ВТБ Бірыңғай лигасы 2017/2018
Астана
Астана
ВТБ Бірыңғай Лигасы, Тұрақты біріншілік
11.03.2018, 15:00 Жс
Арена: «Сары-Арқа» велотрегі (Астана)
84:79
Негізгі уақыт
29:16 17:22 26:16 12:25
Ойын нөмірі: RS-105
Көрермен: 1032
Химки
Химки

«Астана» «Химки» қырандарын қабылдайды

10.03.2018, 13:00    Просмотров: 516
Источник: Баспасөз қызметі
Автор: Альмира Шахаева
Ертең, 11 наурыз күні, елорда баскетбол клубы ВТБ Бірыңғай лигасы аясындағы кезекті ойынын өткізіп, өз алаңында Мәскеу облысының «Химки» клубын қабылдайды.
 
«Химки» – Ресейдің ерлер арасындағы кәсіпқой баскетбол клубы, Мәскеу облысынан, 1997 жылы құрылған. ВТБ Бірыңғай лигасынан бөлек, Еуролигада бақ сынайды.
 
Жетістіктері:
  • Ресей чемпионатының күміс жүлдегері – 2006, 2008-2013, 2015
  • Ресей чемпионатының қола жүлдегері – 2007
  • Ресей кубогының жеңімпазы – 2008
  • ВТБ Бірыңғай лигасының чемпионы – 2010/2011
  • ВТБ Бірыңғай лигасының күміс жүлдегері – 2014/2015
  • ULEB Еуропа кубогының финалына шыққан – 2008/2009
  • Еуропа кубогының финалына шыққан – 2005/2006
  • FIBA Еуролигасының «Төртеу финалында» додаға түскен – 2004/2005
  • ВТБ Бірыңғай лигасы «Төртеу финалында» додаға түскен – 2009/2010
  • Еуропа кубогының жеңімпазы – 2011/2012, 2014/2015

Өткен кездесулер хроникасы:
Мәскеу облысының баскетбол клубы ВТБ Бірыңғай лигасында 2009 жылдан бері ойнайды. Қазақстан клубы Ресейдің бұл командасымен алаңда 13 рет кездескен. Әрі оның үшеуінде шежіресі мол қарсыласын жеңіп те кеткен болатын. Биылғы маусымда «Астана» «химкиліктермен» Химки аренасында кездесіп, шектен тыс шиеленісті матчта 71:72 есебімен ұтылып қалған.  

Қазіргі жағдай:
Биылғы маусымда химкиліктер бас бапкерін ауыстырды. Душко Ивановичтің орнына грек маманы Георгиос Барцокас келді. Команданың ең үздік көшбасшысы – ресейлік қорғаушы Алексей Швед. Ол команда қоржынына орта есеппен 22 ұпайдан салып жүр. Сондай-ақ бір топ легионерлерін де ерекше атап өтуге болады. Лиганың статистикалық деректері бойынша, олар да көшбасшылар қатарында ойқастап жүр.
  
Турнир кестесі:
«Химки» баскетбол клубы ВТБ лигасының турнир кестесінде 9 жеңіс, 7 жеңіліспен 5-інші орынға орналасқан.
Ал «Астана» 5 жеңіс, 10 жеңіліспен 8-інші орынды иеленіп тұр.

