ВТБ Бірыңғай лигасы 2020/2021
Астана
Нұр-Сұлтан
ВТБ Бірыңғай лигасы, Тұрақты біріншілік
23.09.2020, 19:30 Ср
Арена: Велотрек «Сары-Арқа» (Нұр-Сұлтан)
60:93
Негізгі уақыт
15:30 14:20 23:22 8:21
Ойын нөмірі: RS-2
Көрермен: 0
ЦСКА (МСК)
Мәскеу

«Астана» ВТБ лигасының жаңа маусымын өз алаңында ЦСКА командасымен бастайды

22.09.2020, 10:00    Просмотров: 93
Источник: Баспасөз қызметі
Автор:

Тұп-тура 200 күннен кейін үлкен баскетбол қайтадан Қазақстан астанасына оралады! «Астана» баскетбол клубы ВТБ Бірыңғай лигасының жаңа маусымдағы алғашқы матчын өз алаңында өткізіп, Мәскеудің ЦСКА командасын қабылдайды.

НАЗАР АУДАРЫҢЫЗ! — Матч көрерменсіз, бос трибуналарда өтеді.

ЦСКА – Ресейдің ерлер арасындағы кәсіпқой баскетбол клубы, Мәскеу қаласынан, 1923 жылы құрылған. Биылғы маусымда ВТБ Бірыңғай лигасынан бөлек, Еуролига додасында бақ сынайды.

Жетістіктері:

  • КСРО чемпионы − 1945, 1960-1962, 1964-1966, 1969-1974, 1976-1984, 1988, 1990. 
  • Ресей чемпионы – 1992-2000, 2003-2019. 
  • КСРО кубогының жеңімпазы − 1972, 1973, 1982. 
  • Ресей кубогының жеңімпазы – 2005-2007, 2010. 
  • Еуропа чемпиондары Кубогының жеңімпазы − 1960/1961, 1962/1963, 1968/1969, 1970/1971. 
  • NEBL чемпионы − 1999/2000. 
  • Еуролига чемпионы − 2005/2006, 2007/2008, 2015/2016 
  • ВТБ Бірыңғай лигасының чемпионы − 2009/2010, 2011/2012-2018/19
  • ВТБ Бірыңғай лигасының күміс жүлдегері − 2010/2011


Команда құрамы:

ЦСКА-ның былтырғы және биылғы маусымдағы құрамында көп өзгеріс жоқ. 12 ойыншысы бірдей Мәскеу клубымен өз келісімшарттарын ұзартты. Олардың арасында команданың негізін қалайтын үздіктері де бар – Майк Джеймс, Дэниел Хэккетт, Джоэль Боломбой, Никита Курбанов, Дэрран Хиллиард, Йоханнес Фогтманн, Янис Стрелникс, Семен Антонов және Иван Ухов, сондай-ақ жас ойыншылары Андрей Лопатин мен Александр Хоменко. Сонымен қатар, қатарға Уилльям Клайборн қосылды, ол былтырғы маусымда толықтай дерлік жарақатына байланысты ойнай алмаған. Маусым аралығында командадан әскерилер ұжымының капитаны Кайл Хайнс кетіп қалған болатын. Ол Италияның «Олимпия Милан» командасына ауысты. Ал оның лауазымын Никита Курбанов басты. Бұдан бөлек, ЦСКА-ның негізгі құрамдағы тағы бір ойыншысымен жолы қақ айырылды – Андрей Воронцевичпен. Сондай-ақ командадан Коста Куфос, Ховард Сант-Рос және Михаил Кулагин кетіп қалды. Соңғысы «Енисейге» ойысты.

