ВТБ Бірыңғай лигасы 2021/2022
Астана
Астана
ВТБ Бірыңғай Лигасы, Тұрақты біріншілік
17.02.2022, 19:30 Бс
Арена: «Сары-Арқа» велотрегі (Астана)
53:84
Негізгі уақыт
20:16 10:22 10:20 13:26
Ойын нөмірі: RS-84
Көрермен: 418
УНИКС
Казань

«Астана» бес күннің ішінде ВТБ лигасындағы үшінші ойынын өткізіп, УНИКС-пен додаға түседі

16.02.2022, 18:00    Просмотров: 167
Источник: Баспасөз қызметі
Автор:

«Астана» баскетбол клубының үш матчтық марафоны өз алаңында ВТБ Бірыңғай лигасының көшбасшысымен, яғни Қазанның УНИКС-імен өтетін жауапты ойынмен тәмамдалады. Матч бейсенбі күні, 17 ақпанда Нұр-Сұлтандағы «Сарыарқа» велотрегі аренасында өтеді. Басталуы – астана уақытымен 19:30-да. Билеттер Ticketon.kz сайтында сатылымға шықты.

! НАЗАР АУДАРЫҢЫЗДАР — Барлық жанкүйерлерден Өз алаңымызда өтетін матчтарға кіру Ережелерімен мұқият танысып шығуларыңызды өтінеміз. Аренаға тек Солтүстік есіктен кіруге болады (Орынбор көшесі жағынан, жанармай бекетіне қарама-қарсы).


УНИКС – Ресейдің ерлер арасындағы кәсіпқой баскетбол клубы, Қазан қаласынан. 1991 жылы құрылған. Биылғы маусымда ВТБ Бірыңғай лигасынан бөлек Еуролига додасында да өнер көрсетеді.

Жетістіктері:

  • Ресей чемпионатының күміс жүлдегері − 2001, 2002, 2004, 2007, 2016, 2021 
  • Ресей чемпионатының қола жүлдегері − 2000, 2003, 2005, 2009-2011, 2013/2014, 2018/2019
  • Ресей кубогының жеңімпазы − 2003, 2009, 2014 
  • FIBA Еуролига чемпионы − 2003/2004 
  • Еуропа кубогы жеңімпазы − 2010/2011
  • Еуропа кубогының финалына шыққан – 2013/2014, 2020/2021
  • NEBL чемпионы − 2002/2003. 
  • ВТБ Бірыңғай лигасының күміс жүлдегері − 2009/2010, 2011/2012, 2015/2016, 2020/2021 
  • ВТБ Бірыңғай лигасының қола жүлдегері − 2010/2011, 2018/2019


УНИКС баскетбол клубы 2021/2022

УНИКС пен “Астана” биылғы маусымда, қараша айының ортасында, Қазанда кездескен. Онда алаң иелері басымдық танытқан болатын, есеп – 71:59. Естеріңізге сала кетейік, сол матчқа дейін қазандықтар турнир кестесінде көш бастап, алты ойынның біреуін де ғана жеңіліске ұшыраған болатын. Олар одан кейін де тізгін тартпай, түзде “Цмоки-Минск” клубынан үстем түсіп, өз алаңында “Калевті” күйрете жеңді. Бірақ барлық ойында жеңіске жете алмай, Санкт-Петербургте жергілікті “Зениттен” ойсырай ұтылып қалды. Бұл күнтізбедегі өткен жылдың соңында болды. Ал жаңа жылда қазандықтар әлі жеңілістің кермек дәмін татқан жоқ. Бірақ осы ойындарда айқын басымдықпен жеңіске жетті деп те айта алмаймыз: +6 өз алаңында “Нижниймен”, +5 түзде “Зелена Гурамен” және Мәскеудегі маңызды жеңіс – екі ұпай айырмасымен үшінші овертаймда ЦСКА-ны сан соқтырып кетті. Десек те, өз алаңында өткізген соңғы матчта УНИКС “Енисейді” +20 ұпай айырмасымен ойсырата жеңді. Қазір Қазан командасы ВТБ Бірыңғай лигасында көш бастап тұр. Олар 12 ойында жеңіске жетіп, 2 рет ұтылып қалды. УНИКС-тің бұған қоса Еуролигада ойнайтынын да ұмытпауымыз керек. Олар қарашаның ортасына дейін (“Астанамен” кездескенше) он бес ойын өткізіп, соның тоғызында жеңіске жеткен болатын. Әрі қазандықтар “Жальгирис”, “Милан”, “Альба”, “Црвена Звезда”, “Маккаби Тель-Авив”, “Анадолу Эфес”, “Барселона” және ЦСКА секілді азулы командалардан басым түскен болатын.

