ВТБ Бірыңғай лигасы 2020/2021
Автодор
Саратов
ВТБ Бірыңғай Лигасы, Тұрақты біріншілік
22.10.2020, 21:00 Бс
Арена: СС «Кристалл» (Саратов)
107:85
Негізгі уақыт
Ойын нөмірі: RS-97
Көрермен: 0
Астана
Астана

«Астана» түздегі сапарын сабақтайды! Келесі аялдама – Саратов

21.10.2020, 14:00    Просмотров: 353
Источник: Казахстанская Правда
Автор:
Мәскеу түбінде «Химкиді» жеңген тарихи жеңісіне шабыттанған «Астана» баскетбол клубының ойыншылары Саратовқа сапар шекті. Онда олар жергілікті «Автодор» клубымен ВТБ Бірыңғай лигасы аясында додаға түседі. Матч бейсенбі күні, 22 қазанда, астана уақытымен 21:00-де басталады.

«Автодор» 
– Ресейдің ерлер арасындағы кәсіпқой баскетбол клубы, Саратов қаласынан. 1960 жылы құрылған.​

Жетістіктері:
•    Ресей чемпионатының күміс жүлдегері – 1993/1994, 1996/1997, 1997/1998, 1998/1999
•    Ресей чемпионатының қола жүлдегері – 1995/1996
•    Еуропа кубогының жартылай финалына шыққан – 1997/1998
•    А суперлигасының чемпионы – 1996/1997, 1997/1998
•    Б суперлигасының чемпионы – 2008/2009
•    Суперлига чемпионы – 2013/2014
•    Суперлиганың қола жүлдегері – 2012/2013

Команда құрамы:

«Автодордың» құрамы былтырғы маусыммен салыстырғанда біршама өзгеріп, Саратов командасында 6 адам ғана қалды. Әсіресе, америкалықтар Айзея Хикс пен Орландо Джонсон, сондай-ақ француз Мухаммаду Жайте – орны толмас ойыншылар деуге тұрарлық легионерлер. Сонымен қатар, америкалық Райан Боутрайт пен сенегалдық Мухаммад Фэй командамен өзара келісімшарттарын ұзартқан жоқ. Бірақ екеуі де былтырғы маусымда көп ойын өткізбеген болатын. Ресейлік Алексей Бабушкин де командадан кетіп қалды. Ал ол былтыр негізгі құрам ойыншысы болған.

Ал команданың былтырғы маусымдағы көшбасшысы, америкалық Маркел Старкс Саратовтан кеткен жоқ. Сонымен қатар, былтырғы маусымда алаңға көп шыққан Ресейдің жас ойыншылары да қалды: Александр Петенев, Никита Михайловский, Антон Квитковских, сондай-ақ Егор Бестужев пен Николай Муха.

Жаңа баскетболшылардың ішінен америкалық орталық шеп ойыншысы Дрю Горданды бөле-жара атап өтуге болады. Ол – ВТБ Бірыңғай лигасына белгілі ойыншы. Саратовқа Польшаның «Зелена Гура» командасынан ауысып келді. Сонымен қатар, ертеректе «Зенитте» ойнады. Сондай-ақ, Сербияның «Партизан», Италияның «Динамо Сассари», Түркияның «Банвит», Фанцияның «Шампань Шалон-Реймс» және Литваның «Летувос Ритас» командаларында өнер көрсеткен. Әрі NBA Жетілу лигасындағы «Дэлавер ЭйтиСевентерс» және «Лонг-Айленд Нетс» командаларында, ал NBA Жазғы лигасында «Даллас Маверикс», «Юта Джазз», «Сакраменто Кингс» және «Филадельфия СевентиСиксерс» құрамдарында шыңдалған. Хорват шабуылшысы Желько Шакич те бұған дейін ВТБ Бірыңғай лигасында ойнаған. Жалпы, ол өз карьерасында бірталай команданың жейдесін киіп үлгерген. Спорттық мансабын Хорватияның «Каптол» және «Дубрава» командаларында бастап, одан кейін көрші Босния және Герцеговина еліне барып, «Зринжски Мостар» және «Широки» құрамдарында ойнап, екеуімен де бір мәрте жергілікті чемпионаттың чемпионы болған. Содан соң Црна Гораның «Сутор Монтегранаро», Испанияның «Манреса» клубтарында өнер көрсетіп, «Лукойл Академик» командасымен Болгария чемпионатында топ жарған. Бұдан кейін өз отанына оралып, Хорватияның «Цибона» клубында, бір маусым Румынияның «Ю БТ Клюй-Напока» командасында доп қуған. Польшаның «Стелмет Зелена Гура» командасымен ВТБ Бірыңғай лигасында бақ сынаған. Ал былтырғы маусымды ол Литваның «Лейткабелис Пеневежыс» командасында өткізді. Саратовтықтар сапына тағы екі жас америкалық ойыншы қосылды: шабуылшы Бен Эмелогу бұған дейін NCAA Студенттер лигасында ойнап, кәсіби карьерасын былтырғы маусымда Польшаның «Гдыня» клубында бастаған; қорғаушы Нэйт Мэйсон да Студентер лигасынан соң кәсіпқой аренада бір ғана маусым ойнаған. Ол NBA Жетілу лигасындағы «Техас Лэджендс» командасында және Израильдің «Хапоэль Эйлат» клубында тәжірибе жинақтаған. Сонымен қатар, саратовтықтар сапына үш ресейлік ойыншы қосылды. Орталық шептегі Алан Макиев ВТБ лигасына да, «Автодорға» да алғаш рет қосылып отырған жоқ. Ол бұған дейін Саратов клубы сапында бес маусым өнер көрсеткен. Сондай-ақ «Родники», «Иркут», «Рязань», тіпті ЦСКА құрамдарында да ойнады. Өткен екі маусымды ол «Уралмаш» ұжымында өткізді. Ал шабуылшы Евгений Минченко ВТБ Бірыңғай лигасына алғаш рет келіп отыр. Бұған дейін ол Украинаның «Киев» және «Одесса», Латвияның «Лиепая» және «Салдус» командалары сапында ойнаған. Ал соңғы маусымды Ресей Суперлигасында өткізіп, «Самара», «Рязань» және «Купол-Родники» командаларының намысын қорғаған. Қазір команданың ең жас ойыншысы ресейлік шабуылшы Виталиюс Пранаускис болып отыр.

