Қазақстан кубогында жеңіске жеткен «Астана» баскетбол клубы бірден Ақтауға аттанып, жергілікті «Каспий» командасымен Ұлттық лига аясында жауапты екі матчтық додаға түсуге кетті. Бұл ойындар 22 және 23 қараша күндері өтеді. Жексенбі күнгі матч астана уақытымен 19:00-де, ал дүйсенбідегі ойын 18:00-де басталады.

«Каспий» – Қазақстанның ерлер арасындағы кәсіби баскетбол клубы, Ақтау қаласынан. 2008 жылы құрылған.

Жетістіктері:

• Қазақстан чемпионатының қола жүлдегері: 2011/2012, 2012/2013, 2013/2014, 2014/2015, 2016/2017
• Қазақстан кубогының қола жүлдегері: 2012, 2013, 2017

Ұлттық лиганың биылғы маусымы басында “Астана” “Каспийді” өз алаңында қабылдаған. Міне, енді бір айға да толмайтын уақыттан кейін біздің команда жауапты кездесулерін өткізу үшін Ақтауға қонаққа бара жатыр. Естеріңізге сала кетейік, біздің жігіттер өз алаңымыздағы екі ойында да “Каспийді” күйрете жеңген. Сондай-ақ Қазақстан кубогының жартылай финалында да үстемдік танытқан. Сондықтан, алдағы матчтарда Эмиль Райковичтің шәкірттерінің мысы басып тұрары –сөзсіз.

Команда құрамындағы өзгеріс: Алдағы қарсыласымыздың сапындағы бір ғана өзгеріс, Павел Ильиннің команда құрамынан кетіп қалуы болды.

Қарсыластың көшбасшылары: Ұлттық лигадағы сегіз ойыннан кейін Ақтау командасының көшбасшысы америкалық легионер Колин Доэрти болды. Ол – «Каспийдің» ең көп ұпай еншілеген және тиімді ойыншысы. Сонымен қатар, Колин дәл қазір лигадағы ең көп ұпай еншілеген ойыншы болып тұр. Доэртиден бөлек ресейлік Денис Орленконы да ұмытпау керек. Ол қазір тосқауыл қою бойынша лигада көш бастап келеді. Сонымен қатар, Михаил Карпенко қазақстандық Владимир Курочкин және Аймұрат Саткеев сынды ойыншыларымызды да бастапқы бестікте жиі ойнатып жүр. Сондай-ақ ақтаулықтардың негізгі құрамында Александр Оразбеков, Глеб Жуков, Валерий Симонов және Денис Дегтярев ойнайды.

Турнир кестесіндегі жағдай: Ел чемпионатында “Астана” қазір көш бастап келеді. Біздің жігіттер Ақтаудың “Каспий” командасынан бөлек, өз алаңында “Ақтөбені” де екі мәрте тізе бүктірген. Осылай, астана командасы төрт ойын өткізіп, төртеуінде де жеңіске жетіп, әлі ұпай жоғалтпай келеді. “Каспий” қазандағы “Астанамен” болған кездесулерден соң Ұлттық лига аясында тағы алты ойын өткізді. Өз алаңында “Алматы Легионынан” екі мәрте ұтылып қалды да, бұдан соң Алматыда “Легиондармен” өткен жауапты екі матчтың бірінде жеңіске жетті. Содан кейін ақтаулықтар өз алаңында “Атырау Барыстарымен” екі рет додаға түсіп, екеуінде де ойсырай ұтылып қалды. Жалпылай айтқанда, «Каспий» Ұлттық лига аясында “Астанаға” қарағанда екі есе көп ойын өткізді. Бірақ турнир кестесіндегі қарама-қарсы, яғни соңғы орында тұр.

Матчтар жексенбі және дүйсенбі күндері – 22 және 23 қарашада Ақтаудағы “Батыр”спорт кешені аренасында өтеді. Жексенбі күнгі матч астана уақытымен 19:00-де, ал дүйсенбідегі ойын 18:00-де басталады. Матчтардың онлайн-трансляциялары біздің сайтымыздың басты бетінде жүргізіледі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» баскетбол клубы Ұлттық лигадағы кезекті ойындарын өткізу үшін Ақтауға барып, бірінші күнгі матчта көп ұпай еншілеген (бір ойындағы) өз рекордын жаңартты. Біздің жігіттер кездесудің басынан аяғына дейін үстемдік құрып, «Каспийді» кезекті рет күйрете жеңді. Эмиль Райкович легионерлерден Джеремайя Хилл мен Девин Марблге сенім артқан болатын.​