Команда құрамындағы өзгерістер: Қазанның УНИКС-і құрамында, қарашада “Астанамен” өткен матчтан бері ешқандай өзгеріс болған жоқ.

Команда көшбасшылары: Дәл қазір УНИКС-тің ең үздік көшбасшысы – хорват Марио Хезонья. Оны “Супер Марио” деп те атайды. Ол ұпай еншілеу бойынша да, тиімділігі бойынша да команда көшбасшысы болып отыр. Сондай-ақ екі америкалық ойыншыны, екі Браунды – Лоренцо мен Джонды да бөле-жара атап өтуге болады. Команданың негізгі құрамында ресейлік Андрей Воронцевич, америкалық Айзея Кэнэн, италияндық Марко Списсу және нигериялық Тони Джекири ойнайды. Сонымен қатар, алаңға жиі шығатын америкалық Джарелл Брэнтлиді және ресейліктер Дмитрий Узинский мен Вячеслав Зайцевті атап өткен жөн.

Матч бейсенбі күні, 17 ақпанда Нұр-Сұлтандағы «Сарыарқа» велотрегі аренасында өтеді. Басталуы – астана уақытымен 19:30-да. Матчтың онлайн-трансляциясы біздің сайтымыздың басты бетінде жүргізіледі.

Аренаға кіру тек Солтүстік есіктен жүзеге асырылатын болады (Орынбор көшесі жағынан, жанармай бекетіне қарама-қарсы), мына сызбаға сай:

Жалпы, турнир жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» ВТБ лигасы көшбасшысының қыспағына төтеп бере алмады

18.02.2022, 10:00    Просмотров: 194
Источник: Баспасөз қызметі
Автор:

«Астана» баскетбол клубы бес күннің ішінде ВТБ Бірыңғай лигасы аясында үшінші матчын өткізіп, бұл жолы турнирдің көшбасшысымен, яғни Қазанның УНИКС-імен кездесті. Қазақстан командасы, әсіресе оның көшбасшылары осыдан екі күн бұрын өткен ойында барлық күш-жігерлерін жұмсаған болатын. Сондықтан біздің жігіттер тынығып үлгермеді. Ойынды Скайлар Спенсер, Энтони Хики, Антонио Кэмпбелл, Максим Марчук және Рустам Мырзағалиев бестігі бастады.