 
«Астана» БК бас бапкері міндетін атқарушы Михаил Карпенконың пікірі:
– Мейілінше қиын ойын болады. «Химки» – шүбәсіз, ВТБ лигасындағы көшбасшылардың бірі. Құрамы тәжірибелі, қарымды ойыншылармен жасақталған, қосалқы құрамындағы жігіттері де жеткілікті, әрі жерге қаратпайтын сенімді саңлақтар. Әрине, «Химки» үшін ВТБ лигасындағы қазіргі 5-орыны өздеріне сай емес. Олар 4-орындағы ұжымнан үш жеңіс қалып келеді. Химкиліктерге Лигадағы әрбір ойын маңызды, өйткені олар плей-оффтағы маңызды ойындарды өз алаңында өткізуге құқық беретін алғашқы төрттікке ілігуді көздейді. «Химки» алдағы матчқа, плей-оффқа ілігуді мақсат тұтып отырған біз секілді, айрықша көңіл бөледі. Оның да өзіндік себебі бар. «Химки» Еуролига аясындағы соңғы ойынды сүреңсіз өткізіп, өз алаңында «Милан» клубынан ұтылып қалды. Сондықтан алдағы матчта сол сәтсіздіктерінің тамырына балта шабуға тырысады деп ойлаймын. Олар тек жеңіске жетуді ойлап қана келеді. Ал алдағы ойын туралы айтар болсақ, қарсыласымыздың сапында Алексей Швед деген қас шебер ойыншы бар. Ол – ВТБ лигасы мен Еуролиганың ең үздік сұрмергені. Осы ойыншыны тұсаулап ұстау мәселесін ешбір команда шеше алмады десек те болады. Қандай жағдай болмасын, ойын қалай аяқталса да, Швед әр матчта өзінің 20 ұпайын еншілейді. Біздің мақсатымыз – оны ыңғайсыз жағдайларда шабуылдауға мәжбүрлеу. Әрине, тек осы жігітті аңдимыз деп, басқа ойыншыларды да ұмытпауымыз керек. Себебі, олар да – тәжірибелі және шыңдалған ойыншылар, атап айтқанда, Джеймс Андерсон, Чарльз Дженкинс, Стефан Маркович және Энтони Гилл, орталық шептегі Малкольм Томас пен Томас Робинсон. Қысқасы, алаңда бізге әрбір ойыншыға қарсы мұқият ойнап, қорғаныста мейілінше сақ болу қажет. Жеңіске жетуге болады, мүмкіндік әрқашан беріледі. Бәрі де тек өзімізге, қаншалықты тиянақты ойнай алатындығымызға, қаншалықты өзімізге сенімді болатындығымызға, «Химкиге» бірінші минуттан бастап қалай төтеп бере алатындығымызға байланысты болады.     
 
Қайда, қашан, нешеде?
Арена: «Сарыарқа» республикалық велотрегі
Уақыт: 15.00 Астана уақыты бойынша
Трансляция: ВТБ Бірыңғай лигасының сайты, «Астана» БК сайты, «QazSport» телеарнасы.

«Астана» «Химкиден» есе қайтарды

12.03.2018, 02:06    Просмотров: 572
Источник: Баспасөз қызметі
Автор: Альмира Шахаева
ВТБ Бірыңғай лигасы аясындығы «Астана» клубы мен Мәскеу облысының «Химки» командасы арасындағы матч жерлестеріміздің жеңісімен аяқталды.

Химкиліктер Астанаға бірнеше белді ойыншыларын әкеле алмады. Жарақаттарына байланысты Қазақ елі астанасына Алексей Швед, Томас Робинсон және Энтони Гилл ұшып келген жоқ. Оларды Тимофей Якушин және Сергей Клюев сынды жас ойыншылар алмастырды.
 
«Астананың» құрамы да толық емес еді. Команданың ең үздік ойыншысы Джастин Картер алаңға шыға алмады, ол жамбас буынын жарақаттап алған болатын. Сондай-ақ Рустам Ерғали мен Рустам Мырзағалиев жарақаттарынан айығып үлгермеді.

«Астананың» алғашқы бестігі: Ике Удано, Энтони Клеммонс, Ларри Гордон, Леонидас Каселакис және Анатолий Колесников.

Бірінші минуттан бастап «Астана» белсенділік танытып, алаң қожайыны қай команда екенін көрсете білді. Әрі бірінші онминуттықтың ортасында 12:2 есебімен алда тұрды. Химкиліктер тайм-аут алды. Алайда бұл үзілістің те Михаил Карпенконың шәкірттеріне тигізген пайдасы көбірек болды. Леонидас Каселакис пен Ике Удано тізе қоса қимылдап, көпшілікті тәнті қылды. Ал қонақтар керісінше, көп қателесті. Бірінші кезең 29:16 есебімен аяқталып, «Астана» басым түсті.

    
Екінші кезең «химкиліктердің» үш ұпайлық соққымен басталды. Астаналықтар шабуылда қателесіп, қонақтар тағы да екі ұпай еншіледі. Осыдан кейін Михаил Карпенко тайм-аут алуға мәжбүр болды. Осы үзілістен кейін жағдай біршама түзелді. Десек те, «Химки» әрбір шабуылы сайын аса қиналмай ұпай еншілеп, есепті қысқарта түсті. Бұл кезең шиеленісті өтіп, командалар үлкен үзіліске шыққанда, есеп 46:38 болып, алаң иелері алда тұрды.
 
Үшінші кезең өте нәтижелі болды. Осы кезеңнің орта тұсында «Астана» +14 ұпай айырмасымен ұзап та кетті. Бұл, әрине, қонақтарға мүлде ұнаған жоқ. Барцокастың командасы тайм-аут алып еді, бұл да «Химкидің» мәселесін шешпеді. Елорда баскетболшылары қалған уақытта да өрнекті ойын үлгісін көрсетіп, соңғы онминуттыққа 72:54 есебімен шықты.

