Ақтөбе vs. Астана: алғашқы матч

Матч жай ойын емес, нағыз триллер болды. Эмоция біздің Telegram-каналымыздағы оқырмандар санының өсу жылдамдығымен өзгеріп отырды. Айтпақшы, дәл қазір онда футболкалар мен ойын жейделері ұтысқа тігіліп жатыр. Бірақ, біздің қазіргі әңгімеміз ол жайында емес. Бәрін басынан бастайық.

Бірінші ширекте «Ақтөбе» 10:1 есебімен алға кетіп, «Астана» тайм-аут алуға мәжбүр болды. Бір минуттық үзілістен кейін жағдай аса өзгере қойған жоқ, алаң иелері есеп айырмасын ұлғайтуды жалғастыра берді: қарсыластың шабуылы жақсы жүрсе, біздн бәрі керісінше болды. Екі маңызды ойыншы Оразбеков пен Сәрсенғалиевтің құрамда жоқтығы сезіліп тұрды. Алайда алғашқы ширектің соңына қарай Михаил Лоншаков шәкірттерінің ойынв ретке келе бастады, сөйтіп таблодағы көрсеткішті жақсартуға мүмкіндік туды — 26:15.

Екінші ширекте Медовской жалғыз өзі бәріне қарсы тұрды деуге болады. Оның қатарынан үш рет үш ұпайлық соққы жасауы есеп айырмасын 8 ұпайға дейін қысқартуға мүмкіндік берді. Алайда «Ақтөбе» қысым көрсетуін тоқтатпай, тек Симоновтың кезең соңында алыстан жасаған соққысының арқасында үлкен үзіліске 46:37 есебімен аттана алдық.

Үшінші он минуттықтың ортасында «Астана» матчта алғаш рет есепте алға шықты. Алайда бұл қуаныш ұзаққа созылмады: «Ақтөбе» бірнеше алыс соққылармен жауап беріп, қайтадан көш бастады. Шешуші ширек алдындағы есеп — 63:59.

Төртінші ширек басында «Астана» Симонов пен Сүлейменовтің арқасында басымдыққа ие болды. Алайда алаң иелерінің оңай берілер ниеті жоқ еді, сөйтіп олар тағы да көш бастады. Ойындағы тартыс қыза түсті. Бұл сәтте Сардал Абашидзе алдыңғы қатарға шықты: оның қорғаныстағы блок-шоты мен шабуылдағы маңызды ұпайлары шешуші рөл атқарды. «Ақтөбе» есепте үш ұпай айырмашылық бар кезде тайм-аут алды, алайда Мұхаммедәлі Сайрановтың допты тартып алуы мен жарқын данкы матч нүктесін қойды. «Астана» тек жеңісті жұлып алмай, мінез көрсетті. Ойынның қорытынды есебі — 76:81. 

Бүгін сырт алаңда «Ақтөбемен» екінші матчымызды өткіземіз. Қарсылас кеткен есесін қайтара ма, әлде «Астана» тағы да жеңіске жете ме? 
Бұл сұрақтың жауабын бүгін білеміз. Матч сағат 19:00-де басталады. Трансляция — сайтымызда.