ВТБ Бірыңғай лигасы 2017/2018
Локомотив Кубань
Краснодар
ВТБ Бірыңғай лигасы, Тұрақты біріншілік
01.04.2018, 18:30 Жс
Арена: Баскет Холл (Краснодар)
79:78
Негізгі уақыт
19:12 19:18 24:18 17:30
Ойын нөмірі: RS-121
Көрермен: 4877
Астана
Астана

«Астана» Краснодарда додаға түседі

30.03.2018, 18:00    Просмотров: 189
Источник: Баспасөз қызметі
Автор: Альмира Шахаева
Алдағы жексенбіде, 1 сәуір күні, елорда баскетбол клубы ВТБ Бірыңғай лигасы аясындағы кезекті кездесуін түзде өткізіп, Краснодар қаласының «Локомотив-Кубань» баскетбол клубымен додаға түседі.
 
«Локомотив-Кубань» – Ресейдің ерлер арасындағы кәсіпқой баскетбол клубы, Краснодар қаласынан, 1946 жылы құрылған.

 
Жетістіктері:
  • Еуропа кубогының жеңімпазы – 2012/2013
  • FIBA кубогының финалына шыққан – 2004/2005
  • EuroChallenge кубогының финалына шыққан – 2010/2011
  • Ресей чемпионатының қола жүлдегері – 2012, 2015
  • ВТБ Бірыңғай лигасының күміс жүлдегері – 2012/2013
  • Ресей кубогының күміс жүлдегері – 2014
 
Өткен кездесулер хроникасы:
Краснодар баскетбол клубы ВТБ Бірыңғай лигасында 2011 жылдан бері өнер көрсетіп келеді. Осы уақыт ішінде «Локо» ВТБ Бірыңғай лигасының күміс жүлдегері атанып (2012/2013), 2014/2015 жылдар маусымында қола жүлдеге ие болды. «Астанамен» өткізген екеуара кездесулеріне тоқталар болсақ, екі команда жеті рет кездесті. Оның тек біреуінде ғана «Астана» краснодарлықтардан басым түсті. Атап айтқанда, 2014/2015 жылдар маусымындағы өз алаңында өткен матчта «Локомотив» клубын 81:70 есебімен тізе бүктірді.
 
Қазіргі жағдай:
Соңғы екі маусымда команданы көпшілікке танымал серб маманы Саша Обрадович жаттықтырып жүр. Команда көшбасшыларының бірі, америкалық шабуылшы Марди Коллинз де өз міндетін абыроймен атқарып, биылғы маусымда статистикалық көрсеткіштерін едәуір артыра түсті. Биылғы маусымда команда сапына «әскери» Дмитрий Кулагин мен орталық шепте ойнайтын Фрэнк Элегар қосылған. Соңғысын Эстонияның «Калева» және Красноярскінің «Енисей» клубтарында ойнаған кезінен жақсы білеміз.

Турнир кестесі:
Краснодар командасы ВТБ Бірыңғай лигасының турнир кестесінде төртінші орынды иемденіп тұр. Еншісінде – 12 жеңіс, 5 жеңіліс. Ал «Астана» баскетболшылары 6 жеңіс, 12 жеңіліспен 9-орынға табан тіреп тұр.
 
