ВТБ Бірыңғай лигасы 2020/2021
Астана
Астана
ВТБ Бірыңғай Лигасы, Тұрақты біріншілік
25.04.2021, 17:00 Жс
Арена: «Сары-Арқа» велотрегі (Астана)
74:109
Негізгі уақыт
17:25 21:32 24:17 12:35
Ойын нөмірі: RS-76
Көрермен: 0
Минск
Минск

«Астана» ВТБ лигасы маусымын өз алаңында «Цмоки-Минск» командасымен тәмамдайды

24.04.2021, 18:10    Просмотров: 211
Источник: Баспасөз қызметі
Автор:

ВТБ Бірыңғай лигасы додасының негізгі бөлігін «Астана» баскетбол клубы өз алаңында Беларусь елінің «Цмоки Минск» командасымен тәмамдайды. Яғни бұл матч елорда командасы үшін Лиганың биылғы маусымындағы соңғы ойын болады. Матч жексенбі күні, 25 сәуірде өтеді. Басталуы – астана уақытымен 17:00-де.

НАЗАР АУДАРЫҢЫЗДАР!
 — Коронавирус нәубеті салдарынан, астанаға енгізілген шектеу шараларына байланысты, матч көрерменсіз бос трибуналарда өтеді.

«Цмоки-Минск» – Беларусь елінің ерлер арасындағы кәсіпқой баскетбол клубы, Минск қаласынан. 2006 жылы құрылған. Биылғы маусымда ВТБ Бірыңғай лигасы мен Беларусь чемпионатынан бөлек, Еуропа кубогы додасында да өнер көрсетеді.

Жетістіктері:

  • Беларусь чемпионы: 2009−2020
  • Беларусь кубогы жеңімпазы: 2010−2020


Естеріңізге сала кетейік, Беларусь “айдаһарларымен” өтетін алдағы матч біздің команда үшін биылғы маусымда ВТБ Бірыңғай лигасы аясындағы соңғы ойын болады. Бұл кездесу Лига додасының негізгі бөлігіндегі соңғы күнтізбелік ойын күні өтеді. Биылғы маусымла «Цмокилермен» додаға түскен бірінші ойын осыдан бір айдан сәл ғана асатын уақыт бұрын Минскіде өткен болатын. Онда біздің жігіттер жанкештілік танытып, екі ұпай айырмасымен жеңісе жеткен – 78:80. Содан бері Минск ұжымы бес ойын өткізіп, бәрінде де жеңілістің кермек дәмін татты. Әуелі олар “Химки” мен “Пармадан” түзде ұтылды. Одан кейін “Локо”, “Енисей” және тағы да “Химки”командаларына өз алаңында, үш рет қатарынан есе жіберіп алды.

Турнир кестесіндегі жағдай:

“Цмоки Минск” дәл қазір турнир кестесіндегі соңғы, он үшінші орынға табан тіреп тұр. Олар биылғы маусымдағы 23 ойынның тек екеуінде ғана жеңіске жетті. Алдағы ойынның нәтижесі олардың қорытынды кестедегі жағдайларына ешқандай да әсер етпейді, яғни матч қалай аяқталса да, минскіліктер соңғы орында қалады. “Астананың” бұл қарсыласынан 4 жеңісі артық, яғни біздің жігіттер 23 ойынның 6-уында жеңіске жеткен. Бірақ біздің команда осы нәтижелерімен тек 12-орында тұр, Беларусь жігіттерінен бір саты ғана жоғары орналасқан. Бұл ойынның нәтижесі – біздің команда үшін мағыналы. Нақтырақ айтқанда, бір саты жоғары көтеріліп, он бірінші орынға ие болу мүмкіндігі бар. Алайда осы кездесудегі жеңіс – тек мүмкіндік қана. Себебі қорытынды кестедегі жағдай параллель өтетін “Енисей” мен “Калев” арасындағы ойынның нәтижесіне де байланысты болады. Яғни, егер “Астана” өз алаңында «Цмокилерді» ұтып, ал “Калев” Красноярскіде жеңіске жетсе, онда біздің команда 11-орынға ие болады. Осы екі ойын басқадай нәтижелермен аяқталса, олардың бәрінде де “Астана” маусымды 12-орынмен тәмамдайды.

Команда құрамындағы өзгерістер:

Өткен жолғы екеуара кездесуден бері, осыдан бір айдан сәл ғана асатын уақыт бұрын өткен, ертеңгі қарсыласымыздың құрамы өзгерген жоқ. Сол себепті олар біздің ойыншылар мен жаттықтырушылар құрамына мейілінше таныс.

Команда көшбасшылары:

Дәл қазір команданың ең тиімді және нәтижелі ойыншысы Крис Клайберн болып саналады. Сонымен қатар, команда көшбасшылары қатарына Дерек Кук пен Томс Лейманисті қосуға болады. Беларусь ойыншыларынан үнемі алаңға шығып отыратын Павел Бенджамин Дуду, Андрей Рогозенко және Владимир Веремеенко үшеуін бөле-жара атап өтуге болады. Бұл ретте, алаңға көп шығып жүрмесе де, Александр Пустогварды да ұмытпауымыз керек. Ал Евгений Белянков болса, соңғы рет “Астанамен” өткен өз алаңдарындағы матчта ғана ойын хаттамасына іліккен болатын. Алексей Тростинецкий екі айды жуықтап қалды, әлі алаңға шыққан емес.
 