ЦСКА баскетбол клубы 2020/2021

Жаңа ойыншыларына келсек, олар – небәрі екеу. Сербиялық орталық шеп ойыншысы Никола Милутинов өзінің кәсіби мансабын өрімдей жас кезінен бастаған. Он бес жасында-ақ Сербияның «Хемофарм» деген командасында ойнаған. Одан кейін «Партизанға» ауысып, бұл ұжыммен екі мәрте Сербия чемпионы атанады және бір рет Адриатикалық лигада топ жарады. Соңғы бес маумымды Никола Грекияның «Олимпиакос» командасы сапында өткізген. Осы уақыт ішінде ол Грекия чемпионы атанып, екі мәрте осы елдің «Жұлдыздары матчында» ойнаған. Әрі 2017 жылы Грекия чемпионатындағы ең прогрессшіл ойыншы мәртебесіне ие болған. Осы ретте, Милутиновті «Сан-Антонио Сперс» командасы драфтте таңдап алғанын да айта кеткен жөн болар. Командадағы екінші жаңа ойыншы – грузин шабуылшысы Торнике Шенгелия. Ол өз карьерасын Испанияның «Валенсия» командасы сапында бастаған. Әрі бірден «Валенсиямен» Еурокубок жеңімпазы атанады. Одан кейін екі маусым Бельгияда ойнап, «Вервье-Пепинстер» және «Шарлеруа» командалары сапында өнер көрсеткен. Бұдан кейін ол мұхит асып, «Бруклин Нетс» командасымен келісімшартқа отырады. Сондай-ақ «Спрингфилд Армор» сапында ойнаған. 2014 жылы тіпті «Чикаго Булз» сапында бір-екі ай бақ сынаған. Соңғы алты жылды Торнике Испаниядағы «Баскония» сапында өткізіп, осы елдің чемпионатында және Еуролигада ерекше көзге түсті. Былтырғы маусымда Испания чемпионы болды.

Команда көшбасшылары:

ЦСКА үшін бұл ойын ВТБ лигасы маусымындағы алғашқы матч болады. Бірақ олар маусым аралығында Нева және Гомельский кубоктарын жеңіп алды. Команданың көшбасшылары – шектен тыс көп. Әйтсе де, ойға ең әуелі Майк Джеймс келеді. Десек те, әскерилер ұжымы сапында одан да басқа жоғары деңгейлі ойыншылар өте көп – Джоэль Боломбой, Дэниел Хэккетт, Дэрран Хиллиард және Никита Курбанов, сондай-ақ Янис Стрениекс, Йоханнес Войтманн және Семен Антонов. Жарақатынан айығып келген Уилльям Клайборн да нәтижелі ойын өрнегін көрсете алады. Ал жаңа ойыншылары, яғни Никола Милутинов пен Торнике Шенгелия да қарсыластарын жиі-жиі қапы қалдырып отыру үшін барлық күш-жігерлерін салады.

Бас бапкер:

Димитрис Итудис өз есімін ЦСКА-мен көптен бері ұштастырып және «Сәйгүліктерді» көптен бері додаға салып келеді. Итудис өзінің алғашқы бапкерлік өтілін 1990 жылы Хорватияның (сол кездегі Югославияның) «Загреб» баскетбол клубы жүйесінде бастаған. Хорватия командасында бес жыл тәжірибе жинақтаған соң Грекияға оралады. Әрі 4 жылдың ішінде ПАОК, «Панионис», «Филиппос» және МЕНТ командалары сапында шыңдала түседі. 1999 жылы «Панатинаикос» командасында бас бапкердің көмекшісі болып бекітіледі. Әрі бұл қызметте 13 жыл бойы ілімін жетілдіре түседі. Осы уақыт аралығында Димитрис бас бапкердің көмекшісі ретінде 5 рет Еуролига чемпионы, 11 дүркін Грекия чемпионы және 7 мәрте Грекия кубогының жеңімпазы атанады. «Панатинаикостан» кейін, 2013/2014 маусымында, Итудис Түрекияның «Банвит» клубына бас бапкер болады. Бірақ түрік жеріне ұзақ тұрақтамайды. Келесі маусымда ол Ресейге ойысып, ЦСКА командасының тізгінін қолына алады. ЦСКА-мен Димитрис Итудис екі рет Еуролига жеңімпазы атанады және екі мәрте «Еуролигадағы Жыл жаттықтырушысы» мәртебесіне ие болады. Әскерилер клубын жаттықтырған осы 6 маусымда (тек соңына дейін жалғаспай, үзіліп қалған былтырғы маусымды есепке алмағанда), ол ВТБ Бірыңғай лигасының жеңімпазы және Ресей чемпионы болады. Әрі үш мәрте Жыл жаттықтырушысы атанады. Ал 2017 жылы ВТБ Бірыңғай лигасындағы Жұлдыздар матчында «Әлем жұлдыздары» командасының бас бапкері болған.

Димитрис Итудис

Турнир кестесіндегі жағдай:

Екі команда үшін де алдағы матч ВТБ Бірыңғай лигасының жаңа маусымындағы бірінші ойындары болады. Сондықтан олар бірдей жағдайда – әзірше ұпайлары жоқ.