«Астана» БК бас бапкері Михаил Карпенко:
– Біз түзде өте азулы командамен, яғни «Локомотив Кубань» клубымен кездесеміз. «Локо» биылғы маусымда өзіне өте сенімді, бұл команданың Еурокубок маусымын бастан-аяқ жеңіліссіз өткізуі де кездейсоқтық емес. 20 рет қатарынан жеңіске жетіп, рекорд орнатты. Краснодарлықтардан басқа ешбір команда Еуропада мұндай ерен жетістікке қол жектізген емес. «Локомотив» ВТБ лигасында да нәтижелі ойын өрнегін көрсетіп жүр. Қапелімде екі рет ұтылып қалғандарын есепке алмасақ, қалған ойындардың бәрін олар өте жоғары деңгейде өткізді. Краснодарлықтар өз алаңында жақсы ойнайды. Өйткені жанкүйерлерінің қолдауы – адам қызығарлықтай. Команда әбден шыңдалған, ойыншыларын ауыстырып отырады, бір-біріне пара-пар екі бестігі бар деуге де болады. Қорғаныста қарсыластарын аттап бастырмайды, қарсыласының шабуылын осылай, қадам бастырмай бұзуға тырысады. Қарсыласының ойыншыларын тұсаулап ұстап, иық тіресе ойнайды. Саша Обрадовичтің командасы темірдей тәртіпке көп көңіл бөледі, шабуылды әрқилы өрбіте алады. Себебі ойыншыларының бәрі – жан-жақты жігіттер. Алаңға шыққан ойыншыларының бәрі дерлік қауіп төндіре алады. Десек те, мен олардың үш ойыншысын көшбасшы ретінде бөле-жара атар едім. Олар – команда капитаны Марди Коллинз, жақында өткен Еурокубок аясындағы жартылай финалдық ойындардың MVP Дмитрий Кулагин және Френк Элегар. Соңғысы қорғаныста бәрін бағып, серіктерін демеп-жебеп, ағаттықтарын түзеп, қарсы команданың торшеңбері түбінде ширақ қимылдайды. Сонымен қатар, командаға жақында ғана Литва шабуылшысы Йонас Мачюлис қосылды. Ол – өз елінің ұлттық құрамасы және Еуролигадағы ең үздік командалар сапында әбден ысылған, тәжірибесі мол ойыншы. Енді Краснодар командасына жеңіс рухын сіңіре түсуі керек. Бізге оңай болмайды, бірақ біз дүлей додаға дайынбыз, қарсыласымыздың алаңында өзіміздің барлық қабілетімізді көрсетуге тырысамыз.      
 
Қайда, қашан, нешеде?
Арена: Краснодар қаласы, «Баскет-холл» аренасы
Уақыт: 18.30 Астана уақытымен
Трансляция: ВТБ Бірыңғай лигасының сайты, «Астана» БК сайты, «QazSport» телеарнасы.

«Астана» ВТБ лигасының күміс жүлдегерінен ұтылды

01.04.2018, 23:00    Просмотров: 148
Источник: Баспасөз қызметі
Автор: Альмира Шахаева
Елорда баскетбол клубы түзде Краснодардың «Локомотив-Кубань» деп аталатын клубынан ұтылып қалды. Есеп – 78:79. Не сиқыры бар екенін, осы сандар екінші рет «Астананың» сырт алаңда бағын байлады. «Нижний Новгород» клубымен өткен ойын да тура осындай есеппен аяқталған болатын.

Краснодар командасы Еуропадағы үздік клубтардың бірі болып саналады. Сондықтан бұл ойынның оңай болмасы бәріне белгілі еді. Әйтсе де, Михаил Карпенконың командасы қарсыласының атақ-даңқына қарамай, өрнекті ойын үлгісін көрсетіп, алаң иелерін әбден әбігерге түсірді.
  
Ойынның басынан бастап, «Астана» жылдам және жоғары қарқында ойнауға иек артты. Негізі, бұдан нәтиже болды да. Бұған жауап ретінде, алаң иелері асықпауға тырысты және мейілінше байсалдылық танытты. «Астананың» екінші үміт артқан тактикасы алыстан доп лақтыру болды. Алайда бірінші үш ұпайға тек алтыншы мүмкіндіктерінде қол жеткізді. Осыдан кейін бе, алаң иелері Қазақстаннан келген қонақтарының мергендік қабілетттерін лайықты түрде бағаламады. Ақыры «Астана» 29 соққысының 13 дөп түсірді.