Бас бапкер:

Жаттықтырушылар штабында былтырғы маусымнан тек бас бапкердің көмекшісі болған, Ресей маманы Владислав Коновалов қана қалды. Бас бапкер қызметіне Канада жаттықтырушысы Горди Херберт тағайындалды. Тәжірибелі маман өз карьерасын ойыншы ретінде сонау 1982 жылы бастап, 10 жылдан астам Финляндияның бірнеше командасында ойнап шыққан. Ол өз карьерасын түгелдей Финляндияды өткізгенімен, Олимпиада ойындары мен Әлем чемпионаттарында Канада құрамасының намысын қорғаған. Бапкерлік карьерасын Гордон сонау 1994 жылы, әрі сол Финляндияда бастаған. Содан бері бірнеше команданы жатықтырып шықты. Олар – Финляндияның «Корихайт» және «Испун Хонка», Австрияның «Оберварт Ганнерс», Германияның «С.Оливер Вурзбург», «Скайлайнерс Франкфурт» және «Альба Берлин», Францияның «Париж Баскет Рейсинг» және «Элан Биарно По-Ортез», Грекияның «Арис» клубтары. Сонымен қатар, Херберт «Торонто Рэпторс» клубының жаттықтырушылары құрамында болған. Ал мұның бәрін аз десеңіздер, ол Канада құрамасының бас бапкеріне көмекші болып, қазір өзі бас бапкер қызметін атқарады. Финляндии U-18 құрамасын жаттықтырған және Грузия құрамасының бас бапкері болған. Оның регалиясынан Еуропа кубогын, Финляндия және Франция кубоктарын жеңіп алғанын, сондай-ақ Германия чемпионатында топ жарғанын бөле-жара атап өтуге болады. Сонымен қатар, ол Австрия чемпионатында және неміс Бундес лигасында «Жыл жаттықтырушысы» атанған.

Горди Херберт

Команда көшбасшылары:

«Автодор» ВТБ Бірыңғай лигасы аясында небәрі екі ойын ғана өткізді. Бірақ екеуінде де ұтылып қалды. Әйтсе де, команданың көшбасшыларын анықтау қиын емес. Осы екі ойында америкалық Нейт Мэйсон команданың айқын көшбасшысына айналды. Ол алаңда бәрінен көп уақыт өткізеді. Әрі ең нәтижелі және тиімді ойыншы болып отыр. Одан бөлек алаңда жиырма минуттан артық ойнап және тәп-тәуір нәтиже көрсетіп жүргендер – Желько Шакич, Никита Михайловкий, Маркел Старкс және Алан Макеев. Сондай-ақ Бен Эмелогу, Александр Петенев және Дрю Гордон сынды ойыншыларға да көп сенім артылады. Евгений Минченко мен Егор Бестужев те алаңға шығып жүр.

