ВТБ Бірыңғай лигасы 2019/2020
Астана
Нұр-Сұлтан
ВТБ Бірыңғай лигасы, Тұрақты біріншілік
05.01.2020, 19:30 Жс
Арена: Велотрек «Сары-Арқа» (Нұр-Сұлтан)
95:90
Негізгі уақыт
18:22 21:19 28:26 28:23
Ойын нөмірі: RS-75
Көрермен: 795
Енисей
Краснояр өлкесі

«Астананың» жаңа жылдағы бірінші қарсыласы – красноярскілік «Енисей»

27.12.2019, 10:00    Просмотров: 100
Источник: Баспасөз қызметі
Автор:

«Астана» Президенттік баскетбол клубы жаңа жылдағы бірінші ойынын өз алаңында өткізіп, 5 қаңтар күні елорда баскетболшылары ВТБ Бірыңғай лигасы аясында Красноярскінің «Енисей» клубын қабылдайды.
 


«Енисей» – Ресейдің ерлер арасындағы кәсіпқой баскетбол клубы, Красноярск қаласынан, 1981 жылы құрылған. Биылғы маусымда ВТБ Бірыңғай лигасынан бөлек, FIBA Еуропа кубогы додасында өнер көрсетеді.

Жетістіктері:

  • Ресей суперлигасының «Б» дивизионы чемпионы – 2006
  • Ресей кубогының қола жүлдегері – 2011


Бас бапкер:

Биылғы маусымда команданы хорват маманы Дражен Анзулович жаттықтырып жүр. Дражен маусым аралығында бұл қызметте ресейлік Олег Окуловты алмастырды. Ал ол өз кезегінде, Красноярск командасында төрт жыл қатарынан тер төккен болатын. Анзулович Югославияда туған, ойыншы ретіндегі карьерасын түгелдей дерлік Загребтің «Цибонасында» өткізген. Осы ұжыммен Югославия чемпионы болып, FIBA Чемпиондар лигасының жеңімпазы атанған. Алғашқы бапкерлік тәжірибесін 2001 жылы бастап, «Загреб» клубының тізгінін қолына алған. Ал 2003 жылы Дражен «Цибонаға» оралып, бас бапкер болып бекітіледі. Әрі төрт маусымда үш рет Хорватияның премьер лигасында топ жарады. Бұдан кейін ол Ресейдегі «Урал Грэйт» командсына барады. Бірақ дәл осы маусымда «Спиру Шарлеруа» командасына бас бапкер болып, осы ұжыммен бірден Бельгия Кәсіпқой лигасында топ жарады. Ал келесі маусымда олармен тағы да чемпион атанып, Бельгия кубогы мен Суперкубогында жеңіп алады. 2009/2010 маусымында ол Рамунус Бутаутасты алмастырып, «Донецк» командасына бас бапкер болып тағайындалады. Әрі бірінші маусымда-ақ ВТБ Бірыңғай лигасына қатысады. 2010/2011 маусымында Анзулович өз Отанына оралып, қайтадан «Цибона» клубының тізгінін қолына алады. Әрі Хорватия кубогын жеңіп алады. Одан кейін Хорватияның тағы бір командасын, атап айтқанда, «Цедевита» клубын жаттықтырады. Содан кейін, екі маусымдай уақытқа созылған үзілістен соң, Польшаның «МКС Домброва-Гурнич» командасына бас бапкер болады. 2016/2017 маусымында Хорватия құрамасының бас бапкеріне көмекші болып, одан кейін Қытайдағы «Нанкин Монкей Кинг» командасына ойысады. Былтырғы маусымда Дражен Анзулович Хорватия құрамасының бас бапкері болып, өз елінің қырандарымен Станкович кубогын жеңіп алды.

