ВТБ Бірыңғай лигасы 2016/2017
Автодор
Саратов
ВТБ Бірыңғай Лигасы, Тұрақты біріншілік
25.02.2017, 19:00 Сн
Арена: СС «Кристалл» (Саратов)
78:79
Негізгі уақыт
22:24 9:19 28:21 19:15
Ойын нөмірі: RS/112
Көрермен: 2500
Астана
Астана

«Астана» Саратовқа сапар шекті

24.02.2017, 15:00    Просмотров: 1288
Источник: ВТБ Бірыңғай лигасы
Автор:
«Астана» баскетбол клубы Ресей қалаларындағы сапарын одан әрі жалғастырып, бұл жолы шежіресі мол Саратов қаласына тоқтайды. Ертең, яғни 25 ақпан күні ВТБ Бірыңғай лигасы аясында елорда клубы Саратовтың жергілікті «Автодор» командасымен кездеседі.
 
«Астана» ВТБ Бірыңғай лигасы аясындағы үйдегі алғашқы ойынын дәл осы командамен өткізіп, шектен тыс тартысты өткен матчта жеңісті “жұлып” алып, 83:78 есебімен басым түскен болатын.

«Автодор» командасы дәл қазір ВТБ Бірыңғай лигасында 9-орынды иеленіп тұр. Саратов баскетболшылары 5 рет жеңіске жетіп, 11 ойында жеңілістің кермек дәмін татты. Плей-оффта бақ сынау құқығына қол жеткізу үшін біздің командаға осы ойында жеңіске жетіп, үздік сегіздікке мейілінше жайғасу керек. Әрине, бұл ойында жеңіске жету оңай болмайды. Бұл айда «Астананың» ойындары іркес-тіркес өтіп, біршама титықтатты. Әйтсе де, елордалықтар сенімді ақтауға бекініп отыр.

Әдеттегідей, матч қарсаңында «Астана» клубының бас бапкері Илиас Папатеодору алдағы ойын туралы өз ойын ортаға салды:
 - «Автодор» командасы өте азулы ұжым, олар өз алаңында жақсы ойнайды, жеңісті қолдан бермейді. Бұл клубта деңгейі жоғары ойыншылар көп, олар бір ойында 100 ұпайды қиналмай соға алады. Бізге жеңіске жету үшін, қорғаныста мұқият болу керек, оймақтордан кері серпілген допты қағып алуға тырысу керек. Егер осыларды орындап, қырағылық танытсақ, онда жеңіске жетуге мүмкіндік те болады.

Сіздер матч трансляциясын сенбі күні, 25 ақпанда, Астана уақытымен 21:00-да «Қазспорт» телеарнасынан, сондай-ақ ВТБ Бірыңғай лигасы сайтынан
көре аласыздар.

«Астана» Саратовты сан соқтырды

26.02.2017, 10:00    Просмотров: 981
Источник: ВТБ Бірыңғай лигасы
Автор:
Қазақтың «Астанасы» түзде Ресейдің «Автодор» клубынан басым түсті – 79:78 (24:22, 19:9, 21:28, 15:19).

Ойынның бірінші ширек бөлігі тең дәрежеде өтіп, екіншісі басталған бетте «Астана» көсіле сілтеді – 9:0. Ник Миннерат допты діттеген жеріне дөп түсірген соң «Автодор» өзіне-өзі келгендей еді. Бірақ Йан Миллер қатарынан 7 ұпай еншілеп, қазақстандықтар үлкен үзіліске дейін ұпай айырмасын ұстап тұра алды – 43:31. Командалар алаңдағы орындарымен ауысқаннан кейін Миннерат пен Джош Адамс ұпай айырмасын қысқартуға белсене кірісті. Саратов баскетболшылары өздеріне тән ойын үлгісін көрсетіп, матчтың үшінші ширек бөлігінде 28 ұпай еншіледі. Сөйтіп, ұпай айырмасын «–5»-ке дейін қысқартты.