Кездесулер тарихы:

«Астана» мен ЦСКА өз тарихтарында 20 рет кездесті. Бірінші ойындар 2013/2014 маусымында өтіп, онда әскерилер клубы екі рет Қазақстан командасынан басым түскен. Келесі маусымда ЦСКА «Астананы» екі рет чемпионат додасында жеңіп, үш рет 1/8-финалында ұтып, жолынан тайдырды. Біздің команда мәскеуліктерді одан кейінгі маусымда да ұта алмай, екі рет жеңілістің кермек дәмін татты. Содан соң тағы да 2 рет чемпионат аясында, үш рет 1/8-финалында ұтылды. Соңғы үш маусымда да ЦСКА басымдық танытып, екеуара алты ойында жеңіске жетті.

Қызықты деректер:

  • «Астананың» Бас менеджері Валерий Тихоненко өз карьерасының басында, сонау КСРО кезінде, ЦСКА сапында ойнаған, әрі карьерасын дәл осы Мәскеу клубы сапында аяқтап, үш рет Ресей чемпионы болған. Мұнымен қоса, ойыншы ретіндегі мансабын аяқтаған бетте, екі жыл қатарынан ЦСКА-ның жаттықтырушылары штабын басқарған.
  • Соңғы төрт маусымда «Астана» үшінші рет ВТБ лигасы маусымын азулы ЦСКА командасымен, өз алаңында бастап отыр.
  • ЦСКА – ВТБ Бірыңғай лигасында «Астана» әлі бірде-бір рет ұта алмай жүрген жалғыз команда.


Матч сәрсенбі күні, яғни 23 қыркүйекте Нұр-Сұлтандағы «Сарыарқа» республикалық велотрегі аренасында өтеді. Басталуы – астана уақытымен 19:30-да. Матчтың онлайн-трансляциясы біздің сайтымыздың Ойын орталығы бөлімінде, сонымен қатар QazSport телеарнасында тікелей эфирде жүргізіледі.

Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

«Астана» ВТБ лигасының жаңа маусымын өз алаңында бастап, ЦСКА-мен тайталасты

24.09.2020, 10:00    Просмотров: 77
Источник: Баспасөз қызметі
Автор:

«Астана» баскетбол клубы үшін ВТБ Бірыңғай лигасындағы мерейтойлы маусымының басы жеңіл болмады – Мәскеудің ЦСКА командасымен өткен өз алаңындағы ойында біздің команда әйгілі қарсыласына төтеп бере алмады.

Дәл қазір ВТБ Бірыңғай лигасындағы ЦСКА құрамында 14 ойыншы тіркелген. Әрине, олардың екеуі ойынға қатыса алмайды. Бұл матчта ондай ойыншылар неміс Йоханнес Фогтманн мен италиян Дэниэл Хэккетт болды. Бірақ ЦСКА-ның құрамы оларсыз да жоғары деңгейлі ойыншыларға лық толы еді. Ал біздің командаға келер болсақ, Вадим Щербак ойын хаттамасына ілікпеді. Сонымен қатар, Эмиль Райкович осыдан бір-екі күн бұрын жаттығу кезінде кішігірім жарақат алып қалған Адонис Томасты дүлей додаға салмады. Сөйтіп, біздің команданың сапында үш-ақ легионер болды, яғни Қазақстан ойыншыларына өздерінің қабілеттерін паш етуге мүмкіндік мол болды.

