ВТБ Бірыңғай лигасы 2020/2021
Астана
Астана
ВТБ Бірыңғай Лигасы, Тұрақты біріншілік
31.01.2021, 15:00 Жс
Арена: «Сары-Арқа» велотрегі (Астана)
83:92
Негізгі уақыт
29:19 19:22 11:25 24:26
Ойын нөмірі: RS-25
Көрермен: 0
Автодор
Саратов

«Астана» өз алаңында «Автодормен» қарымта кездесу өткізеді

30.01.2021, 18:30    Просмотров: 253
Источник: Казахстанская Правда
Автор:
«Астана» баскетбол клубы ВТБ Бірыңғай лигасында Саратовтың «Автодорымен» өтетін, өз алаңындағы қарымта матчта есе қайтаруға тырысады. Кездесу жексенбі күні, яғни 31 қаңтарда өтеді. Басталуы – астана уақытымен 15:00-де.

НАЗАР АУДАРЫҢЫЗДАР!
 — Коронавирус нәубеті салдарынан, астанаға енгізілген шектеу шараларына байланысты матч көрерменсіз бос трибуналарда өтеді.

«Автодор» – Ресейдің ерлер арасындағы кәсіпқой баскетбол клубы, Саратов қаласынан. 1960 жылы құрылған.

Жетістіктері:
​•   Ресей чемпионатының күміс жүлдегері – 1993/1994, 1996/1997, 1997/1998, 1998/1999
•   Ресей чемпионатының қола жүлдегері – 1995/1996
•   Еуропа кубогының жартылай финалына шыққан – 1997/1998
•   А суперлигасының чемпионы – 1996/1997, 1997/1998
•   Б суперлигасының чемпионы – 2008/2009
•   Суперлига чемпионы – 2013/2014
•   Суперлиганың қола жүлдегері – 2012/2013

“Автодор” 22 қазан күні, Саратовта өткен, биылғы маусымдағы “Астанамен” екеуара матчтың біріншісінде басымдық танытқан болатын — 107:85. Атап өтуге тиіспіз, саратовтықтар сол матчтың бірінші кезеінде құйындай орап соғып, барлық соққыларын нысанаға дөп түсірген. Осы бірінші он минуттықта қол жеткізген басымдықтары жеңіске жетулеріне негіз болған. Сол матчтан кейін кейін Саратов командасының сәтті сериясы басталып, олар төрт ойында қатарынан жеңіске жеткен болатын. Нақтырақ айтқанда, саратовтықтар қарқынына “Химки”, “Цмоки-Минск”, “Локомотив-Кубань” және “Енисей” төтеп бере алмаған. Жаңа жыл қарсаңындағы соңғы матчта олар “Зелена Гурадан” небәрі бір ұпай айырмасымен ұтылып қалды. Ал биыл “Автодор” маусым басындағыдай, жоғары деңгейде ойнай алмай жүр. Олар УНИКСпен және “Зенитпен” өткен матчтарда ойсырай ұтылып қалды. Одан кейін, өз алаңында “Калевке” де есе жіберіп алды. Соңғы екі ойында саратовтықтар өз алаңында ЦСКА командасынан, ал түзде “Зелена Гурадан” ұтылды.

Турнир кестесіндегі жағдай:

Біздің командамен өтетін қарымта матчқа дейін, “Автодор” 13  ойын өткізіп, соның алтауында жеңіске жетті. Бұл нәтиже Саратов командасының турнир кестесіндегі жетінші сатысына орналасуына мүмкіндік беріп тұр. Айта кетуіміз керек, “Автодор” жеңістерін бір-біріне сабақтап жүрген кезінде көшбасшылар үштігіне іліккен. “Астана” лиганың негізгі додасында 12 ойын өткізді, әзірше біздің еншімізде – төрт жеңіс қана, турнир кестесінің оныншы сатысы. Алдағы матчтың нәтижесі “Астанаға” ешқандай әсер етпейді, ойын қалай аяқталса да, біздің жігіттер оныншы орында қалады. Ал “Автодор” жеңіске жетсе, жетінші орнын сақтап қалады, егер ұтылып қалса, алдына “Химкиді” өткізіп алады.

Команда құрамындағы өзгерістер:

Өткен ойынмен салыстырғанда “Автодордың” құрамы әжептәуір өзгеріске ұшырады. Дәл сол күні, “Астанамен” додаға түскенде, Саратов командасы сапынан екі ойыншы кетіп қалды – америкалық Бен Эмелогу және ресейлік Николай Муха. Айтпақшы, Николай өз карьерасын Қазақстанда жалғастырып, “Ақтөбе” командасы сапында ойнады, ал қазір “Қарағанды” құрамына тіркелді. Желтоқсанда тағы бір ресейлік ойыншы, яғни Егор Бестужев “Уфимец” командасына жалға берілді. Нұр-Султандағы ойынға бір аптадан да аз уақыт қалғанда, “Автодордың” орталық шептегі америкалық Дрю Гордонмен арадағы келісімшартты бұзғаны балгілі болды.