Дражен Анзулович

Команда құрамы:

Маусым аралығында команда сапындағы легионерлері түгелдей ауысты. Кеткендердің арасында америкалық қорғаушылар ДиЭнджело Харрисон мен Джон Роберсон, сондай-ақ америкалық шабуылшы Алекс Янга және Латвияның орталық шептегі ойыншысы Мартиньш Мейерс болды. Сонымен қатар, командадан америкалық шабуылшы Майкл Брузевиц және Украина қорғаушысы Денис Лукашов та кетіп қалды. Маусым аралығында «Енисеймен» үш ресейлік ойыншы да келісімшарттарын ұзартпады – қорғаушы Василий Заворуев, шабуылшылар Александр Лавников және Глеб Голдырев. Ал ресейлік бес ойыншы Краснодар командасының намысын қорғауды одан әрі жалғастырды. Тәжірибелі шабуылшы Артем Комиссаров өз карьерасын «Красный Октябрь» командасында бастап, «Зенит» және «Урал» клубтары сапында ойнаған. Артем – Ресей кубогының күміс жүлдегері, сондай-ақ ВТБ Бірыңғай лигасының, Ресей чемпионатының және кубогының қола жүлдегері. Красноярск командасы сапында үшінші маусым ойнап жүр. Қорғаушы Денис Захаров та үшінші маусым қатарынан ойнайды, бірақ ол жалпы алғанда, «Енисей» сапында төртінші маусым өнер көрсетеді. Сонымен қатар, «Локомотив-Кубань», «Нижний Новгород», «Динамо Мәскеу» және «Спарта и К» командалары сапында ойнаған. Ол – Ресей кубогының күміс жүлдегері және Жоғарғы лигасы мен Суперлигасының қола жүлдегері. Қорғаушы Иван Викторов Красноярск командасының намысын екінші маусым қорғайды. Бұған дейін «Нижний Новгород» және «Химки-Подмосковье» клубтары сапында ойнаған. Орталық шептегі Илья Попов өз карьерасын «Спартакта» бастап, «Нижний Новгород» және «Спартак-Приморье» командалары сапында өнер көрсеткен. Былтырғы маусымды «Енисей» құрамында бастап, Швейцарияның «Лайнс де Женев» клубына жалға беріліп, сонда аяқтаған. Илья – Ресей Суперлигасының, Швейцария чемпионатының және Ресей кубогының екі дүркін күміс жүлдегері. Қорғаушы Сергей Митусов – «Енисейдің» жергілікті жас ойыншысы, команда сапында 2015 жылдан бері. Сондай-ақ, орталық шептегі Игорь Каныгинді де атап өту керек. Ол былтырғы маусымның наурыз айында командадан қуылған, бірақ биылғы маусымда «Востоке-65» сапындағы ойындарынан кейін қайтып келді. Красноярск командасында ол 2016 жылдан бері ойнайды. Ал бұған дейін үш жыл «Локомотив-Кубань» клубының намысын қорғаған.

