ВТБ Бірыңғай лигасы 2017/2018
Химки
Химки
ВТБ Бірыңғай лигасы, Тұрақты біріншілік
30.10.2017, 22:30 Дс
Арена: БЦМО (Химки)
vs.
Ойын нөмірі: RS-24
Астана
Астана

Қарсылас жайлы мәлімет

Құлылған жылы: 1997 Клубтық түстері: сары, көк
Мемлекет: Ресей Арена: БО «Химки»
Қала: Химки Сайт: bckhimki.ru

Сипаттамасы

«Химки» – ресейдің ерлер арасындағы баскетбол клубы, Мәскеу облысынан.

«Химки» баскетбол клубы 1997 жылы 5 қаңтарда құрылған.

1997/1998 жылдар маусымында ұжым Ресейдің бірінші лигасында алғаш рет додаға түсіп, бірінші орынға ие болды.

1998/1999 жылдар маусымында Жоғары лигада өнер көрсетіп, доп додасы аяқталмай бірінші орынға ие болды да, А Суперлигасында бақ сынау құқығына қол жеткізді.

1999/2000 жылдар маусымында химкиліктер Ресейдің үздік 10 клубы сапына ілігіп, Еуропадағы Корач кубогына жолдама алды. Онда өз тобында Түркия, Югославия және Болгария чемпионаттарының көшбасшыларынан басым түсті.

Келесі екі маусымда «Химки» өзінің қалыптаса бастау жолында тағы бір саты жоғарылап, екі рет Ресей чемпионатында жетінші орынға ие болды. Әрі Еуропадағы Корач кубогының плей-офф кезеңіне шығуға бір қадам жетпей тоқтады.

2002/2003 жылдар маусымында Мәскеу іргесінен шыққан команда Ресей баскетболының шыңына қарай қарыштап қадам басып, төртінші орынға ие болды. «Химки» БК осы маусымда Ресей чемпионы және Еуролиганың «Төртеу финалы» додасына қатысқан ЦСКА КБК азулы команда алаңында ұтқан Еуропадағы жалғыз клуб болып шықты. 

2003/2004 жылдар маусымында «Химки» Ресей Суперлигасының көшбасшылары арасына жайғасып, яғни бесінші орынға ие болып, өз елінің кубогында «Төртеу финалына» қатысты.

2004/2005 жылдар маусымында химкиліктер EuroChallenge кубогында бақ сынады. Команда плей-офф сатысына шығып қана қойған жоқ, осы доданың «Төртеу финалында» жүлделі орынға сына қағып, мәртебесі жоғары құрлықтық турнирде үшінші болды.

2005/2006 жылдар маусымында химкиліктер жыл сайынғы чемпионатта 3-орынға ие болып, плей-офф сатысында финалға дейін жетті, финалда ЦСКА-дан ұтылды. Ал EuroChallenge-2005/06 кубогы финалында «Химки» Испанияның «Ховентут» клубынан жеңілді. 2006 жылы 7 қазанда «Химки» ҰБА (НБА) клубы «Лос-Анджелес Клипперс» ұжымымен жолдастық кездесу өткізіп, 91:98 есебімен ұтылып қалды.

2006/2007 жылдар маусымында «Химки» Ресей чемпионатының қола жүлдесін жеңіп алды.

2007/2008 жылдар маусымында «Химки» екі жыл бұрынғы жетістігін қайталап, Ресей чемпионатының күміс жүлдесін жеңіп алды. Бірақ бұл «Химкидің» сол маусымдағы ең басты жетістігі болған жоқ. Кестутис Кемзурдің жетекшілігімен «Химки» Ресей кубогының финалында ЦСКА клубынан айласын асырды – 85:67. Сөйтіп, клуб тарихында алғаш рет өз елінің кубогын жеңіп алды.

2008 жылдың желтоқсан айында командаға Италияның танымал маманы Серджио Скариоло бас бапкер болып бекітілді.
 
2008/2009 жылдар маусымында тағы да Ресей чемпионатының күміс жүлдегері атанды. Финалда тағы да ЦСКА командасына есе жіберіп қойды.

2009/2010 жылдар маусымында «Химки» алғаш рет Еуролига додасына қатысты. Бірінші кезеңінде D тобына түсіп, қарсыластары «Реал» (Мадрид), «Панатинаикос» (Афины), «Проком» (Польша), «Милан» және «Ольденбург» (Германия) клубтары болды. «Химки» осы топта үшінші орынға ие болып, 10 ойынның 6-ауында жеңіске жетіп, Top-16 сатысына шықты. Ал үздіктер арасындағы додада «Олимпиакос», «Баскони», «Цибона» клубтарымен бірге H тобына түсті. «Химки» соңғы турға дейін ширек финалға шығу үшін «Басконимен» тайталасты. Бірақ «Химкидің» ұпайларының (доптарының) айырмасы кем түсіп, әрі қарай «Баскони» клубы шықты. Ресей чемпионатында химкиліктер финалға дейін жетіп, үш ойынның қорытындысы бойынша ЦСКА командасынан ұтылып қалды.

2010/2011 жылдар маусымы. Клубта екі жыл толық жұмыс істеген сары-көк жейделілердің италиялық бас бапкері 2010 жылдың желтоқсан айында орнынан босатылды. «Химки» БК бас бапкері міндетін атқарушы болып, Олег Владимирович Мелещенко тағайындалды. Алайда 2011 жылы 12 наурыз күні Мәскеудің әскери клубынан ұтылып қалған кезекті жеңілістерінен кейін Мелещенко қызметінен босатылды. Ал бас бапкер болып, есімі көпшілікке мәлім Литва маманы Римас Куртинайтис тағайындалды.
 
