Жеңіске жетуді көздеген «Астана» баскетбол клубының ойыншылары Эстонияға жол шекті. Онда олар ВТБ Бірыңғай лигасы аясында Таллиннің «Калев» клубымен кездеседі. Матч бейсенбі күні, 5 қарашада, астана уақытымен 23:00-де басталады.
«Калев» – Эстонияның ерлер арасындағы кәсіпқой баскетбол клубы, Таллинн қаласынан. 1920 жылы құрылған.
Жетістіктері:
Команда құрамы:
Эстонияның «Калев» клубы былтырғы маусыммен салыстырғанда құрамын едәуір өзгертті. Команда сапынан былтыр негізгі құрамда ойнаған америкалық Кайл Виналес, эстондар Янари Йоэссар мен Кристиан Кистинг және латыш Айгарс Шкеле кетіп қалды. Сонымен қатар, америкалықтар Саша Киллеа-Джонс, Текеле Коттон, Майкл Финке, эстондар Сандер Райесте, Кристиан Кангур және Мартин Паасойа таллиндіктер сапынан кетті.
Былтырғы маусымдағы құрамынан үш ойыншы ғана қалды, әрі бәрі де эстондар – Стэн Сокк, Танел Курбас және Мартин Дорбек. Ал биыл команда құрамына төрт бірдей америкалық ойыншы қосылды. Орталық шептегі Девин Томас “Калевке” дейін Түркияның “ТЭД Анкара Колежлилер”, Испанияның “Бильбао Баскет”, Израильдің “Хапоэль Эйлат”, Грекияның “Лаврио”, Венгрияның “Алба Фехервар” және Аргентинаның “Пенароле” сынды командаларында ойнаған. Қорғаушы Маркус Кин бұған дейін негізінен Азияда атой салған – Тайландтың “Моно Вампайр”, Оңтүстік Кореяның “КейСиСи Эгис”, Тайванның “Формоса Дриамерс” және “Юлон Люксген Динос” командалары сапында. Сонымен қатар, ол NBA Жетілу лигасында, “Мемфис Хастл” сапында да өнер көрсеткен. Қорғаушы Гейб Билер “Калевке” дейін Люксембургтің “Арантиа Ларошетт”, Македонияның “Пелистер Спорт Битоба” және Сербияның “Врсач Свисслайон” командаларында ойнаған. Ал шабуылшы Чавон Льюис бұған дейін ВТБ Бірыңғай лигасында бақ сынаған, одан ертеректе Литваның “Ювентус”, Польшаның “Чарни” және “Старт” командаларында өнер көрсеткен. “Калевте” ол 2018/2019 жылдар маусымында ойнаған. Сондай-ақ, “Нижний Новгород” және “Енисей” клубтарында да ойнап үлгерді. Биыл команда құрамы латыш қорғаушысы Янис Кауфманиспен де толықты. Янис өз карьерасын Латвияның “Валмейра” және ВЭФ командаларында бастаған. Сондай-ақ ол Испанияның “Форца Ллейда” командасында өнер көрсеткен, ал былтырғы маусымды Латвияның “Вентспилс” клубында өткізді. Кауфманис екі мәрте Латвия чемпионы болған. Сонымен қатар, команда сапына бес эстон ойыншысы алынды. Орталық шептегі Рауно Нургер “Калевтің” өз түлегі, бірақ Испаниядағы “Пенас Хуэско” және “Бреоган” командалары сапында ойнап келген. Шабуылшы Крегор Хермет негізінен Эстонияның “Аудентес”, “Кохила” және “Университет Тарту” командалары сапында ойнаған. Сондай-ақ Испанияның “Форца Ллейда” клубы сапында тәжірибе жинап келді. Қалғандары эстондық жас қорғаушылар – Индрек Сунелик, Георг Каск, Джулиус-Эрик Кастейн.
Бас бапкер:
Команданы былтырғы маусымдағыдай латыш маманы Робертс Штельмахерс жаттықтырады. Әрі оған былтырғыдай эстон Индрек Рейнбок пен латыш Акселис Вайрогс көмектеседі. Жаттықтырушылар құрамына биыл тағы бір бапкер қосылды – эстон Алар Варрак.
Команда көшбасшылары:
Бұған дейінгі өткен ойындарда команданы алға сүйреген ойыншылары америкалықтар Гейб Билер, Девин Томас және Маркус Кин болды. Сондай-ақ эстон Крегор Хермет те ерекше көзге түсіп жүр. Латыш Янис Кауфманис және Танел Курбас, Стэн Сокк, Мартин Дорбек сынды эстондар алаңда шамамен жиырма минуттан ойнап келеді. Рауно Нургер екі матчта да бастапқы бестікте алаңға шықты.
