15 желтоқсанда «Астана» Президенттік баскетбол клубы Ресей астанасы Мәскеуде түздегі кезекті ойынын өткізіп, ВТБ Бірыңғай лигасының қазіргі чемпионы ЦСКА командасымен додаға түседі.
ЦСКА – Ресейдің ерлер арасындағы кәсіпқой баскетбол клубы, Мәскеу қаласынан, 1923 жылы құрылған. Биылғы маусымда ВТБ Бірыңғай лигасынан бөлек, Еуролига додасында бақ сынайды.
Жетістіктері:
Бас бапкер:
2014 жылдан бері Мәскеу командасын грек маманы Димитрис Итудис жаттықтырып келеді. Ол бапкерлік карьерасын тым ерте, нақтырақ айтқанда, 20 жасында бастаған. Итудис алғашқы бапкерлік қызметін 1990 жылы Хорватияның (сол кездегі Югославияның) «Загреб» баскетбол клубы жүйесінде бастаған. Хорватия командасында бес жыл тәжірибе жинақтаған соң Грекияға оралады. Әрі 4 жылдың ішінде ПАОК, «Панионис», «Филиппос» және МЕНТ командалары сапында шыңдала түседі. 1999 жылы «Панатинаикос» командасында бас бапкердің көмекшісі болып бекітіледі. Бұл қызметте 13 жыл бойы ілімін жетілдіре түседі. Әрі осы уақыт аралығында Димитрис бас бапкердің көмекшісі ретінде бес рет Еуролига чемпионы, 11 дүркін Грекия чемпионы және 7 мәрте Грекия кубогының жеңімпазы атанады. «Панатинаикостан» кейін, 2013/2014 маусымында, Итудис Түрекияның «Банвит» клубына бас бапкер болады. Бірақ түрік жерінде ұзақ тұрақтамайды. Келесі маусымда ол Ресейге ойысып, ЦСКА командасының тізгінін қолына алады. ЦСКА-мен Димитрис Итудис екі рет Еуролига жеңімпазы атанады және екі мәрте «Еуролигадағы Жыл жаттықтырушысы» мәртебесіне ие болады. Әскерилер клубын жаттықтырған осы бес маусымда да ВТБ Бірыңғай лигасының жеңімпазы және Ресей чемпионы болады. Үш мәрте Жыл жаттықтырушысы атанады. Ал 2017 жылы ВТБ Бірыңғай лигасындағы Жұлдыздар матчында «Әлем жұлдыздары» командасының бас бапкері болған.
Команда құрамы:
Маусым аралығында ЦСКА-дан Франция қорғаушысы Нандо Де Колоның кетіп қалуы орны толмас олқылық болды. Сол секілді америкалық орталық шеп ойыншысы Отелло Хантер мен Испания қорғаушысы Серхио Родригесті де осы тізімге қосуға болады. Әскерилер клубының негізгі құрамында ойнаған америкалықтар – шабуылшы Алек Питерс пен қорғаушы Кори Хиггинс те маусым аралығында командадан кетіп қалған. Бірақ Итудистің қарамағында былтырғы маусымнан үш легионер қалды. Олар – америкалық орталық шеп ойыншысы Кайл Хайнс, ол Мәскеу командасы сапында 2013/2014 маусымынан бері жүр; Америкалық шабуылшы Уилльям Клайберн, биыл ЦСКА сапында ү.шінші маусым ойнайды; Италия қорғаушысы Дэниел Хэккетт, ЦСКА жейдесін екінші маусым киіп отыр. Ал былтырғы маусымдағы 8 ресейлік ойыншының бәрі де ЦСКА-ға адал болып шықты, ешқайсысы да қоныс ауыстырған жоқ. Олар – шабуылшы Джоэль Боломбой, қорғаушы Иван Ухов, қорғаушы Александр Хоменко, ЦСКА сапында көптен бері жүрген шабуылшылар Никита Курбанов пен Андрей Воронцевич: Никита ЦСКА-ның жейдесін алғаш рет сонау2002 жылы киген, бірақ бірнеше маусымды Ресейдің басқа клубтары сапында өткізіп келді, ал Андрей әскерилер құрамынан 2006 жылдан бері ешқайда аттап басқан емес; Қорғаушы Михаил Кулагин команда сапында 2015 жылдан бері, ал Олимпиада ойындарының және Еуропа чемпионатының қола жүлдегері, шабуылшы Семен Антонов 2016 жылдан бері жүр. Өз түлектері, шабуылшы Андрей Лопатин мен қорғаушы Александр Хоменко команда сапында 2017 жылдан бері ысылып келеді. Команда лидерлерінің бірі, шабуылшы Джоэль Боломбой, сондай-ақ қорғаушы Иван Ухов әскерилер намысын биыл екінші маусым қорғайды.
Биылғы маусымда ЦСКА бес ойыншымен келісімшартқа отырды, әрі олардың бәрі де – шетелдіктер. Америкалық орталық шеп ойыншысы Коста Куфос, ол өзінің бұған дейінгі кәсіби мансабын тек ҰБҚ-да өткізген. 2008 жылғы Драфта оны «Юта Джаз» командасы таңдап алған, 2010/2011 маусымында «Миннесота Тимбервулвз» командасына ауысады, одан әрі екі жылдан «Денвер Наггетс» және «Сакраменто Кингз» клубтарында ойнайды, ал соңғы 4 маусымды ол «Сакраменто Кингз» сапында өткізді. Костаның екі азаматтығы бар, ол Грекия құрамсының да намысын қорғаған, әрі олармен Еуропа чемпионатының қола жүлдегері атанған. Америкалық қорғаушы Дэрран Хиллард үш маусым ҰБҚ-да ойнап, «Детройт Пистонс» және «Сан-Антонио Сперс» командаларының намысын қорғаған, әрі осы клубтардың фарм-командалары сапында да өнер көрсеткен. Соңғы маусымды ол Испаниядағы «Баскония» командасының сапында өткізді. Сонымен қатар, Дэрран АҚШ құрамасы сапында Америка чемпионы болған. Америкалық қорғаушы Майк Джеймс өз карьерасын Хорватияда бастаған, содан кейін Израильге ойысқан. Одан әрі Италия, Грекия, Испания және қайтадан Грекия елдерінде ойнаған, сонда «Панатинаикос» сапында чемпион атанып, Грекия кубогының иегері болады. Келесі маусымды Майк ҰБҚ-да бастайды: әуелі «Финикс Санз» сапында ойнап, Жаңа жыл мерекесінен соң «Нью-Орлеан Пеликанс» құрамына ауысады. Бірақ бұл маусымды ол қайтадан гректің «Панатинаикос» клубы сапында аяқтайды, әрі тағы да Грекия чемпионы атанады. Былтырғы маусымды ол Италияның «Олимпия Милан» клубы сапында өткізіп, бұл ұжыммен Италия суперкубогының иегері атанған. Мәскеу клубы сапына биыл америкалықтардан бөлек, орталық шептегі неміс ойыншысы Йоханнес Войтманн қосылды. Ол өз карьерасын немістің «Сайнс Сити» клубы сапында бастап, одан кейін «Скайланерске» ауысады, бұл ұжыммен FIBA Еуропа кубогының жеңімпазы атанған. Соңғы үш маусымды Йоханнес Испаниядағы «Баскония» клубы сапында өткізген. Латыш қорғаушысы Янис Стрелниекс – әскерилер сапына алынған жаңа ойыншылардың ішіндегі ВТБ Бірыңғай лигасында ойнаған тәжірибесі бар жалғыз баскетболшы. Бірақ ол алғашқы маусымдарда латыштың «Вентспилс» клубында ойнаған және Латвия чемпионы деген атағы да бар. Бұдан кейін екі маусым бойы Петербордың «Спартагында» өнер көрсетіп, ВТБ Бірыңғай лигасы көрігін қыздырған. Содан соң Украинаның «Будевельник», немістің «Брозе» және Грекияның «Олимпиакос» клубтары сапында ойнаған.
Команда көшбасшылары: Майк Джеймс маусымның бірінші жартысында ЦСКА сапындағы ең тиімді және нәтижелі ойыншы болды. Сондай-ақ Уильям Клайбернді нәтижелілігі мен тиімділігі жағынан екінші ойыншы ретінде атап өтуге болады, әрі оның небәрі 3 матч қана өткізгендігін атап өтуге тиіспіз. Үнемі бастапқы бестікте ойнайтындар – Джоэль Боломбой, Дэниел Хэккет, Андрей Воронцевич, сонымен қатар Дэрран Хиллиард, Никита Курбанов және Кайл Хайнс. Сондай-ақ Итудис ойынға жиі қосатындар – Янис Стрелниекс, Йоханнес Войтманн, Семен Антонов және Иван Ухов. Негізі, Димитрис Итудис матч сайын барлық ойыншыларына ойнауға, өз қабілетін паш етуге мүмкіндік береді. Сондықтан алаңға кез келген уақытта, кез келген ойыншы шығуы мүмкін.
Турнир кестесіндегі жағдай: «Астана» дәл қазір үш жеңісімен және бес жеңілісімен турнир кестесінің 11-сатысында тұр, яғни өзінің алдағы қарсыласынан біршама қалып қойған. ЦСКА қазір – екінші орында, еншісінде 7 жеңіс және 3 жеңіліс. Әскерилер клубы биылғы маусымды түзде, күтпеген жерден «Енисейден» ұтылып қалып бастады. Одан кейін өз алаңында «Парманы» тізе бүктірді. Содан соң тағы сүрінді. Бұл жолы өз алаңында «Зениттен» ұтылды. Бұдан кейінгі 5 матчта үстемдік танытып, бар жағынан басым түсті – «Цмоки-Минск», «Зелена Гура», «Автодор» және «Нижний Новгород», тек өз алаңында «Локомотив-Кубань» клубын қабылдағанда ғана тартысты дода болды. Ал Қазанда өткен тоғызыншы матчта ЦСКА тағы да ұтылып, УНИКС-ке есе жіберді. Әскерилер соңғы матчты Пермде өткізіп, жеңіске жетті.
Кездесулер тарихы: «Астана» мен ЦСКА өз тарихтарында 18 рет кездесті. Бірінші ойындар 2013/2014 маусымында өтіп, онда әскерилер клубы екі рет Қазақстан командасынан басым түскен. Келесі маусымда ЦСКА «Астананы» екі рет чемпионат додасында жеңіп, үш рет 1/8-финалында ұтып, жолынан тайдырды. Біздің команда мәскеуліктерді одан кейінгі маусымда да ұта алмай, екі рет жеңілістің кермек дәмін татты. Содан соң тағы да 2 рет чемпионат аясында, үш рет 1/8-финалында ұтылды. Соңғы екі маусымда да ЦСКА басымдық танытып, екеуара төрт ойында жеңіске жетті.
Қызықты деректер:
Матч жексенбі күні, яғни 15 желтоқсанда Мәскеуде, А.Я.Гомельский атындағы ЦСКА әмбебап спорт кешені аренасында өтеді. Басталуы – астана уақытымен 16:00-де. Матчтың онлайн-трансляциясы біздің сайтымыздың Ойын орталығы бөлімінде жүргізіледі.
Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.
«Астана» Президенттік баскетбол клубының баскетболшылары ВТБ Бірыңғай лигасының түздегі матчында Мәскеудің ЦСКА-сымен табан тіресе тайталасқандарымен, жеңіліске ұшырады.
«Астана» доп ойынға қосылғанда, оны іліп әкеткенімен, бірінші шабуылын сәтті аяқтай алмады. Ал алаң иелері өздерінің бірінші шабуылдарында алғашқы ұпайларына қол жеткізіп, есеп ашты. Біздің команда есепті теңестіргенімен, ЦСКА қайтадан алға шықты. Осылай, «Астана» қарсыласын қуып жетуге тырысумен болды. Ал әскерилер клубы есеп айырмасын алты ұпайға дейін жеткізді. Бірақ бірінші кезеңнің ортасында Эмиль Райковичтің шәкірттері бір ғана ұпай айырмасымен ұтылып жатты. Бұдан кейін екі команда бір-бірінің шығыршығына толассыз доп тоғытумен болып, ЦСКА ойыншыларына өз басымдықтарын сәл де болса, ұлғайта түсу үшін шүмектетіп тер төгуге тура келді. Бірінші онминуттықтың соңында екі команданың арасын 4 ұпай ғана бөліп тұрған. Алайда соңғы секундтарда алаң иелері екі шабуылын сәтті аяқтап, бұл кезеңді +8 басымдығымен тәмамдады. Қазақстан командасы үшін екінші кезеңнің басы көңілдегідей болмады. Бір минутқа да жетпейтін уақыт ішінде олар үш командалық ескерту алды. Ал ЦСКА болса, өз басымдығын екі таңбалы санға жеткізді. Кезеңнің басталғанына екі минутқа да жетпейтін уақыт өткен кезде, «Астана» 14 ұпай айырмасымен ұтылып жатты. Әйтсе де, біздің жігітер намысты қолдан бермеуге тырысты. Бұл кезенің басым бөлігінде есеп айырмасы 10 ұпайдың шамасында сақталып тұрды. Бірақ доп додасы терезесі тең дәрежеде өтті. Бұл матчтағы есте қалар ұмытылмас сәттердің бірі Джеремайя Хиллдің орындауындағы үш ұпайлық баззер болды. Десек те, екінші кезеңде мәскеуліктер басым болып, матчтың бірінші жартысы аяқталғанда, алға қарай біршама ұзай түсті – 55:43.
Әйтсе де, матчтың басында ЦСКА ұтып жатқанымен, оларды айқын фаворит деу қиын еді. Мәскеуліктер біздің командадан кейбір көрсеткіштер бойынша асып түсті. Бірақ Қазақстан командасы бастапқы 20 минутта табан тіресе тайталасып, алаң иелеріне мүлде оңай болған жоқ. Он бес минуттық үзілістен кейін де алаңдағы дода көрігі басылған жоқ. Қарсыласымыз алда тұрғанымен, олар есеп айырмасын ұлғайта алмай қойды. Кезеңнің бел ортасында астана баскетболшылары қарқындарын үдете түсті. Ал ЦСКА-ның кежегесі кейін тартып, Мәскеу ойыншылары «Астана» шабуылдарына төтеп бере алмай қалды. Содан әскерилер клубының бапкерлері құрамына ойынға араласып, құйындай орап соққан қазақстандықтарды тайм-аутпен тоқтатуға мәжбүр болды. Ал бұл кезде біздің команда есеп айырмасын 4 ұпайға дейін қысқартқан болатын. Өкінішке қарай, Димитрис Итудистің дәл осы тактикалық кідірісі жүзеге асып, біздің жігіттердің қарқындары әлдеқайда басылып қалды. Соның арқасында ЦСКА өз гандикапын қайтадан қалпына келтіре бастады. Соңғы кезеңнің алдында «Астана» біршама есеп айырмасымен ұтылып жатты – 14 ұпай. Төртінші кезең де жан беріп, жан алысар үлгіде өтті. Бірақ алаң иелері өз басымдықтарын уыстарынан шығармай, кейді оны тіпті 15 ұпайдан да асырып отырды. Ал кей сәттерде 10 ұпайдан да кеміп қалып, қыза түсті. Жалпы, ойын өте нәтижелі өтіп, матч соңында алаң иелері ұпай қорларын жүзден де асырып, жеңіске жетті – 104:91 (29:21, 26:22, 27:25, 22:23).
Ең көп ұпай еншілегендер:
ЦСКА клубының бас бапкері Димитрис Итудис:
— Біз бүгін жақсы ойнадық, мен командамды құттықтаймын. Менің мақсатым, ойыншылардың алаңда өткізетін уақыттарын біркелкі қылып, бөліп отыру болды, өйткені келесі аптада біз үш ойын өткіземіз.
«Астаны» клубының бас бапкері Эмиль Райкович:
— ЦСКА командасын жеңісімен құттықтаймын. Ойын жанкүйерлер үшін қызықты болды деп ойлаймын. Тамаша сәттер, данктер, үш ұпайлық әдемі салынған доптар көп болды. Екі команда да алыстан көп шабуылдап, үш ұпайлық доптарының 50 пайыздан астамын дөп түсіріп, дода көрігін қыздыра түсті. Біздің бүгін ойларымыздың көбісі орындалды. Енді осыны алдағы жеңістеріміздің түпнұсқасына айналдыруға тырысамыз. Мәселен, жуырда Польшаның «Зелена Гурасымен» кездесеміз. Маған осындай деңгейде Қазақстан ойыншыларының өз мүмкіндіктерін паш етіп жүргендері қатты ұнайды – Щербак, Пан және Мырзағалиев бүгін өздерін көрсетті. Олардың әлі де жетіле түсетіндеріне сенімдімін.
Салдары: «Астана» биылғы маусымдағы бірінші мүмкіндігінде алғаш рет әскерилер клубын жеңе алмады. Бірақ чемпиондармен арадағы бұған дейінгі ойындармен салыстарғанда, бүгін ең үздік ойын өрнегін көрсетті. Әйткенмен, Мәскеудегі бүгінгі жеңіліснен кейін «Астана» турнир кестесінде тағы бір саты төмен сырғып, 11-орынға табан тіреді.
Келесі матч: Тарих қойнауына еніп бара жатқан жыл соңында елорда баскетболшылары ВТБ Бірыңғай лигасы аясында, түзде тағы бір ойын өткізеді – 23 желтоқсанда «Астана» Польшаның «Зелена Гура» клубымен кездеседі.
Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.
