ВТБ Бірыңғай лигасы 2017/2018
Химки
Химки
ВТБ Бірыңғай Лигасы, Тұрақты біріншілік
30.10.2017, 22:30 Дс
Арена: БЦМО (Химки)
72:71
Негізгі уақыт
26:17 12:19 11:13 23:22
Ойын нөмірі: RS-24
Көрермен: 1147
Астана
Астана

«Астана» Химкиге аттанды

29.10.2017, 10:00    Просмотров: 570
Источник: Баспасөз қызметі
Автор: Альмира Шахаева
Дүйсенбі күні, 30 қазанда «Астана» ВТБ Бірыңғай лигасы аясындағы төртінші матчын өткізіп, «Химки» (Мәскеу облысы) клубымен кездеседі.

Биылғы ойындар күнтізбесінің түзілуі осылай, «Астана» баскетболшылары маусым басында ылғи түзде ойнап жүр, әрі қарсыластары да Ресей және Еуропа баскетболының ығай мен сығайлары болып тұр.

Өткен кездесулер хроникасы:
«Астана» 6 маусымда «химкиліктермен» 12 рет кездесті, соның 11-інде астаналықтар жеңілістің кермек дәмін татты. Әйтсе де, «Астана» «Химкиді» түзде бір рет сүріндірген, осы лигадағы ең алғашқы 2011/2012 маусымында жеңіске жеткен болатын (84:73).

Командалар арасындағы туыстық:
Екі команданың бас бапкерлері, яғни Костас Флеваракис пен Георгиос Барцокас – бір елдің мамандары. Екеуі де өз елдерінде біраз жыл еңбек етсе де, жұмыс бабымен жолдары түйіспеген. «Астананың» америкалық қорғаушысы Джастин Картер өткен маусымда «сары-көк» жейделілердің құрамында ойнап үлгерді. Джастин Мәскеу түбіндегі клубтың сапында 4 ойын өткізіп, одан кейін Израильдің «Маккаби Кирят-Гат» командасына ауысып кеткен болатын.  

Турнир кестесі:
«Химкиліктердің» жағдайы көш ілгері, 3 ойында 3 рет жеңіске жетіп, турнир кестесінде 3-орында тұр.
«Астананың» көрсеткіші дәл осындай мақтан тұтарлықтай емес, алайда Костас Флеваракистің командасы алғашқы сәтсіздіктеріне жабырқап, ұнжырғалары түсіп жүрген жоқ, жағдайды түзеуге әлі уақыт бар.

Бас бапкердің пікірі: 
«Химки» — ойыншылары тәжірибелі, шабуылшылары ширақ қарымды команда. Өз алаңында жақсы ойнайды, Еуролига аясында өз жерінде үш ойын өткізіп, үшеуінде де жеңіске жетті. ВТБ Бірыңғай лигасында да әлі жеңілген жоқ. «Химкиде» команданың көшбасшысы Алексей Швед қана емес, бәрі де жақсы ойнайды. Нәтижелі ойын өрнегін көрсету үшін бізге олардың жылдам шабуылдарының санын қысқарта түсу қажет, сұрмергендерімен өте сақ ойнау керек. Өзімізге алғы шепте қателеспеуге тырысып, айып алаңы сызығынан допты дөп түсіру қатынасын (пайыздық көрсеткішін) арттыра түсіру керек.   


Қайда, қашан, нешеде?
Арена: «Химки» баскетбол орталығы»
Уақыт
: 19.30 Мәскеу уақыты бойынша
Трансляция: ВТБ Бірыңғай лигасының сайты, «Астана» ПБК сайты, «QazSport» телеарнасы.

Жеңіске бір сүйем жетпедік

31.10.2017, 09:00    Просмотров: 547
Источник: Баспасөз қызметі
Автор: Альмира Шахаева
«Астана» Мәскеу облысына толық құрамда бара алмады. Соңғы жаттығу кезінде Александр Жигулин мен Денис Дегтярев жарақаттанып қалып, Астанада қалды. Сонымен қатар, командамен бірге кетсе де, жарақатынан айыға қоймаған Джастин Картер спорттық бабына әлі келмеген еді.
  
Ойын басталған бетте астаналықтар алаң иелерімен тайталасып, дес берген жоқ. Бірінші кезең «Астана» үшін «тербеліс» болғанымен, екінші онминуттықта доғаның сыртынан лақтырған соққыларының арқасында біздің команда қарсыласымен теңесіп те қалды. Шабуылдан соң шабуыл, соққыдан соң соққы, Костас Флеваракистің командасы химкиліктердің ізіне түсті. «Астана» 40 минут бойы алаң иелерінің бір секунд та босаңсуларына мүмкіндік бермеді. Соңғы кезеңде «Астана» тіпті суырылып алға да шықты. Әрине, қарсыласын әбден састырды. Екі команда үшін де жүректері толқыған ойын болды. Өкінішке қарай, матч соңында алаң иелерінің жолы болды. Кездесу 72:71 есебімен аяқталды («Химки»).   
 