Қазан ұжымы ортада ойынға қосылған допты іліп әкетті. Бірақ матч есебі тек бір жарым минут өткеннен кейін ғана ашылды, әрі оны біздің команданың ойыншысы ашты – Антонио Кэмпбелл, ол айып соққысының біреуін дөп түсіріп, ізінше осы ойындағы бірінші үш ұпайлық допты салды. Қонақтар осыдан кейін ғана өздерінің алғашқы ұпайларын еншіледі. Әрі есепті тез теңестірді. Әйтсе де, бірінші кезеңнің ортасына дейін “Астана” серпіліс жасап, алты ұпай айырмасымен алға шықты. Осы серпілісте доп салғандар: Максим Марчук, Энтони Хики және Скайлар Спенсер. Қазаннан келген қонақтар нәтижелі ойын өрнегін көрсете алмай, ал Қазақстан командасы өз мүмкіндіктерін мүлт жібермеуге тырысты. Энтони Хики қонақтардың қорғанысын бұзып өтып, доп салса, Марка Тихоненко үш ұпайлық соққысын дөп түсірді. Ал “Астана” жеті ұпай айырмасымен алда тұрды. Энтони Хики осы басымдықты уысымыздан шығарып алмауға үлес қосып, әуелі “энд уан”, содан соң пәрменді данк орындады. Алайда, бұл кезеңде соңғы допты үш ұпайлық аймақтан қонақтар салып, есепті қысқартты. “Астана” бірінші кезеңде басым болды, есеп – 20:16. Екінші кезеңнің басында екі команда да нәтижелі ойын өрнегін көрсете алмады. Екі минуттың ішінде командалар алыстан бір-бір доптан түсірді. Бізден мергендік танытқан Олег Балашов болды. Содан кейін Энтони Хики қонақтардың қорғанысын бұзып өтіп, доп салды, әрі оған қарсы ойын ережесі бұзылып, айып соққысын да мүлтіксіз орындады. Ал Антонио Кэмпбелл орта қашықтықтан екі ұпай еншіледі. Алайда қонақтар да қалыспады, екінші кезеңнің ортасында екі команданың арасын сол күйі төрт ұпай ғана бөліп тұрды. Кезең бел ортасынан ауғанда Максим Марчук данк орындап, Энтони Хикидің тамаша пасын сәтті аяқтады. Өкінішке қарай, бұл біздің команданың ойынның бірінші жартысындағы соңғы ұпайлары болып шықты. Қалған төрт минутта тек қазандықтар доп салумен болды. Әрі олар матчтың бірінші жартысында басым түсті, есеп – 30:38. Ойынның бірінші жартысында Қазақстан командасы шығыршық түбінде есе жіберді. Нақтырақ айтқанда, қайтқан допты қағып алудағы көрсеткіштері 10 сәтке кем болды. Сондай-ақ, біз доға сыртынан доп лақтырудан да көрсеткішіміз (дәлдігіміз) кем болып шықты. Қос ұжымның қалған статистикалық көрсеткіштері тең болды.

Талисман баскетбольного клуба Астана

Екінші кезеңнің соңында біздің команданың кежегесі кейін тартып, күш-жігерлері сарқыла бастағаны байқала бастады. Қонақтар ойын тізгінін өз қолдарына алды. Біздің команданың көшбасшылары бес күннің ішіндегі үшінші матчта ауыспай ойнағандықтан, шаршап-шалдыққандары білінді. Жылдамдықтары тым төмендеп кетті. Ал УНИКС болса, маусым көшбасшысы, құрамы жоғары деңгейлі ойыншылармен жасақталған, қосалқы құрамындағы жігіттері де – сенім үдесінен шыға білетін шеберлер. Осы ойынның бірінші ширек бөлігінде ойындары үйлеспей қойған қазандықтар екінші кезеңде еселерін қайтарды. Ал үшінші кезеңнің басында есеп айырмасын лезде екі таңбалы санға жеткізді, Скайлар Спенсер мен Марк Тихоненко олардың құйрық үзіп кетпеулеріне жол бермеуге тырысты. Бірақ бұлар біздің команданың үшінші кезеңнің бастапқы бес минутындағы соңғы ұпайлары болды. Қазандықтар кезең ортасында да, оның екінші жартысында да көсіле сілтеп, есеп айырмасын ұлғайта түсті. Кезең соңына дейін біздің сапымыздан Энтони Хики ғана көзге түсіп, алты ұпай еншіледі. УНИКС үшінші онминуттықта өз басымдықтарын тағы он ұпайға арттырып, соңғы кезең қарсаңында он сегіз ұпай айырмасымен құйрық үзіп кетті – 40:58. Командалар арасы тым алшақтап кетіп, енді оларды қуып жету мүмкін емес екені сезіліп тұрды. Өйткені, бұл матчта біздің команданы ойыны үйлеспей қойды. Қазандықтар есеп айырмасын тез арада жиырма ұпайға жеткізді. Төртінші кезең басында Скайлар Спенсер қонақтардың қорғанысын бұзып, өтіп доп салды, әрі Олег Балашов та екі ұпай еншіледі. Бірақ бұдан соң біздің жігіттер тағы да төрт минуттан артық уақыт бойы доп сала алмай, сергелдеңге түсті. Матчтың аяқталуына бес минут уақыт қалғанда біздің команда отыз ұпай айырмасымен ұтылып жатты. Әрі матчтың қалай аяқталатыны да белгілі болды. Әйтсе де, соңғы бес минут тең дәрежеде өтіп, есеп айырмасы көп өзгерген жоқ. Біздің команда сапынан Энтони Хики, Николай Бажин және Скайлар Спенсер доп салды. Соңғы ұпайларды Бажин мен Спенсер еншілеп осы ойынның қорытынды есебін түйіндеді – 53:84. “Астана” ойсырай ұтылып қалды.


