ВТБ Бірыңғай лигасы 2017/2018
Астана
Астана
ВТБ Бірыңғай Лигасы, Тұрақты біріншілік
18.11.2017, 15:00 Сн
Арена: «Сары-Арқа» велотрегі (Астана)
92:75
Негізгі уақыт
30:19 21:16 26:14 15:26
Ойын нөмірі: RS-37
Көрермен: 1931
Енисей
Красноярск

«Астана» «Енисейді» қабылдайды

17.11.2017, 20:00    Просмотров: 491
Источник: Баспасөз қызметі
Автор: Альмира Шахаева
Ертең, 18 қарашада, елорда баскетбол клубы ВТБ Бірыңғай лигасы аясындағы жетінші ойынын өткізіп, «Енисей» (Красноярск) БК қабылдайды. Матч Астана қаласында өтеді.

Ұзаққа созылған түздегі ойындардан кейін, елорда командасы ақыры өз алаңында да ойнайтын болды. Ал мұның көрермендер қолдауымен, команданың өзіне деген сенімдігін арттыра түсері сөзсіз.

Өткен кездесулер хроникасы:
Красноярск командасы да, «Астана» клубы секілді биылғы маусымда ВТБ лигасында жетінші жыл өнер көрсетіп отыр. «Астанамен» өзара ойындарына тоқталар болсақ, өткен 6 маусымда екі ұжым 6 ойын өткізді. Оның екеуінде «Астана» жеңіске жетті. Бұлардың ішінде үйдегі жеңісіміз ұмытылмастай болып есте қалды. Екі овертайм өткізіп, астаналықтар Красноярск клубын 98:97 есебімен ұтқан болатын. Бұл ойында Америка қорғаушысы Роберт Лаури айрықша көзе түсіп, команданың жеңіске жетуіне сүбелі үлес қосқан.

   
Қазіргі жағдай:
Соңғы үш маусымда команданы Ресей маманы Олег Окулов жаттықтырып жүр. Команданың көшбасшыларының бірі, Нигерия шабуылшысы Сулейман Браймо биылғы маусымда «Енисейдің» ең тиімді және көп ұпай жинаған ойыншларының бірегейі болып, орта есеппен, әр ойында 14 ұпайдан еншілеп келеді. Забиан Дауделл, Энтони Хиллиард және Октавиус Эллис сынды америкалық баскетболшыларынан құрылған екпінді үштігі де нәтижелі ойын өрнегін көрсетіп жүр.


Турнир кестесі:
Красноярск командасы турнир кестесінде 9-орынды иемденіп тұр. Ал елорда баскетбол клубы олардан бір саты төмен орналасқан. Бірақ, бұған қарамастан, «Астананың» өткізген ойындарының пайызы көп.


Бас бапкердің пікірі:
- «Енисейдің» допты дәл түсіре алатын және сауатты қорғана білетін, аса қауіпті ойыншылары жетерлік. Сондықтан бізге 40 минут бойы шектен тыс сақ болу қажет. Біз қазір өз алаңымыздағы ойынды тағатсыз күтіп жүрміз. Әсіресе, Қазақстан ойыншылары мен Каселакис көрермендерге көп үміт артады. Өйткені олар бұл атмосфераны біледі. Әрине, бізге қорғаныста мейілінше мұқият ойнау керек. Әсіресе, қарсыласымыздың әр ойыншысын жекелей тұсаулап ұстауымыз керек. Мен біздің команда қорғаныста үмітті ақтайды деп сенемін.
 
Қайда, қашан, нешеде?
Арена: «Сарыарқа» республикалық велотрегі
Уақыт: 15.00 Астана уақыты бойынша
Трансляция: ВТБ Бірыңғай лигасының сайты, «Астана» ПБК сайты, «QazSport» телеарнасы (14.50-де).

«Астана» «Енисейді» етпетінен түсірді

18.11.2017, 19:30    Просмотров: 704
Источник: ВТБ Бірыңғай лигасы
Автор:
Қазақтың «Астанасы» өз алаңында Красноярскінің «Енисей» клубынан үстем түсті – 92:75 (30:19, 21:16, 26:14, 15:26).

Кездесудің басында-ақ алаң иелері суырылып алға шықты. Әсіресе, Джастин Картер ерекше көзге түсіп, ойынның бірінші ширек бөлігінің ортасына дейін команда қоржынына 10 ұпай салды. Дәл осы ойыншының Сулейман Браймоны қапы қалдырып, сәтті орындаған тамаша данкінен кейін «Астана» екі таңбалы сан айырмасымен алға ұзады – 20:10. Бұдан кейін елордалықтардың басқа легионерлері де команда көшбасшысынан қалыспай, көзге түсе бастады. Леонидас Каселакис бірнеше рет шабуылды сәтті аяқтады (ойынның бірінші жартысында – 15 ұпай). Энтони Клеммонс қонақтардың қорғанысына баса-көктеп кіріп, бұзып өте бастады, ал Ларри Гордон допты алыстан лақтырып, мергендігін паш етті (4-еудің 3-еуін түсірді). Соңғысының үш ұпайлық дуплетінің арқасында «Астана» екінші 10-минуттықтың басында «+20» ұпай айырмасымен қара үзіп кетті – 40:20.

