ВТБ Бірыңғай лигасы 2018/2019
Химки
Химки
ВТБ Бірыңғай Лигасы, Плей-офф 1/4 финалы
05.05.2019, 19:00 Жс
Арена: БЦМО (Химки)
82:59
Негізгі уақыт
24:17 15:17 22:13 21:12
Ойын нөмірі: QF-4
Көрермен: 2559
Астана
Астана

ВТБ Бірыңғай лигасының ширек финалындағы «Астана» мен «Химки» текетіресі

04.05.2019, 13:00    Просмотров: 705
Источник: Баспасөз қызметі
Автор:
5 және 7 мамыр күндері Мәскеу түбіндегі Химкиде «Астана» Президенттік баскетбол клубы мен «Химки» командасы арасында ВТБ Бірыңғай лигасының плей-офф сатысындағы ширек финалдық матчтардың алғашқы екеуі өтеді.

Жексенбіде «Астана» мен «Химки» клубтары арасында ВТБ Бірыңғай лигасының ширек финалдық матчтары басталады. Бұл жұптағы доп додасы 2-2-1 жүйесінде, әрқайсысының алаңында, 3 жеңіске дейін созылады. Алғашқы екі ойын 5-ші және 7-ші мамыр күндері қарсыласымыздың алаңында, «Химки» МОБО аренасында өтеді. Одан кейін жартылай финал жолдамасын сарапқа салу Нұр-Сұлтанда жалғасып, 10-шы және 12-ші мамыр күндері үшінші және қажет болса, төртінші ойындар «Сарыарқа» велотрегі аренасында өтеді. Егер осы төрт матчтың қорытындысы бойынша жалпы есеп тең болса, онда шешуші ойын 15 мамырға жоспарланған, әрі командалар қайтадан Мәскеу облысына барады.
 


Тарих бастауы:
«Астана» үшін бұл маусым ВТБ Бірыңғай лигасына қатысып жүрген 8 маусымды түгелдей есепке алғандағы ең табыстысы болды. Елорда командасы жыл сайынғы чемпионат қорытындысында, 15 жеңіс және 11 жеңіліспен, 6-шы орынды иеленді. Әрі астаналықтар 5-ші рет плей-оффқа шығып отыр. Егер соңғы екі маусымда біздің команда бірден осы турнирде жыл сайын жеңімпаз атанып жүрген, азуы алты қарыс ЦСКА (Мәскеу) командасына тап болса, биыл да жолы азулы қарсыласпен, Лиганың соңғы екі маусымдағы күміс жүлдегері, «Химки» (Мәскеу облысы) клубымен түйісіп отыр.

Қарсылас:
«Химки» – Мәскеу облысының баскетбол клубы, 1997 жылы құрылған. ВТБ Бірыңғай лигасында бірінші маусымынан бастап өнер көрсетіп келеді. 2010/2011 жылдар маусымында химкиліктер ВТБ Бірыңғай лигасының чемпиондық атағын жеңіп алды. Сөйтіп, ЦСКА-дан басқа турнир жеңімпазы атанған жалқы команда болды. Мәскеу облысының командасы – плей-офф додасына тұрақты түрде қатысып келе жатқан және соңғы 5 жылда үш мәрте күміс жүлдегер атанған (2014/2015, 2016/2017, 2017/2018) азулы ұжым. Биылғы маусымда олар жыл сайынғы чемпионатта 3-ші орынға ие болды – 20 жеңіс, 6 жеңіліс.

