«Астана» Латвия чемпионын қабылдайды

21.10.2016, 10:25 Просмотров: 602
Источник: Баспасөз қызметі
Автор: Альмира Шахаева

Ертең, 22 қазан күні «Астана» баскетбол клубы ВТБ Бірыңғай лигасындағы төртінші ойынын өткізеді. Бұл жолы қазақтың бас қаласына Еуропадан Риганың ВЭФ клубы келеді.

Елорда баскетболшылары Латвия командасымен жақсы таныс. Бұған дейінгі маусымдарда «Астана» ВЭФ клубымен тоғыз рет кездесіп, бесеуінде ұтылып қалып, төртеуінде жеңіске жетті. Сондай-ақ, ригалықтармен клубаралық тығыз достық қарым-қатынасымыз да бар!

Тарихтан қысқа мағлұмат:

«Астанның» бұрынғы бас бапкері (2015/2016 жылдар маусымындағы) Рамунас Бутаутас 2010/2014 жылдары Рига клубын жаттықтырған.
ВЭФ клубының қазіргі көшбасшысы, Латвия ұлттық құрамасының ойыншысы Янис Блумс 2013/2014 жылдар маусымында «Астананың» намысын қорғаған.
Рига клубының қазіргі ең үздік ойыншыларының бірі, америкалық қорғаушы Кристофер Ричард Ақтаудың «Каспий» клубында ойнап, Қазақстан чемпионатында «Астанаға» қарсы бірнеше рет өнер көрсеткен.

Қарсылас жайлы мәлімет:

«ВЭФ» (Рига) БК 1958 жылы құрылған.

Жетістіктері:

Латвия чемпионы − 2011, 2012, 2013, 2015
Латвия чемпионатының күміс жүлдегері − 2010, 2014, 2016
КСРО чемпионатының қола жүлдегері −1960, 1966, 1991
Балтық лигасы кубогының қола жүлдегері − 2012
Латвия чемпионатының жартылай финалына шыққан − 2008, 2009

ВТБ Бірыңғай лигасының биылғы маусымында әзірше бір-ақ ойын өткізді. Мәскеу облысында жергілікті «Химки» командасымен кездесіп, шектен тыс тартысты ойында 76:73 есебімен жеңіске жетті. Ал ертеңгі ойын екі команда үшін де – маңызды. Матч тартысты да, қызықты болуы керек. Екі команданың құрамдары бір-біріне сай, екеуі де – жеңісті қолдан бермейтін ұжымдар. «Астана» баскетбол клубы спорт жанкүйерлерінің бәрін ойынды тамашалауға шақырады! Бізге сіздердің қолдауларыңыз керек.

Матч «Сарыарқа» республикалық велотрегінде өтеді. Басталуы – 16:00. Кіру тегін!

Рига баскетболшыларын риясыз жеңдік

22.10.2016, 20:30 Просмотров: 746
Источник: ВТБ Бірыңғай лигасы
Автор:

«Астана» өз алаңында Латвияның ВЭФ клубымен кездесіп, тартысты өткен додада жеңісті жұлып алды – 66:64 (19:18, 14:19, 14:11, 19:16).

Ең көп ұпай жинағандар:

«Астана»: Родерик Одом (22 + 10 д.қ.), Роберт Лоури (11 + 6 д.қ. + 5 пас), Леонидас Каселакис (11), Усман Крубалли (10 + 12 д.қ.).

ВЭФ: Янис Блумс (13), Кристофер Ричард, Мартинш Мейерш (екеуі де – 10), Арнас Лабускас (6 + 5 д.қ.).

«Астана» ПБК бас бапкері Илиас Папатеодору:
– Ойын өте қиын болды. ВЭФ – ойын өрнегі үйлескен тәжірибелі команда. Ұжымдық ойын үлгілері жақсы жетілген. Матчтың бірінші жартысында қорғанысымыз сыр беріп, тізе қоса ойнай алмадық. Қонақтар біздің шабуылымызға да бейімделіп алды. Үлкен үзілісте, шешінетін бөлмеде, ойын өрнегімізді талқылап, қорғаныста ширақ қимылдап, өжеттік таныту керектігіне тоқталдық. Ойынның екінші жартысында осының бәрін жүзеге асырып, лайықты түрде жеңіске жеттік.

ВЭФ БК бас бапкері Янис Гайлитис:
– Біз өз жоспарымызды орындаған жоқпыз, шығыршық тұстамасы түбінде доп қақшып ала алмай қойдық. Екі ойыншымыз өте селқос қимылдады. Бүгін жеңіске жетуіміз керек еді, бірақ ойынды бастан-аяқ бірқалыпты өткізе алмадық.