ВТБ Бірыңғай лигасы 2017/2018
Астана
Астана
ВТБ Бірыңғай лигасы, Тұрақты біріншілік
15.01.2018, 19:30 Дс
Арена: Велотрек «Сары-Арқа» (Астана)
67:53
Негізгі уақыт
23:19 18:11 16:19 10:4
Ойын нөмірі: RS-67
Көрермен: 1036
ВЭФ
Рига

«Астана» Риганың ВЭФ клубын қабылдайды

14.01.2018, 12:00    Просмотров: 147
Источник: Баспасөз қызметі
Автор: Альмира Шахаева

Ертең, 15 қаңтар күні, елорда баскетбол клубы ВТБ Бірыңғай лигасы аясындағы кезекті матчын өз алаңында өткізіп, «ВЭФ» Рига, Латвия клубымен кездеседі.

Өткен кездесулер хроникасы:
Латвия баскетбол клубы ВТБ Бірыңғай лигасында 2009 жылдан бері ойнап жүр. Осы жылдары команданың көрсеткіші де, клубтың бас бапкері де құбылып тұрды. ВЭФ үшін ең нәтижелі маусым 2012/2013 жылдар болды. Осы маусымда ВЭФ Латвияның 2012 және 2013 жылдардағы чемпионы болды. Мұнымен қоса, ригалықтар Еуропа кубогында TOP-16 құрамына енді. Сонымен қатар, ВТБ лигасында үздік сегіздікке ілігіп, плей-офф сатысына шықты. Сол кезде команданы Литва маманы, 2014-2016 жылдары «Астана» клубының бас бапкері болған Рамунас Бутаутас жаттықтырған болатын.

Ал «Астаны» – ВЭФ арасындағы өзара кездесулерге келер болсақ, екі команда алаңда 12 рет кездесіп, оның төртеуінде Қазақстан клубы жеңіске жетті.

Қазіргі жағдай:
Міне, үш жыл болды, команданы Латвия маманы Янис Гайлитис жаттықтырады. Команда құрамы былтырғымен салыстырғанда, едәуір өзгерді. Көпшілікке танымал латыш ойыншысы, осы елдің ұлттық құрамасының капитаны Янис Блумс ригалықтар сапынан кетіп қалды. Бұл ойыншыны Қазақстан жанкүйерлері де жақсы біледі. Ол 2013/2014 жылдар маусымында «Астана» командасының намысын қорғаған. Ұжымның қазіргі көшбасшысы – америкалық қорғаушы Алекс Перез. Ол орта есеппен әр ойында 12 ұпайдан еншілеп жүр.

Турнир кестесі:
«ВЭФ» баскетбол клубы дәл қазір ВТБ Бірыңғай лигасының турнир кестесінде 1 жеңіс, 8 жеңіліспен соңғы орында тұр. 

«Астана» БК бас бапкерінің міндетін атқарушы Михаил Карпенконың пікірі:
– ВЭФ өз ойын өрнегі қалыптасқан, қарымды команда, шабуылды алаң периметрі бойынша жақсы өрбітеді, үш ұпайлық соққыларды қарша боратады, қорғаныстан шабуылға сауатты түрде көше біледі. Олардың турнир кестесінде соңғы орында тұрғандары, команданың деңгейіне сай келмейді. Мұны олар жақында «Автодор» клубымен өткен ойында да көрсете білді, тек матчтың ең соңында есе жіберіп алды. Бұл командамен ойнау оңай болмайды. Олар да біз сияқты жағдайларын тығырыққа тіреп алды, әйтсе де плей-оффқа ілігу мүмкіндігінен түпкілікті айырылған жоқ. Біздің қазіргі мақсатымыз, өткен ойындардағы жеңілістерімізді ұмытып, өкініш атаулысынан психологиялық тұрғыда арылып, қорғаныста сауатты және тізе қоса қимылдап, шабуылда өз мүмкіндіктерімізді табуға тырысу керек. Өз басым, біз ВЭФ клубын жеңеміз деп ойлаймын, бірақ алаңға шыққан әрбір ойыншыға өзінің күш-жігерін 100 пайыз жұмсау керек болады. Бұл жұмыстарды біз жаттығу кезінде бастап та кеттік.

Қайда, қашан, нешеде?
Арена: «Сарыарқа» республикалық велотрегі
Уақыт: 19.30 Астана уақыты бойынша
Трансляция: ВТБ Бірыңғай лигасының сайты, «Астана» ПБК сайты, «QazSport» телеарнасы.