Биыл «Енисейдің» құрамын бес бірдей америкалық ойыншы толықтырды. Қорғаушы Дариус Моррис негізінен АҚШ-та ойнаған. «Лос-Анджелес Лейкерс», «Филадельфия Севенти Сиксерс», «Лос Анджелес Клипперс», «Мемфис Гризлис» және «Бруклин Нетс» сынды командалар сапында болған. Сонымен қатар, ҰБҚ Жетілу лигасындағы «Лос -Анджелес Ди-Фендерс», «Рио Гранде Вэллей Вайперс» және «Санта-Круз Уорриорз» командалары сапында ойнаған. Дариус сондай-ақ Қытайдың «Гуандон Саузерн Тайгерс» клубы сапында өнер көрсеткен. Қорғаушы Дэвион Берри өз карьерасын Италияның «Торино» клубы сапында бастаған, одан кейін ҰБҚ Жетілу лигасындағы «Мэн Рэд Клавс» және «Рэпторс 905» командалары сапында бақ сынаған. Сонымен қатар, Оңтүстік Корея, Грекия және Германия командалары сапында ойқастаған. Шабуылшы Гарлон Грин карьерасын Австралияда бастағанымен, Жапонияға тез ауысып кеткен. Одан кейін Германия мен Бельгияда көзге түскен. Гарлон былтырғы маусымды «Химки» сапында бастаған, бірақ Израильдің «Хапоэль» командасына ауысып кеткен-тін. Орталық шептегі Дастин Хог кәсіби деңгейдегі ойынын Грекияда бастап, Италияға ауысып кеткен. Сондай-ақ Қытайға барып, біраз сонда ойнаған. Қорғаушы Чавон Льюис Литва мен Польшада ойнаған, былтырғы маусымды Эстонияның «Калев» клубы сапында өткізді. Биылғы маусымды «Нижний Новгород» құрамында бастап, бірақ «Енисейге» ауысып келді. Орталық шептегі, тәжірибелі хорват қыраны Томислав Зубчич – Хорватияның бес дүркін чемпионы, Хорватия кубогының үш дүркін жеңімпазы, сондай-ақ Адриатик лигасының және Литва чемпионатының күміс жүлдегері. Ол хорват, литва, түрік, неміс және испан командалары сапында, сонымен қатар Босния және Герцеговина ұжымы құрамында ойнаған. Бұлардан бөлек, Томислав ҰБҚ Жетілу лигасындағы «Оклахом Сити Блю» командасы және ВТБ Бірыңғай лигасындағы «Автодор» және «Нижний Новгород» клубтары сапында өнер көрсеткен. Сондай-ақ, биылғы маусымда «Енисей» сапында серб қорғаушысы Никола Ребич ойнап жүр. Ол – Адриатик лигасы мен Сербияның екі дүркін чемпионы және Сербия кубогының иегері. Никола негізінен Сербия командалары сапында ойнаған. Бірақ былтырғы маусымды Испанияда, содан кейін Црна Горада өткізді. Командаға биыл қосылған ресейлік жаңа ойыншы Александр Гудумак болды. Алайда оны жаңа ойыншы деп айта алмаймыз. Себебі ол «Енисейде» 2017/2018 маусымында ойнаған. Сонымен қатар, ЦСКА, «Автодор», «Красный Крылья», «Нижний Новгород», «Сахалин» және «Востока 65» командалары сапында болған. Әрі Александр ВТБ Бірыңғай лигасы мен Ресей чемпионатында екі рет алтынмен апталған, Суперлигада чемпион болған. Сонымен қатар, қазір «Енисей» құрамында жас шабуылшы Илья Усольцев бар, ол бұған дейіе «Зенит» пен «Локомотив» сапында ойнаған.

Баскетбольный клуб Енисей 2019/2020

Команда көшбасшылары: Дэвион Берри биылғы маусымда «Енисейдің» барлық ойындарында өнер көрсетіп, орта есеппен алаңда 30 минуттан өткізіп жүр. Әрі ойын сайын 20 ұпайдай еншілеп келеді. Дастин Хог бастапқы бестікте жиі ойнап жүрген жоқ. Бірақ ол мұның командада тиімділігі және орта қашықтықтан нәтижелілігі бойынша лидер болуына кедергі болар емес. Сондай-ақ шығыршық түбінде көзге түсіп, орта есеппен бір ойында 6,6 рет доп қағып алып, көш бастап келеді. Сонымен қатар, команда көшбасшыларының бірі Томислав Зубчич болып есептеледі. Америкалықтар Дариус Моррис пен Гарлон Грин соңғы ойындарда алаңға шықан жоқ. Ал ресейліктер Денис Захаров пен Артем Комиссаров және серб Никола Ребич үнемі алаңға шығып, жаттықтырушылары құрамының сеніміне ие болып жүр.

Турнир кестесіндегі жағдай: «Астана» 2019 жылды жеңіспен аяқтап, түзде «Зелена Гура» командасын тізе бүктірген. Бірақ жалпы саны 10 ойын өткізіп, турнир кестесінде 11-орынға табан тіреп тұр. «Енисей» болса, бірінші ойында-ақ көпшілікті қайран қалдырып, өз алаңында ЦСКА командасын жеңіп кетті. Рас, одан кейін өз алаңында «Химки» клубынан ұтылып қалды. Содан соң екі рет жеңіске жетіп, түзде «Парманы», өз алаңында «Автодорды» сан соқтырып кетті. Бұдан кейін түзде «Зенитен» ұтылып қалды да, сырт алаңдағы шиеленісті ойында «Цмоки-Минск» клубын қапы қалдырды. Әрмен қарай «Локомотив-Кубань» жігіттерін өз жанкүйерлері алдында тізерлетіп, түзде «Калев» пен «Нижний Новгород» клубтарына есе жіберіп алды. Сөйтіп, «Енисей» 5 жеңіс, 4 жеңіліспен турнир кестесінде 5-орынды иеленіп тұр.