Матчтың екінші ширек бөлігі барысында красноярскіліктер қарқындарын үдетіп, тырысып-тырмысып, есеп айырмасын 13 ұпайға дейін қысқарта алды. Бірақ бұл уақытша ғана «серпіліс» еді. Үшінші 10-минуттықтың басында бәрі де қайтадан өз орнына келді. Қонақтар соққыларын дөп түсіре алмай, доптан жиі айырылып қала бастады. «Астана» болса, олардың бұл қателіктерінің бәрін кәдеге жарата алмады. Әйтсе де, бірнеше пәрменді шабуылдары мен үш ұпайлық соққыларының арқасында сары-көк жейделілер есеп айырмасын «+25» ұпайға дейін ұлғайта түсті – 64:39. Ойынның соңғы ширек бөлігінде сібірліктер қорғаныста мұқият ойнады, бірақ есепті қысқарта алмай қойды. Сөйтіп, «Астана» биылғы маусымдағы екінші жеңісіне қол жеткізді, ал «Енисей» екінші рет қатарынан жеңілістің кермек дәмін татты.


Үздік ойыншы – Леонидас Каселакис. Осы шабуылшы үшін «Енисей» мейілінше қолайлы қарсылас болып тұр. Өткен маусымда грек баскетболшысы Красноярскіде өрнекті ойын үлгісін көрсеткен. Бүгінгі матчты Каселакистің «Астана» сапындағы екі жылда өткізген барлық ойындарының ішіндегі ең нәтижелісі және тәуірі деуге болады. Леонидас лигадағы өзінің жеке рекордтарының бірнешеуін жаңартты: көп ұпай жинады (25), тиімділігін арттырды (28), ойын барысында дәл соққы бағыттады (8), соққыларын дөп түсіру пайызы жоғары болды (66,7%) және үш ұпайлық соққыларының көбісін дәл түсірді (8-дің 5-еуін – 62,5%).

Цифр: 52% (21-ден 11) – «Астана» ойыншылары үш ұпайлық соққыларының көбісін дәл түсіріп, осы мергендіктерінің арқасында жеңіске жетуге сүбелі үлес қосты.

Көп ұпай жинағандар:
  • «Астана»: Леонидас Каселакис (25 + 7 рет доп қақшып алды), Джастин Картер (20), Ларри Гордон (16), Энтони Клеммонс (15 + 6 пас + 3 рет допты қағып әкетті)
  • «Енисей»: Энтони Хиллиард (20), Виталий Лютыч (12).

«Астананың» бас бапкері Костас Флеаваракис: 
— Біз ойынның ширек бөліктерінің үшеуінде өте жақсы ойнадық, шабуылда допты зыр қаққызып, қорғаныста өте сақ ойнадық. Кішігірім ағаттықтарымыз да болды. Мәселен, Джастин Картер ойынды өте жоғары қарқында бастады, бірақ артынан қосалқы құрам орындығына отыруға мәжбүр болды. Алайда, алаңға шыққандар өз мүмкіндіктерін қалт жіберген жоқ. Өз командамды, клубты, барлық қызметкерлеріміз бен жанкүйерлерді осы жеңісімізбен құттықтағым келеді. Алдымызда аздаған үзіліс бар, мұның пайдасы көп болады деп үміттенемін.


«Енисейдің» бас бапкері Олег Окулов: 
— Бірінші кезекте, біз ойынның бірінші ширек бөлігінде табан тіресе додаға түсе алмай ұтылдық. Шабуылды аяқтауда, тағы да өзімізге деген сенімділік жетіспеді. Мұның бәрі қарсыласымыздың алға ұзап кетуіне мүмкіндік берді. Біз қорғанысымызды өзгертік, бірақ бұдан да нәтиже болмады.


«Астана» келесі ойынын да өз алаңында өткізеді, 10 желтоқсан күні елорда баскетболшылары ВТБ Бірыңғай лигасы аясында Краснодардың «Локомотив» клубын қабылдайды.

Қарсылас жайлы мәлімет

Құрылған жылы: 1981 Клубтық түстері: ақ, көк
Мемлекет: Ресей Арена: «Арена Север»
Қала: Красноярск Сайт: www.basket-enisey.ru

Сипаттамасы

«Енисей» - ресейдің ерлер арасындағы кәсіпқой баскетбол клубы, Красноярск өлкесінен, 1981 жылы құрылған.

Жетістіктері:
  • Ресей Суперлигасының «Б» дивизионы чемпионы – 2006
  • Ресей Суперлигасының «Б» күміс жүлдегері – 2004/2005, 2005/2006
  • Ресей Кубогының қола жүлдегері – 2011

Команданың жалпы суреті

Енисей