік алаң иелерінің жауаптары дайын болып шықты. Үшінші кезеңнің аяқталуына екі минуттай қалғанда алаң иелерінің басымдығы 30 ұпайға да жетті. Бірақ ұзақ тұрмады. “Астана” кезең соңына дейін екі шабуылын сәтті аяқтады, бірақ поляктардың бір шабуылынан көз жазып қалды. Сөйтіп, соңғы кезеңнің алдында жиырма сегіз ұпай айырмасымен ұтылып жатты – 85:57. Бұл жеңісті жұлып алуға мүмкіндік тым аз жағдай еді. Мұндай адам сенгісіз комбек жасау үшін таңқаларлық ерлік қажет еді. Өкінішке қарай, ондай жағдай жүзеге асқан жоқ. “Зелена Гура” ара қашықтықты сенімді түрде ұстап тұрды, ал біздің соңғы мүмкіндігіміз осылай көзден бұл-бұл ұша бастады. Ойынның аяқталуына бес минут қалғанда поляктар 29 ұпай айырмасымен қара үзіп кетті. Яғни ойын тағдыры әлдеқашан шешілді деген сөз еді. Ойын осылай тәмамдалуға айналды. Ал Польша командасы биылғы маусымда бірінші рет жүз ұпайдан артық еншілеп қана қоймай, ВТБ Бірыңғай лигасындағы командалық рекордын да жаңартып, ірі жеңіске жетті – 110:86.
Ең көп ұпай еншілегендер:
«Зелена Гураның» бас бапкері Жан Табак:
— Бүгін біз қорғаныста тамаша ойын өрнегін көрсеттік. Кейбір сәттерде қонақтарымыздың шабуылдарына толықтай тосқауыл қойдық. Тіпті 110 ұпай еншілегенімізге қарамастан, мен алаңның өз бөлігіміздегі жанкештілігімізге ризамын, себебі бізге жетпей жүргені осы еді.
«Астананың» бас бапкері Эмиль Райкович:
— «Зелена Гура» жеңіске лайық болды, бүгін олар бізден әлдеқайда асып түсті. Бұл ойында мен өз командамды танымай қалдым. Бізге жан-жақты талдау жүргізіп, мұндай матчтарда қайталанбастай етіп, шара қолдану қажет.
Келесі матч: астана командасы Польшадан тікелей Пермь қаласына барып, бейсенбі күні, яғни 17 желтоқсанда, жергілікті «Парма» командасымен ВТБ Бірыңғай лигасындағы кезекті түздегі ойынын өткізеді.
Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.