Кездесулер тарихы: «Енисей» де «Астана» секілді ВТБ Бірыңғай лигасына 2011/2012 маусымында қосылған. Бірақ бұл екі ұжым алғаш рет алаңда 2014/2015 маусымында кездесті. Бірақ Лига аясында емес, жолдастық кездесуде додаға түсті. Онда Қазақстан командасы жеңіске жетті. «Астана» ВТБ Бірыңғай лигасы аясындағы матчта да басым түскен, бірақ екеінші ойында ұтылып қалды. 2015/2016 маусымында «Енисей» екі матчта да басым түсті. Соңғы үш маусымда әр команда өз алаңында басымдық танытып, түзде жеңілістің кермек дәмін татып келеді. Жалпы, «Астана» мен «Енисей» өзара 11 рет кездесті. Оның 10-ы ВТБ Бірыңғай лигасы аясында өтті. «Енисей» 6 ойында жеңіске жетіп, «Астана» 4 рет басым түсті.

Қызықты деректер:

  • Соңғы үш маусымда «Астана» өз алаңында «Енисейден» ұтылған емес.
  • Қазақстан командасы жеңіске жеткен жағдайда екеуара кездесулердегі нәтиже теңеседі.


Матч жексенбі күні, 5 қаңтарда Нұр-Сұлтандағы «Сарыарқа» республикалық велотрегі аренасында өтеді. Басталуы – астана уақытымен 19:30-да. Матчтың онлайн-трансляциясы біздің сайтымыздың Ойын орталығы бөлімінде, сондай-ақ QazSport телеарнасында тікелей эфирде жүргізіледі. Билеттер Ticketon.kz сайтында сатылымға шығып та қойды.
 


Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» өз алаңында «Енисейді» есеңгіретті

06.01.2020, 10:00    Просмотров: 52
Источник: Баспасөз қызметі
Автор:

«Астана» Президенттік баскетбол клубы жаңа жылды жеңіспен бастап, ВТБ Бірыңғай лигасысында Красноярскінің «Енисей» клубын тізе бүктірді.

Екі команда үшін де бұл ойында жеңіске жету өте маңызды еді. Егер Красноярск командасы жеңіске жетсе, онда турнир кестесінің төртінші сатысындағы жағдайын нығайта түсер еді. Ал «Астана» үшін бұл жеңіс плей-офф аймағына қайта оралумен тең болатын. Сонымен қатар, көпшілік назары «Астана» сапындағы екі жаңа ойыншыға да ауды. Джеймс Флоренс үшін бұл өз алаңымыздағы алғашқы ойын болса, Стефен Холт команда сапына қайта оралған болатын. Осы ретте, «Астананың» бастапқы бесікке шығарған ойыншыларын тізіп шығайық: Джеймс Флоренс, Душан Ристич, Малкольм Хилл, Александр Жигулин және Вадим Щербак.

