Сенбі күні, 21 қаңтарда «Астана» баскетбол клубы ВТБ Бірыңғай лигасы аясында «Зенит» (Санкт-Петербург) баскетбол клубын қабылдайды.

Қарсылас жайлы мәлімет:

«Зенит» баскетбол командасы 2014 жылы өзі аттас футбол клубы құрылымында департамент болып құрылған. Команданың негізін және бапкерлері құрамын соған дейінгі «Триумф» ұжымының ойыншылары мен жаттықтырушылары құраған. Сонымен қатар, Мәскеу іргесіндегі клубтан 2014/2015 жылдар маусымында ВТБ Бірыңғай лигасы мен Еурокубокта бақ сынау құқығы да ауысқан.

2014/2015 жылдар маусымында «Зенит» бірінші жыл өнер көрсетсе де, ВТБ Бірыңғай лигасының тұрақты біріншілігінде 4-орынға ие болды. Ал ширек финалда «Нижний Новгород» клубына бес ойынның қорытындысы бойынша есе жіберіп алып, 5-орынды иеленді. Еурокубок додасында топтық кезеңнің екеуінен де өтіп, 1/8-финалында «Химки» клубынан ұтылып қалды.
 
2015/2016 жылдар маусымында «Зенит» өз тарихында алғаш рет ВТБ Бірыңғай лигасының қола жүлдегері атанды.

2016 жылғы маусым аралығында клуб құрамын ҰБЛ-сында ойнаған, 22 жастағы шабуылдаушы қорғаушы Сергей Карасёвпен және сербиялық ойын үйлестіруші Стефан Марковичпен күшейтті. Қазір екеуі де клубтың көшбасшыларына айналған.
 
Команданы көпшіліке танымал орыс маманы, баскетболдан Ресей құрамасының бұрынғы бас бапкері Василий Николаевич Карасев жаттықтырады. Өткен маусымда дәл осы бапкер ВТБ Бірыңғай лигасының «Жыл жаттықтырушысы» болып танылған болатын.    

Қазір Карасевтің командасы ВТБ лигасының турнир кестесінде 4-орында тұр. Тоғыз рет жеңіске жетіп, үш рет жеңілістің кермек дәмін татты. Биыл екі команда петерборлықтардың алаңында кездескен. Онда алаң иелері басым түсті (99:72). Енді, мүлде басқа ойын болуы керек. Қалай десек те, бұл кездесу ешкімді де бейтарап қалдырмауы тиіс.
 
Илиас Папатеодору, алдағы кездесу туралы өз пікірін білдірді: 
– «Зенитпен» өтетін матч биылғы маусымдағы өз алаңымыздағы ойындардың ең қиыны болады. «Зенит» шабуылы жойқын команда, допты кезкелген нүктеден дөп түсіре, шабуылды қиналмай, оп-оңай бастап кете алады. Қазір олар тамаша жеңістерін бір-біріне сабақтап, көптен бері сүрінбей келеді. Ал бізге жеңіске жету үшін 40 минут бойы босаңсымай, сақ болып, батылырақ ойнау керек. 

Естеріңізе сала кетейік, матч 21 қаңтар күні «Сарыарқа» республикалық велотрегі залында өтеді. Басталуы – 16:00-де. Кіру тегін!

Ресейдің «Зениті» түзде Қазақстанның «Астана» клубынан басым түсті – 105:82 (25:17, 33:22, 24:23, 23:20).

Алаңның екі бөлігінде де ширақ және үйлесімді ойын өрнегін көрсеткен «Зенит» үлкен үзіліске дейін-ақ ойын тізгінін толықтай өз қолына алды. Петерборлықтар алаңда үстемдік құрып, қарсыластарын әр қателіктері үшін аяусыз “жазалап”, шабуылда емін-еркін көсіле ойнады. Ресей командасының екпін алуы кездесудің бірінші ширек бөлігі бел ортасынан асқанда басталғандай: Сергей Карасев 27 секундтің ішінде 5 ұпай еншіледі, серіктесін қосалқы құрам орындығынан ойынға қосылған Кайл Лэндри іліп әкетті. Сәл кейінірек Роберт Лоури қарсы шабуыл ұйымдастыруға тырысты, бірақ алаң иелеріне көк-ақ-көгілдір түстілердің ойынның екінші ширек бөлігіндегі дүлей шабуылдарына төтеп беру мүмкін болмады – 12:0. Әрі ұпай айырмасы 20-ға да жетуге шақ қалды (20 минуттан кейінгі есеп – 58:39). Командалар алаңның екі бөлігіндегі орындарын ауыстырған соң зениттіктер жеңісті есепті матч аяқталғанша уыстарынан шығарған жоқ. Бұл жеңіс оларға үшінші орында келе жатқан УНИКС клубын қуып жетуге мүмкіндік берді. Сонымен қатар, «Зенит» үшінші ойында қатарынан 100 ұпайдан артық жинады.

Ең көп ұпай жинағандар:

«Астана»: Роберт Лоури (22), Родерик Одом (18 + 7 рет доп қақшып алды), Усман Крубалли (13).

«Зенит»: Райан Тулсон (24 + 5 пас), Янис Тимма (21), Сергей Карасев (16 + 5 рет доп қақшып алды).

Илиас Папатеодору «Астана» БК бас бапкері:
— «Зенитті» жеңісімен құттықтаймын, олар бүгін оған лайық болды. Біз жігерлік танытпадық, қоғаныста өктем ойнау деген жоқ, бұл – біз әлі арыла алмай жүрген кесел. Әрі, сөз жоқ, «Зенит» – деңгейі жоғары команда, ойыншылары жақсы. Әйтсе де, біз бүгін жеңісті оп-оңай бере салдық. Бізге шүмектетіп тер төгу керек, қазір біздің өткізетін ойындарымыз көп.

Василий Карасев «Зенит» БК бас бапкері:
— Қорғаныста жақсы ойнадық, ойыншыларымыздың жиі ауыстырып отырдық. 20 ұпай алға озып кеттік, босаңсыған жоқпыз. Ең бастысы, қорғаныста да, шабуылда да ширақ қимылдадық. Бірнеше рет сытылып кетіп, өте жылдам шабуыл ұйымдастырдық. «Үлкен» ойыншыларымызды ұтымды пайдалана білдік, содан соң шабуылды сауатты түрде үш ұпайлық доп лақтыратын периметрге ауыстырып отырдық. Жалпы, ойын менің көңілімнен шықты.

«Астана» келесі ойынын да өз алаңында өткізеді, 25 және 26 қаңтар күндері елора клубы Қазақстан Ұлттық лигасы аясында Ақтаудың «Каспий» командасын қабылдайды.