ВТБ Бірыңғай лигасы 2017/2018
УНИКС
Казань
ВТБ Бірыңғай лигасы, Тұрақты біріншілік
15.04.2018, 21:00 Жс
Арена: Баскет Холл (Казань)
90:75
Негізгі уақыт
23:27 18:26 25:14 24:8
Ойын нөмірі: RS-132
Көрермен: 3863
Астана
Астана

Қазан «Астананы» қабылдайды

14.04.2018, 12:00    Просмотров: 90
Источник: Баспасөз қызметі
Автор: Альмира Шахаева
Ертең, 15 сәуірде, елорда баскетбол клубы ВТБ Бірыңғай лигасы аясындағы кезекті ойынын түзде өткізіп, Қазан қаласының «УНИКС» клубымен кездеседі.
 
УНИКС – Ресейдің ерлер арасындағы кәсіпқой баскетбол клубы, Қазан қаласынан.
 
Жетістіктері:
  • Ресей чемпионатының күміс жүлдегері − 2001, 2002, 2004, 2007. 
  • Ресей чемпионатының қола жүлдегері − 2000, 2003, 2005, 2009−2011, 2013/14. 
  • Ресей кубогының жеңімпазы − 2003, 2009, 2014. 
  • FIBAЕвролигачемпионы − 2003/04. 
  • Еуропа кубогы жеңімпазы − 2010/11. 
  • Еуропа кубогының финалына шыққан – 2013/14 
  • NEBL чемпионы − 2002/03. 
  • ВТБ Бірыңғай лигасының күміс жүлдегері − 2009/10, 2011/12, 2015/16 
  • ВТБ Бірыңғай лигасының қола жүлдегері − 2010/11
 
Өткен кездесулер хроникасы:
Қазан баскетбол клубы ВТБ Бірыңғай лигасында тоғызыншы маусымын өткізіп жүр. Осы уақыт ішінде «УНИКС» ВТБ Бірыңғай лигасының үш дүркін күміс жүлдегері атанды. Сонымен қатар, осы турнирдің қола жүлдесін де иемденді. «Астана» клубымен өткізген екеуара ойындарына тоқталар болсақ, екі команда алаңда 11 рет кездесті. Елорда клубы бір-ақ рет, 2014/2015 жылдар маусымындағы өз алаңында өткен матчта ғана, 87:67 есебімен қазандықтарға қайратын өткізе алды. Биыл екі команда Астанада кездесіп, елорда клубы тек овертаймда қазандықтарға 73:78 есебімен есе жіберіп алған.

Қазіргі жағдай:
Қазан клубының жаттықтырушылар штабын грек маманы Димитрис Прифтис басқарады. Команда сапында деңгейі жоғары ойыншылар көп. Мәселен, Габон елінің орталық шептегі ойыншысы – Стефан Ласме орта есеппен бір ойында 15 ұпайдан еншілеп жүр. Ал қорғаушы Джамар Смит команда қоржынына әр ойында 14 ұпайдан салып келеді. Испания құрамасының ойыншысы Хуакин Коломның Татарстан жанкүйерлерін қуанышқа бөлеп жүргеніне үш маусым болды. Дәл осы ойыншы Қазан клубымен Ресей чемпионатының және ВТБ Бірыңғай лигасының күміс жүлдегері атанған.

Турнир кестесі:
«УНИКС» баскетбол клубы ВТБ Бірыңғай лигасының турнир кестесінде екінші орынды иемденіп тұр. Көрсеткіші – 17 жеңіс және 2 жеңіліс. Ал «Астана» баскетболшылары 6 жеңіспен 11-орынға орналасқан. 