Ойынға ортадан қосылған допты біздің жігіттер қағып әкетті. Әрі бірінші шабуылдарында-ақ Душан Растичтің тырысуымен есеп те ашты. Алайда ешбір команда бастапқы серпіліспен бірін-бірі қапы қалдыра алмады. Ал доп додасы опыр-топыр, тіпті шым-шытырық үлгіде өрбіп, аса нәтижелі бола қоймады. Ойын бірте-бірте ашық «шайқасқа» ұласты, бірақ қарсыласының аңдысын аңдауда ұмытылмай, екі команда да шабуылда өздерінің еңгерзедей алыптарына сенім артты. Ал Қазақстан командасының атағын шығарып жүрген, әсіресе өз алаңындағы ойындарда мерейін артыра түсетін, алыстан атқылау тактикасынан бірінші кезеңде мүлде нәтиже болмады деуге де болады. Доға сыртынан нысанаға алған 6 соққының тек Джеремайя Хиллдың орындауындағы біреуі ғана шығыршыққа дөп түсті. Ал ұпай қорына үңілсек, бастапқы онминуттықта қонақтар көбінесе алда болды. «Астана» да қалыспай, бірнеше рет таразы басын өздеріне қарай аударды. Десек те, бірінші кезеңде «Енисей» сәл ғана басымдықпен, яғни 4 ұпай айырмасымен, басым түсті. Екінші кезеңнің алғашқы минуттарында Қазақстан командасының кежегесі кейін тартып, үш минутта небәрі 2 ұпай ғана еншіледі. Ал қонақтар болса, есеп айырмасын 10 ұпайға дейін жақындата түсті. Бірақ одан аса алмады. «Астана» ойыншылары олардың екпіндерін дер кезінде тежей білді. Бірақ ойын тізгінін өз қолдарына алудың қисынын таппады. «Енисей» екінші кезең бойы 8 ұпай айырмасымен алда тұрды десек те болады. Өзгеріс Александр Жигулин шабуылды данкпен түйіндей алмағанынан басталды. Өйткені оны қонақтардың лидері Дэвион Берри ойын ережесіне тыс әдіспен тоқтатты. Тура осы сәттен бастап, біздің команданың өздеріне деген сенімдері арта түсті. Сөйтіп, «Астана» осы кезеңде бірінші рет, үлкен үзіліске 35 секунд қалғанда, есепті теңестірді. Алайда сары-көкшіл жейделілер алға шыға алмады. «Енисей» болса, матчтың бірінші жартысын 2 ұпай басымдықпен ғана тәмамдады – 39:41.



Ойынның екінші жартысын екі команда да аса жоғары қарқында бастады. Ал алаңда табан тірескен дүлей дода, ең бастысы, нәтижелі баскетбол қыза түсті. Үшінші кезеңнің басталғанына небәрі екі жарым минут өткенде, командалар өзара 24 ұпай еншіледі. Ал есеп тағы да теңесті. Доп салу үшінші кезеңнің аяғына дейін толастамай, командалар ашық баскетбол додасымен көрермендерді қуантты. Шектен тыс шиеленісті дода қыза түсіп, екі командада алда ұзақ тұра алмай, біршама тайталасты. Осылай, үшінші кезеңнің ойын уақыты тең есеппен аяқталды – 67:67. Ал алда матчтың соңғы, шиеленісті 10 минуты күтіп тұрды. Екі команда да аянған жоқ. Әрбір ұпай үшін, алаңның әрбір сантиметрінде тайталасты. Алаңға негізгі құрам ойыншылары жылдам шығып, шоқтай жанған дода көрігі одан әрі қыза түсті. Бірақ ешқайсысы да суырылып алға шыға алмады. Әйтсе де, «Енисей» төртінші минутта көсіле сілтеп, Эмиль Райковичті бірден тайм-аут алуға мәжбүрледі. Осы бір тактикалық кідірістен соң біздің команданың ойыны жүріп, бабына ене бастады. Бірақ бұл да ұзаққа созылмады. «Астана» таразы басын теңестірген бетте, Красноярск командасының бапкерлері құрамы ойынды тайм-аутпен үзді. Бұдан кейін де біздің жігіттер алда тұрды. Бірақ «Енисей» де қалыспай, есеп айырмасын үш ұпайдан асырмай, отқа май құя түсті. Александр Жигулин 2 айып соқысын мүлтіксіз орындап, допты қонақтардан тартып алды да, дереу Малкольм Хиллға бере қойды. Ал ол болса, есеп айырмасын 5 ұпайға жеткізді. Дражен Анзулович тағы да тайм-аут алуға мәжбүр болды. Ал матчтың аяқталуына бір жарым минуттан да аз уақыт қалған болатын. Әрине, бұл уақыт тактикалық «шайқаспен» өтті. «Енисейдің» жеңісті жұлып алар немесе ойынды овертаймға ойыстырар мүмкіндігі болды. Бірақ біздің жігіттер жеңісті уыстарынан шығарған жоқ. Ал Малкольм Хилл соңғы секундтарда екі айып соқысын мүлтіксіз орындап, қонақтардың аптықтарын су сепкендей басты. Сөйтіп, «Астана» өз жанкүйерлеріне жаңа жылдағы алғашқы сыйлығын тарту етіп, Красноярскінің «Енисей» клубын тізерлетті – 95:90 (18:22, 21:19, 28:26, 28:23).
 