2011 жылы 23 сәуірде «Химки» Римас Куртинайтистің жетекшілік етуімен алғашқы ерен жетістігіне қол жеткізіп, ВТБ Бірңғай лигасының жеңімпазы атанды. Финада ЦСКА командасын тізе бүктірді.
 
2011/2012 жылдар маусымында химкиліктер КБЛ екінші орынға ие болып, финалда тек ЦСКА баскетболшыларынан ұтылды. Осы маусымда Еурокубок иегері атанды. Финалда Испанияның «Валенсиясын» 77:68 есебімен жеңді. Осылай, «Химки» келесі маусымда Еуролига додасының топтық кезеңінде бақ сынау мүмкіндігіне ие болды.

2012/2013 жылдар маусымында «Химки» Еурокубок жеңімпазы ретінде Еуролигаға оралды. Евролиганың жыл сайынғы чемпионатында химкиліктер алты рет жеңіске жетіп, төрт рет ұтылып қалып, өз тобында екінші орынға ие болды. Алға тек Мадридтің «Реал» клубы шығып кетті. Top-16 додасында «Химкиге» плей-офф сатысына шығу үшін бар болғаны бір жеңіс қана жетпеді. ВТБ Бірыңғай лигасында Мәскеу іргесінен шыққан команда жартылай финалға дейін жетті. Алайда үш жеңіске созылған текетіресте бес ойын өткізіп, Мәскеудің ЦСКА-сына жол беріп алды. Ал қарсыластары сол маусымда чемпион болып тынды.

2013/2014 жылдар маусымы. ВТБ Бірыңғай лигасының жартылай финалына дейін жеткендіктен «Химки» БК Еуролига додасының іріктеу сынына қатысу құқығына ие болған. Енді Еуропадағы деңгейі бәрінен жоғары клубтық баскетбол додасының жолдамасына таласу керек болатын. Команданың алдына іріктеу сынынан өтіп, Еуролиганың жыл сайынғы чемпионатына шығу мақсаты қойылған болатын. Бірақ химкиліктер бірінші електік сатыда-ақ жеңіліске ұшырап, Бельгияның «Остенде» клубынан ұтылып қалды. «Химки» қайтадан Еуропа кубогына барды. Онда 1/8-финалына дейін жетіп, екі ойынның қорытындысы бойынша Испанияның «Валенсиясына» жол берді. Ресей кубогының 1/4 финалында Суперлига командасын, яғни Саратовтың «Автодорын» ұтып, сары-көк жейделілер жартылай финалда Қазанның УНИКС клубымен кездесті. Бірақ екі ойынның қорытындысы бойынша жеңіліске ұшырады. ВТБ Бірыңғай лигасында «Химки» жыл сайынғы чемпионаттың жеңімпазы ретінде барлық кезеңде шешуші матчтарды өз алаңында өткізетін басымдыққа ие болған. Алайда үш жеңіске созылған 1/4 финалында-ақ жеңілістен көз ашпай, «Нижний Новгород» клубына азуы батпады.

Маусым тым сәтсіз аяқталса да, клуб басшылары бас бапкер Римас Куртинайтиске қолдау көрсетіп, әрі сенім артып, онымен екі жылдық жаңа келісімшартқа отырды. Командаға ВТБ Бірыңғай лигасының финалына шығып, Еурокубокта топ жару мақсат тұтылды.

2014/2015 жылдар маусымы. «Химки» Еуропа кубогының топтық кезеңінен, сондай-ақ плей-офф сатысынан қиналмай өтті. Ал финалда Мәскеу түбінің командасы Испанияның «Гран-Канария» клубымен кездесіп, екі ойынның қорытындысы бойынша айқын басымдықпен жеңіске жетті. Еуропа кубогының жеңімпазы атанып, Еуролига-2015/2016 додасының жолдамасына қол жеткізді. ВТБ Бірыңғай лигасының жыл сайынғы чемпионатында ЦСКА-ны алға жіберіп алып, екінші орынға ие болды. Ал плей-офф сатысында Саратовтың «Автодоры» мен Краснодарскінің «Локомотив-Кубань» клубтарын ұтып, финалға дейін жетті. Үш жеңіске дейін созылған финалдық додада химкиліктер Мәскеудің әскери клубынан ұтылып, қорытынды есепте екінші орынға ие болды.

Жетістіктері:
  • Ресей чемпионатының күміс жүлдегері – 2006, 2008-2013, 2015
  • Ресей чемпионатының қола жүлдегері – 2007
  • Ресей кубогының жеңімпазы – 2008
  • ВТБ Бірыңғай лигасының чемпионы – 2010/2011
  • ВТБ Бірыңғай лигасының күміс жүлдегері – 2014/2015
  • ULEB Еуропа кубогының финалына шыққан – 2008/2009
  • Еуропа кубогының финалына шыққан – 2005/2006
  • FIBA Еуролигасы «Төртеу финалында» додаға түскен – 2004/2005
  • ВТБ Бірыңғай лигасы «Төртеу финалында» додаға түскен – 2009/2010
  • Еуропа кубогының жеңімпазы – 2011/2012, 2014/2015