«Астана» БК бас бапкері Михаил Карпенко:
– УНИКС – қандай турнирге қатысса да, үнемі ең жоғарғы орындарға таласып жүргенкоманда. Биылғы маусымда УНИКС көсіле шауып, нәтижелі ойын үлгісін көрсетіп жүр. ВТБ лигасында екі-ақ рет ұтылды. Команда маусым аралығында нақты мақсатына сай жасақталды, мен олардың алға қойған мақсаты Еуролигаға ілігу еді деп ойлаймын. Тиісінше, бұл команданың бюджеті мен құрамындағы ойыншылары сол межеге қол жеткізерліктей еді. Өкінішке қарай, Еурокубок додасында сүрініп, финалдық кезеңінде бас бәйгеге таласа алмайтын болды. Сондықтан, қазір барлық күш-жігерін ВТБ лигасында жоғары нәтиже көрсетуге жұмылдырып отыр. Келесі маусымда Еуролигада ойнау үшін бұл командаға биыл бірінші орын алу керек немесе финалда ЦСКА баскетболшыларымен додаға түсу қажет. Осындай жоғары орындарды мақсат тұтып отырған командаға әр ойын маңызды екенін жақсы түсінеміз, олар ешбір ойында босаңсуға жол бермей, өз алаңында тек жеңіске жетуді ойлайды.
 
Әйткенмен, біз өз алаңымызда УНИКС клубына дес бермей, қайсарлық таныттық. Жігіттеріміз бұл командамен де тайталасуға болатынын біледі және сенеді. УНИКС – ойын өрнегі мейілінше үйлескен ұжым. Негізінен, алты легионері алға сүйрейді, бұларға тәжірибесі мол ресейлік ойыншы Антон Понкрашовты қосуға болады. Сонымен қатар, бірнеше ресейлік ойыншысы нақты өз міндеттері бойынша оларды ауыстырып отырады. Атап айтқанда, олар – Владислав Трушкин, Евгений Колесников,Андрей Кощеев. Мұның бәрін біріктіргенде, УНИКС  клубын өте азулы команда болып қалыптасты. Шабуылы әр қилы және қорғаныста өте сенімді ойнайды. Бізге оңай болмайды. Бірақ тағы да қайталаймын, егер бізге осы ойынға құрған жоспарымызды орындасақ және алаңда барлық күш-жігерімізді 100% жұмсасақ, онда жеңіске жету үшін түзде де УНИКС клубымен тайталасуға болады. Бізге шегінер жол жоқ, плей-оффқа ілігуге тырысамыз, сондықтан қалған ойындардың бәрі де біз үшін өте мағызды және соңғы мүмкіндік сияқты болады.
 
Қайда, қашан, нешеде?
Арена: Қазан, «Баскет-Холл» аренасы
Уақыт: 21.00 Астана уақыты бойынша
Трансляция: ВТБ Бірыңғай лигасының сайты, «Астана» ПБК сайты.

«Астана» түзде УНИКС клубынан ұтылды

16.04.2018, 09:00    Просмотров: 129
Источник: Баспасөз қызметі
Автор: Альмира Шахаева
Түздегі ойындары бір-біріне қабаттасып кетсе де, елорда баскетболшылары Қазанға бір ғана мақсатпен аттанды – ВТБ лигасындағы бірнеше жеңілістен соң намысты қолдан бермей, сенімді ақтау. Бірақ арман жеткізбеді, әйтсе де «Астана» алаң иелерін қара терге түсірді.
 
Бірінші минуттан бастап астаналықтар атойлап алға шапты. Есепті Қазан баскетболшылары ашқанымен, «Астана» көп күттірген жоқ. Ике Удано команда қоржынына 2 ұпай салды. Алаң иелері қуып жетуге асықпай, емін-еркін ойнады. Ал бірінші кезең оларға елеусіз жылыстап, ысқырық та шалынды. Таблодағы есеп 23:27 болып, «Астана» алда тұрды. Астаналықтар екінші онминуттықты да қарсыласының жолын бөгеумен бастап, ширақ қимылдады. Бұл кезеңнің орта тұсында қонақтар біршама алға ұзап кетті – дәлірек айтқанда, +10 ұпай. Бұл, әрине, алаң иелеріне мүлде ұнаған жоқ, УНИКС ойынның өрбу барысын өзгертуге тырысты. Кезеңнің аяғына қарай Қазань баскетболшылары есепті сәл де болса, қысқартқан болды. Десек те, үлкен үзіліске шыққанда, «Астана» басым болды – 41:53.        