Матч басында ортаға допты екі рет лақтыруға тура келіп, қонақтар оны іліп әкетті де, бірінші шабуылдарында-ақ есеп ашты. Ал біздің команда біршама уақыт бойы қонақтардың шығыршығының кілтін таппай сенделді. Ойынның басталғанына екі минуттан да асатын уақыт өткенде, 6 ұпай айырмасымен ұтылып жатқанда, Джеремайя Хилл осы ойындағы ғана емес, «Астана» үшін ВТБ Бірыңғай лигасы маусымындағы алғашқы ұпайларды еншімізге жазды. ЦСКА маусым аралығында екі турнирді, яғни Нева және Гомельский кубоктарын жеңіп алған болатын. Ал Қазақстан командасы небәрі бір ғана жолдастық кездесу өткізген-тін, яғни осы матчқа дейінгі ойын практикасы жағынан мәскеуліктер көш ілгері еді. Әрі бұл өз жемісін берді де, қызыл-көк жейделілер көсіле сілтеді. Бірақ «Астана» намысты қолдан бермей, тайталасып бақты. Бірінші кезеңнің ортасына таман, «Астана» өзінің жаңа ойыншысы Майкл Томпсонның шығыршыққа дөп түсірген үш ұпайлық екі добынан кейін небәрі 4 ұпай айырмасымен ұтылып жатты. Алайда командалық фол шектеуі түгесіліп, келесі ойын ережесі бұзылған сәтттер енді екі ұпайлық айып добымен жазалануы керек болды. Әрі қарай ЦСКА да қарқынын үдете түсіп, есеп айырмасы тез арада 10 ұпайдан асып кетті. Осылай, бірінші он минуттық «Астана» үшін мүлдем сәтті болмады – 15:30. Екінші ойын бөлігі де қонақтардың басымдығымен өтіп, олар алға қарай ентелеумен болды. Төрт минуттан кейін есеп айырмасы бақандай 20 ұпайға да жетті. Біздің жігіттер қанша тырысса да, есеп айырмасын қысқарта алмай қойды. Ал ЦСКА бұл басымдықты уысына «қысып» ұстап, есеп айырмасы 20 ұпай шамасында тербеліп тұрды. Сөйтіп, ойынның бірінші жартысы 29:50 есебімен аяқталып, қарсыластарымыз кездесудің екінші бөлігі қарсаңында қара үзіп кетті.

Майкл Томпсон

Үлкен үзілістен кейін Эмиль Райковичтің шәкірттері толғаныстарын таратып, жылдамдықтарын едәуір үдетті. Доп додасы біршама қыза түсіп, екі команда ашық ойын түріне көшті. «Астана» үш минутқа да жетпейтін уақыт арасында есеп айырмасын 21 ұпайдан 14-ке дейін, яғни үштен бір бөлігіне шейін қысқартты. Бірақ бұдан кейін Майк Джеймс қамшыны басып, оны тоқтату мүлде мүмкін болмады. Оның кез келген қашықтықтан, кез келген ойын сәтінен лақтырған доптары шығыршыққа дөп түсіп отырды. Сөйтіп, ЦСКА Майктің арқасында өздеріне ыңғайлы 20+ ұпай айырмасы басымдығына қайта қол жеткізді. Матчтың үшінші ширек бөлігі аяқталғанша біздің қоржынымызға тек Қазақстан ойыншылары ұпай салып отырды – Асқар Майдекин, Руслан Айтқали және Роберт Пан. Осы үшеуінің күш-жігерлерінің арқасында біздің команда есеп айырмасын 20 ұпайға дейін қысқартты. Үшінші кезеңде «Астана» бір ұпай айырмасымен басым түсті, бірақ жалпы есептегі ұпай айырмасы әлі алшақ еді – 52:72. Соңғы кезең біздің команда үшін үшіншісі секілді сәтті басталмады. Біздің жігіттер төрт минутан астам уақыт бойын бірде-бір ұпай еншілей алмай, сергелдеңге түсті. Матчтың аяқталуына бес минут қалғанда ЦСКА 25 ұпай айырмасымен ұтып жатты. Ашығын айтқанда, ойын тағдыры шешіліп те қойған еді. Төртінші кезең «Астаны» үшін өте нәтижесіз болып, біздің ойыншылар небәрі 8 ұпай еншіледі. Осылай, ойсырай ұтылды – 60:93.
 


Ең көп ұпай еншілегендер:
 

  • «Астана» — Майк Томпсон бұл ойында өзін мейілінше көрсете білді, ол 17 ұпай еншілеп, 4 рет доп қағып алды, 4 пас берді және 3 рет допты «қиып» әкетті. Джеремайя Хилл еншісіне 12 ұпай және 6 пас жазды. Дмитрий Гавриловтың еншісінде – 8 ұпай және ол 4 рет доп қағып алды. Мартиньш Мейерс те 8 ұпай олжалады, әрі 3 рет доп қағып алды. Руслан Айтқалиды бөле-жара атап өтуге болады, ол «Астана» сапында үшінші маусым ойнап жүр, бірақ ВТБ Бірыңғай лигасындағы бірінші ойынын бүгін ғана өткізді. Әрі нәтижелі ойын өрнегін көрсетті: 12 минут және 15 секунд ішінде – 5 ұпай еншіледі, 5 рет доп қағып алды және 1 рет допты «қиып» әкетті.
  • ЦСКА — әскерилер сапында нағыз көшбасшы Майк Джеймс болды, ол бүгін дабл-дабл орындады – 21 ұпай, 4 рет доп қағып алды, 10 пас және 2 рет допты «қиып» әкетті. Тағы бір дабл-дабл Никола Милутиновтың еншісінде – 15 ұпай еншілеп, 12 рет доп қағып алды. Джоэль Боломбойдың да көрсеткіші өте жоғары – 15 ұпай олжалап, 8 рет доп қағып алды.


