ВТБ Бірыңғай лигасы 2017/2018
ВЭФ
Рига
ВТБ Бірыңғай Лигасы, Тұрақты біріншілік
30.04.2018, 22:30 Дс
Арена: «Арена Рига» (Рига)
89:77
Негізгі уақыт
20:15 27:17 21:22 21:23
Ойын нөмірі: RS-142
Көрермен: 600
Астана
Астана

«Астана» Латвияға кетті

29.04.2018, 10:00    Просмотров: 613
Источник: Баспасөз қызметі
Автор: Альмира Шахаева
Ертең, 30 сәурір күні, елорда баскетбол клубы ВТБ Бірыңғай лигасы аясындағы кезекті ойынын түзде өткізіп, Латвияның «ВЭФ» баскетбол клубымен кездеседі.
 
«ВЭФ» – Латвияның ерлер арасындағы баскетбол клубы, Рига қаласынан. 1958 жылы құрылған.
 
Жетістіктері:
  • Латвия чемпионы − 2011, 2012, 2013, 2015
  • Латвия чемпионатының күміс жүлдегері –2010, 2014, 2016
  • КСРО чемпионатының қола жүлдегері –1960, 1966, 1991
  • Балтық лигасы кубогының қола жүлдегері – 2012
  • Латвия чемпионатының жартылай финалына шыққан – 2008, 2009

Өткен кездесулер хроникасы:
Латвия баскетбол клубы ВТБ Бірыңғай лигасында 2009 жылдан бері ойнап жүр. ВЭФ үшін ең нәтижелі маусым 2012/2013 жылдар болды. Осы маусымда ВЭФ Латвияның 2012 және 2013 жылдардағы чемпионы атанды. Мұнымен қоса, ригалықтар Еуропа кубогында TOP-16 құрамына енді. Сонымен қатар, ВТБ лигасында үздік сегіздікке ілігіп, плей-офф сатысына шықты. Сол кезде команданы Литва маманы, 2014-2016 жылдары «Астана» клубының бас бапкері болған Рамунас Бутаутас жаттықтырған болатын.
Ал «Астаны» – ВЭФ арасындағы екеуара кездесулерге келер болсақ, екі команда алаңда 13 рет кездесіп, оның бесеуінде Қазақстан клубы жеңіске жетті. Биылғы маусымда «Астана» ригалықтарды өз алаңында қабылдап, үйдегі мачта елорда клубы 67:53 есебімен басым түскен болатын.

Қазіргі жағдай:
Міне, үш жыл болды, команданы Латвия маманы Янис Гайлитис жаттықтырады. Команда құрамы былтырғымен салыстырғанда, едәуір өзгерді. Рига клубы сапынан көпшілікке танымал латыш ойыншысы, осы елдің ұлттық құрамасының капитаны Янис Блумс кетіп қалды. Бұл ойыншыны Қазақстан жанкүйерлері де жақсы біледі. Ол 2013/2014 жылдар маусымында «Астана» командасының намысын қорғаған. Ұжымның қазіргі көшбасшысы – америкалық қорғаушы Алекс Перез. Ол орта есеппен әр ойында 12 ұпайдан еншілеп жүр.
 

Турнир кестесі:
«Астана» және «ВЭФ» клубтарының өткізген ойындарының саны да, жеңіс пен жеңілістері де бірдей, екі команда турнир кестесінде 31,8%  нәтижесімен «иық тіресіп» қатар тұр. 
 
«Астана» БК бас бапкерінің міндетін атқарушы Михаил Карпенконың пікірі: 
– Дәл қазіргі жағдайға байланысты, ВЭФ клубымен өтетін ойын біз үшін ВТБ лигасындағы өте маңызды, мүмкін, тіпті биылғы маусымдағы ең басты ойынымыз болғалы тұр. Оның үстіне, қарсыласымыз да – тура біз секілді жағдайда, жеңісі мен жеңілістерінің қатынасы да тура біздікіндей. Алдағы ойын екі команда үшін де – «do or die!» санатынан. ВЭФ қаңтар айында Астанада өткен матчпен салыстырғанда біршама өзгерді. Қазір спорттық баптарына келді. Сол ойында орталық шептегі тәжірибелі ойыншысы Каспарс Берзиньш жарақатына байланысты ойнамаған болатын. Сондай-ақ америкалық қос легионері де алаңға шықпаған: Кен Браун және Пол Картер. Негізі, осы үшеуі және Алекс Перез, Кристапс Яниченокс, Марекс Мейерис сынды қас шеберлері ВЭФ-тің бетке ұстар, екпінді күші болып саналады. Бұл команда жоғары жылдамдықты ойынға иек артып, периметр бойынан шабуылдауға бейім. Былайша айтқанда, ВЭФ-тің орталық шептегі ойыншысы Илья Громовтан басқасы – доға сыртынан дәл соққы бағыттауға қабілетті.     
 