Миллер мен Родерик Одомның алыстан лақтырған доптары да «Астананың» қайтадан қара үзіп кетуіне жетпеді: волгалықтар ұжымдық ойын үлгісінің арқасында қуып жетуге де айналды. Ойынның аяғы мейілінше қыза түсті. Матчтың аяқталуына 40 секунд қалғанда, Саратов жанкүйерлері дүр сілкінді. Алаң иелерінің капитаны Сергей Быков қиындықпен қарсыластарының қорғанысын бұзып өтіп, есепті теңестірді – 77:77. Қарсы шабуылда Йан Миллер мүлт кетті, енді бәрі де «Автодордың» қолында еді. Ник Миннерат кері ұшқан допты қақшып алды, бірақ қарсы команда ойыншылары тактикалық тұрғыда ереже бұзды. Екі айып соққысының біреуі ғана дөп түсті. Бұл «Астана» үшін тамаша мүмкіндік болатын. Қонақтар оны ұтымды пайдалана білді. Милер тағы мүлт кеткенімен, алаң иелерінің оймақторынан қайтқан допты Леонидас Каселакис қағып алып, «Астананы» алға шығарды – 78:79. Матчтың аяқталуына небәрі 7 секунд қалған болатын. Бұл уақыт «Автодордың» жеңісті “тартып” алуларына жетпеді. Олар тайм-аут алып, жоспар құрғандарымен, доптан айырылып қалды. Сөйтіп, жеңіліске ұшырады. «Астана» осы жеңісінің арқасында плей-оффта бақ сынауға құқық беретін аймақтағы орынға жайғасып, негізгі бәсекелестерінен алшақтай түсті.

Ең көп ұпай жинағандар:

«Автодор»: Николас Миннерат (23 + 8 рет доп қақшып алды), Винс Хантер (17), Евгений Колесников (12), Джош Адамс (12), Сергей Быков (11 + 8 пас).

«Астана»: Иан Миллер (24), Роберт Лоури (18), Леонидас Каселакис (12 + 7 пас).

«Автодор» БК бас бапкері, Владимир Анциферов:
— Өте шиеленісті матч. Біз жеңіске жетеміз деп шыққанбыз, әрі ұтылмауымыз керек еді. Өкінішке қарай, баз біреулер “жанып” кетті, енді біреулер өз мүмкіндігін толық көрсете алмады. Мұны аяқсыз қалдырмаймыз. Ойынның екінші жартысында тізгінді өз қолымызға алып, қуып жеттік. Бірақ қарсыластарымыз өздерінің өрнекті ойын үлгілерімен біздің аптығымызды басты. Соңғы секундтарда бір ұпай айырмасымен ұтылу – намысыңа тиіп, өзегіңді өртеу. Бірақ біздің алға жылжи беруіміз керек. Бүгін жолымыз болмады. Өзіміздің жылдам ойынымызды қайта тауып алу керек. Өкінішке қарай, біз соны жоғалтып алдық. Қолдау көрсеткен көрермендерге алғысым – шексіз.

«Астана» ПБК бас бапкері, Илиас Папатеодору:
— Біз бүгінгі жеңіске лайық болдық деп ойлаймын. Ойынды басынан аяғына дейін бағамдап отырдық. Біз ойынның екінші жартысында «Автодордың» дәл осылай қыспаққа алатынын да болжап білдік. Менің ойымша, «Автодор» – шабуылдаудан ВТБ Бірыңғай лигасындағы ең үздік командалардың бірі. Бүгінгі біздің жалғыз ғана ағаттығымыз, оларға бірнеше рет тез шабуыл ұйымдастырып, оңай ұпай олжалауға мүмкіндік беріп қойдық. Осыдан кейін олар жігерленіп, маңызды үш ұпайлық соққыларын дөп түсіре алды. Бірақ біз бұған да дайын болып шықтық. Асып-саспай, сабырлық танытып, соңғы соққымен өзімізге өте маңызды жеңіске қол жеткіздік. Өз ойыншыларымды құттықтаймын.
 
«Астана» келесі ойынын өз алаңында өткізеді, 5 наурыз күні елордалықтар ВТБ Бірыңғай лигасы аясында Ресейдің «Парма» баскетбол клубын қабылдайды.иги ВТБ.

Қарсылас жайлы мәлімет

Құрылған жылы: 1960 Клубтық түстері: ақ, қара
Мемлекет: Ресей Арена: СС «Кристалл»
Қала: Саратов Сайт: avtodor.ru

Сипаттамасы

«Автодор» – Ресейдің ерлер арасындағы кәсіпқой баскетбол клубы, Саратов қаласынан, 1960 жылы құрылған.
 
Жетістіктері:
  • Ресей чемпионатының күміс жүлдегері – 1993/1994, 1996/1997, 1997/1998, 1998/1999
  • Ресей чемпионатының қола жүлдегері – 1995/1996
  • Еуропа кубогының жартылай финалына шыққан – 1997/1998
  • А суперлигасының чемпионы – 1996/1997, 1997/1998
  • Б суперлигасының чемпионы – 2008/2009
  • Суперлига чемпионы – 2013/2014
  • Суперлиганың қола жүлдегері – 2012/2013

Команданың жалпы суреті

Автодор