Ең көп ұпай жинағандар:
  • «Химки»: Алексей Швед (24 + 6 пас), Джеймс Андерсон (11), Томас Робинсон (8 + 6 рет доп қақшып алды).
  • «Астана»: Энтони Клеммонс (16 + 6 рет доп қақшып алды), Джастин Картер (14 + 6 пас), Леонидас Каселакис (12), Ике Удано (10 + 6 рет доп қақшып алды).

«Химки» клубының бас бапкері Георгиос Барцокас:
-
Бүгін бізде дәл қазір командамыздың қандай екендігін түсінетін, әрі олқы тұстарымызға көз жеткізетін, баскетболдың әліппесін талқылайтын, тамаша мүмкіндік болды. Кезекті рет, біз алғашқы жиырма минутта көңілге қонымды ойын үлгісін көрсете алмадық, мен тіпті ойынға деген көзқарасымыз өте нашар болды дер едім. Біз баскетболдағы қорғаныс, өрнекті ойын үлгісі жайлы мүлде ойлаған жоқпыз, шабуылға қажетті табандылықты көрсете алмадық. Сөйтіп, біз «Астанаға», шабуылда төзімділік таныта білетін, өте жанкешті және қажырлы командаға мүмкіндік беріп қойдық. Олар жеңіп те кете жаздады, бірақ ақыр соңында біз жеңіске жеттік, әрі бұған қуануымыз керек. Өйткені әрбір матч маңызды. Шынымды айтсам, мен қазір өте қуаныштымын. Ертең жаттығу кезінде ойыншыларыма біздің бастапқы жиырма минуттағы өнеріміз кішігірім командалардың ойынын еске түсірді деп айтамын.
 
«Астана» клубының бас бапкері Костас Флеваракис:
- Осы матчта бәрі де біздің командамыздың қандай екендігін және «Астана» ойыншыларының қандай қадір-қасиеттері бар екендігін көрді деп ойлаймын. Біз қырық минут бойы ойын тізгінін өз қолымызда ұстадық. Ал қарсыласымыз ВТБ лигасында орта есеппен 98 ұпай еншілейтін команда болатын. Маған «Химки» өте ұнайды. Өкінішке қарай, матч соңында біз өз мүмкіндіктерімізді мүлт жіберіп қойып, айып соққыларын дөп түсіре алмадық. Неге, не болды? Бұл – ойын, барлық түсініктеме – міне осы. Біз өз ойларымызды жүзеге асыра алдық. Тура осы мезетте біз маусым дайындығын өзге командалардан кеш бастағанымызды, себебі Қытайдағы турнирге барғанымызды, одан кейін маңызды бес баскетболшымыздың ойнамағандарын түсіну де қажет. Лигадағы бірінші ойынымыз азулы ЦСКА клубына тап келді. Баскетболдан түйсігі барлар түсінеді: «Астана» қазір қалай ойнап жүр – ғажап, себебі біз осының бәріне қамшының сабындай қысқа уақыт ішінде қол жеткіздік. Бізге жеңіс керек, тырысып жүрміз, келесі ойындарды күтеміз. Айрықша атап өткім келетіні, бүгін менің ойыншыларым табан тірескен додада аянған жоқ, жеңіске жету мүмкін емес деп ойлаған да жоқ. Ал біздің бүгінгі қарсыласымыз азуы алты қарыс «Химки» болатын, олар Еуролига додасы басталған бетте үш рет жеңіске жетті, бұл команданың азулы екендігін білдіреді.

        
«Астана» келесі ойынын да түзде өткізеді, бірнеше күннен кейін команда Пермь қаласына ұшып барып, 5 қарашада «Парма» клубымен кездеседі.
 

Қарсылас жайлы мәлімет

Құрылған жылы: 1997 Клубтық түстері: сары, көк
Мемлекет: Ресей Арена: Мытищи Арена
Қала: Химки Сайт: bckhimki.ru

Сипаттамасы

«Химки» – ресейдің ерлер арасындағы баскетбол клубы, Мәскеу облысынан.

Жетістіктері:
  • Ресей чемпионатының күміс жүлдегері – 2006, 2008, 2009, 2010, 2011, 2012, 2013, 2015, 2017, 2018, 2019
  • Ресей чемпионатының қола жүлдегері – 2007
  • Ресей кубогының жеңімпазы – 2008
  • ВТБ Бірыңғай лигасының чемпионы – 2010/2011
  • ВТБ Бірыңғай лигасының күміс жүлдегері – 2014/2015, 2016/2017, 2017/2018, 2018/2019
  • ULEB Еуропа кубогының финалына шыққан – 2008/2009
  • Еуропа кубогының финалына шыққан – 2005/2006
  • FIBA Еуролигасы «Төртеу финалында» додаға түскен – 2004/2005
  • ВТБ Бірыңғай лигасы «Төртеу финалында» додаға түскен – 2009/2010
  • Еуропа кубогының жеңімпазы – 2011/2012, 2014/2015

Команданың жалпы суреті

Химки