Бізге қорғанысқа ерекше көңіл бөлу қажет. Биылғы маусымдағы ең үздік ойындарымызды біз сауатты түрде қорғана жүріп, шабуылда жауапкершілік пен жетік шешім қабылдау арқылы өткіздік. Жігіттердің бәрі сапта, жарақат алған ешқайсысы жоқ. Кездесу бағасы мен маңыздылығын жете түсінеміз. Өз ойыншыларыма «Баспен ойлап, жаныңды салып, жүрегіңмен ойна» деген сөздерді жиі айтамын. Бұл ұран бізді дүйсенбі күні жігерлендіреді және жеңіске жетуімізге көмектеседі деп сенемін!
 
Қайда, қашан, нешеде?
Арена: Латвия, Рига, «Arena.Riga»
Уақыт: 22.30 Астана уақыты бойынша
Трансляция: ВТБ Бірыңғай лигасының сайты, «Астана» БК сайты, «QazSport» телеарнасы.

Латыштар «Астанадан» алымды екен

01.05.2018, 10:00    Просмотров: 676
Источник: Баспасөз қызметі
Автор: Альмира Шахаева
Елорда баскетболшылары түзде, ВТБ Бірыңғай лигасы аясында өткен матчта, Риганың ВЭФ командасынан 89:77 есебімен ұтылып қалды. Бұл ойын Латвияның бас қаласында өткен болатын.
 
Ойынның бірінші минутынан бастап, алаң иелері белсенділік танытты. Латыштар жылдам қимылдап, алыстан соққы бағыттауға иек артты. Әрі қателескен жоқ. Астаналықтар болса, керісінше, әрқайсысы жеке ойнады. Бірінші кезең ригалықтардың сәл ғана басымдығымен аяқталды (20:15). Екінші онминуттық астаналықтардың сәтті шабуылымен басталды. Бірақ ВЭФ те қарап қалмады. Бірнеше нәтижелі шабуылдарымен қарымын қайтарды. «Астана» тайм-аут алуға мәжбүр болды. Үзіліс Михаил Карпенконың шәкірттерін жігерлендіре түсті. Ике Удано шығыршық түбінен екі ұпай әкелді. Әрі қарай алаң иелері «Астананың» торшеңберіне үш ұпайлық соққыларын қарша боратты. Соның арқасында +12 ұпай айырмасымен алға шықты. Астаналықтар қалай тырысса да, дәл осы ұпай айырмасы матчтың бірінші жартысы аяқталғанша сақталып тұрды – 47:35. Ал ойынның екінші жартысы алаң иелерінің басымдығымен өтті, десек те болады. Олар «Астананың» ұпай айырмасын қысқартуларына ешқандай да мүмкіндік бермей, өздеріне жақындатқан да жоқ.
 
Матчтың үздік ойыншылары: Джастин Картер (20 + 6 рет доп қақшып алды + 7 пас), Малькольм Грант (19) және Ике Удано (12 + 7 рет доп қақшып алды).

«Астана» клубының бас бапкері Михаил Карпенко: 
— Бүгін біз маусымдағы ең маңызды ойындардың бірінде ұтылып қалдық. Матчтың бірінші жартысында қорғанысымыз сыр берді. Екінші жартысында сабамызға түсіп, қарсыласымызбен тайталасып бақтық. Бірақ мұндай ұпай айырмасын ВЭФ-тің алаңында қысқарту – шектен тыс қиын. ВЭФ клубын жеңісімен құттықтаймын. Бізге ВТБ лигасында енді бір ойын қалды, өз алаңымызда Автодорды қабылдаймыз. Біз өз жанкүйерлерімізді қуантып, жеңіске жетуге тырысамыз. Әзірше біздің плей-оффқа ілігуге теориялық тұрғыда мүмкіндігіміз бар. Біз қолымыздан келгеннің бәрін істейміз.
 
«Астана» келесі ойындарын түзде өткізіп, 3 және 4 мамыр күндері Атырауда жергілікті «Атырау Барыстары» клубымен кездесіп, ерлер арасындағы Қазақстан чемпионаты Ұлттық лигасының финалдық ойындарын жалғастырады.

Ал ВТБ Бірыңғай лигасы аясындағы келесі кездесу «Астана» үшін биылғы чемпионаттағы соңғы ойын болады. Елорда баскетболшылары 12 мамыр күні өз алаңында Саратовтың «Автодор» клубын қабылдайды.

Қарсылас жайлы мәлімет

Құрылған жылы: 1958 Клубтық түстері: ақ, қара
Мемлекет: Латвия Арена: «Арена Рига»
Қала: Рига Сайт: www.vefriga.com

Сипаттамасы

ВЭФ – Латвияның ерлер арасындағы кәсіпқой баскетбол клубы, Рига қаласынан, 1958 жылы құрылған.

Жетістіктері:
  • Латвия чемпионы − 2011, 2012, 2013, 2015, 2017
  • Латвия чемпионатының күміс жүлдегері –2010, 2014, 2016, 2018
  • Латвия чемпионатының қола жүлдегері –1960, 1966, 1991
  • Балтық лигасы кубогының қола жүлдегері – 2012
  • Латвия чемпионатының жартылай финалына шыққан – 2008, 2009

Команданың жалпы суреті

ВЭФ