Турнир кестесіндегі жағдай:

«Автодорға» бұл ойында жеңіске жету – өте маңызды. Өйткені олар бұған дейін екі матч өткізіп, екеуінде де ұтылып қалды. Дәл қазір олар биыл әлі жеңіске жетіп көрмеген тағы да үш командамен бірге турнир кестесінің соңында тұр. «Астана» осыдан бірер күн бұрын ғана «Химкиден» жеңісті жұлып алып, турнир кестесінің соңғы сатысынан жоғары қарай өрледі. Бірақ Саратовта ұтылып қалса, көш соңындағы командалардан алысқа ұзап кете алмайды. Сол себебпті біздің команда түзде жеңіске жетіп, турнир кестесіндегі жағдайын түзеп және нығайтып алуға тырысады. 

Кездесулер тарихы:

«Астана» мен «Автодор» өзара 14 рет кездесті. Бірақ ВТБ Бірыңғай лигасы аясында 11 рет додаға түсті. Осы матчтарда Қазақстан командасы 6 мәрте басым түсті. Былтырғы маусымда коронавирустің кесірінен жолдары бір-ақ рет түйісіп, онда Саратов ұжымы бес ұпай айырмасымен ұтып кетті. Енді биыл Қазақстан командасы соның есесін қайтаруға аттанды.

Қызықты деректер:
  • «Автодор» – «Астана» шығыршығына ең көп ұпай салған команда. Бұл 2015/2016 маусымында жүзеге асып, онда саратовтықтар бірінші ойында 131 ұпай салып, екіншісінде 132 ұпай еншілеген болатын. Әрі бұл – «Астананың» ВТБ Бірыңғай лигасы тарихындағы ең нашар көрсеткіші.
  • «Автодордың» қазіргі жаттықтырушысы Горди Херберт 1986 жылғы Әлем чемпионатында Канада құрамасының сапында ойнаған. «Астананың» бас менеджері Валерий Тихоненко да сол додада КСРО құрамасы сапында өнер көрсеткен. Алайда Канада және КСРО құрамалары сол жолы алаңда кездеспеген.

Матч бейсенбі күні, яғни 22 қазанда Саратов қаласындағы «Кристалл» спорт сарайының аренасында өтеді. Басталуы – астана уақытымен 21:00-де. Матчтың онлайн-трансляциясы біздің сайтымыздың Ойын орталығы бөлімінде, сонымен қатар QazSport телеарнасында келесі күні, 23 қазанда 08:00-де қайталанып жүргізіледі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.
 

«Астана» Саратовта «Автодордың» арынына төтеп бере алмады

22.10.2020, 23:10    Просмотров: 448
Источник: Баспасөз қызметі
Автор:

Саратовта жергілікті «Автодор» клубымен өткен ВТБ Бірыңғай лигасындағы матчтың адам айтқысыз бірінші кезеңі «Астана» баскетбол клубының осы ойынға құрған барлық жоспарының күлін көкке ұшырды. Өткені олар он минуттың ішінде оңбай ұтылды. 

Мәскеу түбінде жергілікті «Химки» клубын тізе бүктірген соң Саратовта да жеңіске жету өте мүмкін сияқты еді. Ал «Автодор» бастапқы екі ойында жеңілістің кермек дәмін татқан болатын. Әуелі ПАРМАдан 23 ұпай айырмасымен, одан кейін ЦСКАдан 34 ұпай айырмасымен ұтылған. Міне, осыны ескере отырып, бәрі де «Астананың» жеңіске жету мүмкіндігі өте жоғары деп ойлады. Бірақ Саратов саңлақтары сақадай сай шығып, тек қана қарсыластары мен трибунадағы қарасы қалың жанкүйерлерін ғана емес, көпшілікті де таң қалдырды.

