14-15 желтоқсан күндері командамыз оңтүстік астанада тағы бір ойындар сериясын өткізеді. Бұл астаналық команданың Алматыда өткізетін қатарынан екінші ойындар сериясы болмақ. Қарсылас – «Алматинский Легион». Астаналық клуб құрамына сырт алаңдағы ойындар сериясы алдында «Жастар» ойыншылары қосылды. Осы матчтар жас баскетболшылардың бәсекелестік жоғары лигада тәжірибе жинауына көмектеседі. Бұл – олардың өзін жақсы жағынан көрсетуіне берілген мүмкіндік.
Бұған дейін «Астана» мен «Алматинский Легион» жалпы 25 рет кездескен. Оның 24-інде астаналық команда сенімді жеңіске қол жеткізген.
Астаналық ұжымның бас бапкері Михаил Лоншаков пен шабуылшы Әсет Амангелдинов алдағы ойындар туралы пікірлерімен бөлісті:
Михаил Лоншаков, «Астана» бас бапкері:
- Сырт алаңдағы ойындар сериясын «Алматинский Легион» командасына қарсы матчтармен жалғастырамыз, бұл ұжым бірнеше маусым бойы бір құраммен ойнап келеді десек болады. Ойыншылары бір-бірін жақсы түсінеді, құрамда тәжірибелі де, жас та баскетболшылар бар. Біздің басты мақсатымыз – олардың жылдам шабуылын тоқтату болмақ. Командамызға тоқталар болсақ, Абылайхан Жандарбек пен Әлижан Ыдырысжан кездесуге қатыса алмайды. Екеуі де өткен ойында жарақат алып қалды. Олардың орнын «Жастардан» қосылған – Богдан Бойко мен Санжар Әубәкіров басады. Екі ойыншыға да ойын уақыты көп беріледі, өздерін көрсетуге мүмкіндік те мол болмақ.
Әсет Амангелдинов, «Астана» шабуылшысы:
- Қарсыласымыз – маусым бойы бір ойын деңгейін көрсетіп келе жатқан, дайындығы жоғары мықты команда. Алдағы ойындар қызықты өтеді деп ойлаймын. Күреске толы кездесулер болатын сияқты, біз дайынбыз. «Ирбис Алатаумен» ойындардан кейін қалпымызға келіп үлгердік. Демалдық, қателіктерімізді талдадық, қорытынды шығардық және матчқа дайындалып жатырмыз.