«Химкидің» көшбасшылары:
Алексей Швед – 30 жастағы Ресей қорғаушысы, өзінің командасының ғана емес, тіпті Лига көшбасшыларының бірі, бүгінгі таңдағы Ресейдің ең үздік баскетболшыларының бірі. Биылғы маусымдағы, 5 қараша күні «Астана» клубымен өткен матчта ол ең үздік ойыншы болып, 28 ұпай еншіледі. «Химкидің» Шведтен де басқа бесаспап ойыншылары бар. Янис Тимма – 26 жастағы Латвия шабуылшысы, Мәскеу облысы командасына наурыз айында ғана қосылған. Бірақ небәрі 6 ойынның ішінде өзінің нағыз қас шебер екендігін дәлелдеп шықты. Ол да Химкиде «Астанамен» өткен матчта 26 ұпай еншілеп, ең үздік көрсеткішке қол жеткізген. Джордан Мики – 24 жастағы Америка шабуылшысы, биылғы маусымда аса жоғары деңгейде өнер көрсетіп, өз командасының қоржынына орта есеппен бір ойында 15 ұпайдан артығымен салып жүр. Сонымен қатар, команданың «басы» – бапкері Римас Куртинайтис жайлы айтпай кету мүмкін емес. Ол «Химки» клубын Лига чемпионы атағына жеткізген, биыл Мәскеу облысы ұжымының, осыдан үш жыл бұрын кетіп қалған, бас бапкерлік қызметіне қайта оралды.

Командаларды салыстыру:
ВТБ Бірыңғай лигасының барлық маусымдарын есепке алғанда, «Астана» мен «Химки» 16 рет кездескен. Өкінішке қарай, жеңістер мен жеңілістер айырмасы Қазақ елі командасының көңілі толарлықтай емес: 13 рет Мәскеу облысы ұжымы жеңіп, 3 рет астаналықтар басым болды. Соңғы рет Қазақстан астанасының командасы «Химкиді» бір жылдан астам уақыт бұрын жеңген – 2018 жылы 11 наурыз күні өз алаңында 84:79 есебімен. Ал биылғы маусымда «Астана» Химкиден екі рет ұтылды. Бірақ екі матч та шектен тыс шиеленісті өтті. Қараша айында біздің команда «Сарыарқа» велотрегінде 9 ұпай айырмасымен есе жіберіп алды – 67:76. Ал Мәскеу түбінде, наурыз айының аяғында химкиліктер 13 ұпай айырмасымен басым түсті – 93:80.



Әйтсе де, «Химки» өте азулы және әйгілі қарсылас болғанымен, әрі биылғы маусымда «Астана» олардан екі рет ұтылып қалғанымен, осы екі матчтың нәтижелері біздің команданың намысты қолдан бермей тайталаса және жартылай финал жолдамасына таласа алатындығын көрсетті. Әрине, оңай емес, бірақ плей-оффта ешқашан оңай бомайды.

Алғашқы екі матчтың онлайн-трансляциясы біздің сайтымыздың басты бетінде жүргізіледі. Жексенбі күні, 5 мамырдағы ойынның басталуы – Нұр-Сұлтан уақытымен 19:00-де, ал 7 мамыр күні өтетін екінші ойын 23:00-де басталады.

Естеріңізге сала кетейік, Ticketon.kz сайтында «Астананың» ВТБ Бірыңғай лигасының ширек финалындағы «Химкимен» өтетін, 10 мамыр жұма күні «Сарыарқа» велотрегінде астана уақытымен 19:30-да басталатын, үйдегі ойынына билеттер сатыла бастады.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» ширек финалдағы бірінші ойында «Химкиден» ұтылып қалды

06.05.2019, 08:00    Просмотров: 856
Источник: Баспасөз қызметі
Автор:
Мәскеу түбінде «Химки» мен «Астана» арасындағы ВТБ Бірыңғай лигасы ширек финалының бірінші ойыны өтіп, елорда командасы жеңіліске ұшырады – 82:59 (24:17, 15:17, 22:13, 21:12).

Бұл жұптағы ойын ең соңынан өтті. Басқа үшеуіндегі бірінші матчтар ертерек аяқталған болатын: УНИКС өз алаңында «Калев» клубынан басым түсіп (92:82), ЦСКА Мәскеуде «Нижний Новгород» командасын оңай шақты (87:50), ал «Зенит» түзде «Локомотив» баскетболшыларын сан соқтырып кетті (69:78).