Ойынның басында ешқандай жамандықтың иісі де сезілмеген-ді. Мартиньш Мейер «Астана» үшін ғана емес, жалпы осы матчтағы есепті ашты. Екі минуттан кейін есеп 5:5 болды. Бірақ бұдан кейін «Автодор» алға қарай лап қойды. Олардың мүлт кеткен сәттері болған жоқ, бәрі де шығыршыққа дөп түсе бастады. Алаң иелері 7 ұпай айырмасымен құйрық үзгенде, Эмиль Райкович тайм-аут алып, ойын өрнектеріне түзету енгізуге тырысты. Бірақ одан да қайыр болмады. Алаң иелері ұпай қорларын адам қызығарлықтай тұрақтылықпен ұлғайта берді. Ал «Астананың» ойыны қорғаныста да, шабуылда да үйлеспей қойды. Кезеңнің бел ортасында Саратов ұжымы 10 ұпай айырмасымен алға озып кетті. Әрі тізгін тарту ойларында да болған жоқ. Бірінші кезеңде «Астана» сапында Адонис Томас көзге ілікті. Бірақ алаң иелері қарқындарын әбден үдетіп алып, дәл сол сәтте олар ешқандай қарсыласты бет қаратпастай болып көсіле сілтеді. Матчтың бірінші ширек бөлігінің аяқталуына бір жарым минут қалғанда «Автодор» 20 ұпай айырмасымен мүлде қара үзіп кетті. Ал біздің команда оларды тоқтата алмай, әбігерге түсті. Саратов командасы бірінші 10 минутта 36 ұпай еншілеп, рекордты көрсеткішке қол жеткізді. «Астана» 16 ұпай жинап, қарсыласымен салыстырғанда, жер шұқып қалды. Бірінші кезеңде алаң иелерінің ойын өрнегінде мін болған жоқ: олардың алыстан да, жақыннан да допты дөп түсірген дәлдіктерінің пайызы жер мен көктей болды, сонымен қатар, «Астана» шығыршық түбінде олармен тайталаса да алмай қалды. Осыдан міне, осындай нәтиже болды. Екінші кезеңде де саратовтықтар айылдарын жиған жоқ, тіпті есеп айырмасын ұлғайта түсті. Кезең ортасында есеп айырмасы біздің команда үшін сорақы шамаға, яғни 24 ұпайға жетті. Бірақ осыдан кейін «Астана» ойларын жинақтай бастады. Олар ойынның бірінші жартысы аяқталуға айналғанда нәтижелі ойын үлгісін көрсетті. Ал есеп айырмасы 12 ұпайға дейін қысқарды. 50:38 – матчтың бірінші жартысы дәл осылай аяқталды. Соңғы минуттардағы ойын үлгісінен соң бұл цифрлар қорқынышты болып көрінген де жоқ.



Үшінші кезеңнің басы мен Джеремайя Хиллдің үш ұпайлық дәл соққысынан кейін біздің командадан комбек күтерліктей үміт сәулесі жылтылдай бастады. Себебі алаң иелерін қуып жетуге 9 ұпай ғана қалған болатын. Бірақ дер кезінде қарсыласын ығыстыра түсудің сәті түспеді. «Автодар» қайтадан көсіле шауып, есеп айырмасы лезде екі таңбалы санға жетті. Біздің жігіттер тағы да ойын тізгінін уыстарынан шығарып алды, ал алаң иелерінің ойындары қайтадан үйлесім таба қойды. Үшінші кезеңнің ортасында есеп айырмасы 20 ұпайды жуықтап, одан кейін бұл шамадан да асып кетті. «Астана» қанша тырысса да, біздің талпыныстарымызды саратовтықтар тойтарып, нәтиже шықпады. Соңғы үзіліске шыққанда «Астана» 20 ұпай айырмасымен ұтылып жатты (75:55). Ал бұл өте көп еді. Төртінші кезеңдегі үмітіміз әр минут сайын көмескі тарта берді. Өйткені біздің команда қанша талпынса да, алаң иелерінің жауабы дайын болып шықты. Әйтсе де, «Астана» 3 минуттың ішінде есеп айырмасын 15 ұпайға дейін қысқарта алды. Осылай дода көрігі қыза түскендей болып еді. Бірақ «Автодор» қайтадан қамшыны басып, тағы да 20 ұпайдай басымдықпен құйрық үзді. Өкінішке қарай, ойынның аяқталуына бес минут қалғанда, бүгін біздің жеңіске жете алмайтынымыз белгілі болды. Матч соңы ашық ойын үлгісінде өтіп, екі команда да тұрақты түрде ұпай қорларын ұлғайта берді. Бірақ есеп айырмасы сол күйі сақталып тұрды. Сөйтіп, «Автодор» 107:85 есебімен айқын басымдыққа қол жеткізді. Бір ойында 85 ұпай еншілеу – аз көрсеткіш емес, әрине. Бірақ бұл матчта алаң иелері құйындай орап соқты, оларды тоқтату мүлде мүмкін болмады. Әрине, бірінші кезең тауымыз шағыларлықтай болды. Бірақ ойынның бел ортасында ойын өрнегін өзгертуге болатын мүмкіндік пайда болған. Қарсыласымыз бүгін көсіле шауып, қорғаныстағы түсініксіз ойынымыз олардың арынды шабуылдарын тойтаруға қауқарсыз болып шықты. Сондай-ақ 15 рет доптан айырылып қалуымыз да (қарсыласымыз 8 рет), кері әсерін тигізді.