Ең көп ұпай еншілегендер:

  • «Астана» – Энтони Хики осы ойында ең көп ұпай жинаған ойыншы болды – 20 ұпай, 3 рет доп қағып алды, 4 пас. Скайлар Спенсер тиімділігі жағынан бәрінен асып түсіп, дабл-дабл орындады – 10 ұпай, 12 рет доп қағып алды, 4 блокшот. Антонио Кэмпбелл 6 ұпай жинап, 6 рет доп қағып алды және 2 пас берді. Максим Марчук өз еншісіне 4 ұпай жазып, 3 рет доп қағып алды және 3 пас берді.
  • УНИКС – қазандықтар сапында төрт ойыншы бірдей он ұпайдан артық жинады, ал ең үздіктері Айзея Кэнэн мен Марио Хезонья болды.


«Астананың» бас бапкері – Дарко Руссо:
— УНИКС-ті жеңісімен құттықтаймын. Олар қорғаныста өте сауатты ойнайды. Әрі УНИКС командалық ойын үлгісін қорғаныста да, шабуылда да көрсетіп жүр. Бұл мен алаңда кезіккен командалардың ішіндегі ең үздіктеріні бірі. Егер олар бүгінгідей көсіле сіотесе, оларды жеңу мүмкін емес деуге де болады. Әрі мен өз жігіттерімді де түсінемін – бұл 6 күннің ішіндегі 3-ші ойын болды. Мен тек 30 ұпай айырмасымен ұтылғанымызға қапаланамын, бірақ үлкен үзілістен кейін біздің күш-жігеріміз сарқылды.

УНИКС  бас бапкері – Велимир Перасович:
— Осы ойынды тым сылбыр бастап, шабуылда өзімізге сенімді болмадық. Бірақ ойынның екінші жартысында жақсы ойнай бастадық, тізгінді уысымыздан шығарған жоқпыз, доппен тез қимылдадық, соның арқасында ірі жеңіске қол жеткіздік.

Салдары: “Астана” бүгін ұтылса да, екі күн бұрын көтерілген тоғызыншы орнын сақтап қалды.

Келесі матч: Астана командасы енді ВТБ Бірыңғай лигасы аясындағы келесі кездесуін 7 наурыз күні өткізеді. Бұл жолы бізге жауапты ойынын өткізу үшін эстонның «Калев» командасы қонаққа келеді. Ал бұған дейін «Астана ойыншылары Қазақстан ұлттық құрамасы сапында Әлем кубогының іріктеу додасы аясында, түзде екі рет додаға түседі – 24 ақпанда Иранмен. Ал 27 ақпанда Бахрейнмен.

Дарко Руссо

Жалпы, турнир жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құрылған жылы: 1991 Клубтық түстері: ақ, жасыл
Мемлекет: Ресей Арена: Баскет Холл
Қала: Казань Сайт: www.unics.ru

Сипаттамасы

УНИКС – Ресейдің ерлер арасындағы кәсіпқой баскетбол клубы, Қазан қаласынан, 1991 жылы құрылған.
 
Жетістіктері:
  • Ресей чемпионатының күміс жүлдегері − 2001, 2002, 2004, 2007, 2016, 2021
  • Ресей чемпионатының қола жүлдегері − 2000, 2003, 2005, 2009−2011, 2013/2014, 2018/2019, 2021/2022
  • Ресей кубогының жеңімпазы − 2003, 2009, 2014
  • FIBA Евролига чемпионы − 2003/2004
  • Еуропа кубогы жеңімпазы − 2010/2011
  • Еуропа кубогының финалына шыққан – 2013/14 
  • NEBL чемпионы − 2002/2003
  • ВТБ Бірыңғай лигасының күміс жүлдегері − 2009/2010, 2011/2012, 2015/2016, 2020/2021
  • ВТБ Бірыңғай лигасының қола жүлдегері − 2010/11, 2018/2019, 2021/2022

Команданың жалпы суреті

УНИКС