  
Соңғы кезең қайсарлық пен құлшыныстың өлшемі іспетті өтті. «Астананың» барлық ойлағаны орындалып, іске асты деп айта алмаймыз. Қателіктер де болды. Әйтсе де, жеңіске деген жігерлігі басым болған жерлестеріміз өз мұраттарына жетті. Кездесу 84:79 есебімен аяқталып, «Астана» БК жеңіске жетті.

 

Ең көп ұпай еншілегендер:
  • «Астана»: Малькольм Грант (16), Ике Удано (16 + 6 рет доп қақшып алды), Леонидас Каселакис (15 + 3 рет допты қағып әкетті), Энтони Клеммонс (14 + 7 рет доп қақшып алды + 5 пас), Ларри Гордон (10 + 5 рет доп қақшып алды + 3 рет допты қағып әкетті).
  • «Химки»: Егор Вяльцев (17), Малкольм Томас (15 + 9 рет доп қақшып алды), Чарльз Дженкинс (14 + 6 пас), Вячеслав Зайцев (14 + 5 рет доп қақшып алды).

«Астана» БК бас бапкері, Михаил Карпенко:
— Бұл шынымен де өте күрделі ойын болды. Қайсыбір сәттерде біз 20 ұпай айырмасымен алға шығып кеткенімізбен, «Химки» секілді командамен ойнағанда, босаңсуға болмайды. Қарсыласымыздың құрамы селдіреп қалғанын және бұған дейін «Милан» клубымен тартысты ойын өткізгендігін біліп, ойынды өте жоғары қарқында бастауға тоқталдық. Мен ойымыздың жүзеге асып, нәтиже шыққанына қуаныштымын. Себебі біз қол жеткізген сол гандикап одан әрі өзімізге сенімді болуымызға мүмкіндік берді. «Химкидің» бізді қуып жетіп, ал біздің абдырап қалып, бірнеше рет қатарынан допты шығыршықа түсіре алмаған сәттеріміз болды. Бірақ сонда да қарқынымызды бәсеңсітпеуге тырыстық. Мен алғашқы бестіктегі команданы жеңгенімізге өте қуаныштымын. Бұл біздің басты мақсатымызға жетуге, плей-оффқа шығуға нық басқан – қадамымыз.

«Химки» клубының бас бапкері, Георгиос Барцокас:
— Өзіміз тап болған жағдайды есепке алсақ, мойындауымыз керек, бұл ойын біз үшін пайдалы болды. Бұған дейін тым аз ойнаған ойыншыларға өздерінің қабілетін паш етуге және спортық баптарына келуге мүмкіндік берілді. Біз «Астанамен», яғни дәл қазір өзіне сенімді ойнап жүрген, өте қарымды командамен табан тіресе додаға түстік.
  
«Астана» келесі ойындарын Ақтауда өткізеді. 14 және 15 наурыз күндері баскетболдан Қазақстан чемпионатының Ұлттық лигасы аясында жергілікті «Каспий» клубымен кездеседі.
 
Ал ВТБ Бірыңғай лигасы аясындағы келесі ойынын түзде өткізеді. 18 наурыз күні елорда баскетболшылары Ресейдің «Нижний Новгород» клубымен кездеседі.

Қарсылас жайлы мәлімет

Құрылған жылы: 1997 Клубтық түстері: сары, көк
Мемлекет: Ресей Арена: Мытищи Арена
Қала: Химки Сайт: bckhimki.ru

Сипаттамасы

«Химки» – ресейдің ерлер арасындағы баскетбол клубы, Мәскеу облысынан.

Жетістіктері:
  • Ресей чемпионатының күміс жүлдегері – 2006, 2008, 2009, 2010, 2011, 2012, 2013, 2015, 2017, 2018, 2019
  • Ресей чемпионатының қола жүлдегері – 2007
  • Ресей кубогының жеңімпазы – 2008
  • ВТБ Бірыңғай лигасының чемпионы – 2010/2011
  • ВТБ Бірыңғай лигасының күміс жүлдегері – 2014/2015, 2016/2017, 2017/2018, 2018/2019
  • ULEB Еуропа кубогының финалына шыққан – 2008/2009
  • Еуропа кубогының финалына шыққан – 2005/2006
  • FIBA Еуролигасы «Төртеу финалында» додаға түскен – 2004/2005
  • ВТБ Бірыңғай лигасы «Төртеу финалында» додаға түскен – 2009/2010
  • Еуропа кубогының жеңімпазы – 2011/2012, 2014/2015

Команданың жалпы суреті

Химки