Краснодардағы тартысты ойынның екінші бөлігі шектен тыс шиеленісті өтті.  Оңғы онминуттықта «Астана» краснодарлықтардың торшеңберін алыстан нысанаға алуға көшті. Әрі адам сүйсінерлік мергендік танытып, 10 соққының 7-еуін дәл түсірді, тіпті алтауын қатарынан салды. Десек те, алаң иелері ойын тізгінін уыстарынан шығарған жоқ. Кездесу тағдырын соңғы 8 секунд шешті. Алаң иелері барлық күш-жігерлерін салып, соңғы күштерін қорғанысқа жұмылдырды. Ойын аяқталғандығын білдіретін дабыл қағылғанда, 79:78 есебімен «Локомотив-Кубань» алда тұрды.     

Бұл ойында ең көп ұпай еншілеген Джастин Картер болды, ол команда қоржынына 26 ұпай салды. Малкольм Гранттың еншісінде – 19 ұпай.   

«Астана» клубының бас бапкері Михаил Карпенко: 
— Бүгін біздің ойымыздың бәрі жүзеге аспады. Біз «Локоның» иық қағыса, табан тіресе ойнайтындығына дайын болдық. Олар тура осылай ойнап, ойларын іске асырды. Біз болсақ, ойыншыларымыздың жекелей шеберліктерінің арқасында ұпай еншілеп отырдық. Матчтың бірінші жартысында көп қауіп төндіре алмадық, бірақ әрі маңыздысы қарсыласымыз 15-16 ұпай алға озып кетсе де, айылымызды жиған жоқпыз. Бізге үш рет қорғаныста сәтті ойнап, үш рет нәтижелі шабуыл ұйымдастыру қажет еді. Сонда матч соңында тайталасуға мүмкіндік пайда болар еді. Біз өрнекті ойын үлгісін көрсетіп, допты жылдам зыр қаққызып, сұрмергендерімізге мүмкіндік жасап бере алдық. Матч соңында доп бізде болды, бірақ жеңісті жұлып ала алмадық. Мен бұл ойында жеңіске жетуге болатын еді деп ойлаймын.

«Астана» келесі ойынын 8 сәуір күні түзде, Красноярскінің «Енисей» клубымен өткізеді.

«Астана» келесі ойындарын өз алаңында өткізеді. 4 және 5 сәуір күндері елордалықтар «Каспий» баскетбол клубын қабылдап, ерлер арасындағы Қазақстан чемпионатының Ұлттық лигадағы 1/2 финалдық ойындарын өткізеді.

ВТБ Бірыңғай лигасы аясындағы келесі ойынын да «Астана» түзде өткізіп, 8 сәуір күні елорда баскетболшылары Красноярскіге барып, жергілікті «Енисей» баскетбол клубымен додаға түседі.

Қарсылас жайлы мәлімет

Құлылған жылы: 1946 Клубтық түстері: жасыл, қызыл
Мемлекет: Ресей Арена: Баскет Холл
Қала: Краснодар Сайт: lokobasket.com

Сипаттамасы

«Локомотив-Кубань» – ресейдің кәсіби ерлер баскетбол клубы, Краснодар қаласынан, 1946 жылы құрылған.

Жетістіктері:
  • Еуропа кубогының жеңімпазы – 2012/2013
  • Ресей кубогының иегегері – 2000, 2018
  • РТЖ халықаралық кубогының жеңімпазы – 2007, 2008
  • Еуропа кубогының финалына шыққан – 2017/2018
  • FIBA кубогының финалына шыққан – 2004/2005
  • EuroChallenge кубогының финалына шыққан – 2010/2011
  • Корач кубогының финалына шыққан – 2001/2002
  • Ресей кубогының финалына шыққан – 2013/2014
  • Еуролиганың қола жүлдегері – 2015/2016
  • ВТБ Бірыңғай лигасының күміс жүлдегері – 2012/2013
  • ВТБ Бірыңғай лигасының қола жүлдегері – 2014/2015
  • Ресей чемпионатының қола жүлдегері – 2000/2001, 2001/2002, 2011/2012, 2014/2015

Команданың жалпы суреті

Локомотив Кубань