Турнир кестесіндегі жағдай:
“Калев” биылғы маусымда небәрі екі-ақ ойын өткізді. Әрі екеуінде де ұтылып, “Зенит” пен “Химкиге” есе жіберді. Сонымен қатар, коронавирус тестінің нәтижесіне байланысты, Эстония командасы “Локомотив-Кубань” клубымен болатын ойынға бара алмай, оларға техникалық жеңіліс жазылды. Сөйтіп, “Калев” үш жеңілістен соң 12-орынға табан тіреді. Ал “Астана” бес ойындағы жалқы жеңісімен олардан бір саты жоғары, яғни 11-орында тұр.
Кездесулер тарихы:
Былтырғы маусымға дейін «Астана» мен «Калев» 14 рет кездескен болатын. Әрі екеуара кездесулерде көбінесе Қазақстан командасы басым түсіп жүрген. Бірақ былтырғы маусымда эстондар бұл көрсеткішті түзеуге тырысып, “Астананы” екі рет тізе бүктірді. Сөйтіп, екеуара 16 ойында “Астана” 10 рет жеңіске жетіп, 6 мәрте ұтылып қалды.
Қызықты деректер:
Матч бейсенбі күні, яғни 5 қарашада Таллиндегі «Саку Суурхалль» аренасында өтеді. Басталуы – астана уақытымен 23:00-де. Матчтың онлайн-трансляциясы біздің сайтымыздың Ойын орталығы бөлімінде жүргізіледі, сонымен қатар, QazSport телеарнасында келесі күні, 6 қарашада 10:00-де қайталанып көрсетіледі.
Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.
“Астана” үшін Санкт-Петербургтен бастау алған түздегі ойындар сапары аса сәтті басталмай, “Зениттен” ойсырай ұтылып қалған. Сондықтан Эстония астанасына біздің команда тас-түйін әзірлікпен аттанды. Өйткені жеңіс ауадай қажет еді. Ал біздің қарсыласымыз, яғни «Калев» клубы мүлде шөліркеп жүрген, өйткені олар биылға маусымда әлі жеңіске жетіп көрген емес. Екі команданың да осы матч алдындағы жеңіске деген ынталары өз алдына, бұған қоса біздің команданың есесі кетіп жүргелі біраз уақыт болған. Мәселен, “Астана” “Калевтен” осыған дейінгі екеуара үш матчта ұтылып қалған, ал Таллинде соңғы рет бұдан 4 жылға жуық уақыт бұрын жеңіске жеткен болатын.
Эстония командасы ортада ойынға қосылған допты оп-оңай олжаға айналдырғанымен, бұл ойындағы алғашқы ұпайларды біздің Мартиньш Мейерс еншіледі. Ол екінші соққысын да шығыршықа дәл түсіріп, “Астана” үш ұпай айырмасымен алға шықты. Алаң иелері таразы басын тез теңестіріп, бір жарым минутта алға шықты. “Калев” содан тізгін тартқан жоқ, бірақ Дмитрий Гаврилов пен Оярси Силиньшаның соққыларының арқасында Қазақстан командасы олардан қол созымдай жерде болды. Девин Марблдың осы матчтағы алғашқы ұпайлары біздің команданы тағы да алға шығарды, бірақ ұзаққа емес. Алаң иелері таразы басын қайтадан өздеріне қарай аударды. Николай Бажин мен Джеремайя Хилл дер кезінде қамшыны басып, оларды алысқа ұзата қоймады. Әйтсе де, бірінші кезеңде “Астана” 4 ұпай айырмасымен есе жіберіп алды – 22:18. Екінші кезеңнің басында Асқар Майдекин матчтағы алғашқы ұпайларын еншіледі, бірақ “Калев” ойын тізгінін уыстарынан шығара қоймады. Алайда Қазақстан командасының ойыншылары жағдайды өзгертуге тырысты. Әрі Майкл Томпсонның алғашқы ұпайлары “Астананы” қайтадан алға шығарды. Екінші кезеңнің ортасында командалар орындарын ауыстырды, енді “Астана” алға шығып, “Калев” қуып жетуге тырысумен болды. Үлкен үзіліс таяғанда Қазақстан ұжымы 9 ұпай айырмасымен қара үзе бастады. Ал ойынның жиырма минуты артта қалғанда “Астана” алты ұпай айырмасымен ұтып жатты – 37:43. Егер жалпы жағдайдан алға озып, үңілер болсақ, екінші кезең Қазақстан командасы үшін ең сәтті ойын бөлігі болды, олар осы кезеңде 10 ұпай айырмасымен басымдық танытты.
Шығыршықтарын ауыстырған соң да “Калев” “Астананың” өкшесіне түсіп, қуып жетуге тырысумен болды. Тіпті екі минутқа да жетпейтін уақыттан соң бұл мақсаттарына да жетіп, есепті теңестірді. Алайда Девин Марбл мен Майкл Томпсон Қазақстан командасын қайтадан алға оздырды. Алаң иелері “Астананы” алысқа ұзатпай, біздің команданың өкшесін басып отырды. Есеп айырмасы толқындай толқып, сәл ғана басымдық таллиндіктерге қарай ауып кете жаздап тұрды. Бірақ үшінші кезеңнің аяқталуына үш минут қалғанда Джеремайя Хилл есеп айырмасын жеті ұпайға жеткізіп, “Калевтің” жаттықтырушылары құрамын тайм-аут алуға мәжбүрледі. Бұл айқын басымдық болмаса да, мұндай ойында маңызы зор айырма еді. Эстондардың тайм-ауты оларға аз да болса, көмектескендей болды. Олар біздің команданың есеп айырмасын одан әрі ұлғайта түсулеріне мүмкіндік бермей, тіпті оны аздап қысқарты да. Бірақ “Калев” біздің команданы үшінші кезең аяқталғанша қуып жете алмады. Төртінші кезең қарсаңында Эмиль Райковичтің шәкірттері алаң иелерінен 5 ұпай озық тұрды – 61:66. Бұл арқаны кеңге саларлықтай басымдық емес еді, сондықтан бәсеке көрігі соңғы он минутқа тірелді.Төртінші кезеңнің екі минутынан соң “Калев” небәрі 2 ұпай айырмасымен ұтылып жатты. Бірақ “Астана” ойыншылары қамшыны басып, көсіле шапты. Соңғы кезең бел ортасына жеткенде, Адонис Томастың айып соққыларынан кейін, “Астана” осы ойында алғаш рет екі таңбалы сан айырмасымен қара үзді. Алаң иелері барлық күш-жігерін салып, ойын өрнегін өзгертуге тырысты. Әрі матчтың аяқталуына қырық бес секунд уақыт қалғанда бар болғаны үш ұпай айырмасымен ұтылып жатты. Джеремайя Хилл сыр білдірмей, “Астананы” қайтадан бес ұпай айырмасымен алшақтата түсті. Эстония клубының жаттықытрушылары кезекті рет тайм-аут алды, бірақ одан ештеңе өзгермеді. Ал Майкл Томпсон екі айып соққысын мүлтіксіз орындап, осы ойынның нүктесін қойды – 85:92.
Ең көп ұпай еншілегендер:
«Калевтің» бас бапкері Робертс Штельмахерс:
— Бүгін біздің алмастырып ойнататын ойыншыларымыз аз болды – бірнеше ойыншымыздың орны үңірейіп білініп тұрды. Селдіреп қалған құраммен 9 күнде 4 матч өткізу оңай емес. Әрине, ойыншылар шаршады, бірақ мен ақталып тұрған жоқпын. Егер Бірыңғай лигада жеңіске жеткіміз келсе, бәрін де ақылға салып ойнауымыз керек.
«Астананың» бас бапкері Эмиль Райкович:
— Біз ойын қарқынын бақылап отырдық. Шешім қабылдауда асыққан жоқпыз, әрі іс-әректімізді біліп отырдық. Ұзақ уақыт түзде ойнап жүргендіктен, бұл – біз үшін өте маңызды жеңіс. Әрі бұл біздің толық құрамдағы алғашқы ойынымыз, мен біздің команданың әлеуетін көріп қуанып отырмын. Яғни ойын өрнегімізді жетілдіре түсіп, бұдан да жоғары жетістіктерге қол жеткізе аламыз.
Салдары: «Астана» осы жеңісінен соң плей-офф аймағына оралып, сегізінші орынға көтерілді. «Зелена Гура» және «Химки» клубтарының алдын орап кетті. Ал «Калев» биылғы маусымда жеңіске жете алмай жүр, турнир кестесінің соңғы сатысына табан тіреп тұр.
Келесі матч: 9 және 10 қараша күндері астана баскетболшылары өз алаңымызда Ұлттық лига аясындағы екі ойынан тұратын кезекті кездесулерін өткізеді. Қарсыласымыз «Ақтөбе» баскетбол клубы болады. Ал ВТБ Бірыңғай лигасыдағы келесі ойынын Эмиль Райковичтің шәкірттері Красноярскінің «Енисей» командасымен өткізеді. Матч 14 қараша күні «Сарыарқа» велотрегінде өтеді.
Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.
