«Астана» өскелең ұрпақ арасында баскетболды таныту мақсатында жұмысты жалғастырып жатыр. Бұл жолы клуб ойыншылары Бибігүл Төлегенова атындағы креативті мектепке барып, жастар арасындағы баскетбол мәдениетін дамыту бағдарламасы аясындағы үшінші шеберлік сағатын өткізді.
Оқушыларға арналған шеберлік сағаты
Іс-шараға «Астана» КБК ойыншылары Андрей Десятников, Галин Смит, Сардал Абашидзе, Владислав Исаенко мен Әлижан Ыдырысжан қатысты. Сондай-ақ, шеберлік сағатына «Астана-Жастар» командасының бас бапкері Антон Пономарев қатысты. Ол клуб ойыншыларымен бірге 4- және 10-сынып оқушыларына шеберлік сағатын өткізіп, өз білімімен және тәжірибесімен бөлісті.
Өзінің кәсіби мансабын 2002 жылы бастаған, одан кейін бапкерлік қызметке кіріскен Антон Пономарев оқушыларға баскетболдағы жолы мен жастар командаларымен жұмыс істеу туралы айтып берді.
Жаттығу: дене қыздырудан соққыға дейін
Шеберлік сағаты әдеттегідей дене қыздырудан басталды. Антон Пономарев пен ойыншылар оқушылардың басты жаттығулар алдында жақсылап дене қыздырып алуларына көмектесті. Әрі қарай білім алушылар баскетболдағы негізгі элементтерді, атап айтсақ, соққы жасауды, дриблинг пен допқа иелік етуді меңгере бастады.
Шеберлік сағаты аясында соққы жасау челленджіне ерекше көңіл бөлінді. 4-сынып оқушылары асқан құштарлықпен соққы жасап, ол үшін клуб серіктесі – «Додо Пицца» желісінен сыйлық жеңіп алды. Жоғары сынып оқушылары болса, өз күштерін кәсіби ойыншылармен бетпе-бет теке-тіреске шығып сынап көрді. Клуб баскетболшыларынан айласын асыра білген оқушыларға «Астана» КБК мерчі сыйға тартылды.
Ойындар және баскетболшылармен байланыс
Жаттығулардан кейін оқушылар командаларға бөлініп, классикалық баскетбол ойнады. Алдымен жігіттер «Астана» ойыншыларымен ойнаса, әрі қарай алаңға қыздар шықты. Осылайша, балалар мен кәсіпқой баскетболшылар жаңа аптаны осындай көтеріңкі көңіл-күй мен достық атмосферасында бастады.
Сыйлықтар және ойыншыларға сұрақ қою
Шеберлік сағатының соңында әр қатысушы «Астана» КБК 4 наурызда өткізетін матчына билет алды. «Сарыарқа» велотрегінде өтетін матчта астаналық ұжым қарсыласы «Пари НН» командасы болмақ. Сонымен қатар, балалар клуб ойыншыларымен сөйлесіп, сұрақтарын қойып, баскетболшының кәсіби мансабының қыр-сырларымен танысуға мүмкіндік алды.
Іс-шара оқушылар мен баскетболшылардың дәстүрлі ортақ суретке түсуімен аяқталды.
«Астана-Жастар» командасының бас бапкері Антон Пономарев балаларға арнап өткізілген шеберлік сағаты мен одан алған әсерімен бөлісті:
- Шеберлік сағаты жоғары деңгейде өтті. Балалар жаңа ақпаратты қабылдап алуға ашық болды және әр жаттығуды барын салып орындады. Оқушылардың жаңа білім алуға деген құштарлығы жоғары. Бұл шеберлік сағаты оларға көп пайдасын береді деп ойлаймын, себебі оқушылар ВТБ Бірыңғай Лигасында ойнайтын негізгі құрамның ойыншыларымен танысты.Олар баскетболдың не екенін біліп, Қазақстандағы даму барысымен танысты. Мүмкін, осы сабақ арқылы біз олардың қызығушылығын оятып, алда олар кәсіби түрде баскетболмен айналысатын болар. Бұл Қазақстандағы баскетболдың дамуына тың серпін береді. Балалармен әр кездесу жарқын эмоция мен керемет әсер сыйлайды. Олар ашық, сенімен жақынырақ танысып, жаңа білім, ақпарат алуға құштарлық танытып тұрады.
