ВТБ Бірыңғай лигасы 2017/2018
Астана
Астана
ВТБ Бірыңғай Лигасы, Тұрақты біріншілік
11.02.2018, 15:00 Жс
Арена: «Сары-Арқа» велотрегі (Астана)
87:64
Негізгі уақыт
23:21 21:21 21:12 22:10
Ойын нөмірі: RS-88
Көрермен: 1120
Зенит
Санкт-Петербург

«Астана» Петербордың «Зенитін» қабылдайды  

10.02.2018, 09:00    Просмотров: 598
Источник: Баспасөз қызметі
Автор: Альмира Шахаева
Жексенбі күні, 11 ақпанда, елорда баскетбол клубы ВТБ Бірыңғай лигасы аясындағы кезекті ойынын өз алаңында өткізіп, Санкт-Петербургтің «Зенит» клубын қабылдайды. 

«Зенит» – Ресейдің ерлер арасындағы кәсіпқой баскетбол клубы, Санкт-Петербург қаласынан.

Жетістіктері:
  • ВТБ Бірыңғай лигасының қола жүлдегері – 2015/2016
  • Ресей чемпионатының қола жүлдегері – 2015/2016
  • Ресей кубогының финалына шыққан – 2015/2016

Өткен кездесулер хроникасы:
Санкт-Петербург қаласының баскетбол клубы ВТБ Бірыңғай лигасында 2014 жылдан бері ойнайды. Бірінші жылдан бастап, команда өз жанкүйерлерін таң қалдырудан жалыққан жоқ. «Зениттіктер» 2015/2016 жылдар маусымында өрнекті ойын үлгісін көрсетіп, ВТБ Бірыңғай лигасының қола жүлдегері атанды. Бұл клубтың ойыншылары Лиганың жыл сайынғы біріншілігінде бірнеше рет өз шептеріндегі үздік ойыншылар болып танылды. «Астананың» «Зенитпен» өткен екеуара кездесулеріне тоқталар болсақ, командалар жеті рет кездесіп, астаналықтар тек бір рет, 2014/2015 жылдар маусымындағы түзде өткен матчта петерборлықтарды тізе бүктірді.       
 
Қазіргі жағдай:
Соңғы төрт маусымда клубты Василий Карасев жаттықтырып жүр. Ол – Ленинград баскетболының түлегі. Дәл осы бапкер 2015/2016 жылы ВТБ Бірыңғай лигасында жыл жаттықтырушысы атанып, командамен қола жүлдеге қол жеткізді. Команданың тіс қаққан көшбасшылары жеткілікті. Мысалы, америкалық шабуылшы Дрю Гордон, ол орта есеппен әр ойында 15,8 ұпай еншілеп, 8,6 рет доп қақшып алып жүр. Айтпақшы, осы ойыншы Жұлдыздар матчындағы слэм-данк бәйгесінде Ике Уданоның бәсекелесі болады. Ресей шабуылшысы Сергей Карасевті де атап өтуге болады. Ол өзіндік ойын өрнегімен, көз тартар өнерімен ерекшеленеді. Карасев орта есеппен бір ойында команда қоржынына 15 ұпайдан салып жүр.      

Турнир кестесі:
«Зенит» баскетбол клубы ВТБ Бірыңғай лигасының турнир кестесінде 11 жеңіс, 2 жеңіліспен төртінші орынды иеленіп тұр. Сондай-ақ EuroCup додасына қатысады, әрі өз тобында екінші орынға орналасқан. Ал «Астана» ВТБ лигасында 11-орында тұр.
 
«Астана» БК бас бапкері міндетін атқарушы Михаил Карпенконың пікірі:
– «Зенит» ойыны үйлескен өте қарымды команда, ВТБ лигасының үздік бес команданың қатарына ілігіп жүргендігі тегін емес. Соңғы кездері табысты ойын өрнегін көрсетіп жүр, осыдан бірнеше күн бұрын ғана Еурокубок додасында плей-офф сатысына шықты. ВТБ лигасында да соңғы ойындарын нәтижелі өткізді, ЦСКА клубын жеңген бір ойынын айтсақ та жеткілікті. Команда шабуылға бейім, олар алаңның екі жағында да, шабуылда да, қорғаныста да аянбайды. Әр шепте бір-біріне бергісіз екі ойыншымен жасақталған азулы ұжым, ойын барысында қарқындарын бәсеңсітпей, құрамына сапырылыстырып отырып, тізгін тартпай ойнайды. Бізге, бірінші кезекте, Кайл Курич және Сергей Карасев секілді мергендеріне айрықша көңіл бөлу қажет. Қазір Евгений Воронов та спорттық бабында, сонымен қатар жаңадан алған ойыншылары Малкольм Гриффин де айылын жияр емес. Десек те, біз тек жеңіске жетуге тырысамыз. Егер «Зенитті» тоқтатсақ, оларды өзімізге ыңғайлы қарқында ойнауға мәжбүрлесек, онда бізде мүмкіндік болады.
 
Қайда, қашан, нешеде?
Арена: «Сарыарқа» республикалық велотрегі
Уақыт: 15.00 Астана уақыты бойынша
Трансляция: ВТБ Бірыңғай лигасының сайты, «Астана» ПБК сайты, «QazSport» телеарнасы (тікелей эфир).