Бұл ойында Дмитрий Гаврилов есеп ашып, әрі бірінші шабуылды “энд уан” орындаумен түйіндеді. Одан кейін Николай Бажин “Астана” басымдығын еселей үсті. “Каспий” шамасының жеткенінше тайталасып бақты, бірақ ойынның басталғанына үш минутқа да жетпейтін уақыт өткенде, Джеремайя Хилл есеп айырмасын он ұпайға жеткізді. Алаң иелері біздің жігіттердің өте жоғары қарқындағы шабуыдарына төтеп бере алмай, минут сайын есеп айырмасы ұлғая берді. Бірінші кезеңнің алтыншы минутында-ақ “Астана” отыз ұпай еншілеп, жиырма ұпайдан артық есеп айырмасымен қара үзіп кетті. Алаң иелері естерінен танып қала жаздаса да, бірінші кезеңнің аяғында еңселерін тіктеп, біздің командамен тайталаса бастады. Десек те, олар он минут уақыт ішінде 22 ұпай айырмасымен ұтылды. “Астана” бірінші кезеңде рекордты көрсеткішке қол жеткізіп, 41 ұпай еншіледі. Командалық ойын үлгісін паш етіп, жоғары нәтиже көрсетті. Біздің команда екінші кезеңде де көсіле сілтеді. Әйткенмен, шабуылдағы мүмкіндіктерінің бәрін жүзеге асыра алмады, есесіне қорғаныстағы ойын өрнектерін едәуір жақсарта түсті. Бұл кезеңнің бел ортасына қарай есеп айырмасы 30 ұпайға жетті. Сарғыш-көкшіл түстілер тізгіндерін тартпай, қарсыластарынан одан әрі ұзай түсті. “Каспий” екінші онминуттықта небәрі 7 ұпай ғана еншіледі. Андрей Литвиненко үш ұпайлық дәл соққысымен осы кезеңдегі жиырма алтыншы ұпайымызды қоржынға салды, ал есеп айырмасын бақандай 40 ұпайға жеткізді – 27:67.



Әлі жиырма минут ойнау керек болса да, Эмиль Райковичтің командасының жеңіске жететіндігіне енді күмән келтіру мүмкін емес еді. Өйткені 40 ұпай айырмасы – бұл әжептәуір үлкен басымдық. Оның үстіне, “Астана” айылын жияр сыңай танытар емес. Ақтау командасы үшінші кезеңде нәтижелі ойын үлгісін көрсетті. Бірақ бәрібір де Нұр-Сұлтаннан келген қонақтарына төтеп бере алмады. Кезеңнің ортасында “Астана” көсіле шауып, ұпай қорын молайта түсті. Ал “Каспий” болса, олардың ұмтылыстарына нәтижелі шабуылмен жауап бере алмай қалды. Үшінші кезеңнің аяқталуына үш минут қалғанда “Астана” 50 ұпайға жуық есеп айырмасымен ұтып жатты. Матчтың осы ширек бөлігі аяқталғанда таблодағы есеп 49:96 болып, астана командасы қара үзіп кетті және ақтаулықтарда ешқандай мүмкіндік болған да жоқ. Соңғы он минутта біздің команда қарқынын біршама бәсеңсітті. Әйтсе де, төрт минутқа жуық уақыттан соң Асқар Майдекин біздің команданың ұпай қорын үш таңбалы санға жеткізді. Әрі қарай “Астана” қарқынын бәсеңдетпей, кезекті ірі жеңісіне адымдай түсті. Алаң иелері төртінші кезеңді сәтті аяқтап, үш ұпай айырмасымен басым түсті. Бірақ бұл жалпы матч қорытындысындағы ұтылыстарының көлеңкесінде қалды. “Астана” бұл ойында ірі жеңіске жетіп, бір ойында ұпай еншілеуден Ұлттық лиганың биылғы маусымында жаңа рекорд орнатты – 66:110.

Ең көп ұпай еншілегендер:

• «Каспий» – бұл жолы да Ақтау командасы сапында америкалық Колин Доэрти өзінің көшбасшылық қабілеттерін паш етті. Ол өз командасы сапында ең көп ұпай еншілеген және тиімді ойыншы болды – 20 ұпай, 4 рет доп қағып алды және 2 рет пас беріп, 2 рет допты “қиып” әкетті. Қазақстандық Валерий Симонов 12 ұпай еншілеп, 4 рет доп қағып алды және 2 рет допты “қиып” әкетті.
• «Астана» – Джеремая Хилл бүгін алаңда жиырма минутқа да жетпейтін уақыт өткізді, бірақ сонда да өте нәтижелі ойын үлгісін көрсетті – 26 ұпай, 4 рет доп қағып алып, 4 рет допты “қиып” әкетті, сондай-ақ 9 пас берді. Роберт Пан “Астана” сапында ең көп ойнаған ойыншы болды – жиырма алты минуттан артық уақыт ойнап, 16 ұпай еншіледі, 5 рет доп қағып алып, 2 пас берді, сондай-ақ 1 блокшот. Девин Марбл бүгін 13 ұпай еншілеп, 4 рет доп қағып алды. Асқар Майдекин өз еншісіне 11 ұпай жазып, 4 рет доп қағып алды. Ал Дмитрий Гаврилов 9 ұпай еншілеп, 5 рет доп қағып алды және 4 нәтижелі пас берді.

Салдары: «Астана» жеңіліссіз ойындарын одан әрі сабақтап, турнир кестесінің бірінші сатысындағы жағдайын нығайта түсті, ал «Каспий» осы рейтингтегі соңғы орында қалды.

Келесі матч: «Каспий» командасымен екеуара екінші ойын ертең, яғни 23 қараша күні Ақтаудағы «Батыр» спорт кешені алаңында өтеді. Басталуы – астана уақытымен 18:00-де.

Detailed information about the tournament, tournament tables, schedule and match results are published in the Tournaments section.