«Астананың» бас бапкері Эмиль Райкович:
— Құттықтаймын, ЦСКА-ны, дәл қазір біз бұл командамен – жер мен көктей әртүрлі деңгейдеміз. Дайындалуға уақытымыз да көп болған жоқ, небәрі екі апта жаттықтық. Бұған қоса, Адонис Томас пен тағы екі ойыншыдан айырылып қалдық. Олар бүгінгі матчта алаңға шыққан жоқ. Мартиньш Мейерс кеше ғана келді, оның спорттық бабына келе қоймағанын өздеріңіз де байқай алдыңыздар. Жағымды тұсы ретінде біздің қазақстандық ойыншылардың алаңда көп ойнау мүмкіндігіне ие болғандарын атап өтуге болады. Әрі кейбіреулері мұны пайдалана алды да. Мысалы, Руслан Айтқали, бұған дейін алаңға көп шыға бермейтін, ал бүгін өзін көрсете білді. Әйтсе де, ең бастысы, 190 күннен кейін біз ақыры баскетбол ойнай бастадық.

ЦСКА-ның бас бапкері Димитрис Итудис:
— Команданы жеңісімен құттықтаймын. Біз «Астананың» легионерлеріне қатысты қиын жағдайға тап болғанын білдік, олар командаға кеш қосылды. Мен бұл қарсыласымызға үлкен құрметпен қараймын, әрі сәттілік тілеймін. Біздің қорғаныстағы жұмыс жайлы өз мақсатымыз болған. Біз оны орындай алмадық, әсіресе үшінші кезеңде жаза басып, 22:23 есебімен ұтылып қалдық. Бұл қай бағытта жұмыс істеуіміз керек екендігін меңзейді. Біз шабуылда жақсы ойнадық, бірақ менің қорғаныстағы ойынымызға көңілім толмайды. Біз қарсыласымыздың 60 ұпай ғана еншілеуіне мүмкіндік бердік, бірақ қорғаныста қапы қалған сәттеріміз де болды. Бүгін біз үздік болдық, бірақ алдымызда күзеп-түзер жұмыс көп.

Салдары: ЦСКА маусымды өзіне сенімді деңгейде бастады, ал «Астана» ұтылып қалса да, бұл тек басы екенін көрсетті.

Келесі матч: 3 қазан күні астана командасы ВТБ Бірыңғай лигасының жаңа маусымында түздегі бірінші ойынын өткізіп, Қазанда жергілікті УНИКС командасымен додаға түседі.
 


Жалпы, клубымыздың ойындары жайлы толық ақпараттар, турнир кестелері, ойындар күнтізбесі мен нәтижелері Доп додалары бөлімінде жарияланған.

Қарсылас жайлы мәлімет

Құлылған жылы: 1923 Клубтық түстері: қызыл, көк
Мемлекет: Ресей Арена: ӘСК ЦСКА
Қала: Мәскеу Сайт: www.cskabasket.com

Сипаттамасы

ЦСКА – Ресейдің ерлер арасындағы баскетбол клубы, Мәскеу қаласынан, 2000 жылы құрылған.

Жетістіктері:
  • КСРО чемпионы − 1945, 1960-1962, 1964-1966, 1969-1974, 1976-1984, 1988, 1990
  • Ресей чемпионы – 1992-2000, 2003-2019
  • КСРО кубогының жеңімпазы − 1972, 1973, 1982
  • Ресей кубогының жеңімпазы – 2005-2007
  • Еуропа чемпиондары кубогының жеңімпазы − 1960/1961, 1962/1963, 1968/1969, 1970/1971
  • Еуролига чемпионы − 2005/06, 2007/08, 2015/16 
  • NEBL чемпионы − 1999/2000
  • ВТБ Бірыңғай лигасының чемпионы − 2009/2010, 2011/2012-2018/19
  • ВТБ Бірыңғай лигасының күміс жүлдегері − 2010/2011

Команданың жалпы суреті

ЦСКА (МСК)