«Астана» Рига клубынан басым түсті

15.01.2018, 23:00    Просмотров: 143
Источник: Баспасөз қызметі
Автор: Альмира Шахаева
Бүгінгі матчты өте маңызды ойындардың бірі болды деуге болады. Екі команда бір-бірімен деңгейлес, әрі екеуі де тек жеңіс үшін бар күш-жігерлерін салды. Қайсысының бағы жанды, оны ойын көрсетті.  
 
Есепті қонақтар ашты. Бірақ алаң иелері көп күттірген жоқ, Ике Удано әдемі соққысымен команда қоржынына екі ұпай салды. Ойынның бірінші бөлігі мейілінше тартысты өтіп, екі команданың да әрбір шабуылы нәтижелі аяқталып отырды. Команданың көшбасшысы Джастин Картер допты доғаның сыртынан лақтырып, соққысының біразын діттеген жеріне дөп түсіріп отырды. Матчтың алғашқы ширек бөлігі шиеленісті өтіп, таразы басы әрбір шабуыл сайын екі жаққа кезек ауып отырды. Әйткенмен, кездесудің бірінші бөлігі 23:19 есебімен аяқталып, «Астана» алға шықты. Екінші онминуттық аса жоғары қарқында басталмады. «Астана» ойыншылары соққыларын шығыршыққа дәл түсіре алмай, мүлт кете бастады. Қонақтар мұны қалт жібермей, допты оп-оңай түсірумен болды. Алайда алаңға Джастин Картер шыққан соң, жағдай өзгерді. «Астана» ұжымдық ойын өрнегін көрсетіп, ұпай айырмасын ұлғайта түсті – 41:30.

Үлкен үзілістен кейін де командалар қарқындарын бәсеңдеткен жоқ. Ойын қыза  түсіп, «Астана» әрбір шабуылын үйлесіммен ұйымдастырып, тізе қоса қимылдап, үшінші онминуттықта да алда болды – 57:49. Үшінші кезең осылай аяқталды. Ал соңғы кезеңде астаналықтар көсіле шауып, қонақтарына ешқандай да мүмкіндік бермеді. Кездесу 67:53 есебімен аяқталып, «Астана» жеңіске жетті.  

Бұл ойында ең көп ұпай еншілеген Джастин Картер болды – 13 ұпай, 5 рет доп қақшып алып, 3 пас берді. Энтони Клеммонс команда қоржынына 14 ұпай салды, Ике Удано мен Ларри Гордон 11 ұпайдан еншіледі.

«Астана» БК бас бапкері м.а. Михаил Карпенко:
— Біз шабуылда мінсіз ойнай алмадық, есесіне қорғаныста өте жақсы ойнадық және құрған жоспарымызды жүзеге асырдық. Қарсыласымыздың 53 ұпай еншілеуіне ғана мүмкіндік бердік. Бұл – жақсы нәтиже. Әрине, шабуылда ширай түсіп, қамшыны басуымыз керек. Бұл менің алғашқы ойыным еді, әрі команда да менің барлық талаптарыма үйренуі керек. Әйтсе де, мен барлық ойыншыларға ризамын. Бұл өте қиын ойын болды. ВЭФ намысты қолдан берген жоқ.


Янис Гайлитис ВЭФ клубының бас бапкері:
— «Астананы» жеңісімен құттықтаймын. Қарсыласымыздың қорғанысын бөле-жара атап өткім келеді. Олар өте мұқият ойнап, шабуылда бізге жылдам қимылдауға мүмкіндік бермеді. Біздің бұдан да көбірек ұпай еншілейтін мүмкіншілігіміз болды, бірақ біз оның бәрін пайдалана алмадық. Кейбір сәттерде қорғаныста өте жақсы ойнағанымызды атап өткім келеді. Алдағы ойындарда бағымыз жанады деп үміттенемін.

«Астана» келесі ойынын түзде өткізіп, елорда баскетболшылары 20 қаңтар күні ВТБ Бірыңғай лигасы аясында Саратовтың «Автодор» клубымен кездеседі.

Қарсылас жайлы мәлімет

Құлылған жылы: 1958 Клубтық түстері: ақ, қара
Мемлекет: Латвия Арена: «Арена Рига»
Қала: Рига Сайт: www.vefriga.com

Сипаттамасы

ВЭФ – Латвияның ерлер арасындағы кәсіпқой баскетбол клубы, Рига қаласынан.

Жетістіктері:
  • Латвия чемпионы − 2011, 2012, 2013, 2015
  • Латвия чемпионатының күміс жүлдегері –2010, 2014, 2016
  • Латвия чемпионатының қола жүлдегері –1960, 1966, 1991
  • Балтық лигасы кубогының қола жүлдегері – 2012
  • Латвия чемпионатының жартылай финалына шыққан – 2008, 2009

Команданың жалпы суреті

ВЭФ