Матч жексенбі күні, 25 сәуірде Нұр-Сұлтандағы «Сарыарқа» республикалық велотрегі аренасында өтеді. Басталуы – астана уақытымен 17:00-де. Матчтың онлайн-трансляциясы біздің сайтымыздың Ойын орталығы бөлімінде, сонымен қатар QazSport телеарнасында тікелей эфирде жүргізіледі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» ВТБ лигасының биылғы маусымы соңында «Цмоки Минск» командасынан өз алаңында ұтылды

26.04.2021, 10:00    Просмотров: 287
Источник: Баспасөз қызметі
Автор:

«Астана» баскетбол клубы ВТБ Бірыңғай лигасының биылғы маусымындағы соңғы ойынында Беларусь елінен келген қонақтарына төтеп бере алмай, өз алаңында “Цмоки-Минск” командасынан ойсырай ұтылып қалды.

Ортада лақтырылған допты қонақтарымыз іліп әкетіп, әрі олар осы ойындағы есепті де ашты. Алдын-ала айта кетейік, ойының басы “Астана” үшін өте сәтсіз болып шықты – оның себебі доптан жиі айырылып қалу және шығыршыққа доп түсіре алма болды. Ал қонақтар болса, бірінші минуттан бастап, мұның бәрін өз кәделеріне жарата біліп, шабуылдарының бәрін ойдағыдай аяқтап отырды. Осылай, олар 0:11 есебімен қара үзіп кетті. Біздің команда алғашқы ұпайын айып сызығынан еншіледі – Николай Бажин бір мүмкіндігін мүлтіксіз орындады. Ал Асқар Майдекин сәл кейінірек біздің команданың ойын барысындағы алғашқы ұпайларын қоржынымызға салды. “Айдаһарлар” тізгін тартпай, үстемдік құрып, есеп айырмасын бірінші кезеңнің бел ортасында-ақ 16 ұпайға жеткізді. “Астана” осыдан кейін ғана күш-жігерін жинақтап, бірте-бірте есеп айырмасын қысқарта бастады. Николай Бажин екі рет айып сызығынан доп салды, ал Оярс Силиньш өзінің алғашқы үш ұпайлық добын нысанаға дөп түсіріп, әрі үш рет айып соққысын мүлтіксіз орындады. Кезең соңына дейін біздің команда сапынан Рустам Мырзағалиев пен Дмитрий Гаврилов қоржынымызға ұпайлар қосты. Бастапқы 10 минут ойын уақытынан кейін “Астана” 8 ұпай айырмасымен ұтылып жатты – 17:25. Екінші кезең Гавриловтың доп салуымен басталды. Сөйтіп, есеп айырмасы 6 ұпайға дейін қысқарды. Алайда “Цмоки-Минск” ұпай қорын сенімді түрде молайта беріп, ал біздің команданың шабуыл өтінде ойыны мүлде үйлеспей қойды. Антон Пономарев салған үш ұпайлық доп та қонақтарға сес бола алмады, ал есеп айырмасы кезеңнің бел ортасына дейін 18 ұпайға жетті. Бұдан кейін Николай Бажин мен Асқар Майдекин доп салған, бірақ қонақтардың басымдығы 20 ұпайға жетті. Матчтың бірінші бөлігі аяқталғанша «Астана» сапынан Пономарев, Бажин, Силиньш және Хилл доп салды. Бірақ жиырма минут ойын уақытынан кейінгі есеп айырмасы көңіл көншірліктей болмады – 38:57.

Аскар Майдекин

Үлкен үзілістен кейін біздің жігіттердің ойындары сәл де болса оңала бастады. Әрі Джеремайя Хилл мен Дмитрий Гаврилов салған доптардан кейін есеп айырмасы оның үштен бір бөлігінен асатын шамаға қысқарды. Эмиль Райковичтің шәкірттерінің өздеріне деген сенімділіктері арта түсті. Матчтың бірінші жартысында оларға осы жетпегені де осы еді. Үшінші кезеңнің ортасында «Астананың» қозғаушы күші Джеремайя Хилл болып, оны өзінің ұпайларымен Оярс Силиньш қолдап отырды. Бұдан кейін Руслан Айтқали есеп айырмасын 8 ұпайға дейін қысқартты. Әйтсе де, қонақтар Қазақстан командасының арынына төтеп беріп, есеп айырмасын одан әрі қысқартуларына кілт тоқтатты. Тіпті есеп айырмасын қайтадан екі таңбалы санға жеткізіп, алысқа ұзап кетті. Асқар Майдекин мен Джеремайя Хилл “Астананың” ұпай қорын толықтыра түскендерімен, соңғы кезең қарсаңында біздің команда 12 ұпай айырмасымен ұтылып жатты – 62:74. Негізі, бұл да еңсе түсірерліктей нәтиже емес еді. Бірақ төртінші кезең «Астана» үшін апатқа ұшыраған ойын бөлігі болып шықты. Соңғы онминуттықтың басынан-ақ біздің жігіттер доп сала алмай, сергелдеңге түсті. Ал қонақтар болса, өздерінің бұл мақсаттарын ойдағыдай жүзеге асырумен болды. Максим Марчук бұл кезеңдегі “Астананың” ең алғашқы ұпайларын төртінші минутта ғана еншіледі. Ал бұл уақытта есеп айырмасы 20 ұпайдан асып кеткен болатын. “Айдаһарлар” одан әрі үстемдік танытып, матчтың аяқталуына бес минут қалғанда 30 ұпай айырмасынан артық есеппен ұтып жатты. Сонымен қатар, 10 ұпай межесінен де асып түсті. Ойын соңында біздің команда сапынан Антон Пономарев пен Джеремайя Хилл доп салып, ал Роберт Пан осы матчтың қорытынды есебін түйіндеді. Ал ол, яғни ойын нәтижесі біздің ұжым үшін жер шұқитындай айырмашылықпен тәмамдалды – 74:109.

Салдары: Бұл ВТБ Бірыңғай лигасының биылғы маусымындағы соңғы ойын еді. Өкінішке қарай, “Астана” турнир кестесінің қорытындысында 12-орынды қанағат тұтты.
 


Ең көп ұпай еншілегендер:

  • «Астана» – біздің команда сапынан бұл ойындағы үздік ойыншы Джеремайя Хилл болды – 17 ұпай, 7 рет доп қағып алды, 5 пас. Оярс Силиньш бүгін 14 ұпай жинап, 2 рет доп қағып алды. Дмитрий Гавриловтың еншісінде – 10 ұпай және 3 рет доп қағып алды. Антон Пономарев 8 ұпай еншілеп, 3 рет доп қағып алды және 2 пас берді. Ал Николай Бажин 7 ұпай олжалап, 4 рет доп қағып алды және 3 пас берді.
  • «Цмоки-Минск» – бүгін Крис Клайберн құйындай орап соқты – 33 ұпай және 5 рет доп қағып алды. Бенджамин-Павел Дуду 20 ұпай жинап, 3 рет доп қағып алды және 5 пас берді.
 


«Астананың» бас бапкері Эмиль Райкович:
— «Цмоки-Минск» командасын жеңісімен құттықтаймын. Олар бүгін бізден асып түсті және жан-тәндерін салып ойнады. Өкінішке қарай, біз бүгінгі ойын қарқынына ілесе алмадық және физикалық тұрғыда спорттық бабымызға сай болмадық. «Астананың» бас бапкері ретінде ВТБ лигасының соңғы ойынында жеңіліске ұшырау жақсы емес, әрине. Биылғы маусымда өте қиын болды, бірақ ең маңыздысы, жергілікті баскетболшылар өз деңгейлерін әлдеқайда көтерді. Көп-көп рахмет, бәріңізге де тек қана жақсылық тілеймін!

«Цмоки-Минск» бас бапкері Ростислав Вергун:
— Екі командаға да ауыр тиген маусым аяқталды. Біз қарсыласымыздың қандай қиындықтардан өткенін жақсы білеміз. Биыл бізге де өте қиын болды, ойымыздағының бәрін жүзеге асыра алмадық. Бүгін біз тек қана жеңіске жетуді ойладық, әрі мен жігіттерімнің өз күш-жігерлерін тиімді баскетболға жұмылдыра білгендеріне қуаныштымын. Тиімділігі жағынан бұл матч біздің биылғы маусымдағы ең үздік ойынымыз болды. Эмиль Райкович пен оның командасына тек табыс тілеймін. Келесі маусымда тағы кездесеміз деп үміттенемін.
 


Келесі матч: Осымен «Астананың» ВТБ Бірыңғай лигасының биылғы маусымдағы өнері тәмамдалды. Енді біздің командаға еліміздің Ұлттық лигасының плей-офф сатысында чемпиондық атағын қорғап қалу керек. Оны біздің жігіттер 1/2 финалында Ақтаудың «Каспий» командасымен бастайды. Үш жеңіске дейін жоспарланған екеуара доданың алғашқы үш ойыны 27, 28 және 30 сәуір күндері Нұр-Сұлтанда өтетін болып жоспарланған.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құрылған жылы: 2006 Клубтық түстері: ақ, көк
Мемлекет: Белоруссия Арена: Falcon Club
Қала: Минск Сайт: www.bc-tsmoki.by

Сипаттамасы

«Цмоки-Минск» – беларустің ерлер арасындағы кәсіпқой баскетбол клубы, Минск қаласынан, 2006 жылы құрылған.

Жетістіктері:
  • Беларусь чемпионы – 2009/2021
  • Беларусь кубогының жеңімпазы – 2010/2021
  • Азовмаш Кубогының қола жүлдегері – 2010