Бұл жұпта «Химки» фаворит болып саналады, әрі бірінші матчта жеңіске деген құлшыныстары да басымырақ болды. Алаң иелері ортада лақтырылған допты қағып алып, бірінші шабуылдарында-ақ есеп ашты. Бірақ Джеффри Гроселл әуелі есепті теңестіріп, 30 секундтан кейін «Астананы» алға шығарды. Алайда Қазақ елі командасы алда ұзақ тұра алмады. Химкиліктер келесі шабуылдарында таразы басын қайтадан өздеріне қарай аударып алды. «Астана» біраз уақытқа дейін қарсыласына дес бермей, тайталасып бақты. Бірақ бірінші кезеңнің ортасында алаң иелерінің аса жоғары қарқындарына төтеп бере алмай қалып (10-0), бірінші онминуттықтың аяқталуына үш жарым минут қалғанда 11 ұпай айырмасымен ұтылып жатты. Бұл кезең аяқталғанша, біздің команда есепті біршама қысқартты да. Әйтсе де, бірінші кезеңде 24:17 есебімен ұтылып қалды. Екінші кезең екі команданың қателіктерімен басталды. Алаң иелері бірінші болып ұпай еншілегендерімен, осы онминуттықтың алғашқы жартысында біздің команда басымдық танытты. Екінші кезең бел ортасына жеткенде 10 ұпайлық есеп айырмасы 2 ұпайға дейін қысқарды. Алайда, өкінішке қарай, қазақстандықтар қарсыластарын қуып жете алмады. Ал олар, яғни алаң иелері өз кезектерінде біздің ұжымның қарқынын басты. Он бес минуттық үзіліске дейін ойын өте тартысты өтті. Екі команда да аянбай, табан тіресе ойнады. Ақыр соңында, екінші кезеңде «Астана» басым түсті – 15:17. Бірақ матчтың бірінші жартысында ұтылып қалды – 39:34.

Үшінші кезеңде Қазақ елі командасының ойыны үйлеспей қойып, алаң иелерінің есеп айырмасын ұлғайта түсулеріне мүмкіндік беріп алды. 2 минутқа да жетпейтін уақыт ішінде химкиліктер есеп айырмасын 10 ұпайдан да асырып, оны ұлғайта берді. Бірақ «Астана» оңайшылықпен берілген жоқ. Әйтсе де, екінші кезеңнің ортасында 11 ұпай айырмасымен ұтылып жатты. Алексей Швед бастаған «Химки» алаңда көсіле сілтеп, өздері ойлағандай тым тез болмаса да, есеп айырмасын ұлғайтқан үстіне ұлғайта түсті. Сөйтіп, үшінші кезең аяқталғанда, 16 ұпай айырмасымен қара үзіп кетті – 61:47. Осылай, алаң иелерінің өздеріне деген сенімділіктері арта түсіп, «Астана» керісінше, біршама басылып қалды. Дегенмен, Эмиль Райковичтің шәкірттері еңселерін түсірмей, қолдарына келгеннің де, келмегеннің де бәрін жасауға тырысты. Десек те, «Химки» баскетболшылары алаңда билеп-төстеп, есеп айырмасын аса қиналмай +20 ұпайға дейін де жеткізді. Оларға айқын басымдықтарын уыстарынан шығармауға әлі 5 минут уақыт бар болатын. Әрі олар бүгінгі ойында өз мақсаттарына жетті. Ал Қазақстан командасының жеңіске жету мүмкіндігі мен үмітінің күлі көкке ұшты. Біздің жігіттер не істеп, тырысса да, бүгінгі жеңілістен құтылудың ешбір жолын таппады. Сөйтіп, «Химки» бірінші ойында ірі есеппен жеңіске жетті – 82:59.

Жалпы, «Астана» қорғаныста жаман ойнаған жоқ. Әрі «Химкидің» позициялық шабуылдарының бәрі қиындықпен жүзеге асты. Бұл әсіресе кездесудің бірінші жартысында байқалып тұрды. Бірақ біздің команда жылдам ұйымдастырылған шабуылдардан көз жазып қалып отырды. Осындай шабуылдарға тойтарыс бере алмай, матчтың бірінші жартысында 5 ұпай ұтылдық. Сонымен қатар, Қазақ елі командасы «Химки» көшбасшыларын тұсаулап ұстай алды. Олар ойынның бірінші жартысында көсіле сілтей алмады. Ал үлкен үзілістен кейін «Аса Мәртебелі» – Алексей Швед осы ойын басталар кезде ғана алған «2018/2019 жылдар маусымындағы лиганың ең көп ұпай еншілеген ойыншысы» жүлдесін ақтай бастады. «Астана» ойыншылары қанша тырысса да, Алексейді тоқтата алмады. Ол дәл осы ойында өз командасын жеңіске жетелеген ойыншы болды.
 