Матчтың үшінші ширек бөлігінде де астаналықтар қарқындарын үдете түсті, ал алаң иелерінің жүйкелері сыр бере бастады: бұл кезеңнің басынан аяғына дейін қонақтар 10 ұпай айырмасын сақтап тұрды. Бірақ соңына қарай алаң иелері есепті мейілінше қысқартты. 66:67 – үшінші кезеңнің қорытындысы. Соңғы кезең шектен тыс шиеленісті болды. УНИКС қамшыны басты, үш ұпайлық соққыларды қарша боратты. Ал елорда клубы болса, өкінішке қарай, кешірілмес қателіктер жіберіп, білгендерінен жаңыла бастады, әрі соның сазайын тартты да. Тартысты өткен кездесуде «Астана» УНИКСке 90:75 есебімен есе жіберіп алды. 

Матчтың үздік ойыншысы Джастин Картер болды, оның еншісінде – 23 ұпай + 5 рет доп қақшып алды, Малкольм Грант команда қоржынына 11 ұпай салды, Ике Удано – 10 ұпай + 11 рет доп қақшып алды.
 

«Астананың» бас бапкері Михаил Карпенко: 
— Біз ойынның бірінші жартысын әжептәуір жақсы өткіздік, әрі шабуылда да ширақ қимылдадық. УНИКСке 50 ұпайдан артық салу – бұл өте жақсы көрсеткіш, әрі біз қорғаныста да сауатты ойнадық. Қазан баскетболшылары небәрі төрт айып соққысын орындады. Яғни біз бәріне үлгеріп отырдық. Бір ғана кінәратымыз, біз оны үзіліс кезінде, киім ауыстыратын бөлмеде да атап өттік: қарсыласымыз доптан айырылып қалғанда, аяусыз жазалап отырды. Ойынның бірінші жартысында біз алты рет доптан айырылып қалдық, ал УНИКС мұны қалт жібермей, 11 ұпай салды. Өкінішке қарай, бұл үрдіс матчтың екінші жартысында да жалғаса берді. Біз ақылға қонбайтын жерде жаза басып, доптан айырылып қалып отырдық. Ал УНИКС бізді үздіксіз жазалап отырды. Сайып келгенде, осындай қателіктеріміздің саны 28 болып шықты. Осынша рет доптан айырылып қалып, ал қарсыласың мұның бәрін қалт жібермей, жазалап отырса, жеңіске жету мүмкін емес. Қорғаныста 5-ке 5 жаман ойнаған жоқпыз, жоспарға сай қимылдап, мейілінше бәсекелестік таныттық. Бірақ біз қарсыласымыздың оп-оңай ұпай олжалап отыруларына көп мүмкіндік беріп қойдық. УНИКС клубын жеңісімен құттықтаймын. Біз үшін бұл – баға жетпес тәжірибе. Әлі үш ойынымыз бар, осы матчтарда жағдайымызды түзеуге және плей-оффқа шығуға болатын мүмкіндік бар.

«Астана» ВТБ Бірыңғай лигасы аясындағы келесі кездесуін өз алаңында өткізеді. 22 сәуір күні елорда баскетболшылары Эстонияның «Калев» баскетбол клубын қабылдайды.

Қарсылас жайлы мәлімет

Құлылған жылы: 1991 Клубтық түстері: ақ, жасыл
Мемлекет: Ресей Арена: Баскет Холл
Қала: Казань Сайт: www.unics.ru

Сипаттамасы

УНИКС – Ресейдің ерлер арасындағы кәсіпқой баскетбол клубы, Қазан қаласынан.
 
Жетістіктері:
  • Ресей чемпионатының күміс жүлдегері − 2001, 2002, 2004, 2007
  • Ресей чемпионатының қола жүлдегері − 2000, 2003, 2005, 2009−2011, 2013/14
  • Ресей кубогының жеңімпазы − 2003, 2009, 2014
  • FIBA Евролига чемпионы − 2003/04
  • Еуропа кубогы жеңімпазы − 2010/11
  • Еуропа кубогының финалына шыққан – 2013/14 
  • NEBL чемпионы − 2002/03
  • ВТБ Бірыңғай лигасының күміс жүлдегері − 2009/10, 2011/12, 2015/16 
  • ВТБ Бірыңғай лигасының қола жүлдегері − 2010/11

Команданың жалпы суреті

УНИКС