ВТБ Бірыңғай лигасы 2017/2018
ЦСКА (МСК)
Мәскеу
ВТБ Бірыңғай лигасы, Тұрақты біріншілік
25.12.2017, 22:30 Дс
Арена: ӘСК ЦСКА (Мәскеу)
79:63
Негізгі уақыт
21:16 19:14 17:18 22:15
Ойын нөмірі: RS-57
Көрермен: 611
Астана
Астана

«Астана» аттанды Мәскеуге

24.12.2017, 13:00    Просмотров: 147
Источник: Баспасөз қызметі
Автор: Альмира Шахаева
Ертең, 25 желтоқсан күні елорда баскетболшылары тарих қойнауына еніп бара жатқан жылдағы соңғы ойынын өткізеді. ВТБ Бірыңғай лигасы аясындағы матчта астаналықтарды Лиганың соңғы чемпионы ЦСКА (Мәскеу) клубы қабылдайды.

«Астана» баскетболшылары биылғы маусымдағы алғашқы ойынын өз алаңында өткізіп, тура осы әскерилер клубын қабылдаған болатын. Ойын, әрине мәскеулік чемпиондардың жеңісімен аяқталған – 92:72. 

- Біз ВТБ Бірыңғай лигасының көшбасшысы ЦСКА (Мәскеу) командасына үлкен құрметпен қараймыз! Бірақ бізде қорқыныш жоқ, УНИКС-пен өткізген ойынның екінші жартысындағы қарқынды жалғастырғымыз келеді. Қандай азулы командамен ойнайтынымызды білеміз, алдағы ойынның қиындығын да түсінеміз, бірақ бұл – біздің қатарымызға жаңа ойыншы қосылғаннан кейінгі жаңа құрамда тайталасуға және осы ойында жоғары жетістікке қол жеткізуге болатын мүмкіндік, – деп өз пікірін білдірді команданың бас бапкері Костас Флеваракис.

Естеріңізге сала кетейік, бұл ойынның трансляциясын сіздер Астана уақытымен 22:30-да ВТБ Бірыңғай лигасының сайты мен «Астана» БК сайтынан, сондай-ақ тікелей эфирде «QazSport» телеарнасынан тамашалай аласыздар.

Елорда клубының келесі ойыны енді 2018 жылы өтеді.

«Астана» биылғы жылғы соңғы матчта әскерилер клубынан ұтылды

26.12.2017, 10:00    Просмотров: 310
Источник: Баспасөз қызметі
Автор:
Мәскеудің ЦСКА командасы өз алаңында қазақтың «Астанасынан» басым түсті – 79:63 (21:16, 19:14, 17:18, 22:15).

Джастин Картер бастаған «Астана» ойынның бірінші жартысында азулы ЦСКА клубымен тайталасып бақты. Әйтсе де, әскерилер командасы ширақ қимылдап, негізгі көрсеткіштер бойынша қарсыласынан асып түсті. Атап айтқанда, доп қақшып алу (22-12) және үш ұпайлық соққылар (18-8) жағынан басым түсті. Мәскеуліктер матчтың алғашқы екі ширек бөлігінде 5 ұпайдан артық еншілеп, үзіліске дейін екі таңбалы сан айырмасымен қара үзіп кетті (40:30).

ЦСКА клубының артықшылығы сол, ойынның екінші жартысында қарқынын үдете түсіп, допты өздерінде көп ұстайды. Әлбетте, бұған кез келген команда төтеп бере алмайды. Қызыл-көк жейделілер ойынның үшінші ширек бөлігі аяқталуға айналғанда құйындай орап соқса да, «Астана» дес берген жоқ. Алайда матчтың төртінші ширек бөлігіне Қазақстан клубының күш-қуаты жетпеді. Әскерилер соған дейін айып алаңының ішінде қауіп төндірумен болса, енді допты алыстан лақтыруға көшті (Виталий Фридзон екі рет дөп түсірді). Әрі қонақтарды өздерінің айып алаңына кіргізбей, бекінісін күшейтті. Ойының төртінші ширек бөлігінің бел ортасында алаң иелері «20» ұпай айырмасымен алға шықты. Бұл – ЦСКА енді жеңісті уысынан шығармайды деген сөз.