«Астананың» «Зениттен» басым түскен ірі жеңісі

11.02.2018, 20:00    Просмотров: 666
Источник: Баспасөз қызметі
Автор: Альмира Шахаева
Қазақ жерінде ВТБ Бірыңғай лигасы аясындағы ойын аяқталып, «Астана» өз алаңында Санкт-Петербург клубын қабылдап, басым түсті.

Доп ойынға қосылғанда, оны «Зенит» іліп әкетті де, бірден атойлап алға шапты. Бірақ олардың бұл шабуылдары сәтсіз аяқталып, алаң иелері допты қақшып әкетіп, Ике Уданоның орындауындағы әдемі данкпен есеп ашты. Қарсыластар өз қателіктерін бірден түзеп, үш ұпайлық соққымен жауап берді. Бірінші кезең осылай тартысты басталып, ойын қарқыны одан әрі үдей түсті. Ике Удано көпшілікті риза қылып, Джастин Картермен тізе қоса қимылдады. Ойынның 6 минуты өткенде, 13:5 есебімен «Астана» алда тұрды. Карасевтің командасы тайм-аут алып, шара қолдануды ойластырды. Әрі олар үшін мұның пайдасы болды да. Қысқа үзілістен кейін қонақтар алыстан екі соққыны дәл түсіріп, ұпай айырмасын «–3»-ке дейін қысқартты. Бірінші онминуттық 23:21 есебімен аяқталып, «Астана» БК клубы алға шықты.

Екінші кезең біріншісіне қарағанда тым шиеленісті болды. «Астана» шабуылда қателіктер жіберіп, қарсыласы оны ұтымды пайдалана біліп, оңай ұпайлар еншілей бастады. Бірақ осы онминуттықтың екінші жартысында алаң иелері қарқындарын үдетіп, таразы басын теңестірді. Рустам Ерғали командаға аса қажет ұпайларды еншілеп, жанкүйерлерді қуантты. Үлкен үзіліске дейін есеп 44:42 болып, «Астана» алда тұрды. Ойынның үшінші ширек бөлігінде елорда баскетболшылары көсіле шауып, «+10» айырмасымен алға озды. Әрі ұпай айырмасын матч соңына дейін ұлғайта түсті. Матч 87:64 есебімен аяқталып, «Астана» БК жеңіске жетті.

Ең көп ұпай еншілегендер:
  • «Астана»: Ике Удано (21+10 рет доп қақшып алды), Энтони Клеммонс (17+5 рет доп қақшып алды), Леонидас Каселакис (16+6 рет доп қақшып алды), Джастин Картер (15);
  • «Зенит»: Кайл Курич (13), Марко Симонович (10)
 
«Астана» БК бас бапкері м.а. Михаил Карпенко:
-  Айта кету керек, матчтың бірінші жартысында ойын тең дәрежеде өрбіді, бұл кездесу нәтижесінде де білініп тұрды. Біз шабуылда жақсы ойнадық, бірақ қорғаныста қателіктер жіберіп алумен болдық. Доптан айырылып қалып, қарсыласымыз оңай жолмен ұпай еншілеп отырды. Әйтсе де, өз мақсатымыздан ауытқымай, ойынға құрған жоспарымызды жүзеге асыра алдық. Кездесудің екінші жартысында ұпай айырмасын ұлғайта түстік, ал матчтың төртінші ширек бөлігінде ойын «тізгінін» өз қолымызда ұстадық. Командаға нәтижелі ойын үшін рахмет, барлық жанкүйерлерімізді ірі жеңісімізбен құттықтаймын.


«Зенит» клубының бас бапкері Василий Карасев: 
- Бұл сапар біз үшін тым ауыр болды – команда Италиядан келген бетте жолға шықты. Ал онда плей-оффқа шығу үшін шүмектетіп тер төккен едік. Бүгінгі матчқа дайындалуға бір күндік қана уақытымыз болды. Команда бар жағынан баяу болды. Біз тіпті жүгірген де жоқпыз, бірге-бір ешкімді алдап өте алмадық, үш ұпайлық соққыларға иек артуға тырысып едік, бірақ көбінесе мүлт кеттік.   

 

«Астана» келесі ойындарын өз алаңында өткізіп, 14 және 15 ақпан күндері елорда баскетболшылары Қазақстан чемпионатының Ұлттық лигасы аясында «Атырау Барыстары» клубын қабылдайды

Ал ВТБ Бірыңғай лигасы аясындағы келесі ойынын «Астана» 4 наурыз күні өткізіп, елорда баскетболшылары өз алаңында Беларусь елінің «Цмоки Минск» клубымен додаға түседі.

Қарсылас жайлы мәлімет

Құрылған жылы: 2014 Клубтық түстері: ақ, көк
Мемлекет: Ресей Арена: «Сибур Арена»
Қала: Санкт-Петербург Сайт: https://bc-zenit.com

Сипаттамасы

«Зенит» – ресейдің кәсіби ерлер баскетбол клубы, Санкт-Петербург қаласынан, 2014 жылы құрылған.

Жетістіктері:
  • ВТБ Бірыңғай лигасының чемпионы — 2021/2022
  • Ресей Чемпионатының жеңімпазы — 2021/2022
  • ВТБ Бірыңғай лигасының қола жүлдегері – 2015/2016, 2016/2017, 2017/2018, 2019/2020 
  • Ресей чемпионатының қола жүлдегері – 2015/2016, 2016/2017, 2017/2018, 2019/2020
  • ВТБ Бірыңғай лигасы Суперкубогының күміс жүлдегері — 2021
  • Ресей кубогының финалына шыққан – 2015/2016

Команданың жалпы суреті

Зенит