Ең көп ұпай еншілегендер: 

  • «Астана» — ВТБ Бірыңғай лигасында шығыршықтан қайтқан допты қағып алудан алдына жан салмай келе жатқан Душан Ристич бірінші орындағы өз мәртебесін нығайта түсіп, бұл ойында 26 ұпай еншілеп, 17 рет доп қағып алды. Екі команда сапында да Малкольм Хиллден артық ұпай еншілеген ешкім болмады. Оның еншісінде – 29 ұпай, 3 рет доп қағып алды, 5 пас және 3 рет допты тартып әкетті. Сонымен қатар, Малкольм өзінің қимыл-әрекетімен қонақтарды ойын ережесін бұзуға мәжбүрледі – 10 рет. Сондай-ақ, Джеремайя Хилл де ерекше көзге түсті – 15 ұпай, 5 рет доп қағып алды және 4 пас. Ал Александр Жигулин өз еншісіне 11 ұпай жазып, 4 рет доп қағып алды. Сондай-ақ ол орасан зор қара жұмысты атқарып, өз командасының жеңіске жетуіне сүбелі үлес қосты.
  • «Енисей»  — Красноярск командасының шүбәсіз көшбасшысы Дэвион Берри болды. Ол 22 ұпай еншілеп, 7 рет доп қағып алды және 5 пас берді. Томислав Зубчич – 17 ұпай, 6 рет доп қағып алды. Ал Денис Захаровтың еншісінде – 13 ұпай.


Матчтың үздік ойыншысы – Малькольм Хилл. Бұл ойында ол «Астана» шабуылының ең үздік ойыншысы болды. Әрі, аталған шабуылшы нәтижелік көрсеткіштері жағынан өз рекордтарын жаңартты – 29 ұпай, тиімділігі – 31 және 3 рет допты тартып әкетті.

«Астана» клубының бас бапкері — Эмиль Райкович:
— Бұл біз үшін өте маңызды жеңіс, өйткені біз турнир кестесінде төртінші орынды иемденіп тұрған қарымды командамен ойнадық. Дражен Анзулович пен оның шәкірттері биыл тамаша маусым өткізіп келеді. Бірақ бүгін біздің ойыншыларымыздың жігерлері басым болып, 100% өз мүмкіндіктерін паш етіп, маңызды жеңіске қол жеткізді.

«Енисей» клубының бас бапкері — Дражен Анзулович:
— Қарсыласымызды құттықтаймын. Шешуші сәттерде олар бізден асып түсіп, зерделі болды. біздің жеңісті өңгеріп кетер мүмкіндігіміз болды, бірақ біз оны мүлт жіберіп алдық. Матч соңында «Астана» сабырлық танытып, жеңіске жетті.

Салдары: «Астана» өз алаңында өте сирек ұтылатындығын тағы да бір рет дәлелдеп шықты. Әрі осы жеңісімен турнир кестесінде екі саты жоғары өрлеп, жетінші орынға орналасты. Ал «Енисей» болса, бір саты төмен сырғып, бесінші орынға жайғасты.

Келесі матч: Тура бір аптадан кейін, жексенбі күні, 12 қаңтарда біздің жігіттер ВТБ Бірыңғай лигасысындағы келесі ойынын өткізіп, Ресейдің Пермь қаласындағы «Парма» клубымен кездеседі.
 


Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құлылған жылы: 1981 Клубтық түстері: ақ, көк
Мемлекет: Ресей Арена: «Арена.Север»
Қала: Краснояр өлкесі Сайт: www.basket-enisey.ru

Сипаттамасы

«Енисей» - ресейдің ерлер арасындағы кәсіпқой баскетбол клубы, Красноярск өлкесінен, 1981 жылы құрылған.

Жетістіктері:
  • Ресей суперлигасының «Б» дивизионы чемпионы – 2006
  • Ресей кубогының қола жүлдегері – 2011

Команданың жалпы суреті

Енисей