Бұл әскерилер клубының биылғы маусымдағы 10-ойындағы 10-ыншы жеңісі еді. Мәскеуліктер 100 пайыздық нәтиже көрсетіп, турнир кестесінде жеке-дара көш бастап келеді.  

Көп ұпай жинағандар:
  • ЦСКА: Кори Хиггинс (14), Отелло Хантер (13 + 7 рет доп қақшып алды), Михаил Кулагин (12).
  • «Астана»: Джастин Картер (14 + 5 рет доп қақшып алды), Леонидас Каселакис (12 + 7 рет доп қақшып алды), Малкольм Грант (11).

ЦСКА клубының бас бапкері Димитрис Итудис:
— Бәріңізді Жаңа жыл мерекесімен құттықтаймын, кім бүгін атап өтеді, соларды. Біз бүгін кәсіби міндеттерімізді топтастырып, бәсекеге қабілетті команданы жеңдік. Ойын уақытын мейілінше дұрыс бөліп, өткен матчтарда көп жауапкершілік жүктелген жігіттерімізді, атап айтқанда, Чачо мен Кайлды тынықтырып алуға тырыстық. Әрі осы ойымызды жүзеге асырып, бәрін тиімді қолданып, жеңіске жеттік. Команданы осы жеңісімен құттықтағым келеді. «Астана» қазір ширай түскен. Құрамын жаңа легионермен толықтырды. Өрнекті ойын үлгісін көрсетіп жүр. Алдағы ойындарына табыс тілеймін.      


«Астана» ПБК бас бапкері Константинос Флеваракис:
— Бүгін біз Еуролига көшбасшысымен ойнауға келіп, ойлы да, сайлы ойын үлгісін көрсетуге тырыстық. ЦСКА барлық шепте тәжірибелі ойыншылармен жасақталған. Мәскеуліктерге төтеп беру үшін өте азулы команда болу керек. Біз көп мүмкіндіктерді мүлт жіберіп алдық, өзіміздің оймақторымыздан кері қайтқан доптардың көбісін қағып алуларына бөгет бола алмадық. Әйтсе де, команданың тырысып ойнағаны көңілімнен шықты. Әрі ЦСКА клубының да бізге үлкен құрметпен қарайтындықтары сезілген талпыныстары да ұнады. Бізге деңгейімізді мейілінше көтере түсу үшін барлық күш-жігерімізді салу керек. Бәріңізді келе жатқан Жаңа жыл мерекесімен құттықтаймын!


«Астана» келесі ойынын Жаңа жыл мерекелерінен кейін, 6 қаңтар күні өз алаңында өткізіп, ВТБ Бірыңғай лигасы аясында «Нижний Новгород» клубын қабылдайды. 

Қарсылас жайлы мәлімет

Құлылған жылы: 1923 Клубтық түстері: қызыл, көк
Мемлекет: Ресей Арена: ӘСК ЦСКА
Қала: Мәскеу Сайт: www.cskabasket.com

Сипаттамасы

ЦСКА – Ресейдің ерлер арасындағы баскетбол клубы, Мәскеу қаласынан.

Жетістіктері:
  • КСРО чемпионы − 1945, 1960-1962, 1964-1966, 1969-1974, 1976-1984, 1988, 1990
  • Ресей чемпионы – 1992-2000, 2003-2015
  • КСРО кубогының жеңімпазы − 1972, 1973, 1982
  • Ресей кубогының жеңімпазы – 2005-2007
  • Еуропа чемпиондары кубогының жеңімпазы − 1960/1961, 1962/1963, 1968/1969, 1970/1971
  • Еуролига чемпионы − 2005/06, 2007/08, 2015/16 
  • NEBL чемпионы − 1999/2000. 
  • ВТБ Бірыңғай лигасының чемпионы − 2009/2010, 2011/2012, 2012/2013, 2013/2014, 2014/2015, 2015/2016, 2016/2017
  • ВТБ Бірыңғай лигасының күміс жүлдегері − 2010/2011

Команданың жалпы суреті

ЦСКА (МСК)