Ең көп ұпай еншілегендер: 

  • «Автодор» – бүгін алаң иелерінің бақандай 6 ойыншысы 10 ұпайдан артық еншіледі, ал олардың екеуі, яғни Нейт Мэйсон мен Никита Михалковский 21 ұпайдан олжалады. Біздің жігіттер Желько Шакичті де, Маркел Старксті де, Дрю Гордонды да және Антон Квитковскихті де тоқтата алмай қалды.
  • «Астана» – Адонис Томас тәп-тәуір үлгісін көрсетіп, 22 ұпай еншіледі. Джеремая Хилл де өз есебіне 22 жазды, бірақ бұл көрсеткішке 5 реттен доптан айырылып қалғаны нұқсан келтіреді – команданың доптан айырылып қалған барлық көрсеткішінің үштен бір бөлігі. Майкл Томпсон алаңда 36 минуттай өткізіп, 13 ұпай еншіледі және 13 пас берді.


«Автодордың» бас бапкері Горди Херберт:
— Біз бірінші кезеңде тамаша ойын үлгісін көрсетіп, матч басында көз ілеспес қарқынды паш еттік деп есептеймін. «Астана» бірнеше рет дода көрігін қыздыруға тырысты, бірақ біз оның бәріне сауатты түрде әрекет етіп, команда ретінде жұдырықтай жұмылдық, өте жақсы баскетбол ойынын көрсеттік және матчтың басынан аяғына дейін өзімізге сенімді түрде алда болдық. Бүгін ойын алаңында 10-12 күнгі шүмектетіп тер төккен жаттығуларымыздың нәтижесін көрсетік.

«Астананың» бас бапкері Эмиль Райкович:
— «Автодорды» жеңісімен құттықтаймын. Қарсыласымыз тамаша ойын өрнегін көрсетіп, ойынның басынна бастап тек жеңіске жетуді көкседі. Біз бірінші кезеңде көп ұпай жіберіп алдық, одан кейін қуып жету өте қиын болды. Химкиде жеңіске жеткеннен кейін екінші рет қатарынан түзде ойнап отырмыз, бізге босаңсуға болмайтынын және ерте екенін көрсеті. Егер жеңіске жеткіміз келсе, әлі де, әсіресе қорғаныста шүмектетіп тер төгу керек.

Салдары: «Автодор» биылғы маусымдағы бірінші жеңісіне қол жеткізді. Әрі осы жеңісінің арқасында турнир кестесінің тоғызыншы сатысына көтеріліп, плей-офф аймағындағы командаларға мейілінше жақындай түсті және біздің команданы оныншы орынға ығыстырды. «Астана» өзекті өртер жеңіліске ұшырады, бірақ маусым енді ғана басталды, бәрі де – алда, ойындар да көп әлі.

Келесі матч: Бірыңғай лигасы аясындағы ойындар бірінен соң бірі кейінге шегеріліп жатыр. Мәселен, «Нижний Новгород» карантинге кетіп, бұл команданың жуырдағы ойындарының бәрі бекітілмеген мерзімге ығыстырылды. Корновирус қауіпі сейіліп, ВТБ лигсының ойындары күнтізбесі енді жиі өзгертіліп отырмайды деп үміттенеміз. Әзірше, келесі ойыны 1 қараша күні Санкт-Петербургте жергілікті «Зенитпен» өтеді деп жоспарланған. Ал 26 және 27 қазан күндері Ұлттық лигада «Каспий» командасымен кездесуі керек.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

# Тәж індетінен сақ болып, «Астанаға» жақ болыңыздар!

Қарсылас жайлы мәлімет

Құрылған жылы: 1960 Клубтық түстері: ақ, қара
Мемлекет: Ресей Арена: СС «Кристалл»
Қала: Саратов Сайт: avtodor.ru

Сипаттамасы

«Автодор» – Ресейдің ерлер арасындағы кәсіпқой баскетбол клубы, Саратов қаласынан, 1960 жылы құрылған.
 
Жетістіктері:
  • Ресей чемпионатының күміс жүлдегері – 1993/1994, 1996/1997, 1997/1998, 1998/1999
  • Ресей чемпионатының қола жүлдегері – 1995/1996
  • Еуропа кубогының жартылай финалына шыққан – 1997/1998
  • А суперлигасының чемпионы – 1996/1997, 1997/1998
  • Б суперлигасының чемпионы – 2008/2009
  • Суперлига чемпионы – 2013/2014
  • Суперлиганың қола жүлдегері – 2012/2013