Ең көп ұпай еншілегендер:
  • «Химки»: Алексей Швед  (27 + 5 пас), Малкольм Томас (10 + 8 рет доп қағып алды), Андрей Зубков (7 + 7 рет доп қағып алды)
  • «Астана»: Джеффри Гросселл (11 + 7 рет доп қағып алды), Энтони Клеммонс (10), Кеннет Хортон (6 + 7 рет доп қағып алды)

«Астананың» бас бапкері – Эмиль Райкович:
— «Химкиді» құттықтаймын, бүгін олар үздік команда болды. Олар құрамындағы ойыншыларын ауыстырып ойнап, бәрін де ұтымды пайдалана біліп, бүгінгі матчта бастан-аяқ жоғары қарқында ойнады. Ойынның екінші жартысында біз оларға ілесе алмай қалдық. Біздің «жанар майымыз» таусылды. Сөйтіп, «Химки» жалпы есепте 1-0 есебімен алға шықты.  


«Химкидің» бас бапкері – Римас Куртинайтис:
— Жеңіске жеткенімізге қуаныштымын. Матчтың басында оңай болған жоқ. Өйткені, әйтеуір бір толқу болды. Бірақ біз оны тез баса білдік. Өте жақсы ойнадық. Бірінші кезекте, қорғанысымызды ерекше атап өткім келеді. Мүмкін, биылғы маусымда бірінші рет шығар, әйтеуір қорғаныста өте сауатты ойнап, қарсыласымыздың 60 ұпай еншілеуіне мүмкіндік берген жоқпыз. Бір сөзбен айтқанда, табан тіресе ойнадық, қайтқан допты қағып алуда асып түстік және не қажет екенін көрсеттік. Келесі ойынды күтеміз.


Бұл жұптағы келесі ойын сейсенбі күні, 7 мамырда, «Химкидің» үйдегі алаңында өтеді. Басталуы – Нұр-Сұлтан уақытымен 23:00-де. Естеріңізге сала кетейік, Ticketon.kz сайтында ВТБ Бірыңғай лигасының ширек финалындағы, «Астана» мен «Химки» арасындағы, 10 мамыр, жұма күні «Сарыарқа» велотрегінде өтетін үйдегі ойынына билеттер сатыла бастады. Бұл ойын астана уақытымен 17:00-да басталады.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құрылған жылы: 1997 Клубтық түстері: сары, көк
Мемлекет: Ресей Арена: Мытищи Арена
Қала: Химки Сайт: bckhimki.ru

Сипаттамасы

«Химки» – ресейдің ерлер арасындағы баскетбол клубы, Мәскеу облысынан.

Жетістіктері:
  • Ресей чемпионатының күміс жүлдегері – 2006, 2008, 2009, 2010, 2011, 2012, 2013, 2015, 2017, 2018, 2019
  • Ресей чемпионатының қола жүлдегері – 2007
  • Ресей кубогының жеңімпазы – 2008
  • ВТБ Бірыңғай лигасының чемпионы – 2010/2011
  • ВТБ Бірыңғай лигасының күміс жүлдегері – 2014/2015, 2016/2017, 2017/2018, 2018/2019
  • ULEB Еуропа кубогының финалына шыққан – 2008/2009
  • Еуропа кубогының финалына шыққан – 2005/2006
  • FIBA Еуролигасы «Төртеу финалында» додаға түскен – 2004/2005
  • ВТБ Бірыңғай лигасы «Төртеу финалында» додаға түскен – 2009/2010
  • Еуропа кубогының жеңімпазы – 2011/2012, 2014/2015

Команданың жалпы суреті

Химки