ВТБ Бірыңғай лигасы 2016/2017
ВЭФ
Рига
ВТБ Бірыңғай Лигасы, Тұрақты біріншілік
18.03.2017, 21:00 Сн
Арена: Olimpic Sport Center (Рига)
73:62
Негізгі уақыт
14:13 11:11 18:17 30:21
Ойын нөмірі: RS/125
Көрермен: 800
Астана
Астана

«Астана» Ригаға аттанды

17.03.2017, 10:00    Просмотров: 717
Источник: Баспасөз қызметі
Автор: Альмира Шахаева
Алдағы сенбіде, 18 наурыз күні «Астана» баскетбол клубы ВТБ Бірыңғай лигасы аясындағы кезекті кездесуін өткізіп, түзде Риганың «ВЭФ» командасымен додаға түседі.

Қазақстан кубогын жеңіп алғаннан кейін команданың көңіл-күйі көтеріліп, дайындыққа құлшына кірісті. Астанаға ұшып келген соң екі күн үйде жаттығып, қайтадан жолға шықты.

Рига командасы «Астананың» өкшесін басып келеді. 8 рет жеңіске жетіп, 9 рет жеңілістің кермек дәмін татып, турнир кестесінің 8-ші сатысында тұр. Латыш клубымен біздің команда биылғы маусымда кездескен. Өз жерімізде ысқырығы безілдеген матч шектен тыс тартысты өтіп, 66:64 есебімен астаналықтар жеңіске жеткен болатын. Алдағы ойын екі команда үшін де маңызды, «Астанаға» да жеңіс қажет, кем дегенде 7-орынға жайғасу, тіпті бір саты жоғарылай түсу үшін бұл ойынның маңызы зор. 
   
Латыш елі чемпионының құрамы қарымды, америкалық қас шеберлермен және жергілікті ойыншылармен жасақталған. Бұл команданың сапында Латвия құрамасының ғана емес, Еуропаға танымал баскетболшылар да ойнайды. «ВЭФ» командасының қорғаушысы Янис Блумсті біздің команда өте жақсы біледі. Сұрмерген қорғаушы 2013/2014 жылдар маусымында Қазақстан клубының намысын қорғап, бірнеше рет команданы жеңіске жетелеген.

«Астана» ПБК бас бапкері Илиас Папатеодору алдағы ойын туралы өз пікірін бүкпесіз айтты:
– Өте шиеленісті “шайқас” болады. «ВЭФ» – өте азулы, жұдырықтай жұмылған команда. Әсіресе, қорғаныста мұқият ойнайды. Егер осы ойында жеңіске жеткіміз келсе, онда бізге шектен тыс сақ болып, аянбай ойнап, жанкештілік таныту керек.

Естеріңізге сала кетейік, бұл ойын 18 наурыз күні Рига қаласында өтеді. Матч трансляциясын сіздер тікелей эфирде ВТБ бірыңғай лигасы сайтынан 21:00-де, сондай-ақ 19 наурыз күні 17:35-те «KazSport» телеарнасынан көре аласыздар.

ВЭФ өз алаңында «Астананың» алдын орап кетті

19.03.2017, 13:00    Просмотров: 1047
Источник: Баспасөз қызметі
Автор:
Латвияның ВЭФ командасы өз алаңында қазақтың «Астанасынан» басым түсті – 65:57 (14:13, 11:11, 18:17, 22:16).

Турнир кестесінде қатар орналасқан, плей-офф додасына шығатын үздік сегіздікті тұйықтап тұрған, екі команда арасындағы кездесу шектен тыс шиеленісті өтті. Ойының соңғы ширек бөлігі басталғанда ВЭФ екі ұпай айырмасымен ғана алда тұрды. Бірақ ең маңызды сәтте латыштардың сұрмергендері белсенділік танытты. Әуелі Янис Блумс үш рет айып соққысын орындауға мүмкіндік алды, одан кейін Гинтс Антропс үш ұпайлық аймақтан екі рет оймақторды дәл көздеді. Олардың бұл қарқындарын Кристофер Ричард пен Арнас Лабуцкас іліп әкетіп, үш ұпайлық соққылармен жалғастырды. Осылай, ұпай айырмасы екі таңбалы санға жетті. Ал үш ұпайлық соққылар одан әрі “қарша борады” – Блумс допты тағы да екі рет дөп түсірді! «Астана» барын салып, тайталасып бақты, бірақ құралайды көзге атқан латыш мергендерін бәрібір тоқтата алмады. Басты бәсекелесін жеңген ВЭФ турнир кестесінде тек Қазақстан клубынан ғана емес, тіпті «Енисейден» де асып түсті.

Ең көп ұпай жинағандар:

ВЭФ: Янис Блумс (18 + 6 рет доп қақшып алды), Кристофер Ричард (15), Мартиньш Мейерс (9 + 10 рет доп қақшып алды).

«Астана»: Роберт Лоури (16), Родерик Одом (14), Иан Миллер (8 + 5 рет доп қақшып алды).

ВЭФ клубының бас бапкері, Янис Гайлитис:
— Жігіттеріме дән ризамын, олар бүгін жанештілік танытты. Соның арқасында доп қақшып алудан асып түстік, ал бұл өте маңызды еді. Қорғаныста сауатты ойнадық. Шабуылда бәрі де ойдағыдай болмады, бірақ ең керек кезінде мүлт кеткен жоқпыз. «Астананың» үздік ойыншылары жиі ескерту алып, оларды алмастыруға мәжбүр болған кездерін ұтымды пайдалана білдік. Соның арқасында соңғы кезеңді біз анағұрлым тың болдық, әрі қарқынымызды үдете алдық.

«Астана» ПБК бас бапкері, Илиас Папатеодору:
— Ойынның өте тартысты өтетіндігін білгенбіз, қарсыласымыздың қаншалықты қарымды екенін де білдік. Осыдан бір апта бұрын біз Қазақстан кубогы додасында сынға түстік, ал легионерлеріміз бұл ойындарға қатысқан жоқ, содан аз да болса, “суып” қалды. ВЭФ бүгін ең маңызды сәтте допты алыстан дөп түсіре білді. Олардың көшбасшылары Янис Блумс командасының жеңісіне сүбелі үлес қосты. Осылай боларын сезіп, біз де дайындалғанбыз, бірақ жауап бере алмадық. Енді төрт ойынымыз бар, осы матчтарда жеңіске жетуге тырысамыз.
 
«Астана» келесі ойындарын 22 және 23 наурыз күндері өз алаңында өткізіп, Қазақстан Ұлттық лигасы аясында «Атырау Барыстарымен» кездеседі.

Қарсылас жайлы мәлімет

Құрылған жылы: 1958 Клубтық түстері: ақ, қара
Мемлекет: Латвия Арена: «Арена Рига»
Қала: Рига Сайт: www.vefriga.com

Сипаттамасы

ВЭФ – Латвияның ерлер арасындағы кәсіпқой баскетбол клубы, Рига қаласынан, 1958 жылы құрылған.

Жетістіктері:
  • Латвия чемпионы − 2011, 2012, 2013, 2015, 2017
  • Латвия чемпионатының күміс жүлдегері –2010, 2014, 2016, 2018
  • Латвия чемпионатының қола жүлдегері –1960, 1966, 1991
  • Балтық лигасы кубогының қола жүлдегері – 2012
  • Латвия чемпионатының жартылай финалына шыққан – 2008, 2009

Команданың жалпы суреті

ВЭФ