Алдағы жексенбіде, яғни 20 қазан күні елорда баскетболшылары ВТБ Бірыңғай лигасы аясында Красноярскінің «Енисей» клубын қабылдайды.
ВТБ лигасында «Енисей» алты ойын өткізіп үлгерді. Оның үшеуінде жеңіске жетті. Ал астаналықтар үшін осы ойын алтыншы болады.
Өткен маусымдағы екі ойында да, өкінішке қарай, астаналықтар красноярлықтардан ұтылып қалған. Команда мұны ұмыта қойған жоқ. Папатеодорудың шәкірттері есе қайтаруға бекініп отыр.
«Астана» клубының бас бапкері Илиас Папатеодору алдағы матч жөнінде өз пікірін білдірді:
– Біз 20 күндік үзілістен кейін ВТБ лигасындағы ойындарымызды одан әрі жалғастырамыз. Әрі осы маусымдағы ең күрделі ойындарымыздың бірін өткіземіз. «Енисейдің» көрсеткіштері жоғары, сөз жоқ, бұл – легионерлері ысылған, ал жергілікті ойыншылары шыңдалған азулы команда. Бұл матчта біз ойын тізгінін өз қолымызға алып, әсіресе, қорғаныста мұқият ойнауға тырысамыз.
Шынымен де, бұл ойын ең қызықты матчтардың бірі болып, тосын сыйлар аз болмауы керек.
Матч «Сарыарқа» республикалық велотрегінде өтеді. Басталуы – сағат 17:00-де. Кіру тегін!