Жаңа ойыншыларына келсек, Саратов ұжымы өзінің фарм-командасынан төрт бірдей жас ойыншыны қатарына қосты – шабуылшылар Александр Барышев, Вадим Харисов, Всеволод Широбоков және Илья Салтыков. Бірақ Салтыковтан басқасы әлі алаңға шыққан емес. Әрі «Автодор» құрамын шетелдік үш ойыншы толықтырды. Пуэрто-Рико қорғаушысы Джиан Клавелл алғаш рет “Автодор” сапында 26 қарашада ойнады. Ол өз карьерасын Пуэрто Рикодағы “Брухос де Гуаяма” командасы сапында бастаған. Содан соң NBA-дағы “Даллас Маверикс” құрамына іліккен. Бұдан кейін Еуропада ойнаған — Түркияның “Сакарья” және “Бурсаспорт”, сондай-ақ Испанияның “Эстудиантес” командаларында. Желтоқсанда команда сапын орталық шептегі Чад ойыншысы толықтырды – Крист Кумадже. Ол өте ірі ойыншы – 224 см және 124 кг. Крист “Делавэр Блю Коатс” командасы сапындағы тырнақалды маусымында, NBA Жетілу лигасының ең үздік қорғанушы ойыншысы болған. Ал биылғы маусымды ол Испанияның “Эстудиантес” командасы сапында бастады. 27 қаңтар күні “Автодор” орталық шептегі Душан Ристичпен келісімшартқа отырғандығын жариялады. Иә, ол былтырғы маусымда ғана “Астананың” ең үздік ойыншыларының бірі болған. Бірақ Душан біздің командамен өтетін матчта алаңға шыға ма, жоқ па, белгісіз.

Команда көшбасшылары:

Команда сапындағы ең тиімді және көп ұпай жинаған ойыншы – америкалық Нэйт Мэйсон. Командадағы тағы бір көшбасшы хорват шабуылшысы Желько Шакич болып саналады. Бұлармен бірге негізгі құрамға Маркел Старкс, Джиан Клавелл, Никита Михайловский және Антон Квитковских кіреді. Сонымен қатар, “Автодордың” жаттықтырушылары құрамы алаңға көбінесе Алан Макиевті, Александр Петеневті және Евгений Минченконы шығарады.

Матч жексенбі күні, 31 қаңтарда Нұр-Сұлтандағы «Сарыарқа» республикалық велотрегі аренасында өтеді. Басталуы – астана уақытымен 15:00-де. Матчтың онлайн-трансляциясы біздің сайтымыздың Ойын орталығы бөлімінде, сонымен қатар QazSport телеарнасында тікелей эфирде жүргізіледі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» өз алаңында «Автодордан» есе қайтара алмады

01.02.2021, 10:00    Просмотров: 263
Источник: Баспасөз қызметі
Автор:

Саратовтың «Автодорымен» өз алаңында өткен матчты жоғары қарқында бастап, бірінші кезеңді +10 ұпай басымдықпен аяқтағанымен, «Астана» баскетбол клубы матчтың екінші бөлігінде қонақтарының есепті теңестіріп, тіпті жеңісті өңгеріп кетулеріне мүмкіндік беріп қойды.

Ортада лақтырылған допты біздің команда іліп әкетіп, бірінші шабуылда-ақ Мартиньш Мейерс есеп ашты. Қонақтар да қарап қалмай, «Автодор» бірден жауап қатып, тіпті алға да шығып кетті. Бұдан кейін Адонис Томас осы ойындағы бірінші үш ұпайлық доптың авторы атанды. Әрі “Астананы” алға шығарды. Жалпы, бастапқы бес минутта біздің команда еншілеген ұпайлардың барлығын дерлік дәл осы Адонис олжалап отырды. Әрі Роберт Пан үш ұпайлық соққысын нысанаға дөп түсірді. Алғашқы онминуттықтың ортасына қарай саратовтықтар 6 ұпай айырмасымен ұтылып жатты. Ал Николай Бажин мен Майкл Томпсонның орындауындағы іркес-тіркес сәтті шабуылдардан соң есеп айырмасы екі таңбалы санға жетті. Қонақтар бар күш-жігерлерін салып, есеп айырмасын қысқартуға тырысты. Әрі олар оны аздап қысқартты да. Алайда «Автодордың» бұл талпынысын Девин Марбл тоқтатып, кезеңнің екінші жартысында көсіле сілтеді. Кезең соңында Майкл Томпсон тағы да үш ұпайлық доға сыртынан мергендік танытып, “Астана” басымдығын қайтадан екі таңбалы санға жеткізді – 29:19. Екінші кезеңде Девин Марбл біздің команданың он ұпай шамасындағы басымдығына өз үлесін қосты. Ал капитан Рустам Мырзағалиев өзінің үш ұпайлық соққысымен біздің команданың кішігірім серпілісін бастап, қонақтардан 17 ұпай айырмасымен қара үзе бастадық. Кезеңнің ортасында Мартиньш Мейерстің “басы дауға” қалды. Ол допты данк тәсілімен қонақтардың шығыршығына салған болатын, бірақ шығыршыққа ұмтылғанда ұқыптылық танытпады. Төрешілер біздің ойыншының ұпайларын есепке алмаумен ғана шектелмей, оған спортқа жат фол берді. Бұған қоса, біздің командаға техникалық фол берілді. Осылай, қонақтар үш айып соққысын орындау мүмкіндігіне ие болды. Әрі одан кейін доп олардың иелігінде қалатын болды. Қонақтар бұл мүмкіндіктің бәрін толықтай жүзеге асырып, есеп айырмасын 10 ұпайға дейін қысқартты. Екі минуттан кейін саратовтықтар 6 ұпай айырмасымен ғана ұтылып жатты. Матчтың бірінші жартысының аяғына дейін біздің команданың қоржынына Мартиньш Мейерс пен Джеремайя Хилл ұпайлар қосты, бірақ екі таңбалы санға тең басымдыққа қайтадан қол жеткізе алмадық. Ойынның бірінші жартысын Дмитрий Гаврилов түйіндеді – 48:41.

Адонис Томас

Майкл Томпсон матчтың екінші жартысын алыстан лақтырған кезекті дәл соққысымен бастады. Әрі біздің команданың басымдығын екі таңбалы санға жеткізді. “Автодор” бұған да жасымай, өздерінің ойын өрнектерін түзей бастады. Әрі үшінші кезеңнің екі жарым минут ойын уақытынан кейін таблодағы есепті теңестірді. Әрине, бұл біздің жаттықтырушылар құрамына ұнаған жоқ, әрі Эмиль Райкович қонақтардың қарқындарын тежеу үшін және өз шәкірттерінің ойындарына өзгеріс енгізу үшін бір минуттық іркіліс алды. Үшінші кезеңнің ортасы толықтай ойын тізгініне таласумен өтті, командалар алма-кезек алға шығып, таразы басы бірнеше рет теңесті. Девин Марбл кезеңнің аяқталуына екі минут қалғанда есепті кезекті рет теңестірді. Өкінішке қарай, бұл біздің команданың осы кезеңдегі соңғы ұпайлары болып шықты. Ал саратовтық ұжым осы уақыт аралығында өз еншісіне 7 ұпай қосты. Осылайша, “Астана” төртінші кезеңге дейін қонақтарын алға шығарып қойды – 59:66. Үшінші кезең өте сәтсіз ойын бөлігі болып шығып, 7 ұпай айырмасымен ұтып жатқан командамаыз енді 7 ұпай айырмасымен ұтылып жатты. Төртінші кезеңдегі дода өте шиеленісті болды. Марбл мен Томас еншілеген ұпайлардан соң небәрі бес ұпай айырмасымен ұтылып жатқанбыз, бірақ “Автодор” дәл осы сусымалы басымдығын уысынан шығармады, тіпті “Астананы” өзіне бір табан жақындатпай қойды. Кезеңнің ортасына қарай, Майкл Томпсонның мүлтіксіз орындаған айып соққыларынан соң, есеп айырмасы 6 ұпайға дейін қысқарып еді, саратовтықтардың жаттықтырушылары бір минуттық үзіліс алатын құқықтарын қолданды. Бұл тайм-аут оларға майдай жағып, екі минутан кейін қонақтар 10 ұпайдан артық есеп айырмасымен алға озды. Уақыт болса, аз қалған. Бірақ жағдайды түзегеннің орнына, матчтың аяқталуына санаулы минуттар қалғанда Мартиньш Мейерс ескерту алды. Бұл оның бесінші рет ереже бұзуы еді, яғни ол алаңнан аластатылды. Әйтсе де, Майкл Томпсон есеп айырмасын 7 ұпайға дейін қысқартып, дода көрігін соңғы рет қыздыра түсті. Ал матчтың аяқталуына бір жарым минут қалған болатын. Бірақ “Автодор” барлық күш-жігерімен матч соңын шиеленістіре түспеуге тырысты. Матчтың соңғы минуты тартысты ойын сәттеріне толы болды. Есеп айырмасы 10 ұпай болып тұрғанда, біздің команда барлық күш-қайратын жұмсады. Матчтың аяқталуына 9 секунд қалғанда Адонис Томас есеп айырмасын төрт ұпайға дейін қысқартты, бірақ уақыт өте аз қалған еді. Соңғы тайм-ауттан кейін “Астана” ойыншылары оларға Эмиль Райкович “сызып бергендердің” ешқайсысын жүзеге асыра алмады. Сөйтіп, өте маңызды жеңісті уыстарынан шығарып алды – 83:92.

Салдары: Екі команда да турнир кестесіндегі өз орындарында қалды: “Автодор” – жетінші, ал “Астана” – оныншы. Алайда біздің команда плей-офф аймағынан көп алыстап кетті.
 


Ең көп ұпай еншілегендер:

  • «Астана» – Майкл Томпсон өз еншісіне 20 ұпай жазып, 3 рет доп қағып алды, 9 пас беріп, 2 рет допты тартып әкетті. Девин Марблдың еншісінде – 19 ұпай, 6 рет доп қағып алды, 2 пас және 3 рет допты тартып әкетті. Адонис Томас 15 ұпай жинап, 3 рет доп қағып алды және 3 пас берді. Ал Мартиньш Мейерс бүгін 10 ұпай олжалап, 6 рет доп қағып алды және 2 пас берді.
  • «Автодор» – Желько Шакич дабл-дабл авторы атанды – 20 ұпай және 11 рет доп қағып алды. Евгений Минченко 19 ұпай, ал Нэйт Мэйсон мен Никита Михайловский 17 ұпайдан жинады.
 


«Астананың» бас бапкері — Эмиль Райкович:
— «Автодорды» жеңісімен құттықтаймын. Бүгін олар бізден жақсы ойнады, әсіресе матчтың екінші жартысында. Біз ойынның бірінші жартысын жақсы бастадық, бірақ одан кейін ескертулер алып, жағдайымыз қиындай түсті. Бүгін Оярс Силиньш ойнай алмады, сондықтан Желько Шакич бізге көп қиындық туғызды. Біздің бүгінгі жеңілісіміздің басты себебі осы болды деп ойлаймын.

«Автодордың» бас бапкері — Горди Херберт:
— Мен өз ойыншыларымды мақтан тұтамын. Біз өткен аптада неше түрлі қиындықтарға тап болдық. Кейбір ойыншыларымыз ауырып қалып, толыққанды жаттығу жұмыстарын өткізе алмады. Нұр-Сұлтанға жету үшін бізге 30 сағат қажет болды. Бірақ мұның бәріне қарамастан, бүгін маңызды жеңіске қол жеткіздік. Өз жігіттерімді тамаша нәтижемен және ойындарымен, әсіресе соңғы 25 минуттағы жанкештіліктерімен құттықтаймын.
 


Келесі матч: Астана баскетболшылары ВТБ Бірыңғай лигасындағы қарсыластарын өз алаңында қабылдауын одан әрі жалғастырады. 4 ақпан күні Нұр-Сұлтанға қарымта матч өткізу үшін Красноярскінің «Енисей» командасы келеді. Ал ақпан айыны бірінші демалысын біздің жігіттер Ақтөбеде өткізіп, осы қаланың өзі аттас командасымен Ұлттық лига аясында екі мәрте кездеседі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құрылған жылы: 1960 Клубтық түстері: ақ, қара
Мемлекет: Ресей Арена: СС «Кристалл»
Қала: Саратов Сайт: avtodor.ru

Сипаттамасы

«Автодор» – Ресейдің ерлер арасындағы кәсіпқой баскетбол клубы, Саратов қаласынан, 1960 жылы құрылған.
 
Жетістіктері:
  • Ресей чемпионатының күміс жүлдегері – 1993/1994, 1996/1997, 1997/1998, 1998/1999
  • Ресей чемпионатының қола жүлдегері – 1995/1996
  • Еуропа кубогының жартылай финалына шыққан – 1997/1998
  • А суперлигасының чемпионы – 1996/1997, 1997/1998
  • Б суперлигасының чемпионы – 2008/2009
  • Суперлига чемпионы – 2013/2014
  • Суперлиганың